कालास्‌सि 3:9 - आठपहरिया

⁹ खानि खानिङि ढाँट् फोग्‍माना टोॽवा चोक्‍नेनिन्, पोङ्‌भोने खानिगा पुरानो पापलोक्‍ना निङ्‌ग्‍वा हिट्‌नुङ् हिट्‌ना पारा चोक्‍मागा सोब्‍बे ओभेन्‍गा टोॽवाचि चा नामा आहिडुएसुम्‍मे॥

कालास्‌सि 3:9 ပူးပေါင်းရင်းမြစ်များ

युहान्‍ना 8:44

खानि आप्‍पे खानि पाबा सैतानङाना ओछालेट्‌चि ए, हिट्‌नुङ् खानि पाबाङाना उनिङ्‌ग्‍वा गाड्‌डे चोक्‍मा डोक् खानिङा निङ्‌ग्‍वा आचोगुएसुम्‍मे॥ हिट्‌नाउम्‍टे उटुम्‌लाम्‍मा डोक् याप्‌मि कासेट् डाना, हिट्‌नुङ् हिट्‌नाङा छेम्‍बाना रिङ् सोरोक् चिम्‍मा फुट्‌टुना, पोङ्‌भोने हिट्‌नालोक् छेम्‍बाना रिङ् डोक् वाइना॥ हिट्‌नाउम्‍टे ओचाट्‌ला गाड्‌डे डोक् माङ्‌जो चेक्‌युक्॥ हिड्‌डेउङ् हिट्‌ना माङ्‌जो काचेक् हिट्‌नुङ् माङ्‌जो काचेक्‍बाचिगा पाबा ए॥

रोमि 6:6

आनिना ना चोलालाम्‍मा पापङाना आधिकार जाखाम् उलियाक्, हिट्‌नुङ् हाट्‌लेउङ् पापङाना ओकामारा आनि उलिसिन्‍चा नुङ् आनिना पाइलेना चोला याप्‌मिचिङा येसु खाप्‍चेङि उछुडुनाँ उन्‌लोक् डोक् खाप्‍चेङि छुडाना रिङ् आनिलाउङ्‌सा ठाहा युङ्‌ग्‍वा॥

एफिसि 4:22

हिट्‌डेउङ् पाइलेना खानिगा उचाफेम्‍मा चाट्‌लाङा खानि जाखाम् माचोगिट्‌टि हिट्‌नुङ् ना पाइलेना चोलालोक् नाहिगा ख्‍वाप्‍पा ओचाफेन्‍गा रिङ्‌चि नामा कोन्‌युक् नुङ् खानिङा सिकाँ आलिसेसिए॥

एफिसि 4:25

हिट्‌डेउङ् आनि सोब्‍बे ठिक्‍ए येम्‌ङाना आङ्‌गाचि लिसिनाँ, आनि माङ्‌जो रिङ् चेक्‍मा लिनिना, टरो आनि ठिबाङ् आरको छेम्‍बाना रिङ् एडोक् चेक्‍मा कोन्‌युक्॥

कालास्‌सि 3:8

टरो हाट्‌ले खानिङा चा रेक् काप्‍मा, मिक् टुग्‍मा, चिम्‍माफुप्‍मा, लोमाजामा, यासिलाम्‍मा होन्‍गा फुवारि रिङ् नामा कोन्‌युक्॥

१ तिमोथि 1:10

इम्‍मेप्‍माजामा टोॽवा काचोक्‍बाचि, येम्‍बेछा-येम्‍बेछा हिट्‌नुङ् मेच्‍छेमा-मेच्‍छेमा इम्‍मेप्‍माजामा टोॽवा काचोक्‍बाचि, याप्‌मि काछोङ्‌बाचि, माङ्‌जो काचेक्‍बाचि, माङ्‌जो साँचि कापिचि हिट्‌नुङ् नुना हिसिक्‍माङाना बिरुद्‌दाङि टोॽवा काचोक्‌चि लोङ्‌सा चोक्‍बालाक् ए॥

पारकास 21:27

टरो हिट्‌ना खालाङ्‌गाङि खोना चा आसुद्‌दो थोक्, ओचाफेन्‍ना टोॽवा काचोक्‍बाचि हिट्‌नुङ् माङ्‌जोगा रिङ् काचेक्‌चि लिग्‍मा ओटोगुन्‍गा॥ जुन् जुन्‍ङाना निङ् थुमाङाना चोला आपिना छाप्‍लाङि निङ् लियुक् हिट्‌नागा याप्‌मिचि एडोक् हिट्‌ना खालाङ्‌गाङि लिक्‍मा ओटोगुटु॥

पारकास 21:8

टरो डारछेरुवा याप्‌मिचि, धोका कापि याप्‌मिचि, चिम्‍मा फुट्‌टुम्‍ना टोॽवा काचोक्‌चि, याप्‌मि कासेट्, हिट्‌नुङ् इम्‍मेट्‌माजामा टोॽवा काचोक्‌चि, चाटाके याप्‌मिचि, मुरति साम्‍माङ् काचोक् याप्‌मिचि हिट्‌नुङ् माङ्‌जो रिङ् ओचेग्‍गा याप्‌मिचि मि लोक् गान्‍धाक् हाट्‌ना भाट्‌टिङि ओठायुक्॥ हिट्‌नाम्‍बाक् दोस्‍रो खेप् सिमा ए॥”

पारकास 22:15

टरो हिट्‌ना खालाङ्‌गा भाराम्‍बाक् कोछुबाचि गाड्‌डे चाट्‌ला उलिसागा याप्‌मिचि, टुनामुना ओचोग्‍गा, इम्‍मेप्‍माजामा टोॽवा काचोक् याप्‌मिचि, याप्‌मि कासेट्‌चि, मुरति साम्‍माङ् काचोक्‌चि, हिट्‌नुङ् माङ्‌जो रिङ् लोमा मोज्‍जा ओलोगा हिट्‌नुङ् माङ्‌जो रिङ् काचेक् याप्‌मिचि उलियुक्॥