Wam Pêtre 2:1 - Tĩrtũm kapẽr ã kagà nyw

¹ Nẽ kwa kêr pu mẽ axte tanhmã amnhĩ tomnuj to ho ri papa hkêt nẽ. Rỳ tanhmã axpẽn mã paxêx to hkêt nẽ. Nẽ paxêx rom tanhmã ri axpẽn nokupyr to hkêt nẽ. Nẽ mẽmoj tã axpẽn kãm pagryk kêt nẽ. Nẽ tanhmã axpẽn japrỳ hto hkêt nẽ. Kêr pu mẽ ã amnhĩ nhĩpêx anhỹr o papa hkêt kumrẽx.

Wam Pêtre 2:1 ပူးပေါင်းရင်းမြစ်များ

Matêwre 15:7

Mẽ ate Tĩrtũm kôt amnhĩ nhĩpêx ã amnhĩ jarẽnh tã ãm amnhĩ to axêx nẽ hkôt amnhĩ nhĩpêx kêt nẽ. Na pre Tĩrtũm amnepêm mẽ akukamã tanhmã mẽ ajarẽnh to. Nhũm ỹ hã mẽ kãm kapẽr jarẽnh xwỳnh Ijaisja ô ri mẽ kãm mẽ ajarẽ nẽ hã kagà. Te Tĩrtũm tãm kot mẽ ajarẽnh pyràk.

Matêwre 23:28

Ja pyrà nẽ ã mẽ ate amnhĩ nhĩpêx anhỹr. Kapôt rũm mẽ anhĩja na mex. Te mẽ ate mẽ ho mex o apa pyràk o na ka htem amnhĩ nhĩpêx nhũm mẽ ãm akrãhkà pix pumu nom ãm mẽ akrã hi kaxwỳnh kãm mẽ ajamaxpẽr punuj rãhã hã mẽ apumunh kêt nẽ. Mẽ ate tanhmã mẽ no kupyr to pix kukamã ajamaxpẽr jakamã te mẽ ate mẽ htykjê jagjênh xà pyràk.

Matêwre 24:51

Hãmri nẽ kamã gryk tỳx nẽ tanhmã homnuj htỳx to nẽ kãm mẽ àpênh punuj xwỳnhjê mẽ mẽ ho hpimrààtã amnhĩ nê mẽ kator pa. Hãmri nẽ mẽ kot kapẽr kwỳm amnhĩ nhĩpêx xwỳnhjê mẽ mẽ ho hpimrààtã tanhmã mẽ homnuj to nẽ amnhĩ nê mẽ kator. Hãmri nhũm mẽ tee ri amnhĩ kukamã hamaxpẽr nẽ mur nẽ tee ri amnhĩ nhĩpêx. Tã kêr ka mẽ ixwakre kamã ho mẽ uràk kêt nẽ. Mẽ kurom ixwakre kamã ixkapẽr kôt amnhĩ nhĩpêx mex rãhã ho ri apa. Anẽ.

Makre 12:15

Nhũm prem ã hêx rom ja hã hkukjêr anhỹr tã no nhũm Jejus mẽ hamaxpẽr ã mẽ omunh mex mẽ mẽ kãm: —Tk. Kwa mon ka mẽ axêx rom ja hã ixkukja? E mẽ atõ inhmã kàxpore htỳxre hõ gõ pa omu. Anẽ.

Rukre 11:44

—Kwa mẽ o kora. Kot ka mẽ amex kêt nẽ. Mẽ kot mẽ akapẽr mar nẽ mẽ akôt amnhĩ nhĩpêx xwỳnhjaja te mẽ kot htỳx ri mẽ hã pika nhĩmõk ã ri mẽ pa xwỳnh kot amnhĩ nhĩpêx pyràk. Jao mẽ ate amnhĩ to mex ã amnhĩ kamnhĩx nom mẽ ate amnhĩ to mex kêt. Te mẽ kot pika mex ã hkamnhĩx nẽ htỳx ri mẽ hã pika nhĩmõk ã ri mẽ pata pyràk o na htem amnhĩ nhĩpêx. Anẽ. Nhũm pre ã Jejus Parijew nhõ xwỳnhjê mã mẽ kot amnhĩ nhĩpêx jarẽnh anẽ.

