Ezekieu 9:9 - Ritonõpo Omiry: A Bíblia Sagrada na língua Aparai do Brasil

⁹ Ynara tykase Ritonõpo ya: — Izyraeu tõ tyyrypyhpyke toehse mã toto. Popyra mã toto ipunaka. Imehnõ totapase eya xine pata tõ po, sero nono po porehme. Popyra ehtoh poko rokẽ mã toto Jerusarẽ po. Ynara ãko mã toto: “Kynonorykõ turumekase Ritonõpo a. Kuenepyra xine mana,” ãko.

Ezekieu 9:9 ပူးပေါင်းရင်းမြစ်များ

2 Tuisa 21:16

Kurãkõ tuhke totapase Manase a exiryke Jerusarẽ esemary tõ tyneryse munu ke; morara tyrise eya Juta tõ akorehmaryhtao tyyrypyrykõ poko toto ehtoh poko, tyneponãmarykõ eahmary poko eya xine, Ritonõpo myakãme repe.

2 Tuisa 24:4

ahno kurã etapatopõpyry pokoino eya hkotano. Naeroro Manase rypyry onykorokasaromepyra Ritonõpo kynexine.

Jo 22:13

Yrome ekaropõko mase: ‘Oty waro Ritonõpo nae? Akurũ tõ xinukutumãkõ moroto mana, irãnao. Otãto kuapiakatorỹko nae?’

Saumu 10:11

Mokyro popyra exikety ynara ãko mana tyya rokene: “Ritonõpo ‘Oty’ kara mana. Pimỹme rokẽ mana, osenuhmara mana!”

Saumu 94:7

Ynara ãko mã toto: “Onenepyra Ritonõpo mana; sero poko zuaro pyra Izyraeu tõ Esẽ mana.”

Izaja 1:4

Tee! Ahno popyra rokẽ mã mokaro, pehme tyyrypyhpyke mã toto! Emero zae pyra ehtoh poko exiketõme mã toto. Ritonõpo turumekase eya xine, Ritonõpo kurano, Izyraeu tõ Esemy. Toeramase toto Ritonõpo winoino.

Izaja 29:15

Popyra ehtoh oehnõko oya xine mana: Ritonõpo winoino õsenetupuhtohkõ zonemyryke oya xine. Koko, xinukutumao zae pyra ehtoh poko matose, mame ynara ãko: “Kuenepyra xine imehnõ mana, kynyrirykõ waro pyra imehnõ mana, emero.”

Izaja 47:10

Orẽpyra mosekaroase oorypyry poko awahtao, imehnõ onyriry onenepyra mekaroase repe. Yrome tuarohxo oehtoh ke mosenekunopyase. Ynara tõsenetupuhse omoro: ‘Ywy imehxo ase, imehnõ ysã pyra mã toto.’

Jeremia 2:34

Oupõkõ tyxikuromase tymõkomokãkara munuru ke oryhmapitopyra exiketõ munuru ke roropa. — Yrome ynara ãko mã ypoetory tomo:

Jeremia 22:17

Yrome omoro ise oehtoh rokẽ enẽko mase, openetatoh poko mase. Ahno kurã etapãko mase, oekyry tõ ryhmãko mase jamihme oexiryke.

Ramẽtasão 1:5

Epetõkara mokyro tuisaryme toehse, orẽpyrahxo exĩko mã toto. Jerusarẽ põkõ rohmanohpõko Ritonõpo mana iirypyryme itamurume toehse toto exiryke. Imũkuru tõ tapoise epetõkara a, toto arotohme mya esarykõ poe.

Ezekieu 7:23

— Otupĩko mã toto emero porehme. Imehnõ etapananõ nae tuhke, imehnõ ryhmãko mã toto Jerusarẽ po.

Ezekieu 8:12

Mame tõturupose Ritonõpo ya, ynara tykase: — Ahno mũkuru, moxiã nyriry enẽko mah? Izyraeu tõ tamuximãkõ tyneponãmary eahmãko mã toto tokare pyra. Ynara ãko mã toto: “Ritonõpo kuenepyra xine mana. Sero nono turumekase eya.”

Ezekieu 8:17

Mame ynara tykase Ritonõpo ya: — Ahno mũkuru, moro enẽko mah? Moxiã, Juta tõ morohne xihpyry rĩko mã toto, onenehpyry tomo; Morara exiryke tyyrypyrykõ poko se ro mã toto. Mokaro pokoino oxiehno, osetapãko mã toto pata tõ poro emero. Morohne motye oehnõko mã toto tynyrirykõ poko toehtohkõme Ytapyĩ kurã tao, naeroro toto zehnohxo jyrĩko toto. Eneko ke yryhpopãkãko mã toto tynyrirykõ xihpyry ke.

Apakuke 1:4

Naeroro õmihpyry omipona pyra mã toto, zae ehtoh onyripyra mã toto. Kure ehtoh poko exiketõ tapuruse mã toto zae pyra exiketomo a. Zae pyra ahno apiakãko mã toto.

Sowonia 1:12

— Moro toehse ahtao ezuru apoĩko ase, pata Jerusarẽ põkõ enetohme. Mokaro wãnohnõko ase typoko xine tãkye exiketomo, tuesapare exiketõ roropa emero nae toexirykõke, orẽpyra sã exiketomo, ynara kananõ tyya rokene: “Oty rĩko Ritonõpo nae? Arypyra; onypynanohpyra mana, onuãnohpyra roropa mana.”

Ruka 11:50

Naeroro awãnohtorỹko Ritonõpo mana, urutõ kõ etapatamitume. Moino ro nono ritopõpyry poe ro urutõ kõ totapase. Mokaro etapatamitume awãnohtorỹko Ritonõpo mana.

Teuteronomiu 31:29

Zuaro ase, toorihse jahtao iirypyryme exĩko mã toto, ynyripohpyry tõ omipona pyra exĩko mã toto. Mame imeĩpo tuãnohsẽme exĩko mã toto. Iirypyrykõ pokoino tohne exĩko Ritonõpo mana toto poko.

Teuteronomiu 32:5

Yrome ipoetory tõ tyyrypyrykõ poko toehse toh nexiase. Aerypymahpyryme toehse toh nexiase, aomiry omipona pyra. Naeroro ipoenõ sã pyra mã toto, ahno popyra tyyrypyhpyke exiketomo.