Xiakre 4:5 - Tĩrtũm kapẽr ã kagà nyw

⁵ Tĩrtũm kapẽr ã kagà htũm kot tanhmã Karõ jarẽnh to nẽ harẽnh kot: Na pre Tĩrtũm mẽ pahwỳr amnhĩ Karõ rẽ nhũm mẽ pahwỳr wrỳ nẽ mẽ pakamã agjê nẽ mẽ pahkôt pa ho pa. Mẽ pahte hkôt pix mã amnhĩ nhĩpêx o papaja na kãm hprãm. Anẽ. Ãm hãmri ã harẽnh kot anhỹr jakamã kwa kêr ka mẽ harẽnh ma nẽ kãm ajamaxpẽr tỳx rãhã ho ri apa.

Xiakre 4:5 ပူးပေါင်းရင်းမြစ်များ

Juãw 10:35

Ãm hãmri na Tĩrtũm kapẽrja. Tãm kot ã mẽ harẽnh kot anhỹr. Mẽ kot ỹ hã mẽ kãm kapẽr jakamã te mẽ kêp uràk ã mẽ harẽnh anhỹr kênã.

Juãw 19:37

Nẽ Tĩrtũm kapẽr ã kagà htũmja mããnẽn ja hã harẽnh kot: Mẽ kot hpĩr nẽ hkanhwỳr xwỳnhja koja mẽ hpar pê omunh o kuhê. Anẽ. Tĩrtũm kapẽr ã kagà htũm kamã ã Jejus tyk kukamã harẽnh kot anhỹr.

Juãw 7:42

Tĩrtũm kapẽr ã kagà htũm kot kêp Garirej nhõ xwỳnh ã harẽnh kêt. Kêp Pahi Tawi hkanrẽhã hkagrõt nyw jakamã koja uràk nẽ Jutej kamã krĩ pê Perẽj kamã kato. Jao koja uràk nẽ kêp Jutej nhõ xwỳnh. Anhỹr o ri axpẽn mã harẽ. Mẽ kot htỳx Jejus pika pê Garirej kamã kator ã hkamnhĩx jakamã ã axpẽn mã harẽnh anẽ. Nom pika pê Jutej kamã na pre kato. Krĩ pê Perẽj kamã. Tã no nhũm mẽ hkwỳjaja ja hã mar kêt jakamã kêp Tĩrtũm kot mẽ pahwỳr mẽnh xwỳnh kêt ã hkamnhĩx.

Atre 7:9

—Jako hkrajê hõ na pre kêp Juje. Nhũm Juje htõjaja hipêêxà hkôt kamã gryk nẽ axtem nẽ mẽ urojê mã ho wẽnê nhũm mẽ kêp haprô nẽ ma pyka pê Ejit wỳr o mõ. Amarĩ Ejit nhõ xwỳnhjê mã àpênh o pa kaxyw. Tã no nhũm Tĩrtũm arĩ tãnopxar rãhã ho hkôt pa.

Rõmãn 1:29

Hãmri nẽ mẽmoj punuj pix mã hamaxpẽr. Nẽ kãm amnhĩ mex pix prãm mã hamaxpẽr. Nẽ kãm axpẽn tomnuj pix prãm. Nẽ mẽmoj tã axpẽn kãm gryk pix prãm. Nẽ mẽ kãm axpẽn par pix prãm. Nẽ mẽmoj tã ri kãm axpẽn mã àkjêr prãm. Nẽ mẽmoj tã kãm axpẽn mã hêx prãm. Nẽ kãm axpẽn kaxyw tanhmã hamaxpẽr punuj to pix prãm. Nẽ kãm tanhmã axpẽn to kapẽr punuj to pix prãm.

