Jeremia 33:9 - Ritonõpo Omiry: A Bíblia Sagrada na língua Aparai do Brasil

⁹ Jerusarẽ poko tãkye exĩko ase, imehxo jyrĩko mã toto, epyrypãko ase toto poko. Imeimehnõ nonory põkõ enaromỹke exĩko, tykytyky ãko mã toto Jerusarẽ põkõ kurãkary poko ya etaryke tyya xine te, tymõkomoke toto riry poko ya etaryke roropa tyya xine.

Jeremia 33:9 ပူးပေါင်းရင်းမြစ်များ

2 Koronika 20:29

Morarame imehnõ ahno tuaro toehse ahtao Izyraeu tõ epetõkara poremãkatopõpyry poko Ritonõpo a enaromỹke toehse toto.

Neemia 6:16

Moro waro toehse yna epetõkara ahtao, typoremãse sã toh nexiase. Tonetupuhse eya xine, Ritonõpo a takorehmase yna exiryke moro erohtoh taotyhkanohse yna a rahkene.

Exite 8:17

Emero pata tõ po tuisa nyripohpyry tysekeremase ahtao, tãkye toehse juteu tomo, erohpyra toehse toto, oseahmatohme, otuhtoh konõto ritohme tãtãkyematohkõme. Morararo ajohpe pyra imeimehnõ tuhkãkõ juteume toehse toh nexiase juteu tõ kurũke.

Saumu 130:4

Yrome popyra yna ehtoh korokãko mase, morara exiryke oeahmãko ynanase.

Saumu 40:3

Jamorepase eremiatoh tyrisenã poko, eremiatohme Kuesẽkõ kurã eahmatoh poko. Moro eneryke tyya xine tuhkãkõ enetupuhnõko mana, Kuesẽkõ enetupuhnõko mã toto tosẽkõme.

Izaja 43:21

Mokaro ynyrityãme mã toto ypoetoryme toto ehtohme jeahmatohme.”

Izaja 55:13

Omoxino tõkehko esary po xipirexite tõ ahtãko mana, Murta tõ ahtapitõko ãtaryka esary po. Morara exĩko jũme enetupuhpotohme ynyrihpyry poko, moro eneryke jũme wenikehpyra oehtohkõme.”

Izaja 60:5

Moro eneryke oya xine atãkyemãko matose yronymyryme; tykytyky ãko oeanokõ mana jamihme samo tãkye oehtohkõke. Moe nono põkõ tuna konõto akuohnõko mã toto tymõkomorykõ kurã enepyryme oya xine.

Izaja 62:1

Jerusarẽ põkõ pyno ase ipunaka, morara exiryke jarao oturukehpyra ase; oseremara ase ozehnotokõ poremãkary eraximaryme, orẽpyra oehtohkõ saerehkatohme xixi samo, opynanopyrykõ saerehkatohme aritu zatyry samo, koko.

Izaja 62:12

Mame oesehpãko mã toto: “Ritonõpo poetory kurãme,” “Ahno, Ritonõpo a typynanohse aexityamo.” Pata Jerusarẽ esehtõko roropa mã toto, “Moro pata, Ritonõpo ipyno mana,” “Moro pata onurumekara Ritonõpo nexiase.”

Izaja 62:4

Taroino “Turumekasẽme,” oesehtopyra ropa exĩko mã toto. Ononory roropa jũme esehtopyra ropa “Patãpome.” Oesehtõko mã toto “Ritonõpo zamaro” me. Ononory roropa esehtõko “Torẽnase” me, tãkye Ritonõpo exiryke opoko xine, ononory roropa ipytyme sã exĩko mana.

Izaja 62:7

“Ah Ritonõpo oseremara nexino, Jerusarẽ kurãkatoh ropa ponãmero eya, sero nono põkõ emero ripotohme Ritonõpo a Jerusarẽ patary eahmatohme.”

Izaja 64:2

Tuna sã morohne exiry kurokuro karyhtao apoto zemimã po. Imehxo oehtoh enetuputyry oepetõkara a; ouno toexirykõke tykytyky ãko toto exiry oẽpataka.

Jeremia 13:11

Mame ahno metỹ sã tymyhse exikety rary sã Izyraeu tõ se exiase Juta tõ maro tymyhse sã ypokona, ameke pyra toto ehtohme. Ypoetoryme toto se exiase jeahmatohme, kure rokẽ jyritohme; yrome jomiry omipona se pyra nexiase toto.

Jeremia 16:19

Ynara tykase ywy: — Ritonõpo Jesemy, Jewomaneme mase, yjamitunuru ekarõko mase ya; jakorehmãko mase popyra ehtoh toehse ahtao ya. Sero nono etyhpyry tõ poe imehnõ ahno oehnõko oya ynara kase: “Yna tamuru tõ tyneponãmarykõ ajohpe rokẽ nae nexiase; tyneponãmarykõ typahsẽme rokẽ nae toh nexiase.

Jeremia 24:6

Mokaro pyno exĩko ase. Mame toto enehnõko ropa ase sero nono pona ropa. Tapyi riry sã kure toto rĩko ase, toto onenahkapopyra exĩko ase; toto arykãko ase, onoupyra ropa exĩko ase.

