Palonga 20:35 - Tataroha Diana

³⁵ Aana ahutana asunge ineu, nou haataꞌinie oto huniꞌomu uri kolu ke asu aꞌailaꞌa tarau hunie kolu ke peꞌie mo iini nge kire mamaelaꞌa. Na kolu ke aamasitoꞌo aana mei wala a Jisas Aalaha ikie aana e teꞌuri, ‘Iini nge ko nii-nii, haꞌadianaꞌalana kei peine loꞌu liutaa aana mo iini ko hele aana mo niinge.’ ”

Palonga 20:35 ပူးပေါင်းရင်းမြစ်များ

Matiu 10:8

Omu ke haꞌa-uurie mo iini ko mweri, omu ke taꞌea loꞌu mo iini e mae oto, omu ke haꞌa-uurie mo iini ko sapesalu aana maelaa ni osa, na omu ke oohe aasie mo liꞌoa aaela. Omu hele mwaakule kaꞌu, na omu ke nii mwaakule loꞌu.

Palonga 20:20

Na omu saie oto uri no ko tarohaꞌinie Tataroha Diana huniꞌomu, na nou haꞌa-uusuliꞌomu i maana mwala na loꞌu i laona mo nume iꞌomu. Taꞌe nou kaꞌa maꞌu ni unu haadaꞌi aana ahutana walu ola nge kire sai peꞌiꞌomu.

Palonga 20:27

Aana maholo nou iiꞌo peꞌiꞌomu nou kaꞌa maꞌu ike huni unu tahangaꞌinie walu ola a God a saetoꞌo aana omu ke saiꞌi.

Palonga 20:34

Na omu saie oto maraamiu uri e ro nimeku nge e raretaꞌinieu huni terie taꞌena nga mei ola nge nou saetoꞌo aana, na hule aana nou raretaꞌinie noꞌone mo iini kire iiꞌo peꞌieu.

Palonga 20:36

A Pol e ere urine mango, kire si meni pouruuru na kire ko aarengaꞌi oto.

Uusu-uusu A Pol Hurula'aa Hunie Mo Rom 15:1

Oto ikie, mo iini kie saie taane uri a God e saꞌa leikie ike haahie mo ola urine, nge kie ke suꞌuri deu mola i sulie walu ola mala saeka maraaka. !Haꞌike! Taꞌe leu i sapeka oto hunie kie ke toli rako peꞌie mwala nge hiiwalaimolinge ikire e mamaelaꞌa na kire ko meꞌu mwaanie ohe mo ola urine kire aapu hunire.

1 Korinit 9:12

Ngaeta mwala kaꞌu kire sai tola ola urine mwaaniꞌomu. Oto iꞌemereꞌi na e urine noꞌone mola, na hule aana e malisine uri mere ke roroꞌa loꞌu liutaa aana mwala ngeena. Taꞌe i sulie mere kaꞌa nine aani teꞌurine ike, oto aana maꞌalana walu ola ko aasaiꞌemereꞌi, mere kaꞌa sare aapwasu ike aani. Mere kaꞌa saetoꞌo aana ike nga mei ola ke liu honosie loꞌu Tataroha Diana i sulie a Kraes.

2 Korinit 11:12

Ngaeta mwala kire ko sare ere toohaꞌinire maraada uri kire ko esu sada mala iꞌemeelu mo hurulaꞌaa. Taꞌe leune e kaꞌa toꞌohuu ike, na ineu, no ko uure honosie mwala urine. Aena urine nge nou saꞌa mamalo ike mwaanie nga taa nge no ko esuie ienini huni haataꞌinie uri ere-toohaꞌinge ikire ngeena e kaꞌa toꞌo aahuꞌine ike.