Rukre 12:1

Tã nhũm mẽ Jejus ã htu rax kumrẽx nẽ hã axpẽn nhĩgãnh o kuhê. No nhũm kormã mẽ kãm tanhmã kapẽr to hkêt nẽ. Ãm kormã hkôt mẽ pa ho mẽ pa xwỳnhjê kumrẽx mã kapẽr nẽ mẽ kãm: —Mẽ piitã kãm amnhĩ kwỳjê pê hamaxpẽr punuj o hpimxur hprãm tã koja nhỹrmã mẽ hamaxpẽr piitã amnhĩrĩt pa. Nẽ mẽmoj piitã ra hpimxur mex tã koja nhỹrmã piitã amnhĩrĩt pa. Nẽ mẽ kot kamàt kô kamã hpimxur pê mẽmoj jarẽnh tã koja mẽ piitã nhỹrmã kot mẽmoj jarẽnhta ma. Nẽ mẽ kot hitom kãm kawax pê axpẽn mã mẽmoj punuj jarẽnh tã koja nhỹrmã mẽ piitã mẽmoj jarẽnhta ma. Jakamã kwa kêr ka mẽ tanhmã Parijew nhõ xwỳnhjaja kot amnhĩ nhĩpêx to ho pa hã mẽ omu nẽ ãm mẽ omu nẽ mẽ hkôt amnhĩ nhĩpêx kêt nẽ. Te mẽ kot tãm amnhĩ nhĩpêx pyràk o amnhĩ nhĩpêx tã no ãm tãm amnhĩ nhĩpêx o pa hkêt. Na htem ãm htỳx ri tanhmã amnhĩ to hêx to ho pa. Tã kêr ka mẽ uràk nẽ ã amnhĩ nhĩpêx anhỹr kêt nẽ. Anẽ.

Juãw 1:47

Hãmri nhũm Jejus amnhĩ wỳr wa omu nẽ kuri mẽ kuhê xwỳnhjê mã Natãnaew jarẽnh kurê kumrẽx nẽ harẽnh o: —E onẽj Ijaew õja mẽ pahwỳr hpôx o tẽ. Ãm hãmri na hte tãm amnhĩ nhĩpêx o pa. Na hte higêt finat Jako kurom hêx rom ri tanhmã mẽ kãm amnhĩ to hêx to ho pa hkêt nẽ. Na hte ãm kapẽr mex pix o ri kapẽr o pa. Anẽ.

Rõmãn 1:29

Hãmri nẽ mẽmoj punuj pix mã hamaxpẽr. Nẽ kãm amnhĩ mex pix prãm mã hamaxpẽr. Nẽ kãm axpẽn tomnuj pix prãm. Nẽ mẽmoj tã axpẽn kãm gryk pix prãm. Nẽ mẽ kãm axpẽn par pix prãm. Nẽ mẽmoj tã ri kãm axpẽn mã àkjêr prãm. Nẽ mẽmoj tã kãm axpẽn mã hêx prãm. Nẽ kãm axpẽn kaxyw tanhmã hamaxpẽr punuj to pix prãm. Nẽ kãm tanhmã axpẽn to kapẽr punuj to pix prãm.

Wam Korĩt 14:20

Kwa mẽ ixkapẽr ma nẽ mar tỳx nẽ. Nẽ mẽhprĩrejê jamaxpẽr o ajamaxpẽr kêt nẽ. Ãm Kris kôt mẽ àptàr tũmjê jamaxpẽr o mãn kêt mẽ ajamaxpẽr o ri apa. Ãm mẽmoj pixire hkôt kot kaj mẽ ãm hãmri te mẽhprĩjê jamaxpẽr pyràk o ajamaxpẽr. Mẽhprĩjaja na htem mẽmoj punuj kukamã hamaxpẽr kêt nẽ. Na htem ãm htỳx pa. Tã kêr ka mẽ uràk nẽ mẽmoj punuj kukamã ajamaxpẽr o ri apa hkêt nẽ.

