Piremõ 1:6 - Tĩrtũm kapẽr ã kagà nyw

⁶ Na xep mẽ piitã mẽ kãm tanhmã Jejus kot mẽ inhnê amnhĩ nhĩpêx to hã harẽnh o ri mẽ hkôt pa. Jakamã kêr ka tanhmã mẽ kot mar xwỳnhjê hkrã hto kê mẽhprĩ hã mar tỳx nẽ Kris kot tanhmã mẽ ho mex to hã amnhĩ tã omu. Anhỹr o ato kuwỳ.

Piremõ 1:6 ပူးပေါင်းရင်းမြစ်များ

Matêwre 25:16

Hãmri nhũm kot ho 5.000 nẽ hamỳnh xwỳnhja kàxporeta py nẽ ma o mõr kurê kumrẽx nẽ tanhmã ho àpênh to ho mõr kãm ra hipy axte ho 5.000 nẽ kumẽ.

Wam Korĩt 14:25

Hãmri nẽ mẽ amã tanhmã kot amnhĩ tomnuj to hã amnhĩ jarẽnh pa hãmri nẽ hkaga nẽ Jejus kôt amnhĩ xunhwỳ. Nẽ hkõnkrã ho htẽm nẽ hkrĩ nẽ Tĩrtũm mã mex o mex ã harẽ. Hãmri nẽ mẽ amã: —Nà ãm hãmri na hte Tĩrtũm mẽ akamã pa ho pa. Anẽ.

Wam Korĩt 16:9

Na pa hte jar kormã mẽ kãm Jejus kapẽr jarẽnh o ri mẽ hkôt ixpa nhũm mẽ ohtô nẽ inhmar o pa. Mẽ kãm mar prãm. Tã no nhũm mẽ hkwỳjaja ohtô nẽ mẽ kêp ja omnuj nẽ nhũm mẽ hã ixkamã gryk nẽ ixtomnu o pa.

Piripos 4:8

E Kris kôt ixtõ nẽ ixtõxjaja. Nà ixkapẽr ã kagà jatur xà na ja. Kwa kêr ka mẽ ixujarẽnh mar tỳx nẽ hkôt amnhĩ nhĩpêx o apa. Nẽ kêr ka mẽ axàpênh mex pix kukamã ri ajamaxpẽr o apa. Nẽ mẽmoj mex pix kukamã ri ajamaxpẽr. Nẽ axpẽn mã akapẽr mex pix kukamã ri ajamaxpẽr. Nẽ akatàt kôt akapẽr xàptàr pix o axpẽn mã akapẽr hkukamã ri ajamaxpẽr o ri apa. Nẽ tãm ri amnhĩ nhĩpêx hkukamã mãn ajamaxpẽr o ri apa. Nẽ mẽ piitã ri mẽ ho mex o apa hkukamã ajamaxpẽr. Nẽ mẽ akapẽr mex pix kukamã mãn ajamaxpẽr o ri apa. E kêr ka mẽ ã amnhĩ nhĩpêx anhỹrja kukamã ajamaxpẽr rãhã ho ri apa.

Korosẽ 1:9

Nẽ na pre Epas akupỹn wa ixwỳr pôj nẽ wa inhmã tanhmã mẽ ajarẽnh to. Mẽ ate amnhĩ kaxyw Jejus kôt ajamaxpẽr o apa nẽ mẽ amã Kris kôt akwỳjê piitã mẽ hkĩnh o ri apaja nhũm wa inhmã mẽ ajarẽ. Pa wa mẽ ajarẽnh ma nẽ mẽ ato Tĩrtũm wỳr rãhã o jar mẽ hagjênh xà kamã ixkrĩ. Nẽ arĩ mẽ ato hwỳr rãhã ho ixkrĩ. Nẽ mẽ ato hwỳr o: —Pa Tĩrtũm. Ot pa Ximotre mẽ wa Korosẽ nhõ xwỳnhjê ho awỳr kaxyw amã mẽ harẽ. Kwa tanhmã mẽ hamaxpẽr to kê mẽ amã hprãm xà hkôt pix mã amã tanhmã amnhĩ nhĩpêx to ho pa. Nẽ Akarõ nhỹ hã hprĩ hã akapẽr ma nẽ ãm hkôt pix mã tanhmã amnhĩ nhĩpêx to ho pa. Anẽ.

Korosẽ 3:10

Nẽ na ka mẽ ra mẽ ate amnhĩ nhĩpêx nyw o amnhĩ nhĩpêx o ri apa. Jao ra mẽ pahto kator xwỳnh maatija kôt amnhĩ nhĩpêx mex o mõ. Kot kaj mẽ gaa nẽ rĩ hkôt amnhĩ nhĩpêx mex kumrẽx o ri apa. Kãm hprãm xà hkôt.

Xitre 3:14

Nẽ kêr ka Kris kwỳjê mã anẽ kê mẽ arĩ õrkwỹ pix kãm hkrĩ ho hkrĩ hkêt nẽ. Kê mẽ tanhmã axpẽn to mex to ho axpẽn kôt pa. Nhũm mẽhõ kêp amrakati kê mẽ tanhmã ho ajuta hto. Mẽ kãm anẽ kê mẽ ã axpẽn nhĩpêx anhỹr o pa.