2 Korinit 11:9

Oto aana maholo nou iiꞌo hao peꞌiꞌomu, nou kaꞌa loꞌohie ike nga mei ola aamiu. !Haꞌike! Taꞌe mo mwaasine aani hiiwalaimolinge nge kire oꞌoꞌo mai aana poꞌo ni henue i Masedonia ni kire lae hao i Korinit huni peꞌieu aana mei toꞌoha. Nou tohungei kinetaꞌinie tolahaku mwaanie nou da nga mei hiꞌelaa huniꞌomu aana taꞌena nga mei ola, na ne kei lae taraꞌasi oto mola urine.

2 Korinit 12:13

Nou peꞌi-peꞌi diana aamiu oto mala ngaeta mo soihaadaꞌinge no ko peꞌire, na peꞌinge ineu huniꞌomu e sada mola aana peꞌinge no ko niie hunire. Taꞌa-taꞌa mei ola mola nou esuie hunire nge nou kaꞌa da huniꞌomu, aana nou kaꞌa unue ike uri omu ke peꞌieu aani toꞌoha. ?Uri omu loꞌongaꞌinie uri nou deu aaela huniꞌomu aana leune? !Haꞌike eena mwae! Mala omu ko loꞌongaꞌinie uri nou deu aaela huniꞌomu aana leune, na omu ke neꞌisae-aasie kaꞌu mola hunieu.

2 Korinit 8:9

Aana saeku hunie omu ke haimaanie hahuꞌana manata-diananga Aalaha ikie a Jisas Kraes. Omu saie mola uri e tohungei toꞌo-toꞌo kaꞌu oto taꞌau i Lengi, taꞌe e si lae mai neꞌi iinoni meitale mola i tehulaꞌamiu, uri hunie omu ke neꞌi iinoni toꞌo-toꞌo i tehulaꞌana maitalenga ingeie ngeena.

Epesas 4:28

A tei iinoni ko peli-peli, ke toliꞌaasie oto tolahai ola aaela ngeena na ke aehotaa loꞌu asunge diana. Ke asuie nga mo ola diana aana nimana, hunie ke toꞌo aana mo ola huni peꞌie mo iini kire maitale.

1 Tesalonaeka 4:11

Omu ke alaaꞌinie iiꞌonga iꞌomu maraamiu hunie omu ke iiꞌo aana hanuelamanga, na mwaanie omu oho dauhe aana mo esunge ngaeta mwala, taꞌe omu ke lio i suliꞌomu maraamiu aani esunge talai ngeulaa mola amiu maraamiu, oto mala melu unue kaꞌu huniꞌomu holaꞌinaꞌo.

1 Tesalonaeka 5:14

Na melu ko eitanaiꞌomu, maeni eesiku, uri omu ke ere aana mo iini ko lalawasie asunge. Omu ke peꞌie mo iini nge kire sai meꞌu hunie saeda ke susu. Omu ke peꞌie mo iini nge loꞌongaꞌinge ikire e mamaelaꞌa, na omu ke haro kele ere hunie ahutana mwala. Na mwaanie saewasunge iꞌomu e lau-leu hunie taꞌena nga iini.

Hibru 13:16

Na mwaanie omu pupulongosie peꞌilana ngaeta mwala aani esunge diana nada, aena aana mo uunu-olanga urine noꞌone nge saena God ko lae otoi mamango haahiꞌi.

Hibru 13:3

Na omu ke loꞌo-loꞌongaꞌinie mo iini ikire i laona nume ni hoꞌo, oto mala uri iꞌomu noꞌone peꞌire i laona nume ni hoꞌo. Na omu ke loꞌongaꞌinie mo iini ko sapesalu, mala uri iꞌomu, omu ko sapesalu noꞌone peꞌire.

3 Jon 1:7

E diana aana o ko peꞌire urine aena aana maholo kire aehota peꞌie mei esunge ienini huni tarohaꞌinie a Jisas Kraes, kire oalaꞌinie uri kire saꞌa toolea ike nga mei niinge mwaanie mo iini kire kaꞌa hiiwalaimoli ike aana a Jisas.