18 “Kure mase Ritonõpo,” ãko ase eya. Kuesẽkõ eahmãko ro ase, ypynanohneme aexiryke.
Mame Ritonõpo omihpyry ẽ aroryhtao, Izyraeu tõ imoihmãkõ maro, tãkye toh nexiase kohkohtãko, rueimo etõko, enara.
Typenekehse ywy kure ehtoh eraximary poko, naeroro Ritonõpo jetaparyhtao, enetupuhnõko ro ase Jesẽme, zae jehtoh ekarõko ase ẽpataka.
Ritonõpo zamaro se ase jeremiatoh tonõ ke, ipoe tãkye jexiryke.
Atãkyematoko, Izyraeu tomo, Ritonõpo Oesẽkõ poko. Oseahmatoko, Jerusarẽ põkomo, Otuisarykõ poko.
Kuamorepako zae ehtoh poko jehtohme, zae rokẽ oexiryke, Jesẽme mase, Ritonõpo, Ypynanohne. Jũme oenetupuhnõko ase.
Ritonõpo Jesemy jezurume mana, ypynanohneme roropa; enaromyra exĩko ase. Jewomãko Ritonõpo mana popyra ehtoh ypoko pyra ehtohme; imehnõ zuno pyra jyrĩko mana ipunaka.
Eremiatoko Ritonõpo Kuesẽkõ eahmaryme, amarokõ emero aomiry omipona exiketomo. Atãkyematoko inyrityã poko, eahmatoko emero zae ehtoh poko exiketomo.
Yna jamihtanohpoko ropa, morarahtao yna, opoetory tomo atãkyemãko ropa ynanase.
Tãkye ehtoko Ritonõpo poko, amarokõ emero aomiry omipona exiketomo! “Kure mase,” kahtoko Ritonõpo kurano a, eahmatohme inyrihpyry poko.
Mame toremiase Moeze tomo Izyraeu tõ maro Ritonõpo Tosẽkõ eahmaryme. Ynara tykase toto: — Eremiãko ase Ritonõpo eahmaryme typoremãkapose toto eya exiryke, orẽpyrahxo toexiryke, kawaru tõ tomase eya, kawaru aronanõ maro tuna konõto kuaka.
Jewomane jamihme Ritonõpo mana. Eya typynanohse ywy; Ritonõpo Jesẽme mana, eahmãko ase. Papa Esẽme mana, eremiãko ase, Imehxo Aexiry poko.
Ypynanohneme Ritonõpo mana; enetupuhnõko ase, mame enaromyra ase exĩko. Yjamihtanohnõko Ritonõpo mana, orẽpyra jehtohme. Ypynanohneme mã ynororo.
Morarame moro ẽmepyry toehse ahtao ynara ãko mã toto emero: — Kuesẽkõme mokyro mana. Tonetupuhse ynororo kyya xine, mame typynanohse sytatose eya. Ritonõpo Kuesẽkõme enetupuhnõko sytatose. Seremiatone eahmaryme, satãkyematone takorehmase kuexirykõke eya.
Typahse kehko kakoxi ahtao oya xine, tarosẽme exĩko mana tyryrykane a, mame wirikane a sapararahme typahsẽme exĩko mã kehko. Morarame moro sã toehse ahtao tãkye exĩko matose ywy, Ritonõpo Oesẽkõme jexiryke. Mame jeahmãko matose, Izyraeu tõ Esẽ kurano.
Atãkyemãko Jerusarẽ põkõ mana, eremiãko mã toto Ritonõpo nyrihpyry poko. Niotakety sã pytakety sã roropa upo kurã ke tõtupohtose toto typynanopyrykõke, orẽpyra toehtohkõke roropa.
“Atãkyematoko, Jerusarẽ põkomo, ywy, Ritonõpo Oesẽkõ, nyrihpyry imehxo ehtoh pokoino. Konopo ekaroase oya xine zae konopo oehtoh po, ikonopotatoh po te, eina exisasaka ahtao roropa, konopo itamurume, osemazuhme ehtopõpyry samo.
Yrome ywy, Ritonõpo Jesemy eraximãko ase. Ypynanohnõko mana; moro enetupuhnõko ase yronymyryme. Jomiry etãko roropa mana.
Izyraeu tõ orutua kõ jamihme exĩko mã toto, soutatu tõ samo, tãkye exĩko mã toto eukuru ẽnanõ samo. Moro ekarory etãko ipoenõ mana, ipakomotyã roropa, mame tãkye exĩko mã toto. Atãkyemãko mã toto ywy, Ritonõpo, nyrihpyry poko.
Morohne onekarorykõ emero tõnõko matose Ritonõpo Kuesẽkõ nymenekahpyry po rokene. Moroto Ritonõpo ẽpataka onekarory pũ õnõko matose: amarokomo, omũkuru tomo, oẽxiry tomo te, anamoto tomo, rewita tomo apatary po exiketomo. Atãkyemãko matose, emero kure rokẽ oerohtoh tyripose Ritonõpo a exiryke.
Typynanohse matose Kuesẽkomo a tymaro oehtohkõme. Naeroro tãkye ehtoko kokoro rokene. Atãkyematoko, ãko ropa ase oya xine.
Wekyry tomo, atãkyematoko oetuarimarykohtao.
Jezu Kyrixtu onenepitopyra matose yrome ipyno matose. Onenepyra ro matose seromaroro yrome enetupuhnõko matose. Naeroro atãkyemãko matose ipunaka. Ãtãkyemarykõ kapuaõkõ tãkye exiry sã mana, ekuhpỹme sã mana tãkye kuhse oexirykõke.
Mame tõturuse Ana Ritonõpo a. Ynara tykase ynororo: Tãkye kuhse ase Ritonõpo poko typynanohse jexiryke eya; inyrihpyry pokoino ehxiropyra ase. Exianãko ase yse pyra exiketõ poko. Tãkye rokẽ ase takorehmase jexiryke Jesemy a.