Sikũn Ximotre 3:3 - Tĩrtũm kapẽr ã kagà nyw

³ Mẽ ukaprĩ hkêt jakamã koja mẽhõ tanhmã mẽ homnuj to nhũm amnhĩ tã mẽ omu nẽ kamã gryk kurê kumrẽx nẽ aa gryk o hapêx kêt nẽ. Nẽ amnhĩ tã tanhmã hkwỳjê ho hêx to ho pa. Nẽ htỳx ri kãm hprãm xà hkôt tanhmã amnhĩ tomnuj to. Nẽ oprê ho pijapu pix kukamã hamaxpẽr. Nẽ axtem nẽ kãm mẽmoj mex pumunh prãm rỳ mẽmoj mex mar prãm kêt nẽ.

Sikũn Ximotre 3:3 ပူးပေါင်းရင်းမြစ်များ

Jutre 1:18

Na prem mẽ amã mẽ harẽnh o: —Jejus akupỹn wrỳk xwỳj ri koja mẽmojaja mẽ awỳr mran pôj. Nom mẽ kot Jejus kapẽr kwỳm amnhĩ krã hkôt tanhmã amnhĩ nhĩpêx to xwỳnhjaja koja mẽ. Hãmri nẽ mẽ apê Jejus kwỳ hã mẽ apumu nẽ mẽ atã akunha nẽ mẽ atã hpẽr o axkẽ nẽ Tĩrtũm ã hpẽr o axkẽ nẽ kapẽr ã kagà hã hpẽr o axkẽ. Anẽ.

Rõmãn 1:31

à mẽ kot amnhĩ nhĩpêx anhỹr o ri mẽ pa xwỳnhjaja na hte Tĩrtũm kãm mẽmoj mex nhũm mẽ kêp omnuj nẽ nhũm Tĩrtũm kêp mẽmoj omnuj nhũm mẽ kãm mex nẽ. Nẽ axpẽn mã mẽmoj tanhmã ho hã amnhĩ jarẽnh tã ho anhỹr kêt nẽ. Nẽ axpẽn kãm ukaprĩ ho ri pa hkêt nẽ.

Matêwre 10:21

—Nẽ koja mẽ hkwỳjaja ixtã mẽ akamã gryk nẽ. Nẽ mẽ atã àmnênh pix o pa. Nẽ mẽ kot mẽ apar kaxyw mẽ akwỳjê hã amỹnê. Koja mẽ anhĩpêêxà hkwỳjaja mẽ apê mẽ hkra hã amỹnê. Nhũm mẽ akra hkwỳjaja mẽ apê mẽ hipêêxà hã amỹnê. Nhũm mẽ atõ hkwỳjaja mẽ apê mẽ htõ hã amỹnê. Nhũm mẽ akatorxàjaja mẽ atã amỹnê. Hãmri nhũm mẽ apa. No ãm kwãr mẽ mãmrĩ ã mẽ anhĩpêx anẽ. Ã mẽ kot mẽ anhĩpêx anhỹr tã kêr ka mẽ tee ri amnhĩ kukamã ajamaxpẽr pê ixkaga hkêt nẽ. Mẽ ãm amnhĩ to htỳx rãhã ty. Hãmri nẽ akaxwỳnhja ma Tĩrtũm mẽ wa inhõ krĩ hwỳr axàpir kurê kumrẽx nẽ wa ixkuri akupỹm amex nẽ atĩr tũm nẽ apa ho apa.

Sikũn Pêtre 2:14

Nẽ nhỹri krĩ hwỳr pôj nẽ mẽnijê pumu nẽ kãm mẽ hkĩnh nẽ. Ra mẽ mjên ri pa htã nhũm mẽ kãm mẽ ho amnhĩkati hprãm nẽ mẽ kamã hpijaàm kêt o ri pa. Nẽ kormã mẽ kot Kris kôt amnhĩ xunhwỳr tohtuj anhỹr xwỳnhjê hwỳr mra nẽ hêx rom tanhmã mẽ kãm kapẽr to pê mẽ no kupyr o ri mẽ hkôt pa. Mẽ kot mẽ mar nẽ Kris kaga nẽ mẽ hkôt ri amnhĩ nhĩpêx prãm xàj ã mẽ hipêx anhỹr o pa. Na htem hikàxpore rũnh o pikuprõnh pix kukamã hamaxpẽr o ra ho õxỳ nẽ. Ã na htem amnhĩ nhĩpêx anhỹr o pa. Tã ra Tĩrtũm kot mẽ homnuj tỳx kaxyw mẽ hã amnhĩ jarẽ.

