Eprêw 3:7 - Tĩrtũm kapẽr ã kagà nyw

^7-8 Amnepêm na pre mẽhõja tanhmã Tĩrtũm Karõ nhỹ hã kapẽr to nẽ kapẽr o: E kêr ka mẽ Tĩrtũm kapẽr mar tỳx o apa. No ama nẽ ãm ama nẽ ri hã apa hkêt nẽ. Rỳ kapẽr pê akrã hihtỳx o apa hkêt nẽ. Mẽ akukamã mẽ anhĩgêtjaja na prem ã amnhĩ nhĩpêx anẽ nẽ Tĩrtũm kapẽr pê hkrã hihtỳx o pa. Kapôt ã Mojes kôt mẽ pata ã na prem kãm Tĩrtũm kapẽr mar prãm kêt nẽ. Nẽ tee ri amnhĩ kukamã hamaxpẽr nẽ akupỹm Ejit wỳr hkrà nẽ axpẽn mã: “Kwa na pu mẽ ra pahpunuj tỳx nẽ papa nhũm Tĩrtũm ãm ja hã mẽ pahpumu nẽ tanhmã mẽ pahto mex to hkêt nẽ. Mãn ra mẽ pahkaga nà? E kwa pu mẽ awjanã nẽ ma akupỹm Ejit wỳr mãn papa.” Anẽ.

Eprêw 3:7 ပူးပေါင်းရင်းမြစ်များ

Matêwre 17:5

Hãmri nẽ kormã ã kãm kapẽr anhỹr rôm nhũm ra kakrã jaka htỳxja wrỳ nẽ wa mẽ hkunor pa nhũm wa mẽ kamã kuhê. Nhũm kakrã kamã Tĩrtũm mẽ kãm kapẽr nẽ mẽ kãm: —E ota Ixkra xa. Inhmã hapê ho inhmã hapê. E kêr ka mẽ kapẽr mar tỳx rãhã ho ri apa. Anẽ.

Matêwre 22:43

Anẽ nhũm Jejus mẽ kuma nẽ mẽ kãm: —Tỳ. Ãm hãmri na ka mẽ harẽ. No mo na htem axpẽn mã kêp pahi Tawi hkanrẽhã htàmnhwỳ pix ã harẽ nẽ mããnẽn kêp õ pahihti hã harẽnh kêt nẽ? Tawi na pre Tĩrtũm Karõ nhỹ hã tanhmã harẽnh to nẽ harẽnh o:

Makre 12:36

Na pre Tawi tãm Tĩrtũm kapẽr tũm kwỳ hã kagà nẽ tanhmã Tĩrtũm kot mẽ akaxyw ãm mã xwỳnhta jarẽnh to. Tĩrtũm Karõ nhỹ hã tanhmã harẽnh to. Tĩrtũm mex ã mẽ grer xàja kwỳ hã kagà nẽ hã kagà ho: Tĩrtũm na pre inhõ Pahihti mã ã kapẽr anẽ nẽ kãm: “E amnẽ ixwỳr tẽ nẽ inhĩhkô hã nhỹ nẽ inhmã mẽ ho amnhĩptàr o akrĩ. Kot paj mẽ kot kãm akurê xwỳnh piitã mẽ unênh pa nẽ awỳr mẽ o mra nẽ anhĩhkram mẽ haxàr pa.” Anhỹr o pre kãm kapẽr. Anẽ.

Juãw 10:16

—Mẽ kot ixkôt amnhĩ xunhwỳr xwỳnhjaja piitã kêp Ijaew pix kêt. Koja Ijaew kêt xwỳnh kwỳjaja mããnẽn ixkapẽr ma nẽ ixkôt amnhĩ xunhwỳ nẽ ixkôt amnhĩ nhĩpêx. Jao ra te kêp ixkrit ôwêhti pyràk. Tã kot paj mẽ ho ixpimràà tã mẽ ho tipxi nẽ mẽ hamãr o ri mẽ hkôt ixpa.

Juãw 10:27

Ixkwỳjaja na te ho ôwêhti kot hamãr xwỳnh kapẽr mar nẽ hkôt ri pata pyrà nẽ ixkapẽr ma nẽ ixkôt amnhĩ nhĩpêx o pa. Ixpê mẽ õ pahihti hã mẽ kot ixpumunh mex jakamã na htem ixkôt amnhĩ nhĩpêx mex o pa. Ixte ja hã mẽ omunh mex nẽ.

