Jeremia 9:21 - Ritonõpo Omiry: A Bíblia Sagrada na língua Aparai do Brasil

²¹ Omato sã kuorikyrykõ tomõse osenuhmatoh ae kytapyĩkõ taka, kutuisarykõ tapyĩ konõto taka tomõse; poetohti tonahkase osema tõ ae, nuasemãkõ roropa osepekahtoh tao.

Jeremia 9:21 ပူးပေါင်းရင်းမြစ်များ

2 Koronika 36:17

Naeroro Papironia tuisary tonehpose eya toto poremãkatohme. Juta tõ nuasemãkõ totapase eya Ritonõpo Tapyĩ tao ro. Toto onypynanohpyra nexiase poetohti tomo te, nuasemãkomo, orutua komo te, nohpo tomo, kure pyra exiketomo te, kurãkomo, enara. Tokarose toto emero Ritonõpo a.

Izaja 40:30

Poetome ro exiketõ etaehnõko mã toto, apotũkehnõko; nuasemãkõ osetapãko, epukãko roropa mã toto.

Jeremia 15:7

Pata tõ po emero sero nono po kuematose kakoxi tyryrykane aka tiriiku emary samo, ipihpyry apiakatohme ipuhturu winoino. Kuenahkapoatose, ypoetory tomo, opoenõ etapase, popyra onyrirykõ onurumekara oexirykõke.

Jeremia 18:21

Yrome, seromaroro, Ritonõpo, ah mokaro poenõ norihno toto omise ehtoh ke te, etonatoh tao roropa. Ah mokaro nohpo tõ nio tõ norihno toto, ah ipoenõ roropa norihno toto. Ah mokaro orutua kõ tyrohsẽ ke norihno toto, ah mokaro wãtasenãkõ norihno toto etonatoh ke.

Jeremia 44:7

— Morara exiryke ywy Ritonõpo, Jamihmehxo Exikety, Izyraeu tõ Esemy, ekaropõko ase seromaroro: Oty katohme sero popyra ehtoh konõto poko matou? Oxiryhmãko matose. Osenahkapory se hmatou: orutua komo, nohpo tõ maro, poetohti, enurusenã kõ maro, akoĩpyry oxinomopyra ehtohme ipunaka?

Jeremia 50:30

Morara exiryke imũkuru tõ nuasemãkõ totapasẽme exĩko osema tao, soutatu tõ emero tonahkasẽme exĩko moro ẽmepyry ae. Ywy Ritonõpo oturuno.

Jeremia 6:11

Ritonõpo, Jesemy, mokaro zehno oehtoh apoto sã ukurohtao mana; typenekehse ywy toto zehno oehtoh kurãkary rokẽ ya ukurohtao. Mame ynara tykase Ritonõpo ya: — Mokaro zehno jehtoh ikuãko poetohti tõ pona osema tao, nuasemãkõ pona roropa oximõme toto ahtao. Inio tõ typyxiãkõ maro tarosẽme exĩko imehnõ namotome, tamuhpomãkõ maro.

Jeremia 6:21

Naeroro ywy, Ritonõpo, mokaro rĩko ase etonatohme, epukatohme. Jũkõ orihnõko mã toto tumũkurukõ maro, tope tõ maro te, typãnarykõ maro.

Jeremia 7:33

Ahno ekepyry õnõko torõ tõ mana te, onokyro tõ roropa, mokaro onerehpyra roropa imehnõ mana, ahno pyra exiryke.

Jeremia 8:2

Jehpyrykõ typahsẽme exĩko sapararahme xixi zopino, nuno roropa, xirikuato zopino roropa. Morohne sehxo toh nexiase, tynekarorykõ tonehse eya xine, imeĩpo ehtoh poko tõturupose toto a eya xine, toahmase toto eya xine. Jehpyry tõ ananỹpyra exĩko mã toto zonẽtohme. Jarao rokẽ exĩko mã kehko nono po, onokyro ety samo.

Joeu 2:9

Xiaxiake tururume ytõko mã toto pata poro. Apuru tõ pona onuhnõko mã toto tapyi tõ taka. Osenuhmatoh ae omõnõko mã toto, omato kõ samo.

Amoxi 5:2

“Izyraeu, oryximãme mase Ritonõpo a, orutua poko exipitopyra exiketyme mase; mepukase, jũme owõpyra ropa mase! Nono po tynomose mase, takorehmaneke pyra mase anỹtohme ropa xikihme!”

Amoxi 6:9

Ynara exĩko mana, ahno 10me tõxinamase ahtao tapyi tao orihnõko ro mã toto emero.

Sowonia 1:17

Ynara ãko Ritonõpo mana: — Popyra ehtoh tuhke rokẽ enehpõko ase ahno pona, wazawazame ytoytõko mã toto tonurãkarame exiketõ samo. Mokaro iirypyryme toehse toh nexiase jomihpyry omipona pyra. Morara exiryke imunuru tukuãsẽme exĩko tuna samo. Ekepyry tõ tomasẽme exĩko mã toto typahsẽ sã rokene.