Juãw 17:5 - Tĩrtũm kapẽr ã kagà nyw

⁵ Jakamã e Papaj. Kêr ka tokyx ixpê akra hã ma akupỹm amnhĩ wỳr ixto api. Pa akupỹm awỳr pôj nẽ te amnepêm akuri ixpaja pyrà nẽ axte akuri ixpa ho ixpa.” Anẽ. Nhũm Jejus arĩ Tĩrtũm mã kapẽr nẽ kãm:

Juãw 17:5 ပူးပေါင်းရင်းမြစ်များ

Wam Pêtre 1:20

Amnepê mã kormã mẽmoj kêt ri na pre Tĩrtũm kot ã mẽ pahpãnhã amnhĩrer anhỹr kaxyw mẽ pakukamã kuta nẽ ãm. Tã nhũm amgrà ohtô nẽ hapêx nhũm mẽ pahwỳr kumẽ nhũm man mẽ pahwỳr wrỳ. Kot ã mẽ pahpãnhã amnhĩ nhĩpêx anhỹr kaxyw.

Piripos 2:6

Kêp Tĩrtũm Kra kumrẽx jakamã te uràk tã xà na pre ja hã amnhĩ pumu nẽ amnhĩ pix kukamã ã hamaxpẽr anẽ nẽ hamaxpẽr o: Te ixte Tĩrtũm pyràk jakamã mẽmoj piitã inhõ na. Jakamã kot paj jar kaxkwa kamã inhmex nẽ ixkĩnh nẽ ixpa ho ixpa nẽ aa rer nẽ nhỹhỹm inhmõr kêt kumrẽx. Anhỹr o na pre hamaxpẽr? Nà na pre ã hamaxpẽr anhỹr kêt nẽ.

Eprêw 1:10

Hãmri nẽ kãm: Pa Pahihti. Nà amnepêm kormã mẽmoj kêt ri na ka pre ixkukwak ri pika nẽ kaxkwa ho akato. Ãm hãmri na ka pre ã amnhĩ nhĩpêx anẽ.

Juãw 17:24

Amnepêm amrakati ri pa pre amã ijapê hã ri ixpa. Tã ot pa jajê ho awỳ. Ka na ka pre inhmã mẽ agõ. Tã ma awỳr inhmõr mã xàta wỳr na pa inhmã mẽ àpir prãm nẽ. Koja mẽ nhỹrmã ma pahwỳr api pu mẽ pahpiitã pahpimrààtã pamã axpẽn japê hã ri papa ho papa.

Juãw 8:58

Hãmri nhũm Jejus mẽ kãm: —Nà ixêx kêt. Ãm hãmri na pa ã mẽ amã amnhĩ jarẽnh anẽ. Amnepêm kormã Apraãw kator kêt ri na pa pre ixrãhã ho ixrãhã ixpa na pa. Ixrãhã ho ixrãhã ixpa xwỳnh jakamã na pa pre hte inhno ho Apraãw pumunh mex o ri ixpa. Kwa mẽ ixkapẽr ma nẽ amnhĩ krã him haxàr tỳx nẽ. Anẽ.

Juãw 1:18

Nẽ aa mẽ pahtõ mẽ pahte pano ho Tĩrtũm pumunh kêt. Ãm Kraja pix na kot no ho omunh. Kaxkwa kamã kuri ri pa ho pa jakamã kot omunh mex. Nẽ te kot Hipêêxàja pyràk jakamã na pre wrỳ nẽ hprĩ hã tanhmã kute hã mẽ pamã harẽnh o pa. Jakamã na pu mẽ ra pahpiitã Tĩrtũm kot amnhĩ nhĩpêx ã omu nẽ mar mex nẽ.

Juãw 14:9

Hãmri nhũm Jejus kãm: —Kwa na pa pre ra mẽ akôt ri ixpa ryy nẽ. Ka mẽ aprĩ hã ixpumunh mex nẽ. Kêt ra mẽ kot ixpumunh mex xwỳnhjaja te mẽ kot mããnẽn Inhĩpêêxàja no ho omunh mex pyràk.

Matêwre 25:34

Hãmri nẽ ixupôk rũm mẽ ate ixkôt amnhĩ xunhwỳr xwỳnhjê mã ixkapẽr nẽ mẽ amã: “E mẽ kajaja kot kaj mẽ amex kumrẽx nẽ ri apa ho apa. Amnepêm kormã mẽmoj piitã hkêt ri na pa pre Inhĩpêêxà mẽ wa mẽ akukamã tanhmã ijamaxpẽr to nẽ mẽ amã mẽmoj mex xunhwỳr rũnh nẽ.

