Matiu 5:16 - Tataroha Diana

¹⁶ Oto iꞌomu, omu ke urine noꞌone. Raa-raa iꞌomu ke raangie ahutana mwala, hunie kire ke lio saie mo ola diana nge omu ko esuiꞌi na kire ke soi haꞌamanikuluꞌaa Aamamiu i Lengi i tehulaꞌani.”

Matiu 5:16 ပူးပေါင်းရင်းမြစ်များ

Matiu 23:5

“Ahutana nga moi taa kire ko euꞌesuiꞌi, mo ola mola uri hunie mwala ke lee-leesire. E toꞌohuu, a God e unue taane uri kie ke hoꞌo-hoꞌosie mo toꞌoni lauleuniꞌe na ngaeta mo ola loꞌu huni aama-aamasitoꞌo aana mo haꞌatolanga ingeie. !Taꞌe lio kaꞌu! Ikire, kire ko esu peine loꞌu aana mo olana, hunie uri mwala ko leesiꞌi na kire ke unue uuri, ‘Ikire ni oto mwala maaꞌi.’

Matiu 23:9

Na mwaanie omu haaraꞌinie nga iini mei aano uuri, ‘Mamaꞌa,’ aana e taꞌa-taꞌa iini oto Aamamiu, ingeie taꞌau i Lengi.

Matiu 5:45

Aana omu kei teꞌurine, nge omu ke si haataꞌinie uri iꞌomu oto mo kalena Aamamiu i Lengi. Ingeie nge ko nii-niie sato hunie ke pwaa haahie mo iinoni diana na mo iini aaela oto noꞌone. Na ko nii-niie nemo hunie mo iinoni oodotaꞌi na mo iini kaꞌa oodotaꞌi oto noꞌone.

Matiu 6:16

Oto a Jisas ko heꞌi teꞌuri loꞌu, “Maholo omu ko oolongau, mwaanie omu nunuku dara mala mo iini ko lupweꞌi deu-deu. Aana kire ko lupweꞌi lio rahitou mola hunie mwala ke leesie uri kire ko oolongau. Taꞌe ineu no ko unue huniꞌomu uri mo iini nge kire ko teꞌurine, kire hele mangoa oto waaitada.

Matiu 6:9

Taꞌe omu ko aarea God omu ke aarengaꞌi uuri. Mamaꞌa i Lengi, mwala ke haꞌamaꞌu aana satamu.

Matiu 9:8

Maholo mwala kire leesie urine, oto kire ko si meꞌu, na kire ko haꞌamanikuluꞌaa God aana e niie nanamanga urine hunie mo iinoni.

Tataroha Diana I Sulie A Jisas Kraes Nge A Luk E Uusue 11:2

Oto a Jisas ko teꞌuri hunire, “Maholo omu ko aarengaꞌi, omu ke ere uurini. Mamaꞌa, Mwala ke haꞌamaꞌu aana satamu. Aalahanga iꞌoe ke lae mai.

Tataroha Diana I Sulie A Jisas Kraes Nge A Jon E Uusue 15:8

Omu ke hungu diana huni haataꞌinie uri iꞌomu mo pwaarongoisuli ineu, na aena urine nge mwala ke si lio saie manikuluhaꞌana Aamaku.

Palonga 9:36

Na ngaeta pwaarongoisuli e iiꞌo aana huilume i Jopa satana a Tabita na aana erenga ni Krik satana a Dokas. Helelana a huꞌe ngeena e tohungei diana suli maholo, na e iiꞌo mola huni peꞌie mo iini ko siꞌohaꞌa.

1 Korinit 14:25

oto hule aana mo loꞌongaꞌinge mumuni ikire na kei maau oto i sinaha. Oto kire kei pouruuru oto i aano i naꞌona a God na kire kei houleꞌinie oto uuri, “!Toꞌohuu, a God oto peꞌiꞌomu i leu!”

