Jenexi 28:20 - Ritonõpo Omiry: A Bíblia Sagrada na língua Aparai do Brasil

²⁰ Moroto tõturuse Jako Ritonõpo a. Ynara tykase ynororo: — Ymaro exikehpyra awahtao, jewomaryhtao oya jesemary ae jytoryhtao, tonahsẽ ekaroryhtao ya, upo roropa,

Jenexi 28:20 ပူးပေါင်းရင်းမြစ်များ

Jenexi 28:15

Amaro exikehpyra ase. Oewomãko ase emero pata pona oytoryhtao. Mame oenehnõko ropa ase xiaro sero nonory pona ropa. Orumekara ase. Jomihpyry ae ro kure rokẽ oritorỹko ase, myarotokorome.

Jenexi 31:13

Ywy ase Ritonõpo, osenepoase oya Peteu po awahtao. Moroto topu tanỹse oya xikihme. Oriu tukuãse oya moro topu pona onekaroryme ya, õmiry metapoase ya. Seromaroro atakimako sero nonory poe oytotohme ropa oenurutopõpyry pona ropa.”

Jenexi 35:3

Atakimatoko, Peteu pona ytõko sytatose. Moroto apoto apõ rĩko ase Ritonõpo eahmatohme kyya xine. Typynanohse ywy eya etuarimaryhtao. Morararo ymaro exikehpyra toehse ynororo emero pona toytose jahtao.

2 Samueu 15:8

Pata Kesua po, Xiria po jahtao ynara akene ya rokene: “Ritonõpo a tarose ropa jahtao Jerusarẽ pona eahmãko ase Eperõ po.”

1 Koronika 4:10

Ynara tykase ynororo Ritonõpo Izyraeu Esemy a: — Ritonõpo, kure rokẽ kyriko. Nono konõto ekaroko ya. Ymaro exikehpyra exiko. Kypynanohko jetũ kamexipory se exiketõ winoino emero. Mame totase ynororo Ritonõpo a, ipenetatoh tokarose eya.

Saumu 116:14

Ipoetory tõ oximõmãkõ rãnao ynekarory ekarõko ase eya, jomihpyry ae ro.

Saumu 116:18

Oximõme opoetory tõ ahtao emero, zara tõ po, Atapyĩ Kurã tao, Jerusarẽ po, ynekarory ekarõko ase oya, jomihpyry ae ro. “Kure mase, Ritonõpo,” kahtoko!

Saumu 119:106

Jomihpyry etapoase, moro rĩko ase, zae oya jamorepatopõpyry omipona exĩko ase rahkene.

Saumu 132:2

Wenikehpyra exiko aomihpyry poko oya, Ritonõpo Jamihmehxo Exikety, Jako Esemy, ynara tykase ahtao:

Saumu 22:25

Ritonõpo, imoihmãkõ rãnao oeahmãko ase onyrityã poko. Õmihpyry omipona exiketõ neneryme ynekarory tõ ekarõko ase oya, jomihpyry ae ro.

Saumu 56:12

Ritonõpo, jomihpyry ae ro ynekarory ekarõko ase oya; “kure mase,” ãko ase ynekaroryme,

Saumu 61:5

Ritonõpo jomihpyry metase: tymõkomoke exiketõ tymõkomory nomõko mã toto typoenõ mõkomoryme. Moro sã mã Õmiry omipona exiketõ ehtoh kurã mekaroase ya.

Saumu 61:8

Morarame eremiãko ase oeahmaryme, zae oehtoh poko jũme. Kokoro rokẽ ynekarory ekarõko ase oya jomihpyry ae ro.

Saumu 66:13

Atapyĩ taka ynekarory tõ arõko ase jahkatohme tytororo; jomihpyry ae ro ynekarory ekarõko ase oya.

Saumu 76:11

Onekarorykõ enehtoko Ritonõpo Kuesẽkomo a õmihpyry ae ro; osehtoko imehnõ nonory põkomo, moe pyra exiketomo, onekarorykõ enehtohme Ritonõpo a. Tõmiry omipona imehnõ ripõko mana emero porehme;

Izaja 19:21

Osenepõko Ritonõpo mana Ejitu põkomo a, enetupuhnõko mã toto. Ritonõpo eahmãko mã toto, mame tynekarorykõ enehnõko mã toto eya, tiriiku tõkehko. Tõmirykõ etapõko mã toto eya, mame tõmirykõ omipona tyrĩko mã toto.

João 1:16

Kypyno xine ro mana iirypyryme kuahtao xine. Morara exiryke kure kyriatosene.

Atos 18:18

Moroto ro Pauru tuhke tynyhse. Morotoino tõsekazumaxĩpo Jezu poetory tomo a toytose ropa Pauru, wapu ae, Xiria pona. Imaro toytose Pirixira, Akira, enara. (Moroto tũsety tysahkapose ropa Pauru a Sẽkerea po. Ajohpe pyra tonetupuhtohme imehnomo a tõturutopõpyry poko Ritonõpo a.)

1 Timoteu 6:8

Naeroro tohke kuahtao xine, tymetyke kuahtao xine roropa tãkye sehtone.

1 Samueu 1:11

Ynara tykase ynororo: — Ritonõpo Imehxo Exikety, jotururu etako. Poeto pitiko ekaroryhtao ya umũkurume, ekarõko ropa ase oya jũme amaro aerohtohme toorikyry ponãmero. Morararo zũsety onysahkara mana opoetoryme aexiry waro emero ehtohme, tykase Ana.

1 Samueu 1:28

Morara exiryke seromaroro mose umũkuru ekarõko ase Kuesẽkomo a, jũme ipoetoryme aehtohme toorikyry ponãmero, tykase Ana Eri a. Mame Ritonõpo toahmase eya xine moroto.

1 Samueu 14:24

Morarame Izyraeu tõ emero tapotũkehse, jamihme pyra toehse tomirykõke, Sauu omihpyry pokoino: “Popyra exĩko mã toto emero tonahsẽ enapyryhtao jepetõkara onyporemãkara ro jahtao.” Morara exiryke otuhpyra tykohmãse toto.