Piripos 1:9 - Tĩrtũm kapẽr ã kagà nyw

^9-10 Na pa hte mẽ ato kuwỳ nẽ kãm: —Pa Tĩrtũm. E Piripos nhõ xwỳnhjê pumu. Na mẽ ra kãm axpẽn kĩnh o axpẽn kôt pa. Kwa tanhmã mẽ hipêx to kê mẽ arĩ kãm axpẽn kĩnh tỳx pix nẽ. Jao axpẽn to mex rãhã ho pa. Nẽ tanhmã mẽ hkrã hto kê mẽ amnhĩ krãm akapẽr jaxàr tỳx nẽ. Jao tãm amnhĩ nhĩpêx mex nẽ hamaxpẽr mex o ri pa. Nom kormã mẽ kot ja pumunh tohtuj anhỹr. Tã kêr ka tanhmã mẽ ho kê mẽ ã amnhĩ nhĩpêx anhỹr rãhã Jejus Kris akupỹn mẽ ixwỳr wrỳ. Anhỹr pa hte mẽ ato hwỳr o ixpa.

Piripos 1:9 ပူးပေါင်းရင်းမြစ်များ

Wam Korĩt 14:20

Kwa mẽ ixkapẽr ma nẽ mar tỳx nẽ. Nẽ mẽhprĩrejê jamaxpẽr o ajamaxpẽr kêt nẽ. Ãm Kris kôt mẽ àptàr tũmjê jamaxpẽr o mãn kêt mẽ ajamaxpẽr o ri apa. Ãm mẽmoj pixire hkôt kot kaj mẽ ãm hãmri te mẽhprĩjê jamaxpẽr pyràk o ajamaxpẽr. Mẽhprĩjaja na htem mẽmoj punuj kukamã hamaxpẽr kêt nẽ. Na htem ãm htỳx pa. Tã kêr ka mẽ uràk nẽ mẽmoj punuj kukamã ajamaxpẽr o ri apa hkêt nẽ.

Sikũn Korĩt 8:7

Na ka htem amnhĩ to mex o ri apa. Nẽ amnhĩ kaxyw Kris hkôt ajamaxpẽr tỳx nẽ. Nẽ ma mẽ kãm Tĩrtũm kapẽr jarẽnh mex o ri mẽ hkôt apa. Nẽ mẽ ajamaxpẽr mex nẽ. Nẽ mẽ piitã mẽ ho mex o ri apa. Nẽ mẽ amã ixkĩnh o ri apa. Jakamã kwa kêr ka mẽ axàmnhĩx mẽ kêp amrakati xwỳnhjê mã mẽ akàxpore hkwỳ nhõr o apa. Jao mẽ amã Tĩrtũm kĩnh tỳx ã amnhĩ to amnhĩrĩt.

Epes 5:17

Nẽ ãm Tĩrtũm pix mã amnhĩ jarẽnh o ri papa nẽ kãm: —Pa Tĩrtũm. Inhmã akôt pix mã amnhĩ nhĩpêx prãm jakamã kwa ixte amã mẽmoj to anhỹr kaxyw ixkrãm ijamaxpẽr mex jagjê nẽ ho amnhĩrĩt mex pa tanhmã amã amnhĩ nhĩpêx to ho ri ixpa. Anhỹr o amnhĩ to kuwỳ. Nom kêr pu mẽ pahtỳx ri pajamaxpẽr kôt tanhmã kãm amnhĩ nhĩpêx to hkêt nẽ.

Korosẽ 1:9

Nẽ na pre Epas akupỹn wa ixwỳr pôj nẽ wa inhmã tanhmã mẽ ajarẽnh to. Mẽ ate amnhĩ kaxyw Jejus kôt ajamaxpẽr o apa nẽ mẽ amã Kris kôt akwỳjê piitã mẽ hkĩnh o ri apaja nhũm wa inhmã mẽ ajarẽ. Pa wa mẽ ajarẽnh ma nẽ mẽ ato Tĩrtũm wỳr rãhã o jar mẽ hagjênh xà kamã ixkrĩ. Nẽ arĩ mẽ ato hwỳr rãhã ho ixkrĩ. Nẽ mẽ ato hwỳr o: —Pa Tĩrtũm. Ot pa Ximotre mẽ wa Korosẽ nhõ xwỳnhjê ho awỳr kaxyw amã mẽ harẽ. Kwa tanhmã mẽ hamaxpẽr to kê mẽ amã hprãm xà hkôt pix mã amã tanhmã amnhĩ nhĩpêx to ho pa. Nẽ Akarõ nhỹ hã hprĩ hã akapẽr ma nẽ ãm hkôt pix mã tanhmã amnhĩ nhĩpêx to ho pa. Anẽ.

Korosẽ 3:10

Nẽ na ka mẽ ra mẽ ate amnhĩ nhĩpêx nyw o amnhĩ nhĩpêx o ri apa. Jao ra mẽ pahto kator xwỳnh maatija kôt amnhĩ nhĩpêx mex o mõ. Kot kaj mẽ gaa nẽ rĩ hkôt amnhĩ nhĩpêx mex kumrẽx o ri apa. Kãm hprãm xà hkôt.

