Jeremia 7:28 - Ritonõpo Omiry: A Bíblia Sagrada na língua Aparai do Brasil

²⁸ Mokaro zurũko mase Ritonõpo, Tosẽkõ, omipona pyra toto exiry poko. Ahno ekurãkasaromepyra mã toto tuãnohse toto ahtao ro. Ajohpe pyra ehtoh tonahse; zae nymyry ehtoh poko oturupyra toehse mã toto.

Jeremia 7:28 ပူးပေါင်းရင်းမြစ်များ

Saumu 12:2

Ajohpe oturũko mã toto oseya; imehnõ enekunohnõko mã toto ipyrypary ke eya xine.

Saumu 50:17

Zae pyra oehtohkõ kurãkapory se pyra matose ya, ynyripohpyry oya xine rumekãko roropa matose.

Porowepio 1:7

Tuaro exiketyme se awahtao osemazuhme Ritonõpo enetupuhko Oesẽme. Tuaro pyra exiketõ zae ehtoh poko etary se hkopyra mã toto.

Izaja 30:9

Jomiry omipona pyra exiketõ mokaro, ajohpe exiketomo, Ritonõpo nyripohpyry etary se pyra exiketõme roropa mã toto.

Jeremia 11:10

Toeramase ropa toto tytamurukõ rypyry poko toto ehtohme, ynyripohpyry omipona se pyra toehse toto, imehnõ neponãmarykõ toahmase roropa eya xine. Izyraeu tomo Juta tõ maro ynetapohpyry omipona pyra toehse mã toto, ynekarohpyry itamurukomo a.

Jeremia 17:23

Otato pyra itamurukõ nexiase, jomihpyry omipona pyra. Putupyra exiketõ sã toh nexiase; jomiry omipona se pyra toh nexiase, tamoreparykõ se pyra roropa toh nexiase.

Jeremia 2:30

Kuãnopyatose, yrome anakorehmara nexiase; okurãkarykõ se pyra oexirykõke. Osekato sã mexiatose, reão samo, oekyry tõ, urutõ kõ totapase oya xine.

Jeremia 32:33

Toeramase toto ymaroino. Tamorepase toto ahtao ro ya onetara toh nexiase; atamorepara toh nexiase, otato pyra nexiase toto tonaroximase toto ahtao ro.

Jeremia 5:1

Jerusarẽ põkomo, ytotoko osema tõ ae! Osenuhmatoko õmye xine! Zupitatoko, osepekahtoh tao! Zae ehtoh poko exikety toiro enẽko matou? Ritonõpo omipona se, amonohkara exikety? Toiro mokyro eneryhtao oya xine, Jerusarẽ rypyry korokãko Ritonõpo mana.

Jeremia 5:3

Amonohkara tõmiry omipona exiketõ zupĩko Ritonõpo mana. Typipohse mexiatose eya yrome otato pyra mexiatose; takurihmose mexiatose eya, yrome enetuputyry se pyra mexiatose. Putupyra exiketõ sã mexiatose, oorypyrykõ rumekary se pyra mexiatose.

Jeremia 6:17

Morarame enenanõ tyrise Ritonõpo a oewomananõme rue etatohme! Yrome: — Onetara ynanase, tykase toto.

Jeremia 6:28

Mokaro emero jomipona pyra mã toto, ytoytõko mã toto imeimehnõ zuruse ajohpe ehtoh poko rokene. Putupyra mã toto, tũpore metau samo, kurimene sã roropa.

Jeremia 6:8

Jerusarẽ põkomo, tuaro ehtoko oetuarimatoh oenaroximatohme; arypyra ahtao orumekatorỹko ase. Apatarykõ ripõko ase patãpome, osa tytaõke pyra exiketyme.

Ozeja 4:1

Sero nono põkõ hxirotoh nae Ritonõpo Kuesẽkõ mana. Etatoko ke Izyraeu tomo, Ritonõpo nekarory: — Ajohpe rokẽ mã toto emero, imehnõ pyno nymyry pyra, Ritonõpo ehtoh poko etary se pyra sero nono põkõ mana ipunaka.

Sowonia 3:2

Tosẽ, Ritonõpo omiry onetara pata Jerusarẽ nexiase. Zae pyra toehtoh kurãkapory se pyra nexiase roropa eya. Typynanohnekõme Ritonõpo onenetupuhpyra nexiase. Takorehmatoh se pyra roropa nexiase eya.

Sowonia 3:7

Ynara tõsenetupuhse ywy: “Seromaroro jomihpyry omipona exĩko ypoetory tõ mana. Zae pyra toehtopõpyrykõ kurãkapõko mã toto ya. Wenikehpyra exĩko mã toto tuhke rokẽ tuãnohtopõpyrykõ poko ya.” Yrome orẽpyra toh nexiase popyra ehtoh poko toehtohkõme.