Eprêw 6:10

Na ka htem Kris kôt mẽ akwỳjê ho mex o ri apa. Te mẽ amã amnhĩ tã ma pyràk o axpẽn nhĩpêx o ri apa nhũm Tĩrtũm ja hã mẽ apumu. Tã koja tanhmã ja hã mẽ ato mex to. Kot tãm mẽ panhĩpêx o pa jakamã koja tanhmã mẽ ate axpẽn nhĩpêx mex tota ã tanhmã mẽ ato mex to.

Xiakre 2:14

Nẽ kwa ixkwỳjaja. Koja mẽhõ kot amnhĩ kaxyw Jejus kôt hamaxpẽr nẽ hkôt amnhĩ xãm ã amnhĩ jarẽnh tã hkôt ri amnhĩ nhĩpêx kêt nẽ. Hã koja nhỹrmã ty hãmri nẽ tanhmã kot we amnhĩ to nẽ Tĩrtũm mẽ Jejus wa kuri htĩr tũm nẽ pa ho pa? Nà koja anhỹr kêt nẽ. Kêp hkra hã amnhĩ jarẽnh tã hkôt amnhĩ nhĩpêx kêt jakamã koja nhỹrmã wa hwỳr àpir kêt nẽ.

Xiakre 2:17

Ja pyrà nẽ koja mẽhõ ra amnhĩ kaxyw Jejus kôt hamaxpẽr nẽ hkôt amnhĩ xãm ã amnhĩ jarẽnh tã kapẽr kôt ri amnhĩ nhĩpêx kêt japêr. Hã koja ãm kêp hkra hã amnhĩ jarẽnh kaprỳ.

Wam Pêtre 2:12

E kwa kêr ka mẽ anhõ krĩ kamã akwỳ kot Kris kôt amnhĩ xunhwỳr kêt xwỳnhjê noo mã tãm ri amnhĩ nhĩpêx o ri apa. Mẽ kot Kris ã tanhmã mẽ anhĩpêx to rỳ tanhmã hã mẽ ato kapẽr punuj to htãã. Kot kaj mẽ ã mẽ hkôt amnhĩ nhĩpêx anhỹr o ri apa hãmri nhũm mẽ tee ri mẽ apumu nẽ hamaxpẽr o: —Kwa mẽ ixte mẽ kot amnhĩ tomnuj xwỳnh ã mẽ harẽnh tã mẽ kot amnhĩ to mex pix xwỳnh na mẽ. Anẽ. Hãmri nẽ nhỹrmã mẽ pahpyrà nẽ Tĩrtũm kôt amnhĩ xunhwỳ nẽ kãm mex o mex ã harẽ nẽ kãm: —Kwa Tĩrtũm. Na pre hte akrajaja anhỹ hã amnhĩ to mex rãhã nẽ pa ho pa pa ja hã mẽ omu. Nà xep amex o amex Tĩrtũm. Anẽ.

Wam Pêtre 3:1

Nẽ kêr ka mẽ anijaja mẽ amjên kapẽr ma nẽ hkôt amnhĩ nhĩpêx. Akĩnhã kormã kot Tĩrtũm kôt amnhĩ nhĩpêx kêt japêr tã arĩ kapẽr ma nẽ hkôt amnhĩ nhĩpêx mex o ri apa. Kê mẽ ate amnhĩ nhĩpêx ã mẽ apumu nẽ mẽ apyrà nẽ Kris kôt amnhĩ xunhwỳr japêr. Mẽ kãm Tĩrtũm kapẽr mar prãm kêt tã koja mẽ ã mẽ ate amnhĩ nhĩpêx anhỹr ã mẽ apumunh kôt mẽ apyrà nẽ amnhĩ kaxyw hkôt hamaxpẽr japêr.

Wam Pêtre 3:16

Nom kêr ka mẽ akapẽr mã aprĩ kamã kãm amnhĩ jarẽ. Tĩrtũm kapẽr kôt amnhĩ nhĩpêx o apa hã mẽ kãm amnhĩ jarẽ. Koja mẽ Kris ã mẽ ato kapẽr punuj rỳ hã mẽ atã hpẽr o axkẽ nẽ pikunhar japêr ka mẽ ãm amnhĩ tã mẽ ama nẽ ãm mẽ ama. Kwãr mẽ mãmrĩ ã mẽ anhĩpêx anẽ. Kêr ka mẽ amnhĩ tã mẽ omu nẽ arĩ amnhĩ to mex rãhã ho ri apa. Kêr kê mẽ tee ri amnhĩ tã mẽ apumu nẽ hpijaàm nẽ.

Sikũn Pêtre 1:8

E kêr ka mẽ ã amnhĩ nhĩpêx anhỹr o ri apa. Kot ka mẽ ã amnhĩ nhĩpêx anẽ nẽ mẽ panhõ Pahihti Jejus Kris kôt amnhĩ nhĩpêx mex o mõ. Hãmri nhũm mẽ akwỳjaja mẽ apumu nẽ mẽ apê Kris kwỳ hã mẽ ajarẽnh kurê kumrẽx.