Hibru 12:14 - Tataroha Diana

¹⁴ Omu ke oꞌoꞌo ni henuelama mola peꞌie ahutana mwala, na omu ke ariꞌapasie noꞌone iiꞌonga oodotaꞌi. Aana nga iini e kaꞌa iiꞌo diana urine, e saꞌa roroꞌa leesie ike a Aalaha.

Hibru 12:14 ပူးပေါင်းရင်းမြစ်များ

Tataroha Diana I Sulie A Jisas Kraes Nge A Mak E Uusue 9:50

“Ahaa mei ola diana, taꞌe mala uri ahaanga aana kei lae mwaanie, kei neꞌi ola aaela oto aana e saꞌa ahaala ike loꞌu. Oto urine, e malisine tolahamiu ke ahaala taraꞌasi, na omu ke iiꞌo ni henuelama i matolamiu heiliu.”

Tataroha Diana I Sulie A Jisas Kraes Nge A Luk E Uusue 1:75

uri hunie kie ke iiꞌo maaꞌi na iiꞌo oodotaꞌi i naꞌona, i suli hei dinge aana maurihaꞌaka.

Uusu-uusu A Pol Hurula'aa Hunie Mo Rom 12:18

Mala uri leu i sapemiu hunie omu ke iiꞌo ni henuelama peꞌie ahutana mwala, nge omu ke asuie oto.

Uusu-uusu A Pol Hurula'aa Hunie Mo Rom 14:19

Oto kie ke ariꞌapasie mola asuilana walu ola huni peꞌilaka hailiu hunie iiꞌonga ni henuelamanga na huni haꞌa-aꞌailaꞌaa hiiwalaimolinge ikie.

Uusu-uusu A Pol Hurula'aa Hunie Mo Rom 6:22

Taꞌe ienini, a God e haꞌa-uuriꞌomu oto mwaanie nanamanga aana oorahaꞌaa, na e da oto omu ke neꞌi iinoni euꞌesu nana. Na hue-huana leune oto maurihaꞌamiu ko neꞌi ola maaꞌi oto, na omu ko helesie oto maurihe huu.

1 Korinit 1:10

Maeni eesiku maaꞌi, no ko eitanaiꞌomu aana satana a Jisas Kraes Aalaha ikie, uri omu ke neꞌie mola taꞌa-taꞌa mei sae. Omu ke toliꞌaasie mo tolahai ola ni oopanga, taꞌe omu ke mani neꞌisae diana hunie omu ke asu loko-loko loꞌu.

1 Korinit 13:12

Maholo ienini, saenanaunge ikie aana a God e kaꞌa tohungei peine ike. E urihana mola kie ko lio-lio waranunuꞌe aana, mala iiro-iiro e wasa-wasaaꞌa. Taꞌe aana nga maholo, kie ke si lio saie taