Rukre 3:18 - Tĩrtũm kapẽr ã kagà nyw

¹⁸ Nhũm pre ã Juãw Paxis Tĩrtũm kapẽr o mẽ ahkre anhỹr o pa.

Rukre 3:18 ပူးပေါင်းရင်းမြစ်များ

Rukre 3:17

—Na htem pur kãm harôj nhĩkẽ nẽ ho grà nẽ hpãnhã kahtwỳ. Nẽ kahuk pa hãmri nẽ hkapĩ nhũm kôk apê nẽ prỳhkà ho htor nẽ ho hapêx pa. Nhũm mẽ hy ho pa nẽ ixkre kamã gôj kãm unhwỳ. Ja pyrà nẽ koja tokyx Tĩrtũm mẽ piitã mẽ kot tanhmã amnhĩ nhĩpêx to ho pa hã mẽ omunh xà hkôt mẽ ho axkjê. Mẽ kot tãm amnhĩ nhĩpêx o mẽ pa xwỳnhjaja koja ma amnhĩ wỳr mẽ ho api nhũm mẽ kuri mex nẽ hkĩnh rãhã nẽ pa ho pa. No mẽ kot amnhĩ tomnuj xwỳnhjaja koja mẽ hkĩnhã tanhmã mẽ hipêx to nhũm mẽ ma kuwy raxja wỳr pa nẽ kamã amnhĩ xà htỳx kamã hamak rãhã nẽ pa ho pa. Anẽ.

Rukre 3:19

Tã nhũm Ijaew nhõ pahi Erox ra htõ hprõ pê Eroxis pytà nẽ ho hprõ nhũm Juãw Paxisja harẽnh ma nẽ ma hwỳr tẽ nẽ hã kãm akir. No ãm ja pix ã kãm àkjêr kêt nẽ. Mããnẽn tanhmã kot amnhĩ tomnuj tỳx to ho pa hã kãm akir.

Juãw 1:15

Nhũm Juãw Paxis na pre hkukamã mẽ kãm harẽnh o ri pa nẽ mẽ kãm: —E ra ixte mẽ amã harẽnh o ri ixpa xwỳnhta na ra pôj. Te pa ixte wa nẽ ixkator pyràk nom amnepê mã kormã ixkêt ri nhũm htĩr rãhã nẽ pa ho pa. Ham ĩ ho kator tã kêp Tĩrtũm Kra jakamã uràk nẽ rãhã ho rãhã hã pa xwỳnh na. Jakamã kot amnhĩ to rax o kot ijakrenh par. Anẽ.

Juãw 1:29

Tã nhũm apkati nhũm Juãw Paxis amnhĩ wỳr Jejus pumu nẽ mẽ kot mar o kuhê xwỳnhjê mã ĩhkra ho ahkre nẽ mẽ kãm: —E. Onẽj Tĩrtũm kot mẽ pakaxyw ãm xwỳnhta tẽ. Mẽ pahpê Ijaew na pu htem xatã pahte amnhĩ tomnuj pãnhã amnhĩrer kaxyw Tĩrtũm mã pahkrit ôwêhti hkra nyw kwỳ hpa nẽ ho amnhĩ pãnhã kãm amnhĩrer o papa. No kêt htẽm nẽj koja nhỹrmã kãm mẽ pahpiitã mẽ pahte amnhĩ tomnuj pãnhã amnhĩrer pa.

Juãw 1:34

Pa ã kot hipêx anhỹr ã omu nẽ kêp Tĩrtũm Kra hã omunh kurê kumrẽx. Jakamã na pa ã mẽ amã ahkre nẽ mẽ amã harẽnh anẽ. Anẽ.

Atre 2:40

Nhũm pre ã Simãw Pêtre mẽ kãm ujarẽnh anẽ. Mẽ kãm kapẽr xihtỳx o kapẽr ry nẽ. Hãmri nẽ mẽ kãm: —Koja nhỹrmã Tĩrtũm mẽ kot tanhmã amnhĩ tomnuj to ho mẽ pa xwỳnhjaja tanhmã mẽ homnuj tỳx to. Jakamã kwa mẽ tokyx mẽ ate amnhĩ tomnuj kaga kê tanhmã mẽ ato hkêt nẽ. Anẽ.

Atre 20:2

Nẽ hwỳr pôj nẽ kamã krĩ hkwỳ hkôt mõ nẽ nhỹri mẽ kot Jejus kôt amnhĩ xunhwỳr xwỳnhjê pumu nẽ Tĩrtũm kapẽr o mẽ ahkre. Mẽ kot hkôt amnhĩ nhĩpêx mex nẽ kãm hprãm xà hkôt pix mã amnhĩ nhĩpêx kaxyw mẽ kãm kapẽr o ri mẽ hkôt pa. Hãmri nẽ kato nẽ ma mõ nẽ pyka pê Gres wỳr pôj.

Rõmãn 12:8

Rỳ ate Tĩrtũm kapẽr o ri Jejus kôt mẽ akwỳjê jamaxpẽr o hihtỳx o ri apa kaxyw axãm ka mẽ kãm kapẽr jarẽnh pê mẽ ho mẽ hihtỳx mex o ri mẽ hkôt apa. Rỳ ka mẽ atõ akukrêx rax japêr nẽ ate mẽ kêp amrakati xwỳnhjê mã mẽmoj nhõr o ri apa kaxyw axãm ka axàmnhĩx ri mẽ kãm mẽmoj nhõr o ri mẽ hkôt apa. Rỳ ate akwỳjê ho amnhĩptàr kaxyw axãm ka mẽ ho amnhĩptàr mex o ri apa. Rỳ ate tanhmã mẽ akwỳjê ho mex to nẽ mẽmoj to mẽ kutã anojarêt o ri apa kaxyw axãm ka akĩnh kãm ã mẽ hipêx anhỹr rãhã ho ri apa nẽ tanhmã akapẽr punuj to hkukamã ri ajamaxpẽr o ri mẽ hkôt apa hkêt nẽ.