Hibru 13:18 - Tataroha Diana

¹⁸ Omu ke aarea God talameelu, aena aana melu saetoꞌo aana mola uri melu ke auꞌesuie mola taꞌena nga mei ola e oodo. Melu sai diana aana uri melu kaꞌa dau huꞌisie ike nga mei ola aaela, na melu saetoꞌo aana uri manatameelu ke taha mola urine taraꞌasi.

Hibru 13:18 ပူးပေါင်းရင်းမြစ်များ

Palonga 23:1

A Pol e toꞌomaaie pulitaa ni lei-lei oto ko teꞌuri, “Maeni eesiku ni Israel, manataku e tahanie taane mola iiꞌonga ineu i naꞌona God lae mai hule siꞌiri.”

Palonga 24:16

Na no ko deu aahonga tarau hunie manataku ke rereꞌa i naꞌona God na i naꞌona mo iinoni.

Uusu-uusu A Pol Hurula'aa Hunie Mo Rom 12:17

Mala uri nga iini ko deu aaelasie nga mei ola takoiꞌomu, omu ke suꞌuri oolisie loꞌu eelihoꞌi hunie. Suli maholo omu ke asuie mola nga taa e oodo na e lio diana i maana ahutana mwala.

Uusu-uusu A Pol Hurula'aa Hunie Mo Rom 13:13

Iau, kie ke iiꞌo oodotaꞌi oto mola tarau, mala mwala ko esuie mola mo ola haadaꞌi i laona matapwanga aana aatowaa. Kie ke suꞌuri esuie mo ngeunge aaela na mahiringe aana inuhilana mo wei ni pweunge. Masinge na ke suꞌuri loꞌu, na kie ke suꞌuri tara loꞌu i sulie mo tolahai ola aaela urine. Kie ke suꞌuri toolea loꞌu haꞌa-erenga na heotaꞌinge.

Uusu-uusu A Pol Hurula'aa Hunie Mo Rom 15:30

Maeni eesiku maaꞌi, aena aana kie mani lado oto peꞌie Aalaha ikie a Jisas Kraes, na i tehulaꞌana manata-diananga a Liꞌoa Maaꞌi e niie hunikie hailiu, nge no ko eitanaiꞌomu uri omu ke peꞌieu i laona asunge ineu aani aarengaꞌinge hunie a God talaku.

2 Korinit 1:12

Maeni eesiku, manataku e taha mola aana nou saie uri melu kaꞌa eeroa ike nga iini aana nga maholo, taꞌe melu ko lulu i sulie mola oodo-oodonga nge a God e saetoꞌo aana. Walu ola melu ko euꞌesuiꞌi e uure mola aana hahuꞌana manata-diananga a God, na melu kaꞌa asuie ike nga mei ola i sulie saenanaunge ni iinoni. Tolahameelu e diana oto urine tarau peꞌie ahutana mo iinoni, na oto liutaa maholo melu oꞌoꞌo peꞌiꞌomu.

Pilipae 4:8

Oto ie, maeni eesiku, mei wala ooreta ineu huniꞌomu, uri omu ke lolodoa mo ola toꞌohuu na mo ola diana i saemiu. Na omu ke loꞌo-loꞌongaꞌi mola i sulie mo ola oodo, na mo ola manola, na mo ola e lio diana, na mo ola mwala e sai haꞌamaꞌu eeni, na mo ola e malisine lahenga haahiꞌi, na taꞌena nga mei ola e diana loꞌu liutaa urine.

Kolosi 4:3

Omu saie taane uri ineu i laona nume ni hoꞌo siꞌiri aena aana nou lae peꞌi houleꞌinie Tataroha Diana i sulie a Kraes. Taꞌe maꞌalana ineu i nume ni hoꞌo urine, omu ke aare-aarengaꞌi noꞌone talameelu mo oaku uri hunie a God ke niie nga mo maholo diana nameelu huni houleꞌinie a Kraes i saana ngaeta mwala.

1 Tesalonaeka 4:12

Aana omu kei deu urine nge hule aana mwala ni puꞌo na kire ke si haꞌamaꞌu eemiu, na omu saꞌa sare sukaa ike loꞌu nga mei ola mwaanie nga iini.

1 Tesalonaeka 5:25

Maeni eesiku maaꞌi, omu ke aarengaꞌi noꞌone talameelu.

2 Tesalonaeka 3:1

Oto maeni eesiku maaꞌi, omu ke aarengaꞌi talameelu hunie uri melu ke sai tarohaꞌinie walana a Aalaha oto hailiu hunie taꞌena nga hanue, na hunie uri mwala ke rongo peꞌi haꞌamaꞌunge aana oto mala iꞌomu omu esuie aana maholo omu rongoa.

1 Timoti 1:5

Aena aana nga taa no ko sare haꞌa-uusulire aana ngeena, nge mola hunie kire ke mana-manata diana hunire hailiu aani sae manola, na aani manatanga rereꞌa, na aani hiiwalaimolinge toꞌohuu.

1 Pita 2:12

Oto omu ke lio-lio talamiu i matolana mo iinoni ni welumalau aana kire ko sare haꞌa-haꞌapeliꞌomu haahie mo ola hunge. Taꞌe omu ke iiꞌo oodotaꞌi mola tarau hunie kire ke leesie tolahamiu e oodotaꞌi. Omu ke teteꞌurine hunie maholo aasanga kei hite aada, ikire noꞌone kire ke si hiiwalaimoli, na kire ke soi haꞌamanikuluꞌaa a God haahiꞌomu.

1 Pita 3:16

Taꞌe omu ke aalamire aani sae maneko peꞌi haꞌamaꞌunge aada. Omu ke iiꞌo oodotaꞌi taraureꞌi hunie manatamiu ke taha mola. Urine mo iinoni nge kire ko ere-ere aaelasiꞌomu kire kei masa i sulie nga taa kire ko unu-unue ngeena, aena aana ahutana mwala kei leesie mo ola diana omu ko esuiꞌi aana omu ko lulu i sulie a Kraes.

1 Pita 3:21

Na haꞌa-uurilada ngeena, nga tolimaa aana haꞌa-uurilaka nge ko lae mai hunikie aana loto-maaꞌinge. Loto-maaꞌinge nge ko haꞌa-uurikie ngeena e kaꞌa neꞌie ike mei ola mola aana wai ko hoda aasie mo mada mwaanie sapeka, taꞌe kie ko loto maaꞌi oto toꞌohuu maholo kie haiholotaꞌinie hunie a God aani sae manola uri kie kei lulu i sulie oto aani norutoꞌonga aana. Na loto-maaꞌinge urine e toꞌo aana nanamanga huni haꞌa-uurikie aena aana a Jisas Kraes e taꞌelaꞌi eelihoꞌi mwaanie maenga.