हिब्‍रु 13:1 - आठपहरिया

¹ खानि बिस्‍वासि भुम्‍भु-झान्‍झाचि हिट्‌नुङ् नाना-झान्‍झाचि आलिसिनाँ ठिबाङ्‌ङा आरको माया चोग्‍गा चोक् चोगायाक्‍टानि॥

हिब्‍रु 13:1 ပူးပေါင်းရင်းမြစ်များ

युहान्‍ना 15:17

हाट्‌ले आङा खानि ना आग्‍याँ पिनाँनि, ठिबाङ्‌ङा आरकोलोङ्‌सा माया चोग्‍गा चोग् चोगानि॥

मुलिचेला टोॽवा 2:1

पाइलेना लेम्‍बा पेन्‌तिकोस ओलोडुना याहुदिचिगा चाडा बेला यरुसलेमङि सोब्‍बे बिस्‍वासिचि ठिक्‍ए डेन्‌ङि उछुमाइसागा॥

मुलिचेला टोॽवा 4:32

सोब्‍बे बिस्‍वासिचिङा ठिक्‍ए निङ्‌ग्‍वा ओचोगुए॥ हिट्‌नुङ् उन्‌चिलोक् युङागा थोक्‌चि “ना खान्‍ङाना ना आङाना” उपिक्‍नेयाट्‌नि हिट्‌नुङ् उन्‌चिलोक् लिसागा थोक्‌चि सोब्‍बेङा ओहान्‍डुजोए॥

गालाति 5:13

आम्‍भु-आन्‍झाचि हिट्‌नुङ् आनो-आन्‍झाचि, खानिउम् टे माङ्‌हाङ्‌ङा सोतान्‍तर लिमाउङ्‌सा मासेगिगा ए॥ खानिङा आटोगुम्‍ना सोतान्‍तर पाप चोक्‍माना निङ्‌ग्‍वालेङ् टिनेनुम्॥ टरो ना सोतान्‍तरउम्‍बाक् ठिबाङ्‌ङा आरको माया चोक्‍सा सेवा चोक्‍मालाउङ्‌सा चोगानुम्॥

गालाति 5:22

टरो सेङ्‌सेङ्‌ना हाङ्‌साङा माट्‌टु गाड्‌डे काचोक्‍बा याप्‌मिङा नाड्‌डेगा टोॽवा चोगुटु, उन्‍ङा याप्‌मिचि माया चोगुचिचि, खुसि लियुक्, हाङ्‌हाङ् लियुक्, आङ्‌मा काहिबा लियुक्, याप्‌मिचि दाया चोगुचिचि, आरु नुलोक् मेट्‌टुचिचि, बिस्‍वासिलो लियुक्,

गालाति 5:6

पोङ्‌भोने खिरिस्‍ट येसुङि बिस्‍वास काचोक्‌चि आनि लाउङ्‌सा खाताना चोगुम्‍चा चोक्‌निम्‍चा पाक्‍चा फाराक् वाइना॥ टरो मुलि रिङ्उम्‍बाक् खिरिस्‍टङि आनि बिस्‍वास चोगुम्‍नाँ आनि आरु याप्‌मिचि माया चोगुम्‌चिम्‌चिम्॥

एफिसि 4:3

माङ्‌हाङ्‌ङाना हाङ्‌साङा डोक् खानि ठिक्‍ए माचोगिटि, हिट्‌डेउङ् ठिबाङ् आरकोलोक् हाङ्‌हाङ् युङ्‌माउङ्‌सा कोसिस चोगानि॥

एफिसि 5:2

खिरिस्‍टङा आनि माया आचोगे हिट्‌नुङ् उन्‍ङा आप्‍पे ओचोला भोक् चोगुङ् आनि लाउङ्‌सा आपिडे हिट्‌नुङ् बुङ्‌बुङ् नाम्‍ना ढुपा गाड्‌डे डोक् माङ्‌हाङ्‌ङि ठाङ्‌सुए॥ हिट्‌डेडोक् खानिङा सोरोक् आरु याप्‌मिचि माया चोगानुम्‌चिम्॥

२ थेसालोनिकि 1:3

भुम्‍बु-झान्‍झाचि हिट्‌नुङ् आनो-आन्‍झाचि, खानि लोङ्‌सा सोरोक् आन्‍याँ माङ्‌हाङ् पोए-पोए पिमा डोक् कोन्‌युक्, हिट्‌नुङ् नाड्‌डे चोक्‍मा नुयुक्‍चा, पोङ्‌भोने खानि बिस्‍वास माङ्‌जोम् पोयुगेट्, हिट्‌नुङ् खानिङा ठिबाङ्‌ङा आरको औधि जोम् माया चोग्‍गा चोक् आचोगेट्‌टि॥