Juãw 10:3

Nhũm kahê xà jamãr xwỳnhja amnhĩ wỳr omu nẽ kãm kahê xà rẽnh kurê kumrẽx nhũm axà. Na hte apkati mẽ ma nhỹhỹm apkur kaxyw mẽ o pa. Nẽ nojarêt nẽ mẽ kãm akir. Ahpỹnhã tanhmã mẽ hixi kute hã mẽ omunh xà hkôt mẽ kãm àkjêr o pa. Hãmri nhũm mẽ kuma nẽ hwỳr mra nẽ hã pikuprõnh pa nhũm mẽ ho hapôj nẽ ma nhỹhỹm ri mẽ apkur kaxyw mẽ o pa.

Juãw 5:25

—No mẽ kãm ixkapẽr mar prãm kêt xwỳnhjaja kêp Inhĩpêêxà mẽ wa ixri mẽ htĩr tũm nẽ mẽ pa mã xwỳnh kêt. Tã ixpê Tĩrtũm Kra jakamã koja mẽ ixkapẽr ma nẽ ixkôt amnhĩ xunhwỳ. Hã kot paj amnhĩ tã mẽ omu nẽ mẽ htĩr tũm nẽ mẽ pa mã xwỳnh ã mẽ harẽ nhũm mẽ àmnhĩx ri hkĩnh nẽ pa ho pa. Kwa mẽ jam ajamaxpẽr tỳx rãhã ho apa.

Atre 28:25

Jakamã kànhmã kuhê nẽ nojarêt nhũm Pawre mẽ kãm: —Nà amnepêm na pre Tĩrtũm finat Ijaisti mã tanhmã kapẽr to. ỹ hã kot mẽ panhĩgêtjê mã tanhmã kapẽr jarẽnh to kaxyw. Tĩrtũm Karõ nhỹ hã kot mẽ kãm kapẽr nẽ tanhmã mẽ harẽnh to kaxyw. Te Tĩrtũm tãm mẽ kãm kapẽr pyràk mẽ kãm kapẽr. Nẽ ãm hãmri tanhmã mẽ pahkwỳjê jarẽnh to. Na pre mẽ kãm: E Ijaisti. Kêr ka ma akwỳjê hkôt ri mẽ kãm tanhmã ixkapẽr jarẽnh to ho ri apa. Nẽ mẽ kãm: “Kot kaj mẽ ajamak o axumar tỳx tã aprĩ hã ixkapẽr mar kêt nẽ. Nẽ mẽ ano ho arĩt tỳx tã aprĩ hã ixte amnhĩ nhĩpêx ã ixpumunh kêt nẽ. Mẽ amã ixkapẽr mar prãm kêt jakamã te mẽ ate mar pymaj amnhĩ jamak pro pyràk o amnhĩ nhĩpêx o ri apa. Nẽ mẽ amã ixte amnhĩ nhĩpêx ã ixpumunh prãm kêt jakamã te mẽ ate ixte amnhĩ nhĩpêx ã ixpumunh pymaj te mẽ anomnhõt pyràk o amnhĩ nhĩpêx o ri apa. Jao amnhĩ kaxyw ixkôt ajamaxpẽr kêt nẽ. Kop mẽ amã ixkapẽr mar prãm ronhỹx ka mẽ aprĩ hã inhmar tỳx nẽ. Nẽ aprĩ hã ixte amnhĩ nhĩpêx ã ixpumunh mex nẽ. Jao amnhĩ tomnuj kaga hpa nẽ ixkôt amnhĩ xunhwỳ. Pa ja hã mẽ apumu nẽ mẽ ato mex nẽ. Tã ka mẽ ã amnhĩ nhĩpêx anhỹr kêt nẽ.” Anhỹr o kêr ka mẽ kãm ixkapẽr jarẽnh o ri mẽ hkôt apa Ijaisti. Anẽ. Na pre ã Tĩrtũm mẽ panhĩgêtjê kaxyw Ijaisti mã kapẽr anẽ nhũm ô ri mẽ kãm ujarẽnh o pa nẽ mẽ pamã hã kagà. Jakamã kwa mẽ okora. Kêr ka mẽ jajê pyrà nẽ ã amnhĩ nhĩpêx anhỹr hkêt nẽ. Kwa mẽ inhma nẽ inhmar tỳx nẽ. Ijaew kêt xwỳnhjaja kot kapẽr marja na ra Tĩrtũm kãm hprãm nẽ. Jakamã koja mẽ hwỳr mẽ kot kapẽr jarẽnh o mẽ pa xwỳnh kwỳjê rẽ nhũm mẽ hkôt mẽ kãm ujarẽnh o pa nhũm mẽ kuma nẽ mẽ akurom kãm mar prãm nẽ. Anẽ. Hãmri nhũm mẽ kuma nẽ hapôx pa nẽ ma akupỹm axpẽn mã tanhmã kapẽr jarẽnh to ho mra.

