2 Tuisa 15:25 - Ritonõpo Omiry: A Bíblia Sagrada na língua Aparai do Brasil

²⁵ Morarame Peka, Remaria mũkuru, Pekaia soutatu tõ esemy tãtamorepase 50me Kireate põkõ maro, tosẽkõ etapary poko. Mame Pekaia totapase eya xine osa jamihme exikety tao, tuisa tapyĩ konõto tao Samaria po, mame tosẽ myakãme tuisame toehse ynororo.

2 Tuisa 15:25 ပူးပေါင်းရင်းမြစ်များ

1 Tuisa 16:18

Mame typatary poremãkatopõpyry eneryke tyya, Ziniri tomõse tapyi konõto taka, osa jamihmã taka irãnao, apoto tukase eya, tapyi tyahkase eya, toorihse ynororo apoto htao.

1 Tuisa 16:9

Toiro ipoetory tõ esẽ, Ziniri tãtamorepase tosẽ etapary poko. Era kyryry tõ kahu tõ zokonaka esẽme Ziniri kynexine. Morarame Tiriza po Era kynexine Arasa tapyĩ tao eukuru ẽnõko, etỹnõko. Tuisa tapyĩ konõto eraseme Arasa kynexine.

2 Tuisa 15:10

Mame Sarũ, Jape mũkuru tãtamorepase tuisa Zakaria etapary poko. Totapase ynororo eya Ipireão po, mame imyakãme toehse ynororo tuisame.

2 Tuisa 15:24

Tyyrypyry poko kynexine ynororo, Ritonõpo, Izyraeu tõ Esẽ omipona pyra. Tuisa Jeropoão, Nepate mũkuru nyrityã xihpyry onurumekara kynexine; Izyraeu tõ takorehmase eya tyyrypyrykõ poko toto ehtohme.

2 Tuisa 15:26

Imehnõ Pekaia nyrihpyry emero tymerose pape pokona, esety Izyraeu tõ Tuisary Ehtopõpyry.

2 Tuisa 15:27

Morarame 52 jeimamyry taropose Uzia ahtao Juta tõ esẽme, Peka, Remaria mũkuru tuisame toehse Izyraeu tõ esẽme. Mame 20me jeimamyry taropose eya tuisame toexiry poko Samaria po.

2 Tuisa 9:14

Morarame Jeu tãtamorepase tuisa Jorão etapatoh poko. Jezereu po tuisa Jorão nexiase, ekurãkãko. Morotona toytose ynororo tyyryhmase ahtao, osetaparyhtao tuisa Hazaeu, Xiria esẽ maro, Ramote-Kireate po. Naeroro ynara tykase Jeu tymarõkõ soutatu tõ esamo a: — Ymaro awahtao xine tomeseke ehtoko tarõkõ ytopyra ehtohme tokare pyra, Ramote-Kireate poe Jezereu põkõ zuruse ypoko.

2 Tuisa 9:5

Moroto soutatu tõ esẽkõ tonese eya oximõme. Ynara tykase ynororo: — Omi enehno ekarotohme oya, tykase. — Onoky a morara ãko mah? tykase Jeu. — Oya, pãna! tykase ynororo.

2 Koronika 28:6

120 miu Juta tõ soutatu tõ orẽpyra exiketõ totapase eya xine toiro ẽmepyry ae ikohmamyry pona. Morara tyripose Ritonõpo a, Tosẽkõ, tytamurukõ Esẽ turumekase Juta tomo a exiryke.

Izaja 7:1

Morarame Akaze, Jotão mũkuru, Uzia pary tuisame ahtao Juta tõ esẽme, etonatoh toehse. Rezĩ tõ tooehse Xiria tuisary, Peka maro Remaria mũkuru, Izyraeu tõ esemy, pata Jerusarẽ poremãkase repe. Yrome onyporemãkasaromepyra toh nexiase.