हिब्‍रु 10:24

हाट्‌ले ठिबाङ्‌ङा आरको माया चोक्‍माना रिङ् हिट्‌नुङ् नुना टोॽवा चोक्‍मा लाउङ्‌सा खोड्‌डेउङ् आँट् पिमा हिडुम्‌चिम्‌चिम्‍ना हिट्‌ना रिङ्‌ङि निङ्‌ग्‍वा चोगुम्॥

१ पाटरुस 1:22

हाट्‌ले खानिङा छेम्‍बाना रिङ् मानाँ आचोगुमुङ् खानि निङ्‌ग्‍वा सेङ्‌सेङ् आचोगुम्‍नाँ खानि भुम्‍भु-झान्‍झाचि हिट्‌नुङ् नाना-झान्‍झाचि छेम्‍बाना माया चोगानुम्‌चिम्, हिट्‌नुङ् निङ्‌ग्‍वालाम्‍मा डोक् ठिबाङ्‌ङा आरको माया चोग्‍गा चोग् चोगानि॥

१ पाटरुस 2:17

सोब्‍बे याप्‌मिचि मान् चोगानुम्‌चिम्॥ हिट्‌नुङ् बिस्‍वासि भुम्‍भु-झान्‍झाचि माया चोगानुम्‌चिम्॥ माङ्‌हाङ्‌लोक् किट्‌टानि हिट्‌नुङ् हाङ्‌बाङाना मान् चोगानुम्॥

१ पाटरुस 3:8

आखेरिङि लोनाँनि, खानि ख्‍वाप्‍पाङाना निङ्‌ग्‍वा ठिक्‍ए लिमा कोन्‌युक्॥ ठिबाङ्‌ङा आरकोङाना निङ्‌ग्‍वाङिना रिङ् बुजा चोक्‍मा कोन्‌युक्॥ भुम्‍भु-झान्‍झाचि हिट्‌नुङ् नाना-झान्‍झाचि गाड्‌डे ठिबाङ्‌ङा आरको माया चोग्‍गा चोक् चोगानि॥ हिट्‌नुङ् लुक्‍मा काटुक् लोक् मेयोक् लिसानि॥

१ पाटरुस 4:8

सोब्‍बे नुङ्‌ना ठेना रिङ्उम्‍बाक् खानि खानिङि आड्‌डिक् गाइरो माया चोगानि, पोङ्‌भोने मायाङा डोक् जोम् पाप टेप्‍टुटु॥

२ पाटरुस 1:7

हिट्‌नुङ् भाक्‌टि चोक्‍सा भुम्‍बु-झान्‍झाचि दाया चोगानुम्‌चिम्, भुम्‍बु-झान्‍झाचि दाया चोक्‍सा मायाङि पोसा खाडानि॥

१ युहान्‍ना 3:23

उन्‍ङा आनि आग्‍याँ आचोगाना रिङ्उम्‍बाक् ना डोक् ए, आनि उन्‍ङाना छा येसु खिरिस्‍ट उनिङ्‌ङि बिस्‍वास चोग्‍मा कोन्‌युक्, हिट्‌नुङ् उन्‍ङा आनि आहिसिक्‍टा गाड्‌डे डोक् ठिबाङ्‌ङा आरकोलाउङ्‌सा माया चोक्‍मा कोन्‌युक्॥

१ युहान्‍ना 4:20

कोइङा “आङा माङ्‌हाङ् माया चोगुङ्‌टुङ्” माट्‌टुटु, टरो बिस्‍वासि भुम्‍बु-झान्‍झाचि हिट्‌नुङ् नाना-झान्‍झाचि चिम्‍मा फुट्‌टुचिचि भोने हिट्‌ना याप्‌मि माङ्‌जो चेक्‌युक्, पोङ्‌भोने उन्‍ङा निसुना बिस्‍वासि भुम्‍भु-झान्‍झा आथाबा नाना-झान्‍झाचिउम् माया चोगुन्‌चिन्‍गा भोने खोना बेला चा निसुन्‍गेट्‌टुन्‍ना माङ्‌हाङ् माया चोक्‍मा हिडुन्‍ना॥

पारकास 2:4

टरो खानि बिरुद्‌दाङि ठिक् रिङ् लोमाना रिङ् आङालोक् युङ्‌ग्‍वा, खानिङा पाइले गाड्‌डे माया चोक्‍मा आनाडुएसुम्‍मे॥