Jemes 3:17 - Tataroha Diana

¹⁷ Taꞌe saenanaunge nge e lae mai mwaanie a God e uuri. E rereꞌa, na e honu aana hanuelamanga, na e mamae, na e sai tola i suli, na e sai hei-aamasi, na ko peꞌi. Saenanaunge urine e kaꞌa sai lupweꞌi deu-deu na e kaꞌa sai rara ike haahie nga iini.

Jemes 3:17 ပူးပေါင်းရင်းမြစ်များ

Matiu 23:28

Iꞌomu, omu urine noꞌone. Aana leesilemiu poꞌoi sinaha uri iꞌomu ni oto mo iinoni diana, taꞌe wai lalo aamiu, e honu oto mola aana lupweꞌi-deunge na oorahaꞌaa.

Matiu 5:8

Deidehie mo iini nge saeda e rereꞌa na e manola, aena aana kire kei iiꞌo peꞌie a God.

Matiu 5:9

Deidehie mo iini nge kire ko esuie hanuelamanga, aena aana a God kei saire aana mo kalena.

Tataroha Diana I Sulie A Jisas Kraes Nge A Luk E Uusue 21:15

Ineu, ne kei haataꞌinie taane aamiu nga taa ni unue aana tohungana saenanaunge hule aana nga iini aana mo maelonga iꞌomu, na e saꞌa oolisie ike loꞌu nga mei wala aana erenga iꞌomu.

Tataroha Diana I Sulie A Jisas Kraes Nge A Luk E Uusue 6:36

Omu ke hai-hei aamasi oto mala Aamamiu i Lengi ko hei-hei aamasi hunie taꞌena nga iinoni.”

Tataroha Diana I Sulie A Jisas Kraes Nge A Jon E Uusue 1:14

A mei Wala ngeena e lae oto mai na e neꞌi iinoni. E oꞌoꞌo oto i matolameelu na melu leesie oto manikuluhaꞌana, mei menikuluꞌanga oto paine aena aana ingeie oto taꞌa-taꞌa mwela mouteꞌi a God. Ingeie oto ko niie ahutana hahuꞌana manata-diananga a God hunikie, na ko unu-unue ahutana walaimolinge a God hunikie.

Tataroha Diana I Sulie A Jisas Kraes Nge A Jon E Uusue 1:47

Maholo a Jisas e leesie a Nataniel ko lae mai takoie, ko si ere oalana uuri, “A mwane ie tohungei mwane ni Israel toꞌohuu nge e saꞌa hahuꞌei eeroa ike nga iini.”

Palonga 11:24

A Banabas ingeie mwane diana na e honu aana Liꞌoa Maaꞌi na hiiwalaimolinge ingeie e susu. Na maholona mo iini hunge kire ko aehota hiiwalaimoli oto aana a Aalaha.

Palonga 9:36

Na ngaeta pwaarongoisuli e iiꞌo aana huilume i Jopa satana a Tabita na aana erenga ni Krik satana a Dokas. Helelana a huꞌe ngeena e tohungei diana suli maholo, na e iiꞌo mola huni peꞌie mo iini ko siꞌohaꞌa.

Uusu-uusu A Pol Hurula'aa Hunie Mo Rom 12:18

Mala uri leu i sapemiu hunie omu ke iiꞌo ni henuelama peꞌie ahutana mwala, nge omu ke asuie oto.

Uusu-uusu A Pol Hurula'aa Hunie Mo Rom 12:9

Mwaanie omu lupweꞌi deu-deu aani manata-diananga, taꞌe omu ke manata diana toꞌohuu. Omu ke leledie aaelanga, na omu ke hele maꞌutaꞌa aana nga taa e diana.

Uusu-uusu A Pol Hurula'aa Hunie Mo Rom 15:14

Maeni eesiku maaꞌi, nou hiiwalaimoli uri omu honu makeato oto aana taꞌena nga tolahai ola diana, na uri omu tohungei saenanau oto aani, hule aana omu sai haꞌananauꞌomu heiliu oto aani.

1 Korinit 12:8

Aana e taꞌa-taꞌa Liꞌoa Maaꞌi ngeena mola ni ko niie nanamanga hunie ngaeta mwala huni unu tahangaꞌinie mo wala ni saenanaunge, na ko niie noꞌone hunie ngaeta mwala tolaha ni sai-olanga.

2 Korinit 10:1

Oto ineu a Pol maraaku no ko eitanaiꞌomu hunie uri omu ke rongo hunieu. Nou rongoa uri ngaeta mo iini eemiu kire ko unue uri nou sai ere hiitoꞌo huniꞌomu mola aani uusu-uusu maholo nou iiꞌo haꞌatauliꞌomu, taꞌe no ko meꞌu ni ere urine maholo nou iiꞌo peꞌiꞌomu. !Haꞌike! Taꞌe no ko heimaanie tolahana a Kraes aana ingeie e saemamae na e lai maneko

2 Korinit 6:6

Na melu haataꞌinie loꞌu uri iꞌemeelu mo koni-konihe a God aana iiꞌonga rereꞌa iꞌemeelu, na aana saenanaunge iꞌemeelu, na aana toli-rakonga iꞌemeelu, na aana saediananga iꞌemeelu hunie ahutana iinoni, na aana nanamanga a Liꞌoa Maaꞌi, na aana melu manata diana toꞌohuu hunie ahutana iinoni.

