Palonga 4:29 - Tataroha Diana

²⁹ Na oto ie, Aalaha, o ke lio-lio diana aana mo naꞌohai mwane nge kire ko haꞌamauꞌoꞌemeelu ienini. O ke peꞌiꞌemeelu, mo koni-konihe iꞌoe mwaanie melu meꞌu ni houleꞌinie walamu.

Palonga 4:29 ပူးပေါင်းရင်းမြစ်များ

Palonga 13:46

Taꞌe a Pol na Banabas kirerue mwaka aada mola na kirerue ko teꞌuri, “E adona walana God unulana ke holaꞌi lae oto huniꞌomu, taꞌe aena aana omu ko leledie mei ola ienini, nge omu haataꞌinie oto uri omu kaꞌa malisine ike helesilana maurihe huu. Aena urine nge mere kei lae oto mwaaniꞌomu na mere kei lae oto i saana mo Aapoloa Aaopa.

Palonga 19:8

A Pol e lae-lae i laona nume ni palo-palo mo Jiu, na e lae peꞌi ere hiitoꞌo hunie mwala i sulie e oolu waro-waro. Aana ko deu aahonga noꞌone huni haꞌa-aaliꞌue mwala hunie kire ke aaliꞌu mei takoie Aalahanga a God.

Palonga 26:26

A Akripa Inemauri e sai mangoa taane walu ola i sulie a Jisas ienini, na nou sai ere haadaꞌi mola noꞌone hunie urine. Na nou saie uri e rongoa taane tataroha i sulie walu ola ienini maholo kire rau, aena aana walu ola ienini kaꞌa rau mumuni ike.”

Palonga 28:31

na e kaꞌa maꞌu loꞌu huni laeliwala i sulie Aalahanga a God. Ko haꞌa-uusulie mola mwala aana taꞌena nga ola i sulie a Jisas, Aalaha ikie, na nga iini e kaꞌa uure honosie loꞌu erenga ingeie.

Palonga 4:13

Oto mo mwane aana pulitaa ni lei-lei ngeena kire ko si tohungei pangataꞌi aana kire leesie a Pita na Jon kirerue kaꞌa maꞌu loꞌu, maꞌalana uri kirerue e ro mei iinoni reu mola na kirerue kaꞌa sukulu diana ike. Na i leune nge kire si lio saie uri ikirerue ni kire lae-lae tarau peꞌie a Jisas holaꞌinaꞌo.

Palonga 4:21

Mo mwane paine aana pulitaa ni lei-lei kire ko haꞌamauꞌorarue loꞌu liutaa, taꞌe lae-lae kire ko si heꞌi toliꞌaasirerue loꞌu hunie kirerue ke lae. Aana e aasa hunie kire kei leirerue aana kire lio saie uri mwala ko lae peꞌi lahea God oto haahie mei ola nge e raune.

Palonga 4:31

Maholo kire aarengaꞌi mango, nge nume kire loko i laona ko si eenu-eenuleꞌi heiliu, na kire si honu oto aana Liꞌoa Maaꞌi. Oto purihaꞌana kire ko si tohungei aꞌailaꞌa loꞌu liutaa ni houleꞌinie walana God.

Palonga 9:27

Oto a Banabas e si peꞌie aana e toolea i saana mo hurulaꞌaa, na ko haꞌarongora uri a Sol e leesie a Aalaha i sulie tala, na a Aalaha e ere oto peꞌie a Sol. Na ko haꞌarongora noꞌone aana uri a Sol ko lae peꞌi ere aꞌailaꞌa mola i sulie satana a Jisas wau i Damaskas.

Palonga 9:28

Oto a Sol ko iiꞌo oto peꞌire, na ko lae hailiu i Jerusalem peꞌi ere aꞌailaꞌa i sulie satana Aalaha.

1 Korinit 14:13

Aena urinena, iini ko toꞌo aana niinge ni Liꞌoa Maaꞌi huni ere aani erenga hai aaopaꞌi ke aitanaie a God hunie ke niie noꞌone nanamanga huni ere luhesie nga taa ko unuena.

2 Korinit 3:12

Oto melu kaꞌa maꞌu ike huni tarohaꞌinie Tataroha Diana, aena aana melu norutoꞌo mola aana uri manikuluhaꞌana haiholotaꞌinge haalu a God ngeena e saꞌa aiꞌaa ike.

Pilipae 1:14

Na loꞌu, iiꞌonga ineu i nume ni hoꞌo ie, e haꞌasusue mwala hunge aana mwala e hiiwalaimoli aana Kraes, uri hunie kire ke aꞌailaꞌa na mwaanie kire maꞌu huni laeliwala aana Tataroha Diana.

1 Tesalonaeka 2:2

Omu saie taane uri i naꞌona melu lae mai seemiu i Tesalonaeka, mwala e tohungei teungeꞌiniꞌemeelu na kire ere aaelasiꞌemeelu oto hiitoꞌo wau i Pilipae. Taꞌe maꞌalana mwala hunge kire sare uure honosiꞌemeelu, a God ikie e peꞌi diana aameelu taane mola huni aatopuri aana maꞌunge na huni haꞌarongoꞌomu aana Tataroha Diana a God.

2 Timoti 4:17

Taꞌe a Aalaha e lae peꞌi haꞌa-uurieu na e niie nanamanga hunieu uri hunie ne ke tarohaꞌinie Tataroha Diana hunie mo Aapoloa Aaopa kire ke rongoa. Na e peꞌieu noꞌone aana maholona hunie kira lei-lei ke suꞌuri lei mae aaku.