Apakuke 2:19 - Ritonõpo Omiry: A Bíblia Sagrada na língua Aparai do Brasil

¹⁹ Tuãnohsẽme exĩko mokyro mana myhene ynara karyhtao wewe risemy a: “Apakako!” topu risã a roropa: “Owõko ty!” Mokyro neponãmary oturũko nae? Arypyra. Oturusaromepyra mana. Tyõtose uuru ke rokẽ exiryke, parata ke roropa. Yrome isene pyra mana.

Apakuke 2:19 ပူးပေါင်းရင်းမြစ်များ

Saumu 135:15

Imehnõ neponãmarykõ parata risẽme mã kehko, uuru risẽme roropa, ahno nyrityamo.

Saumu 135:17

Typanare toh mã repe, yrome otato pyra mã kehko; oseremara roropa mã kehko.

Saumu 97:7

Imehnõ neponãmary eahmananõ ehxirõko mã toto; epyrypaketõ tyneponãmarykõ poko ehxirõko mã toto. Ritonõpo Kuesẽkõ ẽpataka emero ritõ tõ tosekumurukõ po porohnõko mã toto.

Izaja 26:14

Mokaro ahno toorihse mã toto, oehpyra ropa mã toto isene toehtohkõme ropa; zuzenume rokẽ mã toto ẽsemãpyra ropa. Tuãnohse toto oya, tonahkase toto, ipoko xine tuenikehse imehnõ mana emero porehme.

Izaja 40:19

Ahno nyrihpyry sã pyra mana, uuru apuhsẽ sã pyra, parata risẽ sã pyra roropa.

Izaja 41:26

Onoky a morohne mekaroatose: ‘ynara exĩko mana,’ zae oexiry waro yna ehtohme? Morara kara mexiatose emero. Õmirykõ onetapitopyra imehnõ mana moro poko.

Izaja 44:17

Moro wewe zokonaka akoĩpyry ke ahno panõ axikãko mã ynororo, tyneponãmaryme. Imeĩpo tosekumuru po porohnõko mana mokyro eahmaryme. Oturũko mana eya: “Omoro mase yritõme; kypynanohko!” ãko.

Izaja 46:6

Ahno nae tytineru apoĩko mã toto, uuru pitiko rokẽ pyra, parata itamurume roropa, mame tyrine epehmãko mã toto moro uuru ke moro parata maro tyneponãmary ritohme. Mame porohnõko mã toto tosekumurukõ po tyneponãmarykõ eahmatohme.

Izaja 57:6

Topu serehmã kõ apoĩko matose iporiry kuae, oneponãmarykõme ehtohme, eahmatohme; anapyrykõ eukuru roropa rĩko matose toto ẽpataka onekarorykõme eya xine. Moro yzamaro ekarõko matou?

Jeremia 10:14

Morohne eneryke ahno a, tuaro pyrahme sã osekarõko mã toto, putupyra sã ipunaka. Tyneponãmary rinanõ ehxirõko mã toto tynyrityã ajohpe rokẽ exiryke, isene pyra exiketyme exiryke.

Jeremia 10:3

Mokaro enetuputyry typahsẽme sã mana ipunaka. Wewe akohnõko mã toto itu htao; mame ipoko erohkety moro wewe axikãko tytapema ke kehko, tyneponãmary rĩko mana.

Jeremia 10:4

Mame emeporyme parata rĩko uuru maro, perẽku ke tũpore tyrĩko mã toto apõ po epukara ehtohme, ehmopyra roropa ehtohme.

Jeremia 10:9

Mokaro neponãmary tyõtose parata ke Expania poe, uuru ke roropa Upaze poe; ahno nyrityã emero. Tupohtose mã kehko upo ke kamisa kurã risẽ ke, kamiraramã ke roropa tyrise emese kure exiketomo a.

Jeremia 2:27

Ehxirõko mã toto, emero ynara kananõ wewe risemy a: “Omoro mase papame” te, ynara kananõ roropa topu a: “Omoro mase ajame.” Morara exĩko mana, toeramase oexirykõke õparykõ ywinakoxi, oẽmytykõ eramara mexiatose ywinakoxi. Yrome popyra ehtoh toehse ahtao oya xine, oetuarimarykohtao oehnõko ya matose opynanohpotohkõme.

