Eprêw 13:22 - Tĩrtũm kapẽr ã kagà nyw

²² E Kris kôt ixkràmnhwỳjaja. Nà na pa ã mẽ amã kagà nhĩpêx anẽ. Jejus kôt mẽ ato mẽ axihtỳx kaxyw. No na pa ho ry nẽ hipêx kêt nẽ. Ixte ho grire nẽ hipêx jakamã kwa kêr ka mẽ kamã harẽ nẽ mar tỳx nẽ hkôt amnhĩ nhĩpêx mex o ri apa.

Eprêw 13:22 ပူးပေါင်းရင်းမြစ်များ

Wam Pêtre 5:12

Nẽ ota Kris kôt mẽ pahtõ Sirastija na inhmã mẽ akaxyw kagàja nhĩpêx pa mẽ awỳr mẽnh kaxyw. Na pa hte kãm ixkapẽr nhũm inhma nẽ inhmã hã kagà. Na hte Kris kapẽr kôt amnhĩ nhĩpêx rãhã ho ri pa. Tã inhmã kagàja nhĩpêx. Mẽ ate kamã harẽnh nẽ mar nẽ tãm ajamaxpẽr kaxyw. Nẽ Tĩrtũm kãm mẽ ajapê nẽ kot mẽmoj to mẽ akutã nojarêt ã mẽ ate kamã harẽnh kaxyw. Tã kêr ka mẽ kãm mẽ ajapê hã amnhĩ tã harẽnh ma nẽ kapẽr kôt pix mã amnhĩ nhĩpêx mex rãhã ho ri apa. Mẽ akwỳjaja kot tanhmã hã mẽ ato htãã.

Eprêw 3:1

E ixkràmnhwỳjaja. Ra Tĩrtũm kot mẽ pahte kapẽr mar nẽ tãm amnhĩ nhĩpêx o ri papa kaxyw mẽ pahto hkra jakamã kwa kêr ka mẽ Jejus kot tanhmã mẽ pamã amnhĩ nhĩpêx toja mã ajamaxpẽr rãhã ho ri apa. Na pre Tĩrtũm mẽ pahwỳr kumẽ nhũm mẽ pahwỳr wrỳ nẽ Tĩrtũm kapẽr o mẽ pajahkre ho ri mẽ pahkôt pa. Nẽ te kêp mẽ panhõ patre pyrà nẽ mẽ pahto Tĩrtũm wỳr o pa.

Karatas 6:11

E ixte mẽ amã kagà nhĩpêx nẽ mẽnh nhũm mẽ ate ja hã ixpumunh kaxyw kot paj pam kagà jatur xà hã inhĩhkra ho inhĩxi nhĩpêx ka mẽ ixte inhĩxi hã kagà rũnhtita pumu.

Sikũn Korĩt 6:1

Tã kot ã Kra nhĩpêx anhỹr jakamã kwa mẽ ixkapẽr ma nẽ mar tỳx nẽ. No mẽ ama nẽ ãm mar kêt nẽ. Tĩrtũm kãm mẽ pajapê htỳx jakamã mẽ pakutã nojarêt rãhã ho pa. Kumã na pa hte ã mẽ amã kapẽr jarẽnh anhỹr o ri mẽ akôt ixpa.

Sikũn Korĩt 5:20

Kris kot mẽ apiitã mẽ awỳr inhmẽnh jakamã na pa hte ỹ hã mẽ amã kapẽr jarẽnh o ri mẽ akôt ixpa nẽ mẽ amã: —E Tĩrtũm kãm mẽ ajapê jakamã na mẽ awỳr inhmẽ pa mõ. Jakamã kwa mẽ tokyx amnhĩ tomnuj kaga nẽ hkôt amnhĩ xunhwỳ. Kê amnhĩ tã mẽ apumu nẽ mẽ ato hkràmnhwỳ. Anẽ.

Eprêw 4:11

Jakamã kwa kêr pu mẽ amnhĩ to kuwỳ kê ã mẽ panhĩpêx anẽ pu mẽ uràk nẽ ã amnhĩ nhĩpêx anhỹr rãhã ho papa. Nom kot pu mẽ pahkwỳ Ijaewjê pyrà nẽ kapẽr kwỳm amnhĩ nhĩpêx o papa hãmri nẽ mẽ urà nẽ paxàmnhĩx pajamakêtkati nẽ papa hkêt nẽ.

