Korosẽ 2:5 - Tĩrtũm kapẽr ã kagà nyw

⁵ Nẽ kormã arĩ Jejus ã ijaxàr nẽ ixkrĩ nẽ kormã mẽ akôt ixpa hkêt tã ot pa hte mẽ amã ijamaxpẽr rãhã ho ixkrĩ. Nẽ ra tanhmã mẽ ajarẽnh mar to. Na ka xep htem Kris kôt amnhĩ nhĩpêx tỳx o ri apa. Te ahkrô pê kukryt mut kuxêêti kot pĩ kupu htỳxta pyràk. Nẽ ka xep htem arĩ amnhĩ kaxyw Kris mã ajamaxpẽr tỳx o ri apa. Pa mẽ ajarẽnh ma nẽ ixkĩnh tỳx nẽ.

Korosẽ 2:5 ပူးပေါင်းရင်းမြစ်များ

Atre 2:42

Hãmri nhũm mẽ ra mẽ kot Jejus kôt amnhĩ nhĩpêx xwỳnhjê hkôt amnhĩ nhĩpêx o pa nhũm Jejus nhỹ hã mẽ ahkre xwỳnh maatijaja apkati mẽ Jejus kapẽr o mẽ ahkre nhũm mẽ mar tỳx nẽ ra Jejus kôt amnhĩ nhĩpêx mex o mõ. Nẽ gaa nẽ hkôt amnhĩ nhĩpêx mex o pa. Mẽ kãm kapẽr mar prãm tỳx jakamã na pre htem axpẽn wỳr akuprõ nẽ axpẽn kutã apku nẽ Tĩrtũm mã amnhĩ jarẽnh o hkrĩ. Nẽ mẽ kãm axpẽn to mex pix prãm o axpẽn kôt pa ho pa.

Atre 20:21

—Nẽ mẽ ixpê Ijaewjê mẽ mẽ apê Ijaew kêt xwỳnhjê mẽ pa pre mẽ ajahkre ho axpẽn pyràk. Mẽ apiitã mẽ ate amnhĩ tomnuj kaga nẽ hpãnhã Tĩrtũm kôt amnhĩ nhĩpêx kaxyw. Nẽ amnhĩ kaxyw mẽ panhõ Pahihti Jejus Kris kôt ajamaxpẽr kaxyw na pa pre mẽ akôt ri mẽ ajahkre rãhã ho ri ixpa.

Wam Korĩt 11:34

Nẽ ka mẽ atõ ra amã prãm japêr nẽ anhõrkwỹ kamã apku nẽ rĩ kormã mẽ hkôt tẽ. Jao ra anhõhy htu nẽ ajamakêtkati nẽ akwỳjê jamãr o nhỹ. Kê mẽ hpôx pa ka mẽ atipxi nẽ Pahihti Jejus tyk mã ajamaxpẽr pê hkur o akrĩ. Hãmri nhũm Tĩrtũm ja hã mẽ apumu nẽ hkĩnh nẽ tanhmã mẽ ato hkêt nẽ. Na ka prem mẽ ate inhmã kagà nẽ mẽnhta kamã mẽmoj tã ixkukjêr rax nẽ. Tã na pa ra kagà ja kamã mẽ amã hkwỳ jarẽnh rax nẽ. Nom kot paj piitã harẽnh par kêt nẽ. Kot paj ãm mẽ amã hkwỳ pix jarẽ. Hãmri nẽ nhỹrmã ma mẽ awỳr mõ nẽ mẽ apumu nẽ kormã axte mẽ amã harẽnh jatur xàm kumẽ.

Wam Korĩt 14:40

Nom kêr ka mẽ ate Tĩrtũm mã amnhĩ jarẽnh xà hã ixkre kamã axpẽn pãnhã axpẽn mã akapẽr nom anhĩpê kãm akapẽr hkêt nẽ.