Matêwre 4:1

Tã nhũm Jejus Tĩrtũm Karõ nhỹ hã ma kapôt ã ri pa. Satanasti kot amnhĩ tã kamã hamak kaxyw nhũm ma kapôt ã ri pa.

Apokarip 17:6

Nhũm axpã nẽ nhỹ pa omu. No ãm kagôxỳhti ho hpipãnh kêt. Mẽ kot Jejus kôt amnhĩ xunhwỳr nẽ ri mẽ kãm Jejus kêp mẽ õ pahihti hã harẽnh xwỳnhjê kamnhwỳr o mẽ hpar nhũm mẽ hkamrô pikapĩr xwỳnhjê kamrô ho na pre axpã nẽ nhỹ. Pa ã kot amnhĩ nhĩpêx anhỹr ã omu nẽ tee ri ijamaxpẽr.

Apokarip 16:6

Na prem mẽ kot akôt amnhĩ nhĩpêx xwỳnhjê mẽ mẽ kãm ri akapẽr jarẽnh xwỳnhjê hpar o pa nhũm mẽ hkamrô hpikapĩr rax nẽ. Tã ka ra mẽ hã mẽ kêp mẽ hkõm xà homnu hpa nhũm mẽ kêp mẽ hkamrô ã amnhĩ jahkre nhũm mẽ tee ri ho hkõm mã. Nà ãm hãmri na ka ã mẽ kêp gô nhĩpêx anẽ Tĩrtũm. Anẽ.

Apokarip 13:17

—Gô xujanãr rũm mrymnutita nhĩxi kot paj mẽ atã hipêx. Rỳ hixi hã nũm nhĩpêx. Hãmri ka mẽ axàpkur xà japrôr kaxyw nhỹhỹm mra nhũm mẽ atã hixita pumu nẽ rĩ kormã mẽ amã mẽmoj kwỳ ho wẽnê ka mẽ amnhĩm haprô nẽ ho axàpkur o ri apa. Nẽ mẽ ate mẽmoj to wẽnê xwỳnhjaja koja mẽ apê mẽmoj japrôr kaxyw mẽ awỳr mra ka mẽ tee ri nhỹhỹnh mẽ hã hixi japêr hãmri nẽ mẽ kãm mẽmoj to wẽnê hkêt nẽ. Ãm nhỹhỹnh mẽ atã hixi hã kagàta pumunh pix kukwak ri kot kaj mẽ awjaprô rỳ mẽmoj to wẽnê. Anẽ.

Apokarip 13:15

Hãmri nhũm mẽ kuma nẽ mar xà hkôt hipêx nẽ ãm nhũm xa. Hãmri nhũm mrymnuti kot hitepta omu nẽ hwỳr tẽ nẽ tanhmã ho nhũm ra kapẽr nẽ mẽ kãm: —E kêr ka mẽ kot inhmex ã ijarẽnh kêt xwỳnhjê pynê nẽ mẽ himex pa. Anẽ.

Jutre 1:16

Ãm hãmri na mẽ harẽ. Tã na hte arĩ mẽ hkwỳjaja ã amnhĩ nhĩpêx anẽ. Nẽ hamaxpẽr mex kêt nẽ. Na htem nhãm tanhmã mẽ ho kapẽr punuj to pix kukamã hamaxpẽr. Nẽ amnhĩ krã hkôt htỳx ri tanhmã amnhĩ tomnuj to ho pa. Nẽ amnhĩ to jarkrar rãhã nẽ. Nẽ hêx rom mẽ kêp mẽmoj jamỳnh kaxyw tanhmã mẽ kãm hêx to.