Eprêw 4:1

Mẽ pahte Tĩrtũm kukwak ri pajamakêtkati nẽ ri papa ho papaja Tĩrtũm kãm hprãm jakamã kwa kêr pu mẽ amnhĩ pumunh mex o papa. Nẽ wam mẽ panhĩgêt rom Tĩrtũm kapẽr mar tỳx nẽ hkôt mãn kêt ri amnhĩ nhĩpêx mex rãhã nẽ. Kêr pu mẽ kurom mẽ pajamak kãm amnhĩ krit xà hã pika mexta wỳr pôj.

Eprêw 2:1

Tã ã Tĩrtũmja Kra kot amnhĩ to rax o kapẽr o mẽ wrỳk xwỳnhjê jakrenh ã harẽnh kot anhỹr jakamã kwa kêr pu mẽ kapẽr mar tỳx rãhã nẽ hkôt pix mã amnhĩ nhĩpêx o papa. Kot pu mẽ ho anhỹr kêt hãmri nẽ gaa nẽ hkaga.

Sikũn Korĩt 10:1

E Kris kôt ixkwỳjaja. Nà ixpê Pawre kot paj mẽ akwỳ kot tanhmã ixto kapẽr to xwỳnhjê mã amnhĩ jarẽ ka mẽ apiitã inhma. Nà na hte Kris mẽ pakamã gryk tokyx anhỹr kêt nẽ. Na hte mẽ pahto mex japjê nẽ. Tã inhmã uràk nẽ ã mẽ anhĩpêx anhỹr prãm nẽ. No na hte mẽ akwỳjaja axpẽn mã tanhmã ixto kapẽr punuj to nẽ ri axpẽn mã: —Pawre na hte nhỹri krĩ kamã pa nẽ mẽ pamã kagà nhĩpêx nẽ mẽ pahwỳr kurẽ nẽ kamã mẽmoj tã mẽ pamã kapẽr kãm hihtỳx nẽ hã mẽ pamã akir. Tã amnẽ mẽ pahwỳr mõ hãmri nẽ te kãm mẽ pahpyma pyràk o mẽ pamã kapẽr o pa. Anhỹr o ijarẽ.

Atre 13:15

Hãmri nhũm mẽhõ mẽ kãm Tĩrtũm kapẽr ã kagà htũm kwỳ kamã harẽnh o xa. Mojes mẽ Tĩrtũm nhỹ hã kapẽr o mẽ pa xwỳnh kot kapẽr ã kagà hkwỳ kamã nhũm mẽ kãm kamã harẽnh o xa. Hãmri nẽ kamã harẽnh pa nhũm mẽ ahkre xwỳnhjaja Pawreja wa omu nẽ wa hwỳr mẽhõ mẽ nhũm wa hwỳr tẽ nẽ wa kãm: —E na mẽ ijahkre xwỳnhjaja war ate mẽ inhmã axujarẽnh prãm nẽ mãmrĩ mẽ inhmã mẽmoj jarẽnh kaxyw nhũm mẽ war atã anẽ. Anẽ.

Epes 3:3

Na pre mẽ pahto hpimrààtã tanhmã mẽ pahto mex to hã inhmã amnhĩ to amnhĩrĩt pa pre omu. Mẽ kajaja nẽ mẽ pajaja. Pika piitã hkôt mẽ piitãã tanhmã mẽ ho mex to. Na pre kormã kot mẽhõ mã ja jarẽnh kêt tã inhmã ho amnhĩrĩt pa pre omu. Tã kagà ja kamã kot paj mẽ amã hkwỳ ho grêre nẽ ho amnhĩrĩt nẽ mẽ amã hã kagà ka mẽ ixpyrà nẽ kamã harẽ nẽ ama.

Eprêw 12:5

Nẽ mãn ka mẽ arĩ Tĩrtũm kapẽr ã kagà htũm kwỳ hã ano htỳx japêr. Mẽ pahpê Tĩrtũm krajê mã kapẽr jarẽnh kot: Koja Pahi Maati tanhmã mẽ ate amnhĩ tomnuj to nê mẽ amã kapẽr ka mẽ ama nẽ mar tỳx nẽ mẽmojta kaga kurê kumrẽx. No mẽ ama nẽ tee ri kot nê akurê xwỳnhta kukamã ajamaxpẽr o ri akaprĩ o axtem nẽ Tĩrtũm kaga hkêt nẽ. Ama nẽ kot amã mẽmoj nê kapẽr xwỳnhta kaga kurê kumrẽx.

Eprêw 13:19

Nẽ kêr ka mẽ ixto awỳ kê tokyx akupỹm mẽ awỳr inhmẽ. Na pa ra inhmã mẽ apumunh prãm tỳx nẽ.