Rõmãn 6:6 - Tĩrtũm kapẽr ã kagà nyw

⁶ Amnepêm na pu pre htem amnhĩ tomnuj rãhã ho ri papa. Te mẽ kãm mẽ àpênh xwỳnhjaja kot mẽ õ patrãw mã àpênh rãhãta pyràk. Tã nhũm Kris mẽ panê ty. Kot mẽ panê mẽ pahte amnhĩ tomnuj pãnhã amnhĩrer nẽ ho hapêx par kaxyw mẽ panê ty. Jakamã te mẽ pahte amnhĩ tomnuj mẽ pajamaxpẽr punujja te pĩ kahpa hã Jejus kôt harir nẽ htyk nẽ hapêx par pyràk. Pãnhã mẽ pahte amnhĩ nhĩpêx nyw pix o amnhĩ nhĩpêx kaxyw. Nẽ mẽ pajamaxpẽr nyw pix o pajamaxpẽr papa kaxyw.

Rõmãn 6:6 ပူးပေါင်းရင်းမြစ်များ

Karatas 2:20

—Nẽ na prem pĩ kahpa hã Kris nhô nẽ kupĩ nhũm mẽ pahte amnhĩ tomnuj te ĩhkô hã jêt nẽ haxwỳja htyk pyràk. Jakamã na pu htem amnhĩ tomnuj kaga nẽ Kris kôt amnhĩ xunhwỳ nhũm Karõ mẽ pahkarõm agjê pu mẽ te Jejus Kris kot amnhĩ nhĩpêx pyràk o amnhĩ nhĩpêx o papa. Jao hpãnhã mẽ pahte amnhĩ nhĩpêx nyw pix o amnhĩ nhĩpêx o ri papa. Kris kãm hprãm xà hkôt pix mã tanhmã ri amnhĩ nhĩpêx to ho papa. Kris kêp Tĩrtũm Kra htã kãm mẽ pajapê kamã mẽ panê htyk jakamã na pu htem amnhĩ kaxyw kôt pix mã pajamaxpẽr rãhã ho papa.

Epes 4:22

Na pa pre mẽ amã: —Kwa mẽ ri axte amnhĩ nhĩpêx tũm kôt amnhĩ nhĩpêx o ri apa hkêt nẽ. Ja na omnuj tỳx. Na ka prem ã amnhĩ nhĩpêx anẽ nẽ ajamaxpẽr punuj pix o ri apa. Jao amnhĩ tomnuj rãhã nẽ. Tã kêr ka mẽ amnhĩ nê awry hã mẽnh pyrà nẽ axte ã amnhĩ tomnuj anhỹr o ri apa hkêt nẽ.

Karatas 5:24

Tã mẽ pahpê Jejus Kris kwỳ jakamã na pu mẽ pahte amnhĩ nhĩpêx tũmja nhĩpêx o te mẽ pahte amnhĩ nê hpĩr pyrà nẽ axte hkôt amnhĩ nhĩpêx kêt nẽ.

Karatas 6:14

No pa na pa hte ã mẽ kãm mẽmoj tã karõ anhỹr o ri ixpa hkêt nẽ. Ãm Tĩrtũm kot mẽ pahto hkra kaxyw mẽ panhõ Pahihti Jejus Kris kot mẽ nê htykja pix na pa hte mẽ kãm harẽ. Ra kot inhnê htyk jakamã te pa ixte kuri ijêt nẽ ixtyk pyràk. Jakamã ra jar pika ja kamã mẽ kot amnhĩ nhĩpêxja te ixpê htyk nẽ hapêx pyràk pa axte hkôt amnhĩ nhĩpêx kêt pyràk.

Korosẽ 3:5

Jakamã kwa kêr ka mẽ axte ate amnhĩ nhĩpêx tũm kôt amnhĩ nhĩpêx kêt nẽ. Te ra mẽ apê htyk nẽ hapêx par pyrà nẽ axte kãm ajamaxpẽr kêt nẽ. Jakamã axte ri axpẽn mjên rỳ axpẽn prõ ho amnhĩkati hkêt nẽ. Nẽ nhãm ri mẽmyjê hõ rỳ mẽnijê hõ ho amnhĩkati hkêt nẽ. Nẽ mẽ amã tanhmã amnhĩ tomnuj to hprãm kêt nẽ. Nẽ mẽ amã akukrêx rax prãm kêt nẽ. Kot ka mẽ ã amnhĩ nhĩpêx anẽ nẽ gaa nẽ akukrêx rax gryk ã axte Tĩrtũm mã ajamaxpẽr kêt nẽ.