Atre 8:29

Hãmri nhũm Tĩrtũm Karõ Firipti mã harẽ nẽ kãm: —E mẽhõ mũj wỳr aprõt nẽ tẽ nẽ hã ajêt nẽ ma hkôt tẽ. Anẽ.

Eprêw 10:15

Amnepêm mẽ kot Tĩrtũm nhỹ hã kapẽr jarẽnh o mẽ pa xwỳnhjaja na prem mẽ panhĩgêtjê mã kapẽr o pa. Tĩrtũm Karõ nhỹ hã mẽ kãm kapẽr nẽ mẽ kãm:

Eprêw 3:13

Kêt mẽ Kris kôt axpẽn to axihtỳx o ri apa. Nẽ apkati mẽ ã axpẽn nhĩpêx anhỹr rãhã nẽ. Kot kaj mẽ anhỹr kêt hãmri nẽ mẽ amã Tĩrtũm kapẽr mar prãm kêt ã amnhĩ to amnhĩrĩt. Jao tanhmã amnhĩ tomnuj to ho ri apa nẽ atỳx ajamaxpẽr o: —Nà ixte ã amnhĩ tomnuj anhỹr tã nhũm Tĩrtũm ja hã ixpumu nẽ ãm hã ixpumu. Anhỹr o ajamaxpẽr japêr. Rỳ mẽ ajamaxpẽr o: —Nà na pa hte ã amnhĩ tomnuj anẽ nhũm Tĩrtũm ja hã ixpumu nhũm ja kãm mex nẽ. Anhỹr o ajamaxpẽr japêr.

Eprêw 3:15

Tĩrtũm kapẽr ã kagà htũm kot ja jarẽnh kot: E kêr ka mẽ Tĩrtũm kapẽr ma nẽ mar tỳx nẽ. No ama nẽ ãm mar nẽ ri hã apa hkêt nẽ. Rỳ mẽ kot hkaga xwỳnhjê pyrà nẽ kêp akrã hihtỳx kêt nẽ. Anẽ.

Eprêw 4:7

Amnepêm Ijaew Tĩrtũm kôt hamaxpẽr kêt jakamã na prem kapôt ã pikaprãr pa. Hãmri nhũm amgrà xohtô nẽ hapêx nhũm Tĩrtũm mẽ hkanrẽhã mẽ htàmnhwỳjê hõ pê finat Tawija mã kapẽr nhũm kuma nẽ mẽ pamã tanhmã kapẽr tota ã kagà nẽ hã kagà kot: Kwa kêr ka ixkapẽr ma nẽ mar tỳx nẽ. No mẽ anhĩgêtjê pyrà nẽ akrã hihtỳx ho inhma nẽ ãm inhmar kêt nẽ. Anẽ. Na pa pre ra mẽ amã ã ja jarẽnh anẽ.

Eprêw 9:8

Nẽ patre maati pix na pre hitom maatija wỳr agjê nẽ mẽ ho Tĩrtũm wỳ. Ijaew na prem ixkre kapem hamãr o kuhê nẽ hwỳr gjêx kêt nẽ. Tĩrtũm Karõ kot hã mẽ kãm karõ xà hkôt. Te Tĩrtũm pê amỳm kuhê pyràk. Tã na htem jarãhã arĩ Ijaew kanrẽhã mẽ hkra nẽ mẽ htàmnhwỳjaja ã amnhĩ nhĩpêx anhỹr o pa. Jao mẽ higêtjê pyrà nẽ Tĩrtũm pê amỳm kuhê.

Sikũn Pêtre 1:21

Na pre ỹ hã kapẽr jarẽnh o mẽ pa xwỳnhjaja amnhĩ krã hkôt hkwỳjê mã ujarẽnh o pa hkêt nẽ. Tĩrtũm Karõ na pre tanhmã mẽ hkrã hto nhũm mẽ ỹ hã hkwỳjê mã tanhmã harẽnh to ho pa nẽ ỹ hã mẽ pamã hã kagà.

Apokarip 3:20

Na htem hkwỳjê nhõrkwỹ hwỳr gjêx kaxyw hakwa krem kãm àkjêr o kuhê nhũm mẽ kuma nẽ mẽ kãm anẽ nhũm mẽ hwỳr agjê. Nẽ mẽ ixkre hkre kamã axpẽn mã kapẽr o hkrĩ rỳ axpẽn mã kapẽr pê mẽmoj to hkõm o hkrĩ. Ja pyrà nẽ ot pa mẽ ajamãr o ixpa. Mẽ ate inhmã anhỹr nhũm ixte mẽ akôt ixpa ho ixpa nhũm mẽ pahte axpẽn to mex o papa kaxyw.