Ezekieu 10:2 - Ritonõpo Omiry: A Bíblia Sagrada na língua Aparai do Brasil

² Mame ynara tykase Ritonõpo mokyro tupoke mauru panono risẽ ke exikety a: — Ytoko moro pupu parihmã rãnakuroko taporihke exiketõ zopino ikarany apoitohme, oemarykõ pehme. Imeĩpo sapararahme moro ikarany ipahko pata pona. Mokyro ytotopõpyry enease.

Ezekieu 10:2 ပူးပေါင်းရင်းမြစ်များ

2 Tuisa 25:9

Ritonõpo Tapyĩ tyahkase eya te, tuisa tapyĩ konõto roropa te, emero tamuximehxo exiketõ tapyĩ tõ roropa Jerusarẽ po.

Saumu 140:10

Ah ikarã nepukã toto epona xine! Ah mokaro tõmasẽme nexĩ toto oramã aka jũme tũtara ropa toto ehtohme!

Saumu 18:10

Taporihke exikety pona tõtyrise toytotohme, tõnuhse axiny tyryrykane aporiry tõ maro.

Exutu 25:18

Asakoro taporihke exiketõ tyriko, uuru tapitapĩse risemy, kaxo apuru etyhpyry tõ po.

Izaja 30:30

Ritonõpo Imehxo Exikety omiry osetãko imehnomo a emero, zehno toehtoh enepõko mana. Apoto zahkatõ sã exĩko, konopo itamurume, tyryrykane jamihme, konopoimo topuxikirime; tomary jamihmã anỹnõko mana toto wãnohtohme.

Ezekieu 1:13

Onokyro tõ maro ezuru saereh ãko nexiase ytokehpyra exikety. Moro apoto zemimehxo toehse, apoto wino neneneh tykase.

Ezekieu 10:16

mame toytorykohtao ipupurukõ parihmã toytose toto maro. Taporirykõ totapuruhmakase ahtao eya xine toytotohme ipupuru tõ parihmã toytose imaro xine.

Ezekieu 9:11

Mame mokyro tupõ tamuruse mauru panono risemy, imerohpyry aroneme roropa ynororo, toehse ropa Ritonõpo a oturuse tynyrihpyry poko emero. Ynara tykase ynororo: — Emero yrino õmihpyry ae rokene.

Tanieu 7:9

Osenuhmãko ro exiase: tuisa apõ tõ tyrise nexiase esaka xine. Mame toiro tuisa apõ po typorohse mokyro Jũme isene Exikety. Zupõ nexiase karimutume, mauru samo, zũsety karimutume nexiase roropa kaneru hpoty samo. Apony te, apõ pupuru tõ roropa apoto zemimã sã nexiase.

Apokaripxi 8:5

Mame ixtaratu ẽtypyry typehkase mokyro a apoto ke jahkatoh wino. Nono pona tomase eya. Konomeru nexiase panaikato, nenenehkane maro. Nono kywyh kywyh tykase roropa.