2 Korinit 7:11

Omu ke leesie kaꞌu mei saehuunge nge a God e asuie aamiu ngeena, aana ko si da omu ko sare asuie walu ola diana, na omu ko sare haataꞌinie uri omu kaꞌa takalo ike mala iini e asuie mei roroꞌanga ngeena. Na mei saehuunge ngeena ko si da omu ko saewasulie mo iini ko deu-deu aaela, na omu ko meꞌuteꞌinie noꞌone haꞌaloinge a God. Na omu ko si sare leesieu oto liutaa. Na loꞌu ko si da omu ko neꞌisae haꞌahiꞌe aana a God, na omu ko sare haꞌaloie mo iini ko deu aaela. Oto aana ahutana walu ola omu ko deuꞌi ngeena, omu ko haataꞌinie oto uri omu rereꞌa mwaanie mei roroꞌanga ngeena.

2 Korinit 9:10

A God oto iini e sai da mo litei ola kie ko hesiꞌi ke aahu diana hunie maholo ni soꞌokoninge kie ke toꞌo ngaulaa huni ngeuꞌi, na kie ke toꞌo aana mo litei ola loꞌu huni hesiꞌi. Oto urine, maholo omu ko nii peꞌi saediananga, nge a God ke si haꞌahungeꞌaa nga taa omu toꞌo aana, hunie uri omu sai nii oto loꞌu liutaa hunie kira maitale.

Epesas 5:9

aena aana tolahana raa-raa nge e sai da taꞌena nga ola ke lae diana, na ke oodo, na ke toꞌohuu.

Pilipae 1:11

Oto omu ke si honu aana hue-huana oodotaꞌinge nge a Jisas Kraes maraana haꞌalaa ko niie, aani esuilana mo ola diana hunie mwala ke haꞌamanikuluꞌaa God peꞌi paalahelana haahiꞌi.

Pilipae 4:8

Oto ie, maeni eesiku, mei wala ooreta ineu huniꞌomu, uri omu ke lolodoa mo ola toꞌohuu na mo ola diana i saemiu. Na omu ke loꞌo-loꞌongaꞌi mola i sulie mo ola oodo, na mo ola manola, na mo ola e lio diana, na mo ola mwala e sai haꞌamaꞌu eeni, na mo ola e malisine lahenga haahiꞌi, na taꞌena nga mei ola e diana loꞌu liutaa urine.

Kolosi 1:10

Melu ko eiꞌeitanai urine hunie omu ke iiꞌo oto aana tolahai ola e malisine mo iinoni maaꞌi a Aalaha, na hunie asunge iꞌomu ke toꞌohie saena a God. Urine nge omu ke si haꞌahungeꞌaa loꞌu taꞌena nga asunge diana, na omu ke sai diana aana a God.

1 Tesalonaeka 2:7

E toꞌohuu oto. Iꞌemeelu, melu neꞌie oto mo hurulaꞌaa a Kraes, mo iini peine oto liutaa haahie soihaadaꞌinge. Oto iꞌemeelu mo hurulaꞌaa, melu sai haaraiꞌomu hunie taꞌena nga ola. !Taꞌe melu kaꞌa dau rarahiꞌomu ike! !Haꞌike oto ooꞌoo! Melu tohungei deu rako mola aamiu mala huꞌe ko lio i sulie kele wee-wee ingeie maholo ko haꞌasusuhie.

1 Timoti 5:21

Oto i naꞌona God na Kraes Jisas na mo ensel maaꞌi, no ko unue huniꞌo uri o ke tola i sulie mo ola ngeena, na mwaanie o rara haahie mola nga iini.

2 Timoti 2:24

na iinoni euꞌesu a God ke suꞌuri neꞌi iinoni haꞌa-haꞌa-ere. Urine haꞌike, taꞌe ke toli rako mola peꞌie mwala, na ke saenanau diana aana tolaha ni haꞌa-uusulinge, na ke suꞌuri sae-saewasu lau-leu.

Taetas 1:15

Kire unue uri kie ke haꞌahili-hili mwaanie mo ola oto hunge, taꞌe eeronga mola ni ngeena, aana walu ola kire mani diana mola hunie mo iini kire iiꞌo oodotaꞌi. Taꞌe iini nge ko loꞌo-loꞌongaꞌinie mola aaelanga haliꞌite, ahutana ola kire mani madaꞌa hunie, aena aana e kaꞌa hiiwalaimoli ike aana God. Oto iini urine manatana na loꞌongaꞌinge ingeie kire mani aaela mango mola.

