2 Peturu 3:10 - Ritonõpo Omiry: A Bíblia Sagrada na língua Aparai do Brasil

¹⁰ Yrome Kuesẽkõ oehnõko mana. Tuamekaro rokẽ tapyi esẽ ahtao omato oehnõko mana. Moro saaro onenetupuhpynõ tuamekaro ahtao Kuesẽkõ oehnõko ropa mana. Aepyry ropa ahtao kapu osenepyra exĩko mana, panaikato maro. Kapuaõkõ xixi tõkehko zahnõko mã kehko, enahnõko mã kehko. Sero nono tõkehko roropa osenepyra exĩko mana.

2 Peturu 3:10 ပူးပေါင်းရင်းမြစ်များ

Saumu 102:26

Sero nono kapu roropa enahnõko mã kehko, yrome omoro jũme isene exikehpyra exĩko mase. Sero nono kapu roropa atahnikaketyme sã mã kehko, upo samo. Mokarohne myakamãko mase upo myakãmary samo, typahsẽme exĩko mã kehko.

Saumu 46:6

Imehnõ nonory põkõ oserehnõko mã toto, mokaro kowenu tõ tyjamihkehkasẽme mã toto. Oturũko mã Ritonõpo konomeru samo, tuname sero nono exĩko mana.

Saumu 97:5

Ypy tõ tunatãko mã kehko moronapu samo Kuesẽkõ ẽpataka, sero nono emero esẽ ẽpataka.

Izaja 2:12

Moro ẽmepyry toehse ahtao tuisamãkõ emero poremãkapõko Kuesẽkõ Jamihmehxo Exikety mana, epyrypaketõ poremãkapõko mana, imehnõ motye tuisamehxo toexirykõ se exiketõ maro.

Izaja 24:19

Sero nono kywyh ãko, tyrakasẽme exĩko, tykararahsẽme exĩko mana ipunaka.

Izaja 34:4

Xixi te, nuno roropa, xirikuato tõ roropa enahnõko mana, kapu amẽnõko mana pape samo tamẽse ahtao. Xirikuato tõ epukãko mã kehko kapu ae, uwa ary epukary samo, wikeira ary sã roropa.

Izaja 51:6

Osenuhmatoko kakoxi kapu enetoko, nono enetoko roropa. Kapu osenepyra exĩko mana orexĩto samo, sero nono osenahkãko mana upo samo pakatome toehse ahtao, ahno epõkõ orihnõko mã toto moromoro samo. Yrome tuisame imehxo jehtoh osenahkara mana jũme, yjamitunuru jũme enahpyra exĩko mana.

Joeu 1:15

Moro ẽmepyry oehnõko, myhẽ mana! Kuesẽkõ ẽmepyryme exĩko. Sero enahkapõko Kuesẽkõ Jamihmehxo Exikety mana. Oserehtoh konõto exĩko moro ẽmepyry ae mana!

Joeu 2:1

Rue tõ etotoko ypy Xião po, toto tuarõmatoh etotoko ypy kurã po! Tykytyky kahtoko enaromỹke oehtohkõke Juta tomo! Ritonõpo ẽmepyry oehnõko oya xine exiryke.

Joeu 2:31

Xixi kohmãnõko mana, nuno kamirarame exĩko munu samo, Ritonõpo ẽmepyry oehpyra ro ahtao, imehxo ehtopo te, oserehtoh konõto exĩko.”

Joeu 3:14

Tuhkãkõ maro tuhkãkõ moroto mã toto Jakanahmã Atapiakatoh po. Morotona Ritonõpo ẽmepyry oehsasaka mana.

Amoxi 9:13

— Ẽmepyry oehnõko mana: tiriiku ahtãko axihxo, apoinanõ motyẽkãko mana, uwa zoko axihxo eperytãko, eukuru riry poko erohketõ motyẽkãko roropa mana. Tuhkehxo uwa eperytãko mana, eukuru itamurume exĩko iporiry samo.

Amoxi 9:5

Ritonõpo, yna Esemy, Jamihmehxo Exiketyme mase, sero nono tapose ahtao oya, tykytyky ãko mana, sero nono põkõ emero xitãko mã toto toemynyhmarykõme. Sero nono onuhnõko mana, yhtõko roropa mana tuna Niro tunary samo.

Mikeja 1:4

Mame ipupuru tõ zopino ypy tõ tunatãko mã kehko; moronapu sã mã kehko apoto htao; sararakame ytõko mã jakanahmã pona tuna sararakaneme samo.

Naum 1:5

Ritonõpo ẽpataka, ypy tõ tykytyky ãko mana, somohmã tõ atakuhmõko mã kehko. Oseneporyhtao nono tykytyky ãko, ipõkõ emero nono pona epukãko mana.

Marakia 4:5

— Yrome moro ẽmepyry ae, popyra ehtoh oehpyra ro ahtao ywy, Ritonõpo, ypoetory urutõ Eria enehpõko ase.

Mateu 24:35

Kapu enahnõko mana. Sero nono roropa enahnõko mã repe. Yrome jomiry jũme enahpỹme exĩko mana.

Maku 13:31

Kapu enahnõko mana. Sero nono roropa enahnõko mã repe. Yrome jomiry jũme enahpỹme exĩko mana, tykase Jezu.

