Epezu 5:17 - Ritonõpo Omiry: A Bíblia Sagrada na língua Aparai do Brasil

¹⁷ Mame tuaro pyra exiketõ sã pyra ehtoko. Osenetupuhtoko Kuesẽkõ omiry poko, aomipona oehtohkõme, Kuesẽkõ tãkye ehtohme opoko xine.

Epezu 5:17 ပူးပေါင်းရင်းမြစ်များ

Jo 28:28

Ynara tykase ynororo ahno a: “Tuaro oexirykõ se awahtao xine, Imehxo Ritonõpo Ehtoh enetupuhtoko aomiry omipona oehtohkõme; zuaro ehtoh enetuputyry se awahtao xine popyra ehtoh irumekatoko.”

Saumu 111:10

Tuaro oexiry se awahtao, apitoryme Ritonõpo enetupuhko Oesẽme. Aomiry omipona exiketõ tuaro tyripõko mana. “Kure mase, Ritonõpo,” sykatone jũme!

Saumu 119:27

Kuakorehmako õmihpyry enetuputyry poko ya, mame osenetupuhnõko ase, osenuruhkãko roropa ase anamorepatoh tonõ poko.

Porowepio 14:8

Oty katohme emese kure exikety tuaro exiketyme nae? Tyriry waro toexiryke. Yrome putupyra exikety mã tyriry waro osekarõko, zuaro pyra tahtao ipunaka.

Porowepio 2:5

Morohne zupiryhtao oya Ritonõpo zuno ehtoh waro exĩko mase. Ritonõpo waro ehtoh enetupuhpitõko roropa mase.

Porowepio 23:23

Ajohpe pyra ehtoh epekahko, tuaro ehtopo te, ãmorepatopo te, kure osenetupuhtopo, enara, yrome morohne onekaropyra ropa exiko.

Jeremia 4:22

Ynara ãko Ritonõpo mana: “Ypoetory tõ tuaro pyra mã toto, juaro pyra roropa mã toto. Poeto pitiko sã mã toto, putupyra rokene, onenetupuhpyra mã toto. Popyra ehtoh poko tuarohxo mã toto. Yrome zae ehtoh poko zuaro pyra mã toto ipunaka.”

João 7:17

Ritonõpo omipona exiketõ rokẽ mã jomiry enetupuhnõko mã toto. Ritonõpo poe jomiry ehtoh enetupuhnõko roropa mã toto Ritonõpo omipona se toexirykõke.

Romanos 12:2

Ritonõpo se pyra exiketõ typenetatohkõ poko rokẽ mã toto. Mokaro ehtoh sã pyra ehtoko. Õsenetupuhtohkõ ikurãkapotoko Ritonõpo a. Õsenetupuhtohkõ tukurãkase ahtao eya, Ritonõpo penetatoh kurã kypoko xine waro exĩko matose, tãkye Ritonõpo riry waro exĩko roropa matose te, zae ehtoh waro roropa matose exĩko.

Epezu 5:15

Naeroro tomeseke ehtoko oehtohkõ poko. Tuaro pyra exiketõ sã pyra ehtoko. Tuaro ehtoko.

Teuteronomiu 4:6

Naeroro tomeseke ehtoko yronymyryme ynyripohpyry tõ omipona oehtohkõme. Mame imehnõ oenetorỹko mã toto, tuaro exiketõme oekarotorỹko mã toto zae ehtoh waro exiketõme roropa. Mame Ritonõpo Omihpyry etaryhtao eya xine ynara ãko mã toto opoko xine: “Tuaro mokaro mã toto. Itamurume zuaro mã toto. Ahno imehxo mã toto.”

Koroxi 1:9

Naeroro mokyro omiry totase yna a exiryke oturukehpyra ynanase opoko xine Ritonõpo netaryme: “Koroxi põkõ akorehmako Papa typoko xine õsenetupuhtoh waro toto ehtohme. Zae ehtoh poko tuaro tyriko toto popyra ehtoh poko pyra toto ehtohme. Ouzenu a toto amorepapoko Papa,” ãko ase Ritonõpo a.

Koroxi 4:5

Jezu poetory tõ kara maro awahtao xine tuaro ehtoko toto maro, penekehpyra toto ehtohme. Ekurehpyra ehtoko. Etary se toto ahtao zuruko toto Jezu Kyrixtu poko.

1 Tesaronika 5:18

“Kure mase, Ritonõpo,” kahtoko eya. Emero popyra ahtao, morara kahtoko ro eya. “Kure mase,” kakehpyra rokẽ ehtoko. Morara kary etary se Ritonõpo oya xine mana, Kyrixtu Jezu poetoryme oexirykõke.

1 Peturu 4:2

Moino ro ãmoreme xine oorypyrykõ poko mexiatose. Taroino Ritonõpo omipona ehtoko, kokoro rokene. Oorypyrykõ poko penetara ehtoko.