Rõmãn 8:13

Kot puj mẽ arĩ ã amnhĩ nhĩpêx anhỹr o ri papa hãmri nẽ nhỹrmã ty nẽ ma mẽ kot amnhĩ xà htỳx kamã hamak tũm xàta wỳr papa. Jakamã kêr pu mẽ mẽmo arĩgro hã pamã tanhmã amnhĩ tomnuj to hprãm hãmri nẽ amnhĩ kukamã pajamaxpẽr o: —Nà inhmã ã amnhĩ nhĩpêx anhỹr prãm tã kot paj Tĩrtũm Karõ nhỹ hã ja kutã amnhĩ to htỳx nẽ ho anhỹr kêt nẽ. Anẽ. Kot puj mẽ ã pajamaxpẽr anẽ hãmri nẽ nhỹrmã kuwy wỳr papa hkêt nẽ. Pãnhã Tĩrtũm mẽ Jejus wa kuri pamex nẽ pahtĩr tũm nẽ ri papa ho papa.

Rõmãn 6:22

No na pre ra Tĩrtũm tanhmã mẽ akrã hto ka mẽ amnhĩ tomnuj kaga hpa. Te Tĩrtũm tãm kot hpãnhã amnhĩ tã mẽ ato htỳx nẽ amnhĩ kôt mẽ ato pa pyràk ka mẽ ra ãm hkôt pix mã amnhĩ nhĩpêx mex o ri apa. Nẽ hpãnhã amã kapẽr kôt pix mã amnhĩ nhĩpêx mex prãm. Nẽ hkôt pix mã amnhĩ nhĩpêx hprãm. Jakamã kot kaj mẽ nhỹrmã kuri amex kumrẽx nẽ atĩr tũm nẽ ri apa ho apa.

Rõmãn 6:12

Jakamã kot ka mẽ atõ nhỹrmã tanhmã amnhĩ kukamã ajamaxpẽr punuj to japêr hãmri nẽ ajamaxpẽr o: —Nà inhmã ã amnhĩ tomnuj anhỹr prãm nẽ. Omnuj tã kot paj ho anẽ. Nà ixte ho anhỹr mã kênã. Anhỹr o ajamaxpẽr japêr tã kwa mẽ ã ajamaxpẽr anhỹr kêt nẽ.

Rõmãn 7:14

Nẽ Tĩrtũm kapẽr ã kagà htũmta Tĩrtũm kapẽr na. Nẽ Tĩrtũm kĩnhã ãm inhĩ pix na pa ri ixpa jakamã tanhmã kot pa amnhĩ to nẽ kapẽr kôt ri amnhĩ nhĩpêx mex o ri ixpa?

Xitre 3:3

Kormã mẽ pahte hkôt amnhĩ xunhwỳr kêt ri na pu prem ã amnhĩ nhĩpêx anhỹr kêt nẽ. Na pu prem Tĩrtũm mã pajamaxpẽr kêt nẽ kapẽr kôt ri amnhĩ nhĩpêx hkêt nẽ. Nẽ amnhĩ tomnuj pix kukamã pajamaxpẽr o ri papa. Nẽ amnhĩ pix kukamã pajamaxpẽr. Jao mẽ pamã pam amnhĩ nhĩpêx prãm xà kôt pix mã tanhmã amnhĩ nhĩpêx to ho ri papa. Nẽ axpẽn tomnuj nẽ. Nẽ axpẽn kãm pagryk rãhã ho papa. Ã mẽ pahte amnhĩ nhĩpêx anhỹr ho papa jakamã nhũm pre mẽ piitã kãm mẽ pahkĩnh kêt nẽ. Pu mẽ pajaxwỳja pamã mẽ hkĩnh kêt nẽ.