Jenexi 37:8 - Ritonõpo Omiry: A Bíblia Sagrada na língua Aparai do Brasil

⁸ Mame tõturupose irui tomo: — Oty kary moro? Yna tuisaryme exĩko mah? Õmiry omipona exĩko ynanae? Takorõkõ zehnohxo toehse toh kynexine aosenehtopõpyry pokoino, epyrypakety sã aexiry poko roropa tõsenehtopõpyry ekaroryhtao eya.

Jenexi 37:8 ပူးပေါင်းရင်းမြစ်များ

Jenexi 27:41

Morarame takorõ zehno toehse Ezau, kure Jako tyripose jũkomo a exiryke. Mame ynara tõsenetupuhse ynororo: “Okynã pyra papa orihnõko mana. Moromeĩpo tyhnamokehse ahtao jakorõ etapãko ase.”

Jenexi 37:4

Tumũkuru Joze pynohxo Jako ehtoh tonese irui tomo a, naeroro takorõkõ zumoxike toehse toto. Zehno toexirykõke xihpyryme tõturuse toto, imaro aotururuhtao.

Jenexi 37:9

Mame tõsenehse ropa Joze, moro tõsenehtopõpyry tokarose roropa turui tomo a. Ynara tykase ynororo eya xine: — Tõsenehse ropa ywy. Morarame xixi sã enease, nuno maro, xirikuato tõ 11mãkõ maro. Mame nepuiase kehko ykyryry xirikuato ẽpataka.

Jenexi 42:10

— Arypyra tuisa, tykase toto. — Opoetoryme ynanase. Tonahsẽ epekahse rokẽ ynanoehno.

Jenexi 44:18

Mame eponaro toytose Juta, Joze maro oturuse: — Tuisa, ajohpãme sã oturuxi amaro. Yzehno pyra exiko. Sero nonory esẽme mase.

Jenexi 49:26

Tonahsã itamurume ekarõko mana, ekuru tõkehko roropa, kurãkõ ypy tõ poe moino ro exikety poe kurãkõ ekarõko mana. Otyro tõkehko, kurãkõ ypy tõkehko po exiketomo. Emero kurãkõ exĩko Joze zupuhpyry pona parimã sã zupuhpyry po, exĩko mana tymenekase ynororo irui toh tae.

Jenexi 50:18

Moromeĩpo irui tõ tooehse eya. Toepuise toto Joze ẽpataka. Ynara tykase: — Taro ynanase, opoetoryme.

Saumu 118:22

Moro topu, tapyi rinanõ nurumekahpyry, moro topu se toehse toto, kurãme kuhse exiryke, tapyi kyryryme nymyry.

Exutu 2:14

Tozuhse ynororo eya: — Onoky omi poe yna zupokãko mahno? Yna tuisaryme awahtao sahmo? Jetapary se hmahno ahno etapatopõpyry sã oya? Mame enaromỹke toehse Moeze. Ynara tõsenetupuhse ynororo: “Tuaro toehse mã toto ynyrihpyry poko.”

Ruka 19:14

— Morarame imehnõ ipataõkõ tosẽkõme ise pyra toh kynexine. Zehno toh kynexine. Ahno tonyohse eya xine ĩkapo, ynara katohme: “Mose se pyra ynanase yna esẽme,” katohme repe.

Ruka 20:17

Mokaro eneryhtao ro ynara tykase Jezu: — Morara exiryke ynara tymerose ypoko Ritonõpo omiryme: “Moro topu turumekase tapyi rinanomo a. ‘Popyra mana,’ tykase toto oseya. Typahse roropa eya xine repe. Yrome inypapyhpyrykõ tapoise ropa eya xine kurãme kuhse exiryke. Ipoe rokẽ tapyi jamihme mana,” me tymerose Ritonõpo omiryme.

Atos 7:35

— Moeze mokyro ro. Apitoryme ise pyra toh kynexine repe tutuisarykõme. “Onoky omi poe upokato mano tuisame awahtao samo?” tykase toto eya. Yrome mokyro ro tyrise Ritonõpo a toto tuisaryme, takorehmase ynororo apoto htaonõpo a.

Teuteronomiu 33:16

Inonorykõ kure rokẽ tyriko, Ritonõpo, emero epo exiketõ roropa, kure rokẽ ehtoh ekaroko, emero, eya xine! Mame Ritonõpo, aosenepohpyry omoxino zahkety panõ htae, kure rokẽ toto tyriko! Ah morohne kurãkõ emero kure oehtoh nexĩ Joze ekyry tomo a, imehxo Joze toehse exiryke turui tõ motye!

Epereu 10:29

Mokaro saaro seromaroro Ritonõpo mũkuru kerekeremananõ nae. Ritonõpo omiry totase eya xine repe: “Umũkuru kynorihne opynanohtohkõme, okurãkarykõ se toexiryke,” kary totase repe. Yrome: “Oty katoh toorihse Ritonõpo mũkuru nae?” ãko mã toto Ritonõpo omiry poihtõko. “Iirypyrymãkõ sã omũkuru kynexine,” ãko roropa mã toto Ritonõpo a ajohpe rokene. Ritonõpo Zuzenu toto pyno repe. Yrome ipoihtõko rokẽ mã toto. Morara exiryke yronymyrymehxo mokaro wãnohnõko Ritonõpo mana Moeze kerekeremahpõkõ wãnohtopõpyry motye kuhse, iirypyrymehxo toto exiryke Ritonõpo kerekeremary poko.

1 Samueu 10:27

Yrome imehnõ ajoajohpãkomo ynara tykase: — Otarame mose kuewomatorỹko nase, nary rokene, tykase toto. Sauu typoihtose eya xine. Tynekarorykõ onekaropyra roropa eya toh nexiase.

1 Samueu 17:28

Mame takorõ omiry etaryke tyya tyekĩtapãse irui Eriape: — Oty kasehxo koh moehno xiaro? Onoky maro oeky tõ mynomono ona po? tykase. — Awaro ase. Epyrypãko rokẽ mase okurohtao, ajoajohpe rokene. Osetapatoh enese rokẽ moehno, tykase irui Tawi a.

1 Samueu 18:8

Naeroro mokaro omiry etaryke tyya tãkye pyra toehse Sauu. Tyekĩtapãse ynororo. Ynara tykase: — Ya miume rokẽ tokarose nohpo tomo a, yrome Tawi a 10 miume tokarose. Toiro se rokẽ ynororo tuisame toehtohme, tykase Sauu.