Pilipae 2:12 - Tataroha Diana

¹² Aena urine, maeni eesiku, mala omu lae kaꞌu peꞌi tola i sulie a God aana omu rongo hunie walaku maholo ineu ue peꞌiꞌomu, omu ke hele susuleꞌi aani lulu i sulilana walaku oto urine, oto liutaa aana maholo mala ienini nge nou kaꞌa iiꞌo ike peꞌiꞌomu. Aana e roroꞌa toꞌohuu uri omu ke mani meꞌuteꞌinie a God hunie omu ke asu aꞌailaꞌa huni haꞌa-oaie leune a God e aehotaa, aana e haꞌa-uuriꞌomu mwaanie haꞌamotaahinge.

Pilipae 2:12 ပူးပေါင်းရင်းမြစ်များ

Matiu 11:12

Uure oto aana maholo a Jon Loto Maaꞌi e aehota laeliwala lae mai hule siꞌiri, Aalahanga a God ko peine aꞌailaꞌa mola, maꞌalana mo mwane hai-heiseuni ko deu rarahie kire ke paine haahie.

Matiu 11:29

Omu ke lae mai huni aangaꞌinie tori aana haꞌa-uusulinge ineu, na omu ke neꞌi pwaarongoisuli ineu. Aena aana ineu, nou maneko na nou haꞌamwai-mweiꞌaau toꞌohuu. Na omu ke si lio oodoie mamalonga hunie maurihaꞌamiu i seeku. Jeremaea 6:16

Palonga 16:29

A poro paine ngeena ko eriri mola aana ko meꞌu, na ko soi oto hunie nga sine. Oto ko huru weu i laona nume ni hoꞌo, na ko pouruuru oto i naꞌona a Pol na Saelas.

Palonga 9:6

O ke taꞌelaꞌi oto, na o ke lae wau i huilume. Nga iini taane wau i leune ke si unue huniꞌo nga taa ni esuie.”

Uusu-uusu A Pol Hurula'aa Hunie Mo Rom 2:7

Mwala nge ko lae peꞌi deu esunge diana, aana kire tohungei saetoꞌo aana uri kire ke iiꞌo huu peꞌie a God, na uri a God ke lae-lahera, na ke haꞌapainaꞌara, mwala ngeena nge a God kei niie maurihe huu nada.

1 Korinit 15:58

Aena urinena, maeni eesiku maaꞌi, omu ke uure maꞌutaꞌa mola na omu ke suꞌuri esu oolo-oolo. Omu ke asu susuleꞌi mola nana Aalaha ikie. Aana omu saie oto uri nga taꞌa-taꞌa mei ola omu ko euꞌesuie nana Aalaha, e saꞌa mango ike mola mwaakule.

1 Korinit 2:3

Oto maholo nou lae mai seemiu, nou maarara aana nou hiingeꞌinie uri nou kaꞌa malisi hule aana nou meꞌu peꞌie ariringe.

1 Korinit 4:14

Nou kaꞌa unue ike mo ola ienini huni haꞌamasaꞌomu, taꞌe huni haꞌananauꞌomu mala mo mwela maaꞌi ineu.

2 Korinit 7:15

Oto maholo ienini, a Taetas noꞌone e tohungei neꞌisae paine aamiu aana ko loꞌongaꞌi i sulie uri omu meni lio i suli diana aana, na omu meꞌuteꞌinie peꞌi haꞌamaꞌunge aana, hule aana omu meni mwaꞌe-mwaꞌe ni tola i sulie walana.

Epesas 6:5

Iꞌomu mo koni-konihe, omu ke tola i sulie mo poro paine iꞌomu mei welumalau, na omu ke maꞌuteꞌinire peꞌi haꞌamaꞌunge aada. Na omu ke tola i sulire oto mala omu ko tola i sulie a Kraes peꞌie mei sae toꞌohuu.

Pilipae 1:27

Oto maꞌalana uri ne ke lae loꞌu mei leesiꞌomu wa haꞌike, taꞌe tolahamiu ke oodo oto malisine Tataroha Diana a Jisas Kraes. Na nou sare rongoa uri omu ke mani esu loko-loko taane peꞌie taꞌa-taꞌa mei sae aani helinge honosie mo iini ko sare dau tekelaꞌinie hiiwalaimolinge aana Tataroha Diana.

Pilipae 1:29

Iꞌomu, omu ko ooho oto aana taꞌa-taꞌa taungei oohonga nge omu leesie nou ooho-ooho kaꞌu aana i naꞌo, na omu ko rongoa no ko ooho-ooho ue aana maholo ie. Omu ko ooho urine aana a God e haꞌamaꞌu eemiu, aani lio hilisilemiu huni hiiwalaimoli aana a Kraes, na oto liutaa huni sapesalu i tehulaꞌana.

Pilipae 1:5

Aena aana omu ko peꞌi diana aaku i laona asunge aana Tataroha Diana, uure oto wau aana maholo omu aehota hiiwalaimoli aana hule mai siꞌiri.

