Matêwre 25:43 - Tĩrtũm kapẽr ã kagà nyw

⁴³ Nẽ nhỹri ahte ixpa hã ixpumu nom amnhĩ nhõrkwỹ hwỳr ixwỳr kêt nẽ. Nẽ ixê pynajre nẽ ixpa hã ixpumu nom inhmã axê nhõr kêt nẽ. Nẽ ixà nẽ inhĩkwỹ hã ixpumu nom ixkane hkêt nẽ. Nẽ mẽ kot ijaxàr nhũm arĩ ixkrĩ hã ixpumu nom ixwỳr amrar nẽ tanhmã ixto mex to hkêt nẽ. Ã mẽ ate inhĩpêx anhỹr o apa jakamã e mẽ ma kuwy hwỳr apa kurê kumrẽx.” Anẽ. Kot paj ã mẽ kãm ixkapẽr anẽ.

Matêwre 25:43 ပူးပေါင်းရင်းမြစ်များ

Matêwre 25:36

Nẽ na pa pre ixê pynajti nẽ ri ixpa ka prem ja hã ixpumu nẽ inhmã axê gõ pa haxà nẽ ri hã ixpa. Nẽ na pa pre ixà nẽ inhĩkwỹ ka prem ixwỳr mra nẽ ixkane nẽ tanhmã ixto mex to pa akupỹm inhmex. Nhũm prem ijaxà pa mẽ hagjênh xà kamã ixkrĩ ka prem ixwỳr mra nẽ tanhmã ixto mex to. Ã mẽ ate ixto mex anhỹr o ri apa jakamã nhũm inhõ Papajja ixtã mẽ apumu. Tã koja ixtã mẽ ato mex rax nẽ.” Anẽ.

Matêwre 25:42

Aa mẽ ate tanhmã ixto mex to hkêt. Na ka pre htem inhmã prãm nẽ ixpa hã ixpumu nom inhmã mẽmoj nhõr kêt nẽ. Nẽ inhmã kôr nẽ ixpa hã ixpumu nom inhmã gô hkwỳ hkêt nẽ.

Matêwre 25:44

Hãmri nhũm mẽ tee ri inhma nẽ amnhĩ tã ixkukja nẽ inhmã: “Kwa nà ã mẽ ijarẽnh anhỹr kêt nẽ. Aa mẽ ixte ã anhĩpêx anhỹỹre hã. Nhỹri na pa prem tanhmã akute hã apumu? Nà aa mẽ ixte nhỹri ã ate amnhĩ nhĩpêx anhỹr ã apumunhre hã.” Anẽ.

Atre 15:36

Hãmri nhũm Pawre mẽ Panãpe war arĩ mẽ hkôt ri pa hã apkati xohtô nẽ. Tã nhũm Pawre hamaxpẽr nẽ Panãpe mã: —Kwa ma pu ma akupỹm ra pahte krĩ hkwỳ hkôt mẽ kãm Jejus jarẽnh o papa xwỳnhjê hkôt akupỹm mõ. Pu ma mẽ hwỳr mõ nẽ Jejus kôt pahtõ nẽ pahtõxjê kot tanhmã ri amnhĩ nhĩpêx to hã mẽ omu. Anẽ.

Eprêw 13:2

Nẽ amnepê mã na pre mẽmojaja nhỹhỹnh mra nẽ mẽ panhĩgêtjê hõ hwỳr pôj. Hãmri nhũm mẽ omu nẽ htỳx axtem krĩ hõ nhõ xwỳnh ã mẽ hkamnhĩx tã no nhũm mẽ kêp Tĩrtũm kapẽr o mẽ wrỳk xwỳnh kwỳ na prem. Hãmri nhũm amnhĩ nhõrkwỹ hwỳr mẽ kuwỳ nhũm mẽ ma hkôt mra nẽ kuri pôj nẽ kutã apku. Jakamã kwa koja nhỹhỹnh krĩ hõ rũm mẽmojaja ma mẽ awỳr mõ ka mẽ omu nẽ axàmnhĩx amnhĩ nhõrkwỹ hwỳr mẽ hwỳr kurê kumrẽx kê mẽ ari pôj. Ã mẽ hipêx anhỹr o apa hãmri nẽ nhỹrmã mẽ panhĩgêtja pyrà nẽ amnhĩ wỳr Tĩrtũm kapẽr o mẽ wrỳk xwỳnhjê hõ hwỳr japêr. Mẽ uràk nẽ ja hã mẽ omunh kêt tã atỳx amnhĩ wỳr mẽ awỳ nhũm ja mẽ amã mex o mex.

Eprêw 13:3

Nẽ kêr ka mẽ ra mẽ kot Jejus ã mẽ akwỳjê pynênh nẽ mẽ hagjênh xwỳnhjê mã ajamaxpẽr rãhã ho ri apa nẽ mẽ ho ajamakêtkati hkêt nẽ. Te mẽ kajaja mẽ ĩhkô hã mẽ hagjênh xà kamã apunuj nẽ akrĩ pyràk o mẽ kãm ajamaxpẽr o ri apa. Jao mẽ kamã axukaprĩ ho mẽ hwỳr mra nẽ mẽ kãm mẽmoj nhõr o ri apa.