Taetas 3:2

Mwaanie kire ere aaelasie nga iini wa kire ke haꞌa-erea nga iini, taꞌe kire ke iiꞌo maneko na kire ke manata diana mola hunire hailiu.

Hibru 12:11

Aana maholo a God ko haꞌaloikie, kie sai sapesalu aana leune taane, na kie saꞌa ilenimwaꞌe ike. Taꞌe purihaꞌana, nge mo iini a God e haꞌaloikie aana tala ngeena, kie sai iiꞌo ni henuelama aana kie iiꞌo oodotaꞌi oto i maana God.

Hibru 12:14

Omu ke oꞌoꞌo ni henuelama mola peꞌie ahutana mwala, na omu ke ariꞌapasie noꞌone iiꞌonga oodotaꞌi. Aana nga iini e kaꞌa iiꞌo diana urine, e saꞌa roroꞌa leesie ike a Aalaha.

Jemes 1:17

Ahutana mo ola diana na mo ola oodotaꞌi kire uure mai mwaanie i Lengi, mwaanie iini nge e haꞌaholaa sato, na waro-waro, na mo heeꞌu. Na raa-raangana e kaꞌa urihana ike mo ola ngeena aana kire ko hei-hei-oolisi mola, taꞌe tolahai ola diana ingeie e saꞌa kele hai-oolisi ike oto ooꞌoo.

Jemes 1:5

Taꞌe mala nga iini hikemiu ko saetoꞌo aana saenanaunge, nge ke suke aana a God. Sulie a God e mwaꞌe-mwaꞌe huni nii, na e sai niie saenanaunge huniꞌomu, na e saꞌa asuie ike omu ke hii aaela aani sukanga.

Jemes 2:13

Aena ngeena omu ke haataꞌinie hai-aamasinge iꞌomu oto hunie mo iinoni, aana a God e saꞌa haataꞌinie ike loꞌu hai-aamasinge ingeie aana maholo kei leie mo iini nge kire kaꞌa sai hei aamasi. Taꞌe mo iini nge kire haataꞌinie hai-aamasinge, nge kire kei uure na kire saꞌa maꞌu ike aana maholo a God kei leire.

Jemes 2:4

?Haꞌalaa nga taa nge omu ko esuie urine? Aana omu ko neꞌisae haꞌamaꞌu aana ngaeta mo iinoni liutaa aana ngaeta mo iini. Na mei neꞌisaenga aaela nge omu ko esuie urine, aena aana omu ko neꞌisae haꞌamaꞌu mola aana ngaeta mo iini, na nga mo iini haꞌike.

Jemes 3:15

Aena aana saenanaunge urine e kaꞌa uure ike mwaanie a God, taꞌe ola mola aana mo iinoni aana walumalau ie, aena aana mei ola ngeena e uure mola mwaanie a Satan.

Jemes 4:8

Omu ke iiꞌo karaꞌinie a God, nge a God kei iiꞌo karaꞌiniꞌomu. Iꞌomu mo iini nge omu oorahaꞌaa, omu ke loto aasie oorahaꞌaa mwaanie manatamiu. Na iꞌomu mo iini omu ko sare lulu i sulie a God na walumalau aana taꞌa-taꞌa maholo, omu ke asuie neꞌisaenga iꞌomu ke rereꞌa.

1 Pita 1:22

Oto i tehulaꞌana omu tola i sulie mo wala toꞌohuu aana Tataroha Diana ngeena, omu da oto maurihaꞌamiu e rereꞌa mwaanie oorahaꞌaa eena, na omu sai manata diana oto hunie mo eesimiu maaꞌi. Aena urine, omu ke mana-manata diana oto huniꞌomu heiliu aana ahutana saemiu.

1 Pita 2:1

Oto aena urinena, mwaanie omu heꞌi lulu i sulie loꞌu mo neꞌisaenga aaela huni waelie ngaeta iini. Omu ke suꞌuri heꞌi eero loꞌu, na omu ke suꞌuri lupweꞌi eeroa mwala, na omu ke suꞌuri saehanalie mo ola ngaeta iini, wa omu ke lae peꞌi ere aaelasie ngaeta mwala.

1 Pita 2:18

Iꞌomu mo koni-konihe, omu ke tola i sulie mo poro paine iꞌomu peꞌi haꞌamaꞌunge aada oto toꞌohuu. Mwaanie omu haꞌa-haꞌamaꞌu mola aana mo poro paine nge kire diana huniꞌomu, taꞌe omu ke haꞌamaꞌu noꞌone aana mo iini nge kire aaela huniꞌomu na kire ko deu rarahiꞌomu.

1 Jon 3:18

Maeni mwela ineu, kie ke suꞌuri mana-manata diana mola aani wawa wa aani wala, taꞌe manata-diananga toꞌohuu nge ko haataꞌi aana nga taa kie ko esuie.

1 Jon 3:3

Na ahutaka nge kie ko lio-lio peꞌie maaꞌoohinge loosie maholo ngeena, kie ko kinetaꞌinikie hunie kie ke iiꞌo rereꞌa oto mala a Kraes e rereꞌa.