Jeremia 2:28

— Otoko na mokaro onyrityamo, oneponãmarykomo? Ah noehno toto oetuarimarykohtao, opynanohtohkõme ãkorehmarykõ waro toto ahtao. Juta tomo, onyrityã oneponãmarykõme tuhke exiry apatary tõ punero.

Jeremia 51:17

Morohne eneryke tyya xine ahno tõ emero putuhtome sã, tuaro pyra exiketõ sã osekarõko mã toto. Mokaro neponãmary rinanõ tãkye pyra exĩko mã toto tynyrityã ajohpãkõ, isene pyra exiryke.

Jeremia 51:47

Morarame okynã pyra Papironia neponãmarykõ wãnohtoh oehnõko mana. Papironia põkõ toehxirosẽme exĩko mã toto, orihnõko roropa mã toto, emero porehme.

Tanieu 3:1

Mame ahno panõ tapuhpose Napukotonozo a uuru risemy, kae exiry 27 meturume, ipuropuru 2,70 meturume. Moro tyripose eya xikihme ona amimomã pata Tura po, Papironia nonory po.

Tanieu 3:18

Mãpyra yna onypynanohpyra Ritonõpo ahtao ro tuaro exiko tuisa, oneponãmary oneahmara ynanase, onyripohpyry uuru risẽ oneahmara roropa ynanase, tykase toto.

Tanieu 3:29

Morara exiryke ynara tyripõko ase emero pata põkomo a te, emero ahno a, emero nono põkomo a, emero rokẽ omiry waro exiketomo a roropa: Ritonõpo, Satarake tõ Esẽ onykerekeremara ehtoko, Mesake maro, Apete-Neko, enara. Ikerekeremaryhtao tysahsahkasẽme exĩko mana, itapyĩkõ typahsẽme exĩko roropa mana. Ynara exiryke, imepỹ pyra exiryke, Ritonõpo mokaro Esẽ panono, typoetory tõ pynanohneme roropa mana.

Tanieu 3:7

Morarame rueimo tõkehko tõsetopitose ahtao, tosekumurukõ po typorohse imoihmãkomo mokyro ahno panõ, uuru risẽ eahmatohme.

Tanieu 5:23

Mãpyra osepeme pyra mexino Kapu Esemy a. Ikyryry tõ uuru risemy, kopu tõ, Itapyĩ tae tanỹse aexityã, tonehpose oya eukuru jehnahpyry ẽtohme, omoro, oeahmananõ maro, tuisa tomo te, ipyxiamo, imehnõ nohpo tõ maro, enara. Moro motye roropa imehnõ neponãmarykõ eahmãko mexiatose parata risemy te, uuru risemy, metau risemy, kurimene risemy te, wewe risemy, topu risemy, tonure pyra exiketomo, otato pyra exiketomo, zuaro pyra ipunaka exiketomo. Yrome Ritonõpo Imehxo Exikety oneahmara mekurehno, tyjamitunuru ke ahno etapãko mana ise tahtao, ipoe isene roropa sytatose. Emero opoko ehtoh menekãko mana.

Tanieu 5:4

Tyneponãmarykõ toahmapitose roropa eya xine, tynyrityã uuru risemy te, parata risemy te, metau risemy, kurimene risemy, wewe risemy, topu risẽ roropa, enara.

Jona 1:5

Tonaroxitapãse wapu aõkomo. Kui tykase toto: “Yna akorehmako!” tykase toto, kohtãko tyneponãmarykomo a repe. Mame mõkomo typahpitose eya xine, zohzohmehxo wapu ehtohme. Jona rokẽ nyhnõko nexiase tuenikaroro wapu ao. Tuaro pyra nexiase.

Atos 17:29

Naeroro Ritonõpo poenõme kuahtao xine, kynyrihpyrykõ sã pyra Ritonõpo mana. Uuru risẽ sã pyra, parata risẽ sã pyra, topu risẽ sã pyra, enara.

Apokaripxi 17:4

Tupõ tamuruse nohpo a nexiase tahpiremy. Emeporyme uuru risẽ nae nexiase, topu kurã roropa typyne exiketomo, kasuruimo roropa. Emahpo kasana nae nexiase uuru risemy. Moro kasana pehme nexiase iirypyry ke nuriame exikety ke roropa, typoko imeimehnõ ehtopõpyry epehpyry ke.