Kolosi 4:2 - Tataroha Diana

² Mwaanie omu mou-mou mwaanie aarengaꞌinge taraureꞌi, na mwaanie omu poo-poosuaꞌa loꞌu aana, taꞌe omu ke aarengaꞌi peꞌi paalahenga hunie a God.

Kolosi 4:2 ပူးပေါင်းရင်းမြစ်များ

Matiu 26:41

Omu ke lio na omu ke aarengaꞌi, mwaanie malaahonga e hane haahiꞌomu. Nou saie uri manatamiu e aꞌailaꞌa taane huni esuie mo ola diana, taꞌe sapemiu ni mola ko tataku.”

Tataroha Diana I Sulie A Jisas Kraes Nge A Mak E Uusue 13:33

Aena urine, omu ke lio talamiu na omu ke dau aakau taraureꞌi suli maholo, aena aana omu kaꞌa saie ike maholo ne kei ooli loꞌu mei.

Tataroha Diana I Sulie A Jisas Kraes Nge A Luk E Uusue 18:1

Oto a Jisas e ere ni aalahuunge huni haataꞌinie aana mo pwaarongoisuli ingeie uri kire ke aarengaꞌi tarau mwaanie kire aakohe na mwaanie kire mou-mou mwaanie.

Tataroha Diana I Sulie A Jisas Kraes Nge A Luk E Uusue 21:36

Oto omu ke kakali diana peꞌi aarengaꞌinge taraureꞌi, hunie omu ke uure aꞌailaꞌa huni lae sapemawa i matolana walu ola kei reu ngeena, lai hule aana maholo omu kei uure i naꞌoku a Kale Ni Iinoni.”

Palonga 1:14

Ahutadaelu kire sai loko oto tarau peꞌie a Meri nikana a Jisas, na ngaeta mo huꞌe loꞌu, na mo mwane aasine a Jisas kire mani hute, hunie ahutada kire ke mani aarea God.

Uusu-uusu A Pol Hurula'aa Hunie Mo Rom 12:12

Omu ke ile-ilenimwaꞌe tarau haahie mo heiholotaꞌinge a God huniꞌomu. Maholo siꞌohaꞌanga ko hite aamiu, omu ke hele maꞌutaꞌa mola aana hiiwalaimolinge, na omu ke iiꞌo peꞌi aarengaꞌinge mola tarau.

Epesas 6:18

Na omu ke aarengaꞌi tarau na omu ke suke aana a God hunie ke peꞌiꞌomu i suli maholo. Na omu ke iiꞌo aani aarengaꞌinge aana nanamanga a Liꞌoa Maaꞌi. Oto omu ke lio-lio diana, na mwaanie omu toitoliꞌaasie aarengaꞌinge tarau talana ahutana mo iinoni a God.

Pilipae 4:6

Omu ke suꞌuri tolahiꞌe loꞌu aana nga mei ola, taꞌe omu ke aarea mola a God. Na omu ke sukaa taꞌena nga ola omu saetoꞌo aana, peꞌi paalahelana wau i saemiu.

Kolosi 1:9

Aena urinena, uure aana hai dinge melu rongoa tataroha i suliꞌomu, melu ko lae peꞌi aarengaꞌi talamiu. Na melu ko eitanaie a God uri omu ke sai diana aana nga taa a God e saetoꞌo aana omu ke asuie, na uri omu ke honu mola aana saenanaunge na lio sai-olanga a Liꞌoa Maaꞌi e sai niie hunikolu.

Kolosi 2:7

Omu ke iiꞌo susu oto i lalo aana Kraes mala nga ai imi-imine e susu i aano. Na hiiwalaimolinge iꞌomu ke susu na ke aatosara loꞌu aana mo ola nge haꞌa-uusulilemiu e lae aani, na omu ke paa-paalahea God taraureꞌi suli maholo.

Kolosi 3:15

A God e soiꞌomu tararuru hunie omu ke iiꞌo aana hanuelamanga i lalo aana taꞌa-taꞌa mei sape, na mwaanie omu kele waelie hanuelamanga nge a Kraes e niie huniꞌomu ngeena, taꞌe hanuelamanga ngeena ke aalaha haahie neꞌisaenga iꞌomu. Na omu ke paa-paalahea God tarau.

Kolosi 3:17

Oto taꞌe-taꞌena nga ola omu ko euꞌesuie, wa omu ko unu-unue, omu ke asuie mala iinoni a Aalaha ikie a Jisas. Na omu ke paalahea a God Aamaka tarau i tehulaꞌana a Kalena.

Kolosi 4:12

A Epapras noꞌone ko niie wau mei wala ni saediananga huniꞌomu. Ingeie nga koni-konihe toꞌohuu a Kraes Jisas na ngaeta iini eemiu. Ingeie ko esu namiu tarau aani eitanailana a God hunie omu ke sai diana aana walu ola a God e saetoꞌo aana omu ke asuiꞌi, na hunie omu ke asuiꞌi oto toꞌohuu mala mo rato aana tolahana Kraes.

1 Pita 4:7

Maholo ie ko karaꞌinie oto haꞌamangolana ahutana walu ola. Oto omu ke loꞌo-loꞌongaꞌi diana na omu ke kinetaꞌinie tolahamiu mwaanie nga mei ola e waelie aarengaꞌinge iꞌomu.