हिब्‍रु 12:14 - आठपहरिया

¹⁴ खानि सोब्‍बे याप्‌मिचिलोक् हाङ्‌हाङ् युङ्‌माना कोसिस चोगानि हिट्‌नुङ् चोखो लिसानि, पोङ्‌भोने सेङ्‌सेङ् मिलिङे साक्‍ङा चा टाङ्‌बा निमा उहिडुन्‍ना॥

हिब्‍रु 12:14 ပူးပေါင်းရင်းမြစ်များ

मारकुस 9:50

युम् नुना ए, टरो युम्‌ङाना ओसाम् खाडे भोने, हिट्‌ना खोड्‌डेउङ् युम्‍युम् लोना चोक्‍माना? हिट्‌नुङ् खानि चोला युम् गाड्‌डे डोक् नुम्‍नुम् चोगानुम्, हिट्‌नुङ् सोब्‍बेलोक् टोङानिउङ् युङानि॥”

लुका 1:75

हिट्‌नुङ् आनि मिकिट्‌ङे ओटोकानाङि, आनि चोलाटेप् सोजो हिट्‌नुङ् माहामा ओसेवा चोक्‍मा उहिडुम्‍मा नुङ् लिसाना ए॥

रोमि 12:18

लिमा हियुक् भोने सोब्‍बे याप्‌मिचिलोक् टोङानिउङ् हाङ्‌हाङ् युङानि॥

रोमि 14:19

हिड्‌डेउङ् खोना रिङ्‌ङा हाङ्‌हाङ् टाडुटुना, हिट्‌नुङ् खोना रिङ्‌ङा आरु बिस्‍वासिचि उन्‌चि बिस्‍वासङि बोल्‍लेउ चोगुचिचिगा हिट्‌ना रिङ् चोक्‍मा लाहाब् लिसियाक्‌टि॥

रोमि 6:22

टरो हाट्‌ले खानिङा पापलाम्‍मा छुट्‌कारा आटोगुएसुम्‍मे, हिट्‌नुङ् माङ्‌हाङ्‌ङाना कामारा आलिसेसिए॥ हाट्‌ले खानि सेङ्‌सेङ् आलिसिटि हिट्‌नुङ् खोना बेला चा लाट्‌निना चोला आटोगुम्‍टुम्॥

१ कोरिन्‌थि 1:10

आम्‍भु-आन्‍झाचि, आनि टाङ्‌बा येसु खिरिस्‍टङाना उनिङ्‌ङि आङा खानिलाउङ्‌सा बिन्‌टि चोगुएट्‌टुङ्, खानि सोब्‍बे टोङानिउङ् युङानि, हिट्‌नुङ् खानिङि साम्‍माना रिङ् उलिनि चा॥ टरो खानिङा ठिक्‍ए निङ्‌ग्‍वा हिट्‌नुङ् ठिक्‍ए रिङ्‌ङि निङ्‌ग्‍वा पिडानुम्॥

१ कोरिन्‌थि 13:12

हाट्‌ले आनि खिम्‍बाराङ् आइनाङि पुयुम् गाड्‌डे एडोक् निसुम्‍टुम्, टरो हिट्‌ना बेलाम्‍बाक् सोब्‍बे थोक् पारचिन्‍दा निसुम्‍टुम्॥ हाट्‌ले आङा खाट्‌टिप्‍मा एडोक् बुजा चोगुङ्‌टुङ्, टरो हिट्‌ना बेलाम्‍बाक् माङ्‌हाङ्‌ङा आङाना बारेङि सोब्‍बे रिङ् निसु गाड्‌डे डोक् आङा चा सोब्‍बे थोक् ठाहा टोगुङ्‌टुङ्॥

२ कोरिन्‌थि 6:17

नाड्‌डेउङ्, “हिट्‌नागाँगा माझालाम्‍मा होन्‍डानि, हिट्‌नुङ् हिट्‌नागालाम्‍मा साम्‍डानिउङ् युङानि नुङ् टाङ्‌बाङा माट्‌टुटु॥ आसुद्‌दो थोक् पाक्‍चा खोट्‌नेनुम्, हिट्‌नुङ् आङा खानि लाट्‌नाँनि॥”