Wam Korĩt 5:8

Jakamã na pu htem ãm amnhĩ to mex pix o ri papa. Nẽ tãm amnhĩ nhĩpêx o ri papa. Jao tanhmã amnhĩ tomnuj to ho ri papa hkêt nẽ.

Sikũn Korĩt 12:20

Tã kot paj jatã ma mẽ awỳr mõ ka mẽ akwỳjaja tanhmã amnhĩ tomnuj to japêr. Mẽmoj tã axpẽn mã axàkjêr o apa. Rỳ mẽmoj tã axpẽn kãm agryk. Rỳ axpẽn kãm agryk tokyx anhỹr o apa. Rỳ axpẽn pê anhõxỳ. Rỳ axpẽn to akapẽr punuj o apa. Rỳ mẽ ajakwa kamã nhãm mẽ hixi ho rêr o ri apa. Rỳ amnhĩ to rũnh prãm xàj anhmã amnhĩ nhĩpêx to ho apa. Kot kaj mẽ ã amnhĩ nhĩpêx anhỹr o ri apa pa ja hã mẽ apumu nẽ ixkaprĩ htỳx kumrẽx ka mẽ tee ri amnhĩ tã ixpumu.

Epes 4:31

Nẽ kêr ka mẽ axte ri axàhkurê ho ri apa hkêt nẽ. Nẽ agryk kãm axpẽn mã tanhmã akapẽr punuj to hkêt nẽ. Rỳ axpẽn japrỳ ho ri apa hkêt nẽ. Nẽ atỳx ri axpẽn tã apẽr o apikẽnh kêt nẽ. Nẽ ri axpẽn tã mẽ kãm axàmnênh kêt nẽ.

Wam Tesarõn 2:3

Nom pa prem ixêx rom tanhmã mẽ amã ixkapẽr to hkêt nẽ. Rỳ mẽ inhmã mẽmoj prãm xàj mẽ ano kupyr pê mẽ amã ixkapẽr kêt nẽ.

Xitre 2:3

Nẽ mẽni wejjê mã anẽ kê mẽ kãm Jejus kĩnh xàj tãm ri amnhĩ nhĩpêx o pa. Jao axpẽn jakwa kamã nhãm mẽ hixi ho rêr o pa hkêt nẽ. Nẽ kagôxỳhti ho pipãnh o pa hkêt nẽ. Nẽ mẽ kãm anẽ kê mẽni xàptàr nywjê jahkre mex o pa. Mẽ kot mẽ mar nẽ mẽ uràk nẽ tãm amnhĩ nhĩpêx kaxyw. Jao mẽ kãm mẽ mjên nẽ mẽ hkrajê japê hã mẽ kãm mẽmoj to anhỹr o mẽ kutã nojarêt rãhã ho pa. Kêr ka ã mẽni wejjê mã akapẽr anẽ.