2 Korinit 9:13

Na i tehulaꞌana mei esunge diana iꞌomu ngeena ko haataꞌinie hiiwalaimolinge iꞌomu e toꞌohuu, nge mwala oto hunge kei paalahea God. Omu hiiwalaimoli aana Tataroha Diana a Kraes na omu tola i sulie Tataroha Diana ngeena aani peꞌinge hunire na ahutana mwala loꞌu. Oto mwala hunge kei haꞌamanikuluꞌaa God haahie mwaꞌe-mwaꞌenga iꞌomu.

Kalesia 1:24

Na kire ko si soi haꞌamanikuluꞌaa God haahie nga taa nge e asuie aaku aana e huꞌisie tolahaku urine.

Epesas 2:10

Aana ikie mo iinoni aana soihaadaꞌinge, ikie oto mo naꞌohai haꞌaholanga a God. E uusungeꞌinie mai a Jisas Kraes huni haꞌahaalukie, hunie kie ke asuie walu ola diana nge e oalaꞌiniꞌi oto waite, hunie kie ke asuiꞌi.

Epesas 5:8

Holaꞌinaꞌo iꞌomu maraamiu omu oꞌoꞌo kaꞌu noꞌone i laona rodohono, taꞌe aena aana omu neꞌi iinoni oto a Aalaha, oto omu iiꞌo oto i laona raa-raa. Oto omu ke dau diana oto mala mwela aana raa-raa,

1 Tesalonaeka 2:12

Aana melu ere-ere haꞌasusuꞌomu, na melu eitanaiꞌomu huni tola i sulie a Jisas, na melu ere hatongaꞌi huniꞌomu hunie omu ke iiꞌo aani iiꞌonga diana i maana a God. Aana e haaraiꞌomu hunie omu ke neꞌi iinoni aana aalahanga ingeie na hunie omu ke iiꞌo peꞌie aana manikuluhaꞌana.

1 Timoti 2:10

Taꞌe kire ke haꞌalaunire aana mo esunge diana kire ko esuiꞌi, aana leune e adona mo huꞌe nge kire ko unue uri kire manata diana hunie a God.

1 Timoti 5:10

Mo nao keni urine kire ke neꞌie oto mo iini nge ahutana mwala kire lio saie uri kire ko esuie mo ola diana tarau. ?Uri e haꞌasai diana taane aana mo mwela ingeie? ?Uri e totola konie taane mo awataa? ?Uri e rararetaꞌinie taane kira hiiwalaimoli peꞌi haꞌamwai-mweiꞌanga? ?Uri e peꞌi-peꞌie taane kira siꞌohaꞌa? ?Uri e oꞌoꞌo aakau taane huni peꞌie taꞌena nga iinoni? Mo nao keni repo nge tolahada e diana urine o ke si uusue satada hunie soihaadaꞌinge ke lio i sulire.

1 Timoti 5:25

Oto e urine loꞌu aana ngaeta mo esunge diana kire mwadaꞌu noꞌone huni leesiꞌi, taꞌe maꞌalana nga mo iini kire iiꞌo mumuni keꞌu, kire saꞌa roroꞌa ni iiꞌo mumuni ike taraꞌasi.

1 Timoti 6:18

O ke unue hunire loꞌu uri kire ke asuie mola mo ola diana hunie kire ke toꞌo-toꞌo aana toꞌo-toꞌonga ni Lengi. Kire ke peꞌi-peꞌi, na kire ke iiꞌo aakau huni nii,

Taetas 2:14

aana e toliꞌaasie maraana hunie ke mae honotaka, na hunie ke tola aalihoꞌi aaka mwaanie mo oorahaꞌaanga ikie. E haꞌarereꞌakie oto hunie kie ke neꞌi iinoni oto ingeie, hunie kie ke tohungei iiꞌo oodotaꞌi aani esuilana mo ola diana oto tarau.

Taetas 2:7

Na iꞌoe, Taetas, o ke haataꞌinie noꞌone mei meu-meuringe diana aani esuilana mo ola diana hunie kire ke haimaaniꞌo. Mwaanie o eero-eero aana maholo o ko haꞌa-uusuli, taꞌe o ke haꞌa-uusuli peꞌie saenanaunge hunie mwala ke haꞌamaꞌu noꞌone aamu.