२ कोरिन्‌थि 7:1

मायालु आसाइबाचि, माङ्‌हाङ्‌ङा आनि नागा चामारसिङा आचोगानाँ आनि येम् हिट्‌नुङ् आनि हाङ्‌सा आसुद्‌दो चोगुना साब्‍बे पारिक्‍गा रिङ् चोक्‍मा नाडुम्, हिट्‌नुङ् माङ्‌हाङ् मान् चोगुमुङ् पुरो सेङ्‌सेङ् लिसा खाडि॥

गालाति 3:21

हिट्‌डे भोने पाक् धारमाबिधि माङ्‌हाङ्‌ङाना चामारसिङा एङ्‌फुट्‌ङि कोब्‌युक्‌नि टे? हिट्‌डे माखाक्॥ धारमाबिधिङा याप्‌मि ओछोङ्‌ग्‍वाट् चोला पिडुनाँ बे, हिट्‌ना पालान् चोगुङ् डोक् याप्‌मि माङ्‌हाङ् ओटोकानाङि फाट्‌टुर माले लिसे बे॥

एफिसि 5:5

पोङ्‌भोने इम्‍मेप्‍माजामा टोॽवा काचोक्, आसुद्‌दो थोक्‌ङि निङ्‌ग्‍वा काचोक् आथाबा लोभ काचोक् याप्‌मि माङ्‌हाङ् हिट्‌नुङ् खिरिस्‍टङाना उमुलुक्‌ङि लिग्‍माना हाक् टोगुन्‍ना नुङ् खानिङा ठाहा टोगानुम्॥ लोभि लिमाम्‍बाक् मुर्‌ति साम्‍माङ् चोक्‍मा गाड्‌डे डोक् ए॥

फिलिप्‌पि 3:12

आङा नागा सोब्‍बे थोक् पाइले डोक् चोक्‍मा हिडुङे आथाबा आङा सिद्‌दा लिसेसाङे नुङ् माट्‌टुङ्‌ना माखाक्॥ टरो आङा खिरिस्‍ट गाड्‌डे लिमा बोल् चोगेट्‌टुङ्, पोङ्‌भोने ना रिङ् लाउङ्‌सा डोक् खिरिस्‍ट येसुङा आङा याङ्‌सेगे॥

१ थेसालोनिकि 3:13

नाड्‌डेउङ् उन्‍ङा खानि बिस्‍वासङि बोल्‍लेउ लिमा घुवार माफाडिटि, हिट्‌नुङ् आनि टाङ्‌बा येसु उन्‍ङाना ख्‍वाप्‍पा सेङ्‌सेङ्‌गा ओयाप्‌मिचिलोक् उङ्‌ना बेला आनि माङ्‌हाङ् पाबाङाना ओटोकानाङि खानि सेङ्‌सेङ् हिट्‌नुङ् फाट्‌टुर माले आलिसिटि॥

१ थेसालोनिकि 4:7

पोङ्‌भोने माङ्‌हाङ्‌ङा आनि आसुद्‌दो चोलाङि वामा माखाक्, टरो सेङ्‌सेङ्‌ना चोलाङि वामाउङ्‌सा आछेम्‍डाना ए॥

१ थेसालोनिकि 5:15

ना रिङ् मिट्‌टानुम्, साङा चा ओचाफेम्‍मा चोक्‍माना ओसाट्‌टोङि ओचाफेम्‍मा ओचोगुन्‍चा, टरो ठिबाङ्‌ङा आरको हिट्‌नुङ् सोब्‍बे याप्‌मिचिलोक् सोरोक् ओचेट्‌नुलोक् चोक्‍माना निङ्‌ग्‍वा चोगानुम्॥

१ तिमोथि 6:11

टरो खान् माङ्‌हाङ्‌ङाना याप्‌मि, नाड्‌डेगा सोब्‍बे रिङ् खान्‍ङा नाडु, हिट्‌नुङ् माङ्‌हाङ् ओटोकानाङि पाक् नुना हिट्‌ना चोक्‍मा, भाक्‌ति चोक्‍मा, बिस्‍वासिलो लिमा, माया चोक्‍मा, धैइरेताङि लोक् मेयोक् लिमा कानिङ्‌ग्‍वा पिडु॥

