Wam Juãw 5:9 - Tĩrtũm kapẽr ã kagà nyw

⁹ Nẽ na pu htem jar pahkwỳjaja kot axpẽn mar xà hã ixkre kamã mẽ kapẽr ma nẽ mẽ hkôt pajamaxpẽr. Tã koja Tĩrtũm tanhmã mẽ pamã mẽmoj to amnhĩrĩt to pu mẽ hkôt pajamaxpẽr kurê kumrẽx. Kêp Tĩrtũm kênã kot pu kêt mẽ kapẽr prã nẽ hkôt pajamaxpẽr kêt. Tãm na pre mẽ pamã Jejus kêp Kra hã ã ho amnhĩrĩt anẽ.

Wam Juãw 5:9 ပူးပေါင်းရင်းမြစ်များ

Atre 17:31

Koja nhỹrmã tanhmã mẽ pahte amnhĩ nhĩpêx to ho papa hã mẽ pahpumunh kôt tanhmã mẽ pajarẽnh to. Nẽ amnhĩ ri mẽ htĩr tũm nẽ mẽ pa ho pa xwỳnhjê jarẽ nẽ amnhĩ ri mẽ pa hkêt xwỳnhjê jarẽ. Na pre ra ã mẽ harẽnh anhỹr kaxyw arĩgro hta. Arĩgrota ã kot hprĩ hã kãm tanhmã mẽ pajarẽnh to kaxyw na pre ra Jejusja xãm. Kaxyw na pre akupỹm ho htĩr. Nẽ akupỹm ho htĩr jao kot nhỹrmã kãm tanhmã mẽ pajarẽnh to xwỳnh ã ho amnhĩrĩt. Anẽ.

Matêwre 17:5

Hãmri nẽ kormã ã kãm kapẽr anhỹr rôm nhũm ra kakrã jaka htỳxja wrỳ nẽ wa mẽ hkunor pa nhũm wa mẽ kamã kuhê. Nhũm kakrã kamã Tĩrtũm mẽ kãm kapẽr nẽ mẽ kãm: —E ota Ixkra xa. Inhmã hapê ho inhmã hapê. E kêr ka mẽ kapẽr mar tỳx rãhã ho ri apa. Anẽ.

Wam Juãw 5:10

Jakamã mẽ pahte Tĩrtũm Kra hkôt amnhĩ xunhwỳr xwỳnhjaja na pu prem Jejus kêp Kra hã harẽnh ma nẽ hkôt pajamaxpẽr kurê kumrẽx. No mẽ kêp hkra hkêt xwỳnhjaja na htem Tĩrtũm kot kêp Kra hã harẽnh ma nẽ ãm kuma nẽ amnhĩ kaxyw hkôt hamaxpẽr kêt nẽ. Jao te Tĩrtũm kêp Hipêêxà hã amnhĩ to hêx pyràk ã harẽ.

Eprêw 2:4

Hãmri nẽ mẽ pamã aa mẽ pahte mẽmoj pumunh kêt kwỳ ho anhỹr o ri mẽ pahkôt pa. Tĩrtũm Karõ kot ja kaxyw mẽ ho mẽ àhpumunh tỳx jakamã nhũm mẽ ỹ hã ahpỹnhã tanhmã mẽ pamã amnhĩ nhĩpêx to ho pa. Mẽ pahte ja hã mẽ omunh nẽ kamã pano pyma kaxyw. Nẽ ã mẽ pajamaxpẽr anẽ nẽ pajamaxpẽr o: —Nà ãm hãmri na mẽ pamã ã Jejus jarẽnh anẽ nẽ ỹ hã ã amnhĩ nhĩpêx anhỹr o pa. Anhỹr o pajamaxpẽr kaxyw na prem ã mẽ pahkôt amnhĩ nhĩpêx anhỹr o pa.

Atre 5:32

Tã mẽ pajaja mẽ ixte Jejus htyk nẽ akupỹm htĩr ã omunh mex jakamã na pa hte Tĩrtũm Karõ nhỹ hã ã mẽ amã harẽnh anẽ. Karõja na pre Tĩrtũm mẽ ixte hkôt amnhĩ nhĩpêx xwỳnhjê hwỳr kurẽ nhũm mẽ ixwỳr wrỳ nẽ mẽ ixkarõ mã agjê. Tã ỹ hã na pa htem ri ã harẽnh anhỹr o ri mẽ akôt ixpa. Anẽ.

Juãw 10:38

Mẽ amã ixkapẽr mar prãm kêt tã kwa ixte Tĩrtũm pyrà nẽ aa mẽ ate mẽmoj pumunh kêt kwỳ ho anhỹr ã ixpumu nẽ Inhĩpêêxà mẽ wa ixte amnhĩ nhĩpêx tipxi hkôt ajamaxpẽr. Anẽ.

Juãw 5:39

—Nẽ Tĩrtũm kapẽr ã kagà htũm haxwỳja kot tanhmã ijarẽnh to. Ka htem wa ixri atĩr tũm nẽ apa ho apa hprãm xàj kamã harẽnh rãhã ho ri apa. Nẽ kot tanhmã pa ijarẽnh to htã ka mẽ ixkapẽr ma nẽ amnhĩ kaxyw ixkôt ajamaxpẽr kêt nẽ. Anẽ.

Eprêw 6:18

Jakamã koja nhỹrmã ma amnhĩ wỳr mẽ pahto àpir ã amnhĩ jarẽ hãmri nẽ ãm hãmri amnhĩ jarẽ nẽ amnhĩ jarẽnh o: —Nà ãm hãmri ixte amnhĩ pumunh xà hkôt na pa mẽ amã ja hã amnhĩ jarẽ. Anẽ. Koja ã amnhĩ jarẽnh anẽ hãmri nẽ hijuk ri axte hpãnhã tanhmã mẽmoj jarẽnh to hkêt nẽ. Ra kot ã amnhĩ jarẽnh anhỹrja koja arĩ rãhã nẽ. Jakamã e kwa kêr ka mẽ tee ri amnhĩ kukamã ajamaxpẽr o ri apa hkêt nẽ. Ra mẽ pamex nẽ ri papa kaxyw Tĩrtũm kôt amnhĩ xunhwỳr jakamã kêr pu mẽ arĩ kot mẽ pahto mex rax xà hã arĩgrota jamãr rãhã ho ri papa.

Wam Juãw 5:8

Tĩrtũm Karõ na pre kêp Kra hã mẽ pamã ho amnhĩrĩt pu prem kêp Kra hã omu. Nẽ Juãw Paxis kot hkrã kumrãrta ã pu mẽ mããnẽn kêp Tĩrtũm Kra hã kot ho amnhĩrĩtja ã omu. Nẽ mããnẽn kêp Tĩrtũm Kra hã pĩ kahpa hã jêt nẽ htyk nẽ hkamrô pikapĩrta ã mẽ pamã ho amnhĩrĩt pu mẽ kêp Kra hã omu. E mẽ pamã mẽmoj to axkrunẽpxi nẽ Jejus kêp Tĩrtũm Kra hã kot ho amnhĩrĩt xwỳnh na jajaja.