Ruka 12:39

Omato oepyry waro tapyi esẽ ahtao, tytapyĩ taka omato anaomõnohpopyra aexiry mana, tymõkomory onematonanohpopyra toehtohme.

Romanos 8:20

Ritonõpo nyrityã emero orihnõko mana, atahnikãko. Toorikyrykõ se pyra repe. Yrome pake Ritonõpo a tahnikapose toto, iirypyryme toehse Atão exiryke. “Toiparo rokẽ ytoytõko mã toto ynyrityamo,” tykase Ritonõpo. Morarame kukurãkarykõ ropa, eraximãko sytatose. Emero Ritonõpo nyrityã kurãkary ropa eraximãko sytatose.

1 Korĩtiu 1:8

Kokoro rokẽ poremãpyra oritorỹko Ritonõpo mana onenetupuhkehpyra oehtohkõme, tyyrypyhpyke pyra oehtohkõme Kuesẽkõ Jezu Kyrixtu oepyry ropa ahtao.

1 Korĩtiu 5:5

Naeroro Jezu jamitunuru poe mokyro iirypyryme aexihpyry a ynara kahtoko: “Joroko tamuru oesẽme mana,” kahtoko eya, tyyrypyry xihpyry se pyra aehtohme ropa. Otarãme orihnõko mana. Yrome tyyrypyry rumekary ropa ahtao eya orihpyra ro ahtao ipynanohnõko Ritonõpo mana Kuesẽkõ oepyry ropa ahtao.

2 Korĩtiu 1:14

Seromaroro pohto rokẽ moro enetupuhnõko matose. Morarame Kuesẽkõ Jezu tooehse ropa ahtao tãkye kuhse exĩko matose yna poko. Morararo opoko xine tãkye kuhse exĩko ynanase.

1 Tesaronika 5:2

Omato oepyry sã, Kuesẽkõ oepyry mana. Tokare pyra oehnõko mana.

1 Tesaronika 5:4

Wekyry tomo, mokaro sã pyra matose tuaro oexirykõke. Oserehpyra matose, omato oepyry sã pyra Jezu oepyry oya xine mana,

2 Peturu 3:11

Senohne emero enahkapõko Ritonõpo mana. Moro waro matose. Naeroro oorypyrykõ poko pyra ehtoko ipunaka. Kokoro rokẽ Ritonõpo omipona ehtoko.

2 Peturu 3:12

Tumũkuru Jezu Kyrixtu enehpõko ropa Ritonõpo mana. Aepyry ropa imomohtoko. Aomipona ehtoko axĩ aehtohme ropa. Aepyry ropa ahtao kapu zahnõko mana. Enahnõko mana. Xixi tõkehko etunamãko. Iporiry sã exĩko axitũ moino exiryke.

2 Peturu 3:7

Yrome seromaroro Ritonõpo poe ro kapu tõkehko enahpyra ro mana. Sero nono roropa enahpyra mana. Imeĩpo kapu enahkapõko mana apoto ke. Tõmiry ke sero nono roropa enahkapõko mana. Senohne enahkaporyhtao tyya tõmipona pyra exiketõ tuarimapõko mana iirypyrymãkomo. Toto enahkapõko mana, enara. Moro waro se pyra mokaro mana.

Juta 1:6

Wenikehpyra ehtoko roropa Ritonõpo nenyohtyã poko. Toitoine mokaro imehxo toexirykõ se toehse. “Ritonõpo sã orẽpyra sytatose,” tykase toto ajohpe. Ritonõpo ime exiry typoenohse eya xine. Morara exiryke mokaro ẽmãko Ritonõpo mana etuarimatoh taka. Keti ke sã tymyhse mã toto jũme xinukutumao. Tũtara mã toto apiakatoh konõto eraximatohme toto a. Tooehse ropa Jezu ahtao: “Popyra matose ya,” ãko mã eya xine. Wenikehpyra ehtoko mokaro poko, Ritonõpo ime exiry poenohnanõ poko.

Apokaripxi 16:15

“Etatoko pahne,” ãko Jezu kyya xine. “Jeraximara awahtao xine omato oepyry sã oehnõko ropa ase zuaro pyra awahtao xine. Tãkye exĩko matose tuaro awahtao xine, nyhpyra exikety sã awahtao xine, ãtakimahpyry sã awahtao xine. Morara awahtao xine tupokã sã ytoytõko matose, ehxiropyra roropa matose.”

Apokaripxi 20:11

Morarame tuisa apõ konõto enease, karimutumano. Tapõ po typorohse exikety enease roropa. Ewinoino sero nono toepase samo, kapu roropa toepase samo, osenepyra toehse.

Apokaripxi 21:1

Morarame kapu enease tyrisenano. Nono roropa tyrisenã enease. Pakatokõ kapu nono maro osenepyra toehse. Tuna konõto pyra nexiase roropa.

Apokaripxi 3:3

Naeroro ãmorepatopõpyrykõ poko wenikehpyra ehtoko. Onetahpyrykõ poko roropa wenikehpyra ehtoko. Aomipona ehtoko oorypyrykõ irumekatoko ropa. Pakara awahtao xine omatome oehnõko ase oya xine. Mame joepyry ropa waro pyra matose exĩko.

Apokaripxi 6:14

Mame osenepyra toehse kapu, pape amemyry samo. Ypy tõ tysyryhmase esae xine, ahmõta tõ roropa esae xine tysyryhmase.