Jeremia 26:6

Otato pyra awahtao xine, sero Ytapyĩ Kurã rĩko ase Xiro ritopõpyry sã ya. Mame imeimehnõ nonory põkõ sero pata esehtõko mã toto, popyra ehtoh enehpory se toto ahtao.

Jeremia 29:1

Mame pape meroase juteu tõ neneryme, Napukotonozo narotyã tynamotome Jerusarẽ poe Papironia pona: tuisa tomo, oturuketomo, urutõ komo, ahno maro emero.

Jeremia 3:17

Morara ahtao esehpatoh toehse ahtao Jerusarẽ esehpãko mã toto “Kuesẽkõ apõme”. Mame imehnõ nonory põkõ emero oximõnõko mã toto jeahmatohme, moroto. Morotoino typenetatohkõ onyripyra exĩko mã toto, zae pyra ehtoh poko pyra exĩko roropa mã toto.

Jeremia 3:19

Ynara tykase Ritonõpo: “Izyraeu tomo, umũkurume orirykõ se exiase, nono kurã ekarory se roropa exiase oya xine, imepỹ nono motye nono kurano ipunaka. ‘Papame, ykohmary se exiase oya xine,’ jũme jurumekara ropa oehtohkõme.

Jeremia 31:14

Oturuketõ nahpãko ase inapyrykõ kurã ke, ypoetory tomo a emero ise toto ehtoh ekarõko ase. Ywy Ritonõpo oturuno.”

Jeremia 31:4

Izyraeu tomo, oritorỹko ropa ase tynonoke ahnome. Tãporĩ tõ apoĩko ropa matose watohme tãkye oehtohkõke.

Jeremia 32:42

— Mame popyra ehtoh enehtopõpyry sã ya toto pona, kure ehtoh ekarõko ase roropa eya xine jomihpyry ae ro.

Jeremia 33:14

Ynara tykase Ritonõpo: — Imeĩpo moro kurã rĩko ase Juta tomo a Izyraeu tomo a roropa ynetapohpyry ae ro eya xine.

Jeremia 4:2

Mame ajohpe pyra õmirykõ etaporyhtao oya xine, zae rokẽ awahtao xine: “Ritonõpo netaryme te, Ritonõpo neneryme,” ãko matose. Mame imehnõ nonory põkõ emero kure toto ripõko mã toto ya, jeahmãko roropa mã toto.

Jeremia 44:8

Oty katoh jyhtomãko matou ritõ panõ poko, onekarorykõ zahkãko onekarorykõme imehnõ ritõ tõ eahmaryme, taro Ejitu po, tõsesarise oehtohkõ po? Otarame senohne rĩko matose osenahkapotohme, imeimehnõ nonory põkõ oeunohtohme. Oesetykõ esehtõko mã toto popyra ehtoh enehpory se toto ahtao.

Jeremia 49:25

Moro pata kurã potu, tãkye aexihpyry, seromaroro patãpome toehse, tytaõke pyra ipunaka.

Ezekieu 26:20

Oemãko ase aorihtyã esaka, pakatokõ ekepyry esaka exĩko mase. Onomõko ase moroto aorihtyã esao nono zopino pakatokõ typoremãkase aexityã maro. Jũme apatary po ahno exipyra ropa exĩko mã toto. Patame jũme exipyra ropa exĩko mase isene exiketõ maro sero nono po.

Ezekieu 36:35

Ynara ãko mã toto ononorykõ poko: “Patãpome nexiase, oname tonore. Yrome seromaroro Ritonõpo narykahpyry Etẽ sã mana.” Oturũko roropa mã toto pata tõ poko, tomatonanohse aexityamo, tytohkase, typahse nono pona. Moro ẽmepyry toehse ahtao tapurusẽme exĩko mã toto apuru konõto ke, typõke exĩko roropa mã kehko.

Ezekieu 39:13

Atakorehmãko mã toto emero Izyraeu nonory põkomo, aorihtyã ekepyry ẽmary poko. Moro pokoino omi kurã etãko mã toto typoko xine tuisame imehxo toehse jahtao. Ywy, Ritonõpo Oesẽkõ, oturuno.

Ozeja 3:5

Yrome ẽmepyry oehnõko mana: Izyraeu tõ oehnõko ropa Ritonõpo eahmase ropa Tosẽkõme. Tutuisake exĩko mã toto tuisa Tawi paryme exikety. Morarame Ritonõpo eahmãko mã toto Tosẽkõme, aomiry omipona, inekarory kurã tuhke apoĩko roropa mã toto.

Zakaria 1:17

Ynara tykase roropa inenyokyhpyry ya: — Oturuko imehnõ netaryme, Ritonõpo Jamihmehxo Exikety ynara tykase: ypatary tõ tymõkomoke exĩko ropa mã kehko, pitiko rokẽ pyra. Pata Jerusarẽ akorehmãko roropa mana tynymenekahpyryme aehtohme ropa.

Zakaria 12:2

— Jerusarẽ ripõko ase eukuru jehnahpyry samo imehnõ nono põkomo a, zomye exiketomo a emero; moro eukuru enyryhtao eya xine etỹnõko mã toto. Jerusarẽ pona ytõko mã toto etonase Juta tõ patary tõ maro.

Teuteronomiu 30:5

atamurukõ nonohpyry pona ropa. Oesarykõme exĩko ropa mana, kure rokẽ oritorỹko Ritonõpo mana kure atamurukõ nyrihpyry motye eya.