Taetas 3:14

O ke haꞌaninaa mwala aana soihaadaꞌinge hunie kire ke mwaꞌe-mwaꞌe ni esuie mo ola diana huni peꞌi-peꞌie ngaeta mwala, na mwaanie kire lalawa huni esuie mo ola diana.

Taetas 3:4

Taꞌe maꞌalana e urine, na a God a Haꞌa-uuritaka e saediana mola hunikie, na e haataꞌinie manata-diananga ingeie hunikie

Hibru 10:24

Kie ke lae peꞌi loꞌo-loꞌongaꞌi i sulie nga mo tala uri taa kie sai haꞌa-aꞌailaꞌaa neꞌisaenga ikie hailiu eeni hunie kie ke mani haataꞌinie oto manata-diananga aani esunge diana.

1 Pita 2:12

Oto omu ke lio-lio talamiu i matolana mo iinoni ni welumalau aana kire ko sare haꞌa-haꞌapeliꞌomu haahie mo ola hunge. Taꞌe omu ke iiꞌo oodotaꞌi mola tarau hunie kire ke leesie tolahamiu e oodotaꞌi. Omu ke teteꞌurine hunie maholo aasanga kei hite aada, ikire noꞌone kire ke si hiiwalaimoli, na kire ke soi haꞌamanikuluꞌaa a God haahiꞌomu.

1 Pita 2:9

Taꞌe iꞌomu oto, a God e lio hilisiꞌomu nana. Iꞌomu oto mo pris a Inemauri, na iꞌomu oto mwala maaꞌi ingeie. Iꞌomu oto mo tohungei iinoni a God maraana, nge e lio hilisiꞌomu huni tarohaꞌinie tolahai esunge diana ingeie. Aana a God oto e soiꞌomu mei mwaanie rodohono na omu lai sili i laona raa-raa ingeie e manikuluꞌe.

1 Pita 3:1

Na iꞌomu mo huꞌe noꞌone, omu ke tola i sulie mo poro iꞌomu. Urine, maꞌalana poro iꞌoe e kaꞌa hiiwalaimoli ike aana God, taꞌe ohe tolahamu kei haꞌa-aaliꞌue mai takoie hiiwalaimolinge. E kaꞌa ilisie ike uri o ke haro unue loꞌu nga mei ola hunie, taꞌe poro iꞌoe kei hiiwalaimoli mola

1 Pita 3:16

Taꞌe omu ke aalamire aani sae maneko peꞌi haꞌamaꞌunge aada. Omu ke iiꞌo oodotaꞌi taraureꞌi hunie manatamiu ke taha mola. Urine mo iinoni nge kire ko ere-ere aaelasiꞌomu kire kei masa i sulie nga taa kire ko unu-unue ngeena, aena aana ahutana mwala kei leesie mo ola diana omu ko esuiꞌi aana omu ko lulu i sulie a Kraes.

1 Pita 4:11

Taꞌena nga iini eemiu nge a God e niie oto nanamanga nana huni laeliwala, nge ke laeliwala oto mola i sulie mo wala nge a God e niiꞌi mei hunie. Na taꞌena nga iini eemiu nge a God e niie nanamanga huni peꞌie mwala, nge ke peꞌie mwala oto toꞌohuu aana nanamanga nge a God e niie hunie. Oto i tehulaꞌana mo esunge diana urine, mwala e sai paalahea God aana satana Jisas Kraes. Na ingeie oto e toꞌo aana ahutana manikuluꞌanga na sakanga oto di, oto di. Iau, ke urine oto.

1 Pita 4:14

Oto mala uri mwala ko haꞌasapesaluꞌaꞌomu i tehulaꞌana omu ko lulu i sulie a Kraes, omu ke ile-ilenimwaꞌe mola haahie. Omu ke ilenimwaꞌe mola aena aana mei tolahai sapesalunge i tehulaꞌana a Kraes nge ko haataꞌinie uri Liꞌoa Maaꞌi a God e iiꞌo oto aamiu toꞌohuu na kei haro niie manikuluꞌanga huniꞌomu.