Sikũn Pêtre 3:3

Nẽ kwa mẽ inhma. Nhỹrmã Kris akupỹn mẽ pahwỳr wrỳk xwỳj ri koja mẽ kot amnhĩ tomnuj tỳx xwỳnhjaja mẽ awỳr mra. Mẽ hpijaàm kêt o pa xwỳnh jakamã koja mẽ tanhmã mẽ akamã amnhĩ tomnuj to ho pa. Nẽ mẽ apê Kris kwỳ hã mẽ apumu nẽ mẽ atã hpẽr o pikẽnh o pa.

Xiakre 2:6

Nom kot kaj mẽ ahpỹnhã mẽ hipêx nẽ amnhĩ tomnuj nẽ. E pa mẽmoj tã mẽ akukja. Mẽmojaja na htem tanhmã mẽ ato hêx to? Nẽ mẽmojaja na htem juisti mã tanhmã mẽ ato kapẽr punuj to? Xà mẽ kêp amrakati xwỳnhjaja? Nà mẽ tãm kêt. Mẽ hikàxpore rũnh xwỳnhjaja na htem ã mẽ anhĩpêx anhỹr o pa.

Xitre 2:3

Nẽ mẽni wejjê mã anẽ kê mẽ kãm Jejus kĩnh xàj tãm ri amnhĩ nhĩpêx o pa. Jao axpẽn jakwa kamã nhãm mẽ hixi ho rêr o pa hkêt nẽ. Nẽ kagôxỳhti ho pipãnh o pa hkêt nẽ. Nẽ mẽ kãm anẽ kê mẽni xàptàr nywjê jahkre mex o pa. Mẽ kot mẽ mar nẽ mẽ uràk nẽ tãm amnhĩ nhĩpêx kaxyw. Jao mẽ kãm mẽ mjên nẽ mẽ hkrajê japê hã mẽ kãm mẽmoj to anhỹr o mẽ kutã nojarêt rãhã ho pa. Kêr ka ã mẽni wejjê mã akapẽr anẽ.

Xitre 1:8

Ãm àmnhĩx amnhĩ nhõrkwỹ hwỳr mẽ hwỳr o pa. Nẽ mẽ piitã mẽ kutã nojarêt rãhã nẽ. Nẽ tãm hamaxpẽr nẽ tãm mẽ piitã mẽ hipêx o pa. Nẽ amnhĩ tomnuj pymaj amnhĩ to htỳx pê Tĩrtũm kôt amnhĩ nhĩpêx mex rãhã ho pa.

Wam Tesarõn 4:8

Jakamã kot kaj mẽ atõ ja hã mẽ inhma nẽ ãm mẽ inhma nẽ arĩ ã amnhĩ nhĩpêx anẽ. Hãmri nẽ mẽ pajaja mẽ ixkapẽr nhĩrôp axãm kêt nẽ. Tĩrtũm kapẽr nhĩrôp kot kaj xa. Nẽ mããnẽn kot mẽ pahwỳr Karõ mẽnh xwỳnhja kapẽr nhĩrôp kot kaj xa.

Wam Korĩt 7:9

No kot ka mẽ atõ ra akurẽ japêr nẽ mãmrĩ aprõ rỳ mãmrĩ amjên. Ja mããnẽn tanhmã kute hkêt.

