Xiakre 2:15 - Tĩrtũm kapẽr ã kagà nyw

¹⁵ Nẽ xà koja mẽhõ kêp amrakati nẽ ri pa. Nẽ ê pynajre pix jagjê nẽ ri hã pa. Nẽ õ hkêt nẽ ri kãm prãm nẽ pa.

Xiakre 2:15 ပူးပေါင်းရင်းမြစ်များ

Makre 14:7

Mẽ kêp amrakati xwỳnhjaja koja mẽ arĩ mẽ akôt pa rãhã nẽ. Ka mẽ amã mẽmo arĩgro hã mẽ ho ajuta hprãm nẽ tanhmã mẽ ho ajuta hto nẽ mẽ kãm mẽmoj gõ. No pa kot paj ri mẽ akôt ixpa ka mẽ ixto mex ry ho apa hkêt nẽ. Kot paj tokyx mẽ are.

Rukre 3:11

Hãmri nhũm mẽ kãm: —Nà kêr ka mẽ axpẽn kãm axukaprĩ ho ri apa. Nẽ mẽ kêp amrakati xwỳnhjê mã amnhĩ kutã mẽmoj nhõr o ri apa. Nẽ mẽ anhĩnôhkà axkrut nẽ mẽhõ hinôkà hkêt xwỳnhjê mã ho pyxi nẽ agõ nẽ pyxi nẽ ho arĩk. Nẽ mẽ axàpkur xà ho anhõxỳ ho apa hkêt nẽ. Ãm axàmnhĩx ri mẽ kêp amrakati xwỳnhjê mã amnhĩ kutã mẽ kãm mẽmoj to hkryre nẽ agõ. E kêr ka mẽ ã axpẽn nhĩpêx anhỹr o ri apa. Anẽ.

Atre 9:29

Nẽ Ijaew kwỳ pê Gresjê kapẽr o mẽ kapẽr xwỳnhjê mã nhũm xatã mẽ kãm Jejus jarẽnh o ri mẽ hkôt pa. Kêp Tĩrtũm kot mẽ pakaxyw ãm xwỳnh ã harẽnh rãhã ho ri mẽ hkôt pa. No nhũm mẽ kãm mar prãm kêt nẽ ra kot Jejus ã hpĩr mã.

Eprêw 11:37

Nhũm prem kẽn rũnh o mẽ hkwỳjê htak o mẽ kupa. Nẽ mẽ hayr o mẽ hkwỳjê pa. Nẽ mẽ hkamnhwỳr o mẽ hkwỳjê pa. Ã na prem Kris kôt mẽ hamaxpẽr ã mẽ omunh xà hkôt mẽ hipêx anhỹr o pa. Jakamã na pre mẽ hkwỳjaja mẽ umaj mẽõ krĩ rũm hapôj nẽ ma hprõt nẽ mra. Nẽ te mẽ õ krĩ hkêt pyrà nẽ kapôt ã kêp amrakati nẽ ri pa. Mẽ ê hkêt nẽ ôwêhti hkà ho ê nẽ ri hã pa. Nẽ motre kà ho amnhĩ pre nẽ ri hã pa. Nẽ kẽn prêk ã api nẽ kre kamã hpimxur o pa. Nẽ pika hkre kamã hpimxur o pa. Nhũm mẽ kãm mẽ hkurê xwỳnhjaja te mẽ kêp ahpunu nẽ mẽ kêp ahkro pyràk o mẽ hipêx nẽ axpẽn mã mẽ harẽnh o: —Nà mẽ mexti hã. Kwa pu mẽ piitã mẽ himex paa ri. Anhỹr o mẽ harẽnh tã nhũm Tĩrtũm mẽ uràk nẽ ã mẽ harẽnh anhỹr kêt nẽ. Na pre mẽ mex kumrẽx ã mẽ harẽ. Nẽ nhỹrmã kuri mẽ mex nẽ pa ho pa hkukamã mẽ harẽ.

Xiakre 2:5

Kwa mẽ inhma ixkwỳjaja. Mẽ kêp amrakati xwỳnhjaja mẽ hikàxpore hkêt tã na hte mẽ hkwỳjaja amnhĩ kaxyw Tĩrtũm kôt hamaxpẽr nẽ hkôt amnhĩ xunhwỳ nhũm amnhĩ tã mẽ omu nẽ kot mẽ panhĩpêx pyrà nẽ mẽ ho hkra. Jakamã jar mẽ kêp amrakati htã na htem amnhĩ kaxyw Tĩrtũm kôt hamaxpẽr tỳx rãhã ho pa. Jakamã koja mẽ nhỹrmã kuri htĩr tũm nẽ mex kumrẽx nẽ pa ho pa. Mẽ kãm Tĩrtũm kĩnh o mẽ pa xwỳnh piitã koja mẽ nhỹrmã ã mex nẽ ri pa anẽ.