Pilipae 1:6

Na nou norutoꞌo uri a God nge e aehotaa mei esunge diana i laona maurihaꞌamiu, kei lae peꞌi esu taraꞌasi oto urine i lalo aamiu, lai hule aana hai dinge a Jisas Kraes kei ooli loꞌu mei.

Pilipae 2:19

Nou norutoꞌo uri e saꞌa tewa ike taane i naꞌona Aalaha ikie a Jisas kei haꞌamwadaꞌue hunieu, huni uusungeꞌinie wau a Timoti i seemiu. Hunie ineu noꞌone ne ke hii kohi aani rongolana nga mo tataroha mwaaniꞌomu.

Pilipae 4:1

Maeni eesiku maaꞌi, nou manata diana huniꞌomu toꞌohuu, na saeku uri ne ke tohungei lae kaꞌu mei leesiꞌomu. Iꞌomu oto domana rorodara manikuluꞌe nakue, na no ko tohungei ilenimwaꞌe hiitoꞌo haahiꞌomu. Oto aena aana walu ola urine, maeni eesiku maaꞌi, nge omu ke iiꞌo susu mola peꞌie hiiwalaimolinge aana a Aalaha.

Pilipae 4:15

Iꞌomu mo Pilipae, omu saie mola maholo nou aehota laeliwala aana Tataroha Diana wau aana poꞌo ni henue iꞌomu i Masedonia. Omu saie mola uri maholo nou lae mwaanie leune, nga taꞌa-taꞌa soihaadaꞌinge e kaꞌa peꞌieu ike aana maholona. Taꞌe iꞌomu haliꞌite nge omu sai loꞌongaꞌinieu aani niinge.

1 Tesalonaeka 1:3

Oto tarau aana aarengaꞌinge iꞌemeelu hunie a God Aamaka, melu ko aamasitoꞌo aana mo tolahai iinoni diana nge omu ko lulu i suliꞌi i sulie hiiwalaimolinge iꞌomu aana a Jisas, na mo weonga iꞌomu i tehulaꞌana omu manata diana hunie a God. Na melu ko loꞌongaꞌinie noꞌone uuranga aꞌailaꞌa iꞌomu aani norutoꞌonga aana a Jisas Kraes Aalaha ikie.

2 Timoti 2:10

Aena urine kaꞌu, maꞌalana mwala ko haꞌaloieu mala ie, taꞌe no ko iiꞌo susu mola. Aana tala urine nge no ko peꞌie mwala nge a God e lio hilisire oto, hunie kire ke toꞌo aana maurihe peꞌie a Jisas Kraes na kire ke iiꞌo peꞌie aana manikuluhaꞌana oto di.

Hibru 12:1

Oto pulitaa oto paine ienini kire haataꞌi diana aana tala aana hiiwalaimolinge ngeena, na kire loko kali-kelikie oto huni toꞌo-toꞌomaaie hurunge ni hiiwalaimolinge ikie. Aena urine, kie ke toliꞌaasie taꞌena nga ola ko liu-liu honosikie mwaanie hiiwalaimolinge aana God, na kie ke toliꞌaasie noꞌone mo walo ni oorahaꞌaa nge ko hiriꞌikie oto tarau. Oto kie ke huru aꞌailaꞌa taraꞌasi aana hurunge nge a God e totohoa oto naka huni huru aana.

Hibru 4:1

Haiholotaꞌinge a God ngeena e iiꞌo mola ue, uri mo iini nge kire hiiwalaimoli aana kire sai mamalo aana leu ni mamalo e dau aakau aana loosire. Oto omu ke lio-lio diana talamiu, mwaanie uri nga iini eemiu e oore aani helesilana mei mamalonga ngeena.

Hibru 4:11

Aena urine, kie ke mani esu aꞌailaꞌa oto hunie kie ke hule aana leu ni mamalo peꞌie a God ngeena, na mwaanie nga mo iini aaka kire lae takalo loꞌu mola aena aana kire haimaanie haitohenga mwala holaꞌinaꞌo ngeena.

Hibru 5:9

Oto urine a God e haataꞌinie uri nga mei ola e kaꞌa aaela ike aana a Jisas, na a Jisas e si neꞌie tala hunie maurihe aana mwala ko tola i sulie.

1 Pita 2:11

Maeni iinoni maaꞌi, iꞌomu nga mo iinoni ni welumalau haꞌike na omu iiꞌo mola mai mala mo awataa, na tohungei henue iꞌomu oto taꞌau i Lengi. Aena urine no ko unue oto huniꞌomu uri omu ke suꞌuri lae loꞌu i sulie mo saehanalinge aaela iꞌomu. Aana mo neꞌisaenga aaela ngeena kire sai ooho honosie maurihaꞌamiu.

2 Pita 3:18

Taꞌe omu ke pai-peine taraꞌasi mola i lalo aana manata-diananga na sai-olanga hunie Aalaha ikie na a Haꞌa-uuritaka, a Jisas Kraes. Nge manikuluꞌanga ingeie e saꞌa mango oto ooꞌoo. Ke urine oto.