Juãw 3:13

Mẽhõ na we ra ma kaxkwa hwỳr api nẽ kamã mẽmoj mex pumu nẽ man akupỹn mẽ awỳr wrỳ nẽ mẽ amã tanhmã harẽnh to? Nà amrakati kumrẽx. Ãm paxipix ixpê Tĩrtũm kot mẽ akaxyw ixãm xwỳnh na pa pre amnẽ kurũm mẽ awỳr wrỳ hãmri nẽ ixprĩ hã mẽ amã tanhmã harẽnh to ho ri ixpa.

Apokarip 3:21

Kormã mẽ kot ixpĩr kêt ri na pa pre mẽ kot amnhĩ tomnuj xwỳnhjê kutã amnhĩ to htỳx o ixpa. Amnhĩ to htỳx nẽ ri ixpa kamã ixtyk jakamã nhũm Inhĩpêêxà akupỹm ixto ixtĩr nẽ akupỹm amnhĩ wỳr ixto api. Hãmri nẽ amnhĩ nhĩhkô hã mẽ ho amnhĩptàr ã hkrĩ xà kamã inhỹr pa ixkrĩ ho ixkrĩ nẽ ĩhkô hã mẽ piitã mẽ ho amnhĩptàr o ixkrĩ. Tã kot kaj mẽ atõ ixpyrà nẽ ate amnhĩ tomnuj nê amnhĩ to htỳx nẽ. Nẽ inhmã hprãm xà hkôt pix mã amnhĩ nhĩpêx rãhã ty. Hã kot paj amnhĩ pyrà nẽ wa ixte mẽ ato amnhĩptàr ã ixkrĩ xàja kamã amnhĩ nhĩhkô hã mẽ akrĩ ka mẽ wa inhĩhkô hã wa inhmã mẽ ho amnhĩptàr o akrĩ.

Apokarip 13:8

Jakamã nhũm mẽ ohtô rax kumrẽx nẽ mrymnuti hkôt amnhĩ nhĩpêx. Nẽ kutã hkõn krã ho rôrôk nẽ hkrĩ nẽ kãm mex o mex ã harẽ. No ãm mẽ piitã hkêt. Kot mẽ pahte amnhĩ tomnuj pãnhã amnhĩrer xwỳnh kôt ra mẽ kot amnhĩ xunhwỳr xwỳnhjaja tapxipixjaja na prem hkôt amnhĩ xunhwỳr kêt nẽ. Amnepê mã kormã amrakati ri Tĩrtũm mẽ Jejus wa õ kagà kamã mẽ htĩr tũm nẽ mẽ pa mã xwỳnh nhĩxi xwỳnh pixjaja na prem mrymnuti pumu nẽ hkwỳjê rom hprĩ hã kot amnhĩ nhĩpêx ã omunh kurê kumrẽx nẽ hkôt amnhĩ nhĩpêx kêt nẽ.

Wam Juãw 1:2

Na pre kaxkwa kamã Hipêêxà hkôt ri pa ho pa htã amnẽ pika hwỳr mẽ pahwỳr wrỳ. Hãmri nẽ jar mẽ pakamã kato pa pre mẽ ixkwỳjaja omu. Tã mẽ ixte omunh xà hkôt na pa htem amnhĩ xô ri tanhmã mẽ amã harẽnh to. Koja nhỹrmã akupỹm mẽ pahto mẽ pahtĩr pu mẽ kuri pahtĩr tũm nẽ pamex nẽ papa ho papa.

Juãw 17:1

Tã nhũm Jejus mẽ inhmã kapẽr pa nẽ hpãnhã kaxkwa hwỳr rĩt nẽ Tĩrtũm mã amnhĩ jarẽ nẽ kãm: “Pa Papaj. E na pa ra amã hprãm xà hkôt tanhmã amã amnhĩ nhĩpêx to hpar o mõ nẽ akupỹm awỳr inhnojarêt kaxyw. Jakamã kot kaj ixpê Akra hã ma akupỹm amnhĩ wỳr ixto api. Mẽ kot ja hã ixpumunh nẽ amã amex o amex ã ajarẽnh o pa kaxyw.

Wam Pêtre 1:21

Tã nhũm prem kupĩ nhũm Tĩrtũm akupỹm ho htĩr nẽ mex o mex ã harẽ. Mẽ pahte ja hã harẽnh mar kôt amnhĩ kaxyw Tĩrtũm pix mã pajamaxpẽr o ri papa kaxyw. Nẽ mẽ pahte amnhĩ wỳr Jejus jamãr rãhã ho ri papa kaxyw.