Eprêw 12:1

Na pre mẽ pakukamã mẽ panhĩgêt kwỳjaja amnhĩ kaxyw Tĩrtũm mã hamaxpẽr pê ã amnhĩ xà htỳx kamã hamak o pa anẽ. Tã te ra mẽ kot kỳj rũm kaxkwa rũm mẽ pahpumunh nẽ tanhmã mẽ pamã kapẽr to pyrà nẽ mẽ pamã kapẽr o: —E mẽ inhma mẽ ixkanrẽhã mẽ ixtàmnhwỳjaja. Na pa prem ã Tĩrtũm kamnàr rom amnhĩ nhĩpêx o ixpa anẽ. Mẽ kot ja hã mẽ inhĩpêx kati htã pa prem Jejus kaga hkêt nẽ. Tã kêr ka mẽ ixpyrà nẽ ã mẽ kãm mẽ akurê xwỳnhjê kutã amnhĩ to htỳx anẽ. Nẽ mẽ ixpyrà nẽ amnhĩ kaxyw Tĩrtũm kôt pix mã ajamaxpẽr tỳx rãhã ho ri apa. Anẽ. Jakamã kwa kêr pu mẽ uràk nẽ ã amnhĩ nhĩpêx anhỹr rãhã ho mãn ri papa. Te mẽ hprõt xwỳnhjaja kot amnhĩ nhĩpêx pyràk o amnhĩ nhĩpêx. Na htem hprõt tỳx kaxyw mẽmoj pytĩ jamỳnh nẽ ho hprõt hkêt nẽ. Na htem ỹ kamã hprõt o hprõt tỳx nẽ wam hkwỳjê mã wa nẽ mra. Ja pyrà nẽ kêr pu mẽ pahte Tĩrtũm kapẽr kôt amnhĩ nhĩpêx mex o papa kaxyw tanhmã mẽ pahte amnhĩ tomnuj to hã amnhĩ pumu nẽ hkaga kurê kumrẽx. Mẽ pahte amnhĩ tomnuj o papa xàja te mex pyràk no ãm mex kêt. Te ho mẽ hprõt xwỳnh kot axtem nẽ mẽmoj pytĩ mỳnh nẽ tee ri ho hprõt tỳxta pyràk. Kot puj mẽ tanhmã amnhĩ tomnuj to ho papa nẽ Tĩrtũm kapẽr kôt amnhĩ nhĩpêx mex kêt nẽ. Jakamã kwa kêr pu mẽ Tĩrtũm kapẽr gryk ã amnhĩ tomnuj nê amnhĩ to htỳx rãhã ho papa. Te ho mẽ hprõt nẽ nhỹri mẽ àhuk xà pix kukamã hamaxpẽr rãhã hprõt tỳx xwỳnhta pyrà nẽ ãm Jejus mã pajamaxpẽr tỳx rãhã ho papa.

Xiakre 1:21

Jakamã kwa kêr ka mẽ axte amnhĩ tomnuj rỳ ajamaxpẽr punuj o ri apa hkêt nẽ. Na htem ohtô nẽ ã amnhĩ nhĩpêx anhỹr o pa nom kêr ka mẽ kurom Tĩrtũm kapẽr mãn amnhĩ krã him haxàr tỳx nẽ. Kapẽr o mẽ ajahkre xwỳnhjaja na htem ho mẽ ajahkre mex o pa. Tã kêr ka mẽ ama nẽ amã hkôt amnhĩ nhĩpêx prãm rãhã ho ri apa. Na pu htem Tĩrtũm kapẽr ma nẽ hkôt amnhĩ nhĩpêx o papa hãmri nẽ nhỹrmã Tĩrtũm mẽ Kra wa kuri pahtĩr tũm nẽ pa mex nẽ papa ho papa.

Xiakre 3:14

Nom kot ka mẽ mẽmoj tã axpẽn kamã agryk o ri apa. Rỳ amnhĩ pix kukamã ajamaxpẽr o ri apa hãmri nẽ ãm ate Tĩrtũm kapẽr kôt amnhĩ nhĩpêx ã amnhĩ jarẽnh kaprỳ.

Xiakre 4:11

E ixkwỳjaja. Kwa kêr ka mẽ anhĩõ kot tanhmã amnhĩ tomnuj to hã omu nẽ tanhmã ho akapẽr punuj to hkêt nẽ. Tĩrtũm kapẽr ã kagà htũm kot ja nê mẽ pahkurê kamã hihtỳx jakamã kot ka mẽ ri ã amnhĩ nhĩpêx anẽ nẽ te ate Tĩrtũm kapẽr tũm kwỳ omnuj ã harẽnh pyràk. Rỳ te axàhpumunh tỳx o ate Tĩrtũm jakrenh ã amnhĩ to jarkrar pyràk. Jao kapẽr kôt amnhĩ nhĩpêx kêt nẽ. Na htem Tĩrtũm kapẽr ã kagà htũm kwỳ mex ã harẽ nẽ hkwỳ omnuj ã harẽnh kêt nẽ. Piitã mex kênã.

