Palonga 2:33 - Tataroha Diana

³³ A God e tola aalihoꞌi aana hunie ke iiꞌo aana naꞌohai iiꞌo-iiꞌoha, i pwalo-pwalona, na a God Aamana e niie Liꞌoa Maaꞌi hunie oto mala e haiholotaꞌinie. Oto nga taa nge omu ko leesie na omu ko rongoa ngeena, mei ola a God e lingisie mai haahiꞌemeelu oto ni ngeena.

Palonga 2:33 ပူးပေါင်းရင်းမြစ်များ

Matiu 28:18

Oto a Jisas ko lae mai saada, na ko ere hunire uuri, “A God e niie oto ahutana nanamanga hunieu, haahie ahutana mo ola i Lengi na mai aano i leu.

Tataroha Diana I Sulie A Jisas Kraes Nge A Mak E Uusue 16:19

Oto i purine Aalaha ikie a Jisas e ere mango urine peꞌire, a God e tahelaꞌinie oto taꞌau i Lengi na e lai iiꞌo oto aana iiꞌo-iiꞌoha paine i pwalo-pwalona God.

Tataroha Diana I Sulie A Jisas Kraes Nge A Luk E Uusue 24:49

Na ineu maraaku, ne ke si uusungeꞌinie mai haahiꞌomu nga taa nge Aamaku e haiholotaꞌinie. Taꞌe omu ke iiꞌo kaꞌu i Jerusalem hule aana omu kei hele aana nanamanga ngeena uure i Lengi.”

Tataroha Diana I Sulie A Jisas Kraes Nge A Jon E Uusue 14:16

Na ne kei haꞌatohu aana a Mamaꞌa, oto ingeie ke si uusungeꞌinie mai ngaeta iini huni peꞌiꞌomu na hunie ke iiꞌo susu oto peꞌiꞌomu.

Tataroha Diana I Sulie A Jisas Kraes Nge A Jon E Uusue 14:26

Na iꞌemereꞌi a Mamaꞌa mere kei uusungeꞌinie mai nga iini huni peꞌiꞌomu, nge a Liꞌoa Maaꞌi eena. Ingeie ke si haꞌa-aamasitoꞌoꞌomu aana walu ola nou unuꞌi oto huniꞌomu, na ke haꞌasaiꞌomu aana ahutana mo ola ngeena.

Tataroha Diana I Sulie A Jisas Kraes Nge A Jon E Uusue 15:26

“Iꞌemereꞌi a Mamaꞌa mere kei uusungeꞌinie mai seemiu nga iini huni peꞌiꞌomu, na ingeie oto Liꞌoa aani walaimolinge. Maholo kei lae mai, ke si unu haadaꞌi eeku,

Tataroha Diana I Sulie A Jisas Kraes Nge A Jon E Uusue 17:5

Oto ie, Mamaꞌa, o ke haꞌamanikuluꞌaau aana mei menikuluꞌanga ngeena nou toꞌo aana kaꞌu oto peꞌiꞌo i naꞌona haꞌaholalana walumalau.”

Palonga 1:4

Na ngaeta maholo a Jisas e ngau-ngeu peꞌie mo hurulaꞌaa oto ko teꞌuri hunire, “Omu ke suꞌuri lae-lae mwaanie i Jerusalem, taꞌe omu ke maaꞌoohie kaꞌu mei niinge nge a Mamaꞌa e haiholotaꞌinie huniꞌomu, oto mala nou unue kaꞌu noꞌone huniꞌomu.

Palonga 10:45

Mo Jiu nge kire hiiwalaimoli oto na kire lae mai peꞌie a Pita, kire ko tohungei pangataꞌi aana a God e niie noꞌone Liꞌoa Maaꞌi hunie kira Konilias maꞌalana ikire mo Aapoloa Aaopa.

Palonga 2:17

A God e teꞌuri, ‘Aana mo dinge karaꞌinie haꞌamangolana walumalau ienini, ne kei lingisie mai Liꞌoa ineu haahie ahutana mwala. Na mo kalemiu mwane na mo kalemiu keni, kire kei meni houleꞌinie walaku. Na ne kei niie mo haataꞌinge hunie mo saanau iꞌomu, na ne kei niie mo maꞌahu-polenga hunie mo repo iꞌomu.

