Jemes 4:11 - Tataroha Diana

¹¹ Maeni eesiku, omu ke suꞌuri sisiho aana nga iini. Mala omu ko siho aana nga iini i lalo aana Kraes, wa omu ko leie, nge omu ko ere waelie oto haꞌatolanga kire ko lulu i sulie. Urine nge e haataꞌinie omu kaꞌa hele ike i sulie mo haꞌatolanga, taꞌe omu ko sare haꞌapainaꞌaꞌomu loꞌu liutaa aana haꞌatolanga ngeena huni leie.

Jemes 4:11 ပူးပေါင်းရင်းမြစ်များ

Tataroha Diana I Sulie A Jisas Kraes Nge A Luk E Uusue 6:37

Oto a Jisas ko heꞌi teꞌuri loꞌu, “Mwaanie omu talei lei-leie taꞌena nga iinoni, mwaanie a God e leiꞌomu noꞌone urine. Mwaanie omu talei lei-lei maesie nga mwala, hunie a God ke suꞌuri lei maesiꞌomu noꞌone. Na omu ke sae-sae aasi hunie mo iinoni, hunie a God ke si saeꞌaasi noꞌone huniꞌomu.

Uusu-uusu A Pol Hurula'aa Hunie Mo Rom 2:1

Oto iꞌomu nge omu ko unu-unue uri mo iini nge kire dau urine kire tohungei deu aaela, iꞌomu noꞌone omu ke lio talamiu. ?Oto omu ko ere huni taa? Aena aana maholo omu ko leie ngaeta mwala urine, e urihana omu ko leiꞌomu loꞌu mola maraamiu ni ngeena, aena aana iꞌomu na omu ko deu-deu aaela noꞌone mola mala ikire.

Uusu-uusu A Pol Hurula'aa Hunie Mo Rom 2:13

Mwala nge kire ko talei rorongo aasie mola mo Haꞌatolanga ngeena, kire saꞌa roroꞌa iiꞌo oodotaꞌi ike i maana God. Taꞌe mwala nge kire ko lulu i sulie walu ola i laona mo Haꞌatolanga ngeena, haꞌalaa a God ko da kire ke oodotaꞌi i maana.

Uusu-uusu A Pol Hurula'aa Hunie Mo Rom 7:7

?Oto nga taa nge kolu kei unue? ?Uri mo Haꞌatolanga kire aaela? !Haꞌike oto ooꞌoo! Mo Haꞌatolanga mone ko si da kie ko saie uri kie oorahaꞌaala. Mala uri mo Haꞌatolanga ke suꞌuri unue uuri, Mwaanie o sae-saehanali, Eksodas 20:17 haꞌalaa nou kaꞌa saie ike leune e aapu eena.

1 Korinit 4:5

Oto omu ke suꞌuri leie mwala, aena aana e kaꞌa hule ue aana maholo a God kei lae mai huni leie mwala. Oto omu ke maaꞌoohie kaꞌu Aalaha ikie kei lae mai, aana ingeie nge ke si haataꞌinie mo ola kire oꞌoꞌo mumuni rorodoꞌa hunie kire ke iiꞌo haadaꞌi. Ingeie oto kei haataꞌinie saehaahinge mo iinoni, na kei lahera i sulie nga taa nga iini e asuie.

2 Korinit 12:20

Aana no ko maarara mwaanie uri maholo ne kei hule hao, na nou leledie helelamiu. Na ohe iꞌomu, omu saꞌa rongo ike hunieu maholo ne kei haꞌa-oodohiꞌomu. No ko maarara mwaanie nou lae hao i seemiu na nou oodoie mola walu ola mala haꞌa-erenga, na heotaꞌinge, na saewasunge, na sae aaelanga, na oopanga, na isinge, na sihoai-olanga, na toohaꞌinge, na maaola-olanga kire iiꞌo mola i matolamiu.

Epesas 4:31

Omu ke toliꞌaasie taꞌe-taꞌena nga tolahai ola ni loohaꞌi roroꞌanga, na ni ngiduupunge, na ni saewasunge. Na omu ke toliꞌaasie taꞌena nga teanga aaela, na ni eeronga huni waelie nga iini, na omu ke toliꞌaasie noꞌone taꞌena nga mei hiinge huni waelie ngaeta iinoni.

