Jeremia 31:16 - Ritonõpo Omiry: A Bíblia Sagrada na língua Aparai do Brasil

¹⁶ Xitara exiko, oxity ikorokako ropa. Onyrihpyry emero opoenõ poko topehmasẽme exĩko mana; oehnõko ropa mã toto epetõkara nonory poe. Ywy Ritonõpo oturuno.

Jeremia 31:16 ပူးပေါင်းရင်းမြစ်များ

Jenexi 43:31

Tyxitakehse tahtao tõmyty tukurikase eya. Tutũtase ropa ynororo. Ynara tykase: — Otuhtoh enehtoko rahkene, tykase ynororo.

Jenexi 45:1

Mame Joze tosenakunuhse yronymyryme. Morara exiryke typoetory tõ taropose eya, toiroro tyekyry tõ maro toehtohme. Opore ynara tykase: — Otũtatoko emero porehme sero tae! Naeroro Joze poetory tõ pyra toehse moro tao. Tutũtase toto ahtao porehme tõsekarose Joze turui tomo a.

2 Koronika 15:7

Yrome orẽpyra ehtoko! Penekehpyra ehtoko. Ãkorehmatorỹko Ritonõpo mana oerohtohkõ poko, kure rokẽ otyhkatohme.

Saumu 126:5

Ah mokaro ixitatyã tutupikõ arykaryhtao tãkye nexĩ toto tykyrysã apoiryhtao ropa tyya xine!

Saumu 30:5

Zehno Ritonõpo ehtoh axĩtao rokẽ mana, yrome kure aexiry exikehpyra mana isene ro kuahtao xine. Kyxitarykõ poko ẽmehnõko sytatose repe, yrome tõmehse ahtao atãkyemãko ropa sytatose.

Ekereziaxti 9:7

Naeroro otuhko ãtãkyemaryme; uwa eukuru ẽko õseahmaryme. Morohne riry oya kure Ritonõpo a mana.

Izaja 25:8

Orihtoh enahkãko roropa mana jũme, nono põkõ orihpyra exĩko mã toto. Toto xity korokãko Ritonõpo mana toto enuru ae, mame typoetory tõ ehxirotopõpyry enahkãko mana sero nono po. Morara tykase Ritonõpo.

Izaja 30:19

Jerusarẽ põkomo, Xião põkomo, xitara exĩko matose. Ritonõpo Oesẽkõ kohmaryhtao oya xine ãkorehmatohkõme, nupunato oenetorỹko mana; opyno xine exĩko, õmirykõ etãko, ãkorehmatorỹko roropa mana.

Izaja 40:10

Ritonõpo Kuesẽkõ oehnõko mana tuisamehxo ehtohme; tyjamitunuru ke topetõkara poremãkãko mana. Tymaro typynanohse aexityã enehnõko mana.

Jeremia 23:3

Ypoetory tõ akoĩpyry enehpõko ase imehnõ nonory tõ poe. Morotona toto taropose ya, inonorykõ pona toto enehnõko ropa ase. Emũkuãko mã toto tuhke, emãnõko mã toto.

Jeremia 29:14

Yje! Ourutorỹko ase, jeporỹko matose, mame aarotorỹko ropa ase ononorykõ pona ropa. Oximõme oenehtorỹko ase imeimehnõ nono tõ poe emero, aaropotopõpyrykõ poe. Mame aarotorỹko ropa ase ononorykõ pona ropa, moro poe kuaropoatose imehnõ namotome. Ywy Ritonõpo oturuno.’

Jeremia 30:18

Ynara tykase Ritonõpo: “Jako pakomotyã enehnõko ropa ase inonorykõ pona ropa. Emero tapyi taõkõ pynanohnõko ase. Jerusarẽ tyrisẽme ropa exĩko mana, tuisa tapyĩ konõto tao ahno exĩko ropa.

Jeremia 33:11

kui katoh tonõ tãkye exiketõ omiry, atãkyemaketõ panaikato roropa otuhtoh riry poko, pytary poko roropa. Ahno eremiaketõ etãko roropa matose, tynekarorykõ enehnõko Ytapyĩ taka, “Kure mase,” katohme ya. Ynara ãko mã toto eremiãko: “ ‘Kure mase,’ kahtoko Ritonõpo Jamihmehxo Exikety a, kure aexiryke, kypyno xine exikehpyra mana, jũme.” Sero nono po tymõkomoke toto ripõko ase, osemazuhme toto ehtopõpyry samo. Ywy Ritonõpo oturuno.

Jeremia 33:7

Tymõkomoke Juta tõ rĩko ase Izyraeu tõ maro, tapyi tõkehko rĩko ropa ase, osemazuhme toto ehtopõpyry samo.

Ezekieu 37:21

Mame kaxiko eya xine: ywy, Ritonõpo Oesẽkomo, Izyraeu tõ enehnõko ase, imeimehnõ nonory poe, toto ytotopõpyrykõ poe. Mame toto enehnõko ropa ase oximõme arotohkõme ropa esarykõ pona ropa.

Ozeja 1:11

Juta tomo Izyraeu tõ maro oximõnõko mã toto. Oximõme toiro tuisa menekãko mã toto tutuisarykõme. Ahno tõ jamihme exĩko ropa mã toto, tymõkomoke roropa. Moro ẽmepyry toehse ahtao Oseahmatoh konõtome exĩko mana, Jezereu ẽmepyryme.

1 Tesaronika 4:14

Ynara enetupuhnõko sytatose, Jezu towõse ropa toorihxĩpo. Naeroro typoetory ekepyã ẽsemãkãko ropa Ritonõpo mana. Toto enehpõko ropa mana Jezu maro, Jezu tonetupuhse eya xine exiryke.

Epereu 11:6

Ritonõpo zamaro ehsaromepyra sytatose onenetupuhpyra kuahtao xine. Ynara exiryke, Ritonõpo ehtoh enetuputyryhtao rokẽ kyya xine, imaro oturũko sytatose. Ynara enetuputyryhtao roropa kyya xine, tõmipona se exiketomo a kurãkõ ekarõko Ritonõpo mana. Morohne enetuputyryhtao rokẽ kyya xine kuomirykõ etãko Ritonõpo mana.

Epereu 6:10

Zae rokẽ Ritonõpo ãpiakatorỹko mana. Wenikehpyra ynororo oerohtopõpyrykõ poko aomipona. Ipyno oexirykõke imehnõ Jezu poetory takorehmase oya xine. Imehnõ akorehmãko ro matose.

Ruti 2:12

Kure rokẽ oripory se ase Ritonõpo a onyrihpyry emetakame. Osewomary se mexiase Ritonõpo, Izyraeu tõ Esẽ, maro. Eya oripory se ase kure rokene.