२ तिमोथि 2:22

हिट्‌डेउङ् ठाङ्‌बेन् बेला निङ्‌ग्‍वालाम्‍मा टाना ओचाफेन्‍गा रिङ्‌चिलाम्‍मा पिन्‍डा, हिट्‌नुङ् सेङ्‌सेङ्‌ना निङ्‌ग्‍वाङि टाङ्‌बा माङ्‌ध्‍यान् काचोक् याप्‌मिचिलोक् पाक् नुना हिट्‌ना रिङ्‌ङि, बिस्‍वासङि, मायाङि हिट्‌नुङ् हारका लिसिना रिङ्‌ङि लाहाब् लिसा॥

हिब्‍रु 12:10

पोङ्‌भोने नाराङिगा आनि पाबाचिङा उन्‌चि लाउङ्‌सा जुन् रिङ् माहामा लोयुक् हिट्‌ना रिङ्‌ङा इम्‍टेप्‍मा बेला सोम्‍मा साधाँ आचोक्‌युक्, टरो माङ्‌हाङ्‌ङा उन् गाड्‌डे डोक् सेङ्‌सेङ्‌ना उलिसियाक् नुङ् आनिना ओचेट्‌नुना लाउङ्‌सा उन्‍ङा आनि साधाँ आचोक्‌युक्॥

हिब्‍रु 9:28

हिट्‌नाडेडोक् सोब्‍बे याप्‌मिचिगा पाप टुग्‍माउङ्‌सा खिरिस्‍ट आप्‍पे ठिक्‍ए खेप् भोक् लिसे॥ हिट्‌नुङ् जब खिरिस्‍ट दोस्‍रो खेप् उङ्‌युक्, हिट्‌ना बेला याप्‌मिचिगा पाप टुग्‍मा माखाक्, टरो ओलाम्‍भो उपुयुङ् उयुङेसागा याप्‌मिचि बाचाँ चोक्‍माउङ्‌सा उङ्‌युक्॥

१ पाटरुस 3:11

हिट्‌नाङा ओचाफेन्‍ना टोॽवा चोक्‍मा नाडुङ् ओचेट्‌नुना टोॽवा चोक्‍मा कोन्‌युक्॥ हिट्‌नाङा आरु याप्‌मिचिलोक् सान्‌तिङि युङ्‌मा निङ्‌ग्‍वालाम्‍मा डोक् चोक्‍मा कोन्‌युक्॥

१ पाटरुस 3:13

हाट्‌ले खानि ओचेट्‌नुना टोॽवा चोक्‍मा निङ्‌ग्‍वा आचोगुम्‍टुम् भोने साङा खानि याङ्‌छामा माचाट्‌टिटिगा टे?

२ पाटरुस 3:11

नागा सोब्‍बे रिङ् जाखाम् उलियुक् नुङ् ठाहा आटोगुमुङ् खानिङा आचोगुम्‍गा ख्‍वाप्‍पा थोक्‌ङि सोजो हिट्‌नुङ् माङ्‌हाङ् हारका चोक्‍माना रिङ्‌ङि निङ्‌ग्‍वा पिमा कोन्‌युक् नुङ् मिट्‌टानुम्॥

२ पाटरुस 3:18

टरो सोरोक् आनि टाङ्‌बा हिट्‌नुङ् काहिङ्‌मेप्‍बा डाङ्‌बा येसु खिरिस्‍टङाना ओठोना हिट्‌नुङ् ओमायादायाङि पोसा खाडानि॥ हाट्‌ले हिट्‌नुङ् सोरोक् टाङ्‌बाङाना डोक् उनिङ् टो-टो उलियाक्॥ आमेन्॥

३ युहान्‍ना 1:11

मायालु आसाइबा, नाड्‌डेगा ओभेन्‍गा टोॽवा काचोक् याप्‌मिचिगा चाट्‌ला योॽवा चोगुन्, टरो नुना रिङ् एरोक् सिकाँ लिसा॥ जुन् याप्‌मिङा ओचेट्‌नु चोगुटु हिट्‌ना माङ्‌हाङ्‌ङाना ओयाप्‌मि ए॥ जुन्‍ङा ओचाफेम्‍मा टोॽवा चोगुटु, हिट्‌नाँ माङ्‌हाङ् मिसेन् डोक् निसुन्‍गेट्‌टुन्‍ना॥