1 Timoti 3:11

Mo huꞌe, na e urine loꞌu, aana kire ke haro neꞌie mo keni e malisine mwala ke haꞌamaꞌu aada. Kire ke suꞌuri ere aaelasie nga iinoni, taꞌe kire ke kinetaꞌinie tolahada, na kire ke neꞌi huꞌe ni nou-norue nge mwala e sai norutoꞌo mola aada tarau.

2 Timoti 3:3

Kire saꞌa saie ike loꞌu manata-diananga, na kire saꞌa sae-sae aasi ike loꞌu hunie nga iinoni. Kire kei eero-eerotaꞌinie mola mwala, na kire saꞌa kinetaꞌinie ike tolahada mwaanie aaelanga. Kire saꞌa aama-aamasie ike nga iini, na kire kei leledie mola taꞌena nga ola diana.

Taetas 2:3

Na o ke haꞌa-uusulie noꞌone mo huꞌe hunie kire ke lulu i sulie tolahai iinoni diana nge e malisine mo iini kire hiiwalaimoli aana a Jisas. Kire ke suꞌuri sisiho aana mwala, na kire ke suꞌuri inu-inu wei ni mehiri hiitoꞌo. Taꞌe kire ke haꞌa-uusulie mwala mola aana tolahai iinoni diana,

Jemes 1:16

Maeni eesiku diana, omu ke suꞌuri toliꞌaasie nga iini ke eeroꞌomu aana mo haꞌananaunge ienini.

Jemes 1:19

Maeni eesiku, omu ke loꞌongaꞌi kohi i sulie mo ola ienini. Omu ke mwaꞌe-mwaꞌe huni hehurongo, na haro loꞌongaꞌi omu ke si ere. Suꞌuri saewasu oto lau-leu,

Jemes 1:25

Taꞌe a God e sai haꞌadianaꞌaa mo iini nge ko lio hahuroto i laona haꞌatolanga ingeie. Haꞌatolanga ngeena e tohungei diana, na e sai luhesie mo iinoni hunie kire ke iiꞌo luhetaꞌi mwaanie oorahaꞌaa. Oto iinoni nge ko rongo hunie mo haꞌananaunge a God, na ko loꞌongaꞌi i suliꞌi taraureꞌi, na e saꞌa pulongosie nga taa e rongoa, taꞌe ko hele i sulie nga taa a God e unue, nge a God e sai haꞌadianaꞌaa aana nga taa nge ko esuie.

Jemes 2:8

Taꞌe mala omu ko hele i sulie haꞌatolanga a Inemauri ikie aana mo Uusu-uusu Maaꞌi, nge e unue uuri, O ke manata diana hunie mo iinoni mala o ko manata diana huniꞌo mola maraamu, Levitikas 19:18 nge urine haꞌalaa omu ko deu oodo.

Jemes 5:10

Kolu meni saie oto, maeni eesiku, uri mo propet maaꞌi nge kire ere hunie a God oto i naꞌo, sapesalunge paine e hule oto aada. Taꞌe ikire, kire maaꞌoohi susutoꞌo mola, na e malisine ikolu, kolu ke lulu i sulie uuri-uurite ikire aani maaꞌoohi-susutoꞌonga noꞌone mala ikire.

Jemes 5:7

Maeni eesiku, omu ke maaꞌoohi susutoꞌo lai hule aana a Jisas kei ooli loꞌu mei. Ikolu, kolu meni saie uri mo mwane nge ko esuie hohola kire sai maaꞌoohi susutoꞌo hule aana nemo kei da hohola ikire ke repo diana malisine soꞌokoninge.

Jemes 5:9

Omu ke suꞌuri upwesiꞌomu heiliu, maeni eesiku, mwaanie a God e leiꞌomu. Na leinge e karaꞌinie oto kei lae mai.

1 Pita 2:1

Oto aena urinena, mwaanie omu heꞌi lulu i sulie loꞌu mo neꞌisaenga aaela huni waelie ngaeta iini. Omu ke suꞌuri heꞌi eero loꞌu, na omu ke suꞌuri lupweꞌi eeroa mwala, na omu ke suꞌuri saehanalie mo ola ngaeta iini, wa omu ke lae peꞌi ere aaelasie ngaeta mwala.