Wam Tesarõn 3:12

Koja Tĩrtũm tanhmã mẽ akrã hto ka mẽ amã axpẽn kĩnh pê tanhmã axpẽn to ajuta hto ho ri apa. Nẽ mẽ amã akwỳjê hã ma ho te mẽ kam amã amnhĩ tã ma pyràk o ri apa. Ã kot kaj mẽ apiitã axpẽn nhĩpêx anẽ. Te wa inhmã mẽ akĩnh pê tanhmã mẽ ato mex to pyràk.

Wam Tesarõn 4:1

E Jejus kôt ixkwỳjaja. Na pa prem ma mẽ awỳr mõ nẽ Tĩrtũm kapẽr o mẽ ajahkre ho ri mẽ akôt ixpa. Mẽ ate mar nẽ Tĩrtũm kãm hprãm xà hkôt tanhmã amnhĩ nhĩpêx to kaxyw. Ka prem mẽ inhma nẽ hkôt amnhĩ nhĩpêx mex o ri apa. Tã kot paj axte ja hã tanhmã mẽ amã karõ hto. Pahihti Jejus nhỹ hã axte mẽmoj tã mẽ amã karõ. Jakamã kwa kêr ka mẽ arĩ Tĩrtũm kapẽr kôt pix mã ri amnhĩ nhĩpêx mex nẽ ỹ hã amnhĩ to htỳx pê ã amnhĩ nhĩpêx anhỹr o ri apa.

Sikũn Tesarõn 1:3

Nẽ na ka htem amnhĩ kaxyw Tĩrtũm mã ajamaxpẽr tỳx mex o ri apa. Nẽ axpẽn kutã anojarêt rãhã nẽ. Na pa htem ã mẽ ate amnhĩ nhĩpêx anhỹrja mã ijamaxpẽr nẽ mẽ anhỹ hã ixkĩnh nẽ Tĩrtũm mã mẽ anhỹ hã ixkĩnh ã amnhĩ jarẽ.

Piremõ 1:6

Na xep mẽ piitã mẽ kãm tanhmã Jejus kot mẽ inhnê amnhĩ nhĩpêx to hã harẽnh o ri mẽ hkôt pa. Jakamã kêr ka tanhmã mẽ kot mar xwỳnhjê hkrã hto kê mẽhprĩ hã mar tỳx nẽ Kris kot tanhmã mẽ ho mex to hã amnhĩ tã omu. Anhỹr o ato kuwỳ.

Eprêw 5:14

Mẽ kot Tĩrtũm kapẽr mar mex xwỳnhjaja na htem hprĩ hã kapẽr piitã mar tỳx nẽ. Kot amnhĩrĩt mex xwỳnhta mar tỳx nẽ mããnẽn kot amnhĩrĩt mex kêt xwỳnhja nhũm mẽhprĩ hã piitã mar tỳx nẽ. Te ho mẽ àptàr kot mẽõ mex kur o pata pyràk. Jao ra mẽ àptàr jamaxpẽr o hamaxpẽr o ri pa nẽ hamaxpẽr o: —Kot paj tãm amnhĩ nhĩpêx o ri ixpa nhũm ja inhmã mex nẽ. Nom kot paj axtem tanhmã amnhĩ tomnuj to nhũm ja ixpê omnuj nẽ. Jakamã kot paj tãm amnhĩ nhĩpêx pix o ri ixpa nhũm Tĩrtũm mã ja mex nẽ. Anẽ.

Wam Pêtre 1:22

Tã pu prem ra kot ã mẽ panê amnhĩ nhĩpêx anhỹr ã harẽnh ma nẽ mẽ pahte amnhĩ tomnuj kaga nẽ hkôt amnhĩ xunhwỳ. Jao amnhĩ to mex pix o ri papa. Nẽ mẽ pamã Kris kôt mẽ pahkwỳjê hkĩnh o papa. Tã kwa kêr pu mẽ arĩ pamã axpẽn kĩnh tỳx rãhã ho papa.

Sikũn Pêtre 3:18

Na ka htem mẽ papytàr xwỳnh Pahihti Jejus Kris kôt ri amnhĩ nhĩpêx o apa. Tã kêr ka mẽ arĩ hkôt amnhĩ nhĩpêx mex rãhã ho ri apa. Nẽ hkôt amnhĩ xunhwỳr tỳx nẽ. Kêr kê amnhĩ tã mẽ apumu nẽ mẽmoj to mẽ akutã nojarêt nẽ. Krisja mex o mex nẽ hihtỳx o hihtỳx. Tã kêr pu mẽ kãm mex o mex ã mãn harẽnh rãhã ho ri papa. Tã ãm ja pix. Ixpê Simãw Pêtre na pa ã mẽ amã ja hã kagà nẽ mẽ awỳr mẽnh anẽ.