Palonga 5:31

A God e taꞌea na e haꞌa-iiꞌosie aana naꞌohai iiꞌo-iiꞌoha i pwalo-pwalona hunie ke aalaha haahikie, na hunie ke haꞌa-uurikie, na hunie mwala ni Israel ke oonisae mwaanie mo oorahaꞌaanga ikire hunie a God ke saeꞌaasiꞌi mwaanire.

Uusu-uusu A Pol Hurula'aa Hunie Mo Rom 5:5

Na norutoꞌonga ikie ngeena e saꞌa da ike hunie kie ke talei maa-maaꞌoohi mola mwaakule. Aana a God e haataꞌinie oto manata-diananga ingeie hunikie aana e uusungeꞌinie mai Liꞌoa Maaꞌi hunikie.

Kalesia 3:14

A Kraes e asuie leune urine, hunie uri mo Aapoloa Aaopa noꞌone ke hele aana nga taa nge a God e haiholotaꞌi huni niie nana a Ebraham. Na ko lae urine hunie mo iini kie hiiwalaimoli aana Jisas, uri kie ke hele aana Liꞌoa Maaꞌi nge a God e haiholotaꞌinie oto hunikie.

Epesas 1:13

Oto iꞌomu mo Aapoloa Aaopa noꞌone, omu neꞌi iinoni a God aana maholo omu rongoa mei wala toꞌohuu aana Tataroha Diana uri a God ko sare haꞌa-uuriꞌomu. Omu hiiwalaimoli oto aana Kraes ni ngeena, na huni haataꞌinie uri a God oto e toꞌo aamiu, e niie Liꞌoa Maaꞌi nge e haiholotaꞌinie oto huniꞌomu.

Epesas 4:8

Mo Uusu-uusu Maaꞌi e unue uuri, E tapolie mo maelonga ingeie, e si tola mauri aada maholo e tahelaꞌi taꞌau aana leu e lae oto i Lengi, nge e si haꞌa-adoa mo iinoni ingeie aani niinge. Sam 68:18

Taetas 3:6

Na aena aana a Jisas Kraes e haꞌa-uurikie, nge a God e tohungei haꞌadianaꞌakie na e niie oto Liꞌoa Maaꞌi ingeie hunikie.

Hibru 10:12

Taꞌe a Kraes e asuie mola taꞌa-taꞌa uunu-olanga, na uunu-olanga ingeie ngeena e toꞌo aana nanamanga huni taꞌaasie mo oorahaꞌaa oto taraꞌasi. Oto e asu mangoa uunu-olanga ngeena, e si lai iiꞌo aana naꞌohai iiꞌo-iiꞌoha i pwalo-pwalona God. Sam 110:1

Hibru 2:9

Taꞌe kie sai leesie taane uri haꞌa-oailana mei wala ngeena e aehota aana a Jisas. Aana a God e asuie a Jisas hunie ke mwai-mwei haꞌawali mwaanie mo ensel hunie uri ke haataꞌinie manata-diananga a God maholo e mae honotaka mo iinoni. Na aena aana e sapesalu hiitoꞌo na e mae urine, nge a God e haꞌa-aalahaa, na e haꞌamanikuluꞌaa na e haꞌapainaꞌaa.

1 Pita 1:21

I tehulaꞌana Kraes mone omu hiiwalaimoli aana a God. Na aena aana a God e taꞌe aalihoꞌi aana a Kraes mwaanie maenga na e niie manikuluꞌanga nana, nge omu sai diana aana uri omu sai hiiwalaimoli oto toꞌohuu aana a God na norutoꞌonga iꞌomu aana haiholotaꞌinge ingeie kei oa toꞌohuu taane.

1 Pita 3:22

A Jisas e tahelaꞌi oto i Lengi, na e iiꞌo oto i pwalo-pwalona God aana leu e nanama oto liutaa. Na aana a Jisas e toꞌo aana iiꞌo-iiꞌoha oto paine ngeena, nge ko aalaha oto haahie mo ensel na mo aakalo na mo inemauri na mo aalaha, na haahie taꞌena nga ola e nanama loꞌu.