Wam Korĩt 7:5

Nẽ kot kaj mẽ mẽmo arĩgro hã amã Tĩrtũm mã amnhĩ jarẽnh ryy hprãm japêr. Hãmri nẽ aprõ mã: —E kot puj jarãhã axpẽn to amnhĩkati hkêt nẽ. Kot puj ãm Tĩrtũm pix mã amnhĩ jarẽnh o amỹkry. Anẽ. Hãmri nẽ mãmrĩ ã amnhĩ nhĩpêx anẽ. No kwa kêr ka mẽ ãm ja ho anhỹr o apkati pixi nẽ kãm anhũre. Nhũm jãã ka mẽ amã axpẽn to amnhĩkati hprãm nẽ mãmrĩ tanhmã axpẽn nhĩpêx to. No kot kaj mẽ ã amnhĩ nhĩpêx anhỹr kêt o hã atã apkati xohtô nẽ gaa nẽ ra akurẽ xàj axtem nẽ Satanasti jamaxpẽr o ajamaxpẽr. Jao nhãm mẽhõ ni hwỳr mra nẽ aprõ kuhpa hã kamã akurẽ ho kamã apijaàm kêt. Rỳ nhũm mẽnijaja nhãm mẽmyjê hõ hwỳr mra nẽ mjên kuhpa hã kamã hkurẽ ho war axpẽn kamã hpijaàm kêt.

Juãw 6:70

Hãmri nhũm kuma nẽ kãm: —Nà ixte amnhĩ kaxyw mẽ apê 12jê rênh tã na ka mẽ atõ akwỳjê hkĩnhã axtem nẽ Satanasti hkôt amnhĩ xãm. Anẽ.

Rukre 16:14

Hãmri nhũm Parijew nhõ xwỳnhjaja mar o kuhê. Na prem ra mẽ hikàxpore rax gryk ã Jejus kaga. Jakamã ã kot mẽ kãm kàxpore jarẽnh anhỹrja ma nhũm ja mẽ kêp omnuj nẽ nhũm mẽ hã hpẽr o pikẽnh o kuhê.

Rukre 10:16

Anhỹr o mẽ kãm kapẽr hãmri nẽ hpãnhã hkôt mẽ pa ho mẽ pa xwỳnhjê mã kapẽr nẽ mẽ kãm: —Kot kaj mẽ Tĩrtũm kapẽr o mẽ ahkre ho ri apa nhũm mẽhõ ama nẽ akapẽr kôt amnhĩ nhĩpêx. Hã koja te pa kot ixkôt amnhĩ nhĩpêx pyràk o amnhĩ nhĩpêx. No koja amar kêt nẽ akaga hãmri nẽ te pa kot inhmar kêt nẽ ixkaga pyràk o amnhĩ nhĩpêx. Jao mããnẽn Tĩrtũm kaga. Anẽ hãmri nhũm mẽ kuma hãmri nẽ anhgrà nẽ axkrut kapẽn nẽ ma ahpỹnhã krĩ hkôt anhgrà.

Sikũn Pêtre 2:19

Na htem mẽ kãm kapẽr o: —Kwa mẽ ixpyrà nẽ mãmrĩ amã tanhmã amnhĩ tomnuj to hprãm xà hkôt amnhĩ nhĩpêx o ri apa. Mẽhõ kot kêt ja nê tanhmã amã kapẽr to? Anẽ. Mẽ kot amnhĩ tomnuj xàja te kêp mẽ õ patrãw pyràk jakamã na htem ãm kôt pix mã amnhĩ nhĩpêx o pa. Jakamã kot pu mẽ tanhmã amnhĩ tomnuj to. Nẽ gaa nẽ axte. Nẽ gaa nẽ ra ho amnhĩ pyràk. Hãmri nẽ tee ri pamã hkaga hprãm kaprỳ nhũm te kêp mẽ panhõ patrãw pyràk o mẽ panhĩpêx pu mẽ ãm kôt pix mã ri amnhĩ nhĩpêx o ri papa.

Rõmãn 1:29

Hãmri nẽ mẽmoj punuj pix mã hamaxpẽr. Nẽ kãm amnhĩ mex pix prãm mã hamaxpẽr. Nẽ kãm axpẽn tomnuj pix prãm. Nẽ mẽmoj tã axpẽn kãm gryk pix prãm. Nẽ mẽ kãm axpẽn par pix prãm. Nẽ mẽmoj tã ri kãm axpẽn mã àkjêr prãm. Nẽ mẽmoj tã kãm axpẽn mã hêx prãm. Nẽ kãm axpẽn kaxyw tanhmã hamaxpẽr punuj to pix prãm. Nẽ kãm tanhmã axpẽn to kapẽr punuj to pix prãm.