Wam Korĩt 15:58

Jakamã e kwa Jejus kôt ixkwỳjaja. Kêr ka mẽ arĩ Pahihti Jejus kôt mãn amnhĩ xunhwỳr tỳx rãhã ho ri apa. Nẽ kapẽr kôt pix mã ri amnhĩ nhĩpêx rãhã nẽ kãm tanhmã amnhĩ nhĩpêx mex to ho ri apa. Kot kaj mẽ ã amnhĩ nhĩpêx anẽ hãmri nẽ kãm tanhmã amnhĩ nhĩpêx to kaprỳ ho ri apa hkêt nẽ. Ãm hãmri kãm mẽmoj to anhỹr mex rãhã ho ri apa.

Wam Korĩt 16:13

E kwa kêr ka mẽ arĩ amnhĩ wỳr Jejus kamã ajamak rãhã ho ri apa. Nẽ hamãr pê kutêp tãm amnhĩ nhĩpêx o ri apa. Nẽ amnhĩ kaxyw hkôt ajamaxpẽr tỳx rãhã nẽ.

Korosẽ 2:1

E kot paj mẽ amã tanhmã amnhĩ jarẽnh to ka mẽ inhma. Na pa hte mẽ ato Tĩrtũm wỳr rãhã ho ixkrĩ. Mẽ kajaja nẽ krĩ pê Ratisej kamã Jejus kôt mẽ pahkwỳjaja. Kormã ixte mẽ apumunh kêt tã pa hte mẽ ato Tĩrtũm wỳr kãm ixihtỳx ãhã ho ixkrĩ.

Wam Tesarõn 2:17

Nẽ ma mẽ awỳr mẽ inhmõr tã mẽ anhõ krĩ kamã mẽ kêp Kris kwỳ hkêt xwỳnhjaja na pre mẽ ixpumu nẽ mẽ anê mẽ ijano pa prem ijapôj nẽ hpãnhã ma nhỹhỹm krĩ hõ hwỳr ixpa. Nom arĩ mẽ amã ijamaxpẽr rãhã nẽ mẽ ato ijamak o ri ixpa nẽ xatã akupỹm mẽ awỳr ixkrà.

Wam Tesarõn 3:8

Tesarõn nhõ xwỳnhjaja kot Kris ã tanhmã mẽ anhĩpêx to htã ka mẽ arĩ hkôt amnhĩ xunhwỳr tỳx rãhã nẽ. Pa wa mẽ ajarẽnh ma nẽ mẽ anhỹ hã ixkĩnh pê tanhmã Pahihti Jejus mã amnhĩ nhĩpêx to ho ri ixpa.

Eprêw 3:14

Kwa mẽ ri ã ajamaxpẽr anhỹr kêt nẽ. Amnepê mã mẽ pahte Kris kôt amnhĩ xunhwỳr nhũm kot mẽ pahto hkrata ã na pu prem amnhĩ kaxyw hkôt pajamaxpẽr o papa. Tã kêr pu mẽ arĩ ã amnhĩ nhĩpêx anhỹr tỳx o papa rãhã ty.

Eprêw 6:19

Na hte kanôre ho htỳx xàja kanôre ho htỳx nhũm ma gô hkôt pa hkêt nẽ. Ja pyrà nẽ kot puj mẽ Tĩrtũm kot mẽ pahto mex xà kamã pajamak o papa hãmri nẽ hkaga hkêt nẽ. Amnepê mã na pre hte mẽ panhõ patre maatija Tĩrtũm mã amnhĩ jarẽnh xà hã ixkre hwỳr agjê nẽ hkôt ã kupẽxê ho hitom maati hwỳr agjê nẽ kamã mẽ ho Tĩrtũm wỳr o kuhê. Tã nhũm Jejus akupỹm kaxkwa hwỳr api nẽ Tĩrtũm ri hkrĩ hãmri nẽ patre maatita pãnhã tãm mẽ pahto hwỳr o hkrĩ.

Wam Pêtre 5:9

Na hte ã pika piitã hkôt Kris kôt mẽ pahtõ nẽ mẽ pahtõxjê nhĩpêx anhỹr o pa nhũm mẽ pahpyrà nẽ amnhĩ xà htỳx kamã hamak o pa pê omnuj nẽ pa. Jakamã kwa kêr ka mẽ Kris kôt amnhĩ xunhwỳr tỳx nẽ kutã amnhĩ to htỳx rãhã ho ri apa.