Xiakre 4:5

Tĩrtũm kapẽr ã kagà htũm kot tanhmã Karõ jarẽnh to nẽ harẽnh kot: Na pre Tĩrtũm mẽ pahwỳr amnhĩ Karõ rẽ nhũm mẽ pahwỳr wrỳ nẽ mẽ pakamã agjê nẽ mẽ pahkôt pa ho pa. Mẽ pahte hkôt pix mã amnhĩ nhĩpêx o papaja na kãm hprãm. Anẽ. Ãm hãmri ã harẽnh kot anhỹr jakamã kwa kêr ka mẽ harẽnh ma nẽ kãm ajamaxpẽr tỳx rãhã ho ri apa.

Xiakre 5:9

Nẽ kêr ka mẽ axpẽn to akapẽr o ri apa hkêt nẽ. Kot ka mẽ ã amnhĩ nhĩpêx anẽ nhũm Tĩrtũm mẽ ama nẽ tanhmã mẽ ajarẽnh to. Kot mẽ pahpumunh xà hkôt tanhmã mẽ pajarẽnh to xwỳnh na. Tã ra tanhmã kot mẽ pahpiitã mẽ pajarẽnh to xà hã arĩgroja ra ahtêp o mõ.

Wam Pêtre 2:16

Nẽ mẽ pahpê Tĩrtũm kra jakamã na pu htem paxàmnhĩx kãm tanhmã amnhĩ nhĩpêx to ho ri papa. Nom kêr pu mẽ pahpê hkra hã pahtỳx ri amnhĩ nhĩpêx kêt nẽ.

Wam Pêtre 2:22

Krisja aa tanhmã amnhĩ tomnuj to hkêt nẽ pa ho pa. Nẽ aa mẽmoj tã amnhĩ to hêx o pa hkêt.

Wam Pêtre 3:10

Kapẽr ã kagà htũm kot ja jarẽnh kot: Kot kaj mẽ amã amex nẽ akĩnh nẽ ri apa hprãm hã kot kaj mẽ ã amnhĩ nhĩpêx anẽ: Kot kaj mẽ ri akapẽr punuj o ri apa hkêt nẽ. Nẽ mẽmoj tã amnhĩ to axêx o ri apa hkêt nẽ.

Wam Pêtre 4:2

Jakamã kêr pu mẽ axte mẽ pahte amnhĩ nhĩpêx tũm kôt amnhĩ nhĩpêx o papa hkêt nẽ. Nẽ mẽ pajamaxpẽr tũm kôt axte pajamaxpẽr o papa hkêt nẽ. Ãm Tĩrtũm kãm hprãm xà hkôt pix mã tanhmã amnhĩ nhĩpêx to ho papa rãhã ty.

Wam Pêtre 4:4

Tã Kris kôt amnhĩ xunhwỳ hãmri nẽ mẽ pahte amnhĩ nhĩpêx nyw o amnhĩ nhĩpêx o papa. Hãmri nhũm arĩ mẽ kot amnhĩ nhĩpêx tũm o amnhĩ nhĩpêx xwỳnhjaja tee ri ja hã mẽ pahpumu nẽ hêx rom amnhĩ kôt mẽ pamã tanhmã ri àhkrox to ho pa. Pu mẽ axte mẽ hkôt amnhĩ nhĩpêx kêt nhũm mẽ tee ri ja hã mẽ pahpumu nẽ mẽ pakamã gryk kato nẽ tanhmã mẽ pahto kapẽr punuj to.