Rõmãn 9:17

Amnepê mã Ejit kãm mẽ õ pahihti Paraohti hwỳr na pre Mojes mẽ nhũm ma hwỳr mõ nẽ kãm tanhmã Tĩrtũm kapẽr jarẽnh to nẽ kãm: —E Tĩrtũm na awỳr inhmẽ pa mõ. Tãm na pre apê Ejit nhõ xwỳnhjê nhõ pahi kaxyw axãm. Akrã hihtỳx tã nhũm mẽ kaxyw axãm. Tã ra xatã àhpumunh tỳx o tanhmã anhĩpêx to. Krĩ piitã hkôt ri mẽ pa xwỳnhjaja kot atã harẽnh mar nẽ àhpumunh o àhpumunh ã omunh kaxyw. Tã ixte amã ja jarẽnh kaxyw na pre awỳr inhmẽ pa man awỳr mõ. Anẽ.

Wam Korĩt 6:19

Mẽ panhĩ kamã na hte Tĩrtũm Karõ agjê nẽ kamã hkrĩ. Tĩrtũm na pre mẽ pahwỳr kurẽ nhũm mẽ pahkarõ mã agjê pu mẽ te mẽ pahpê õrkwỹ pyràk. Jakamã na pu htem amnhĩ krã hkôt pahtỳx ri mẽmoj tanhmã ho ho papa hkêt nẽ. Ãm Tĩrtũm jamaxpẽr xà hkôt pix mã na pu htem tanhmã mẽmoj nhĩpêx to ho papa.

Sikũn Korĩt 6:16

Na pu htem Tĩrtũm mã amnhĩ jarẽnh xà hã ixkre kamã sãnti xunhwỳr nẽ amnhĩ to hwỳr pê kãm mex o mex ã harẽnh kêt nẽ. Axtem na sãntija. Mẽ panhõ Tĩrtũmja sãnti rom htĩr tũm rãhã nẽ pa ho pa xwỳnh. Nẽ mẽ papajaja te mẽ pahpê Tĩrtũm nhõrkwỹ pyràk. Kapẽr ã kagà htũm kot ja jarẽnh kot: Ixkrajaja te kêp inhõrkwỹ nhũm ixpê õ dõn pyràk. Te ixpê inhõrkwỹ kamã ixpa xwỳnh pyràk jakamã kot paj ixkrajê kamã ri ixpa ho ixpa. Ixpê Mẽhpãm na pa. Anẽ.

Karatas 3:8

Nẽ mẽ apê Ijaew kêt xwỳnhjaja. Na hte Tĩrtũm mẽ pahto hpimràk tã mẽ pahte amnhĩ kaxyw kãm pajamaxpẽr ã mẽ pahpumunh kôt amnhĩm mẽ pamex ã mẽ pajarẽ nẽ mẽ pahto hkra. Amnepêm na pre Apraãw mã kapẽr nẽ kãm: E ate amnhĩ kaxyw ixkôt ajamaxpẽr jakamã kot paj akukwak ri pyka piitã hkôt mẽ piitã mẽ ho mex nẽ. Anhỹr o kãm kapẽr jao mããnẽn mẽ apê Ijaew kêt xwỳnhjê jarẽ.

Xitre 3:3

Kormã mẽ pahte hkôt amnhĩ xunhwỳr kêt ri na pu prem ã amnhĩ nhĩpêx anhỹr kêt nẽ. Na pu prem Tĩrtũm mã pajamaxpẽr kêt nẽ kapẽr kôt ri amnhĩ nhĩpêx hkêt nẽ. Nẽ amnhĩ tomnuj pix kukamã pajamaxpẽr o ri papa. Nẽ amnhĩ pix kukamã pajamaxpẽr. Jao mẽ pamã pam amnhĩ nhĩpêx prãm xà kôt pix mã tanhmã amnhĩ nhĩpêx to ho ri papa. Nẽ axpẽn tomnuj nẽ. Nẽ axpẽn kãm pagryk rãhã ho papa. Ã mẽ pahte amnhĩ nhĩpêx anhỹr ho papa jakamã nhũm pre mẽ piitã kãm mẽ pahkĩnh kêt nẽ. Pu mẽ pajaxwỳja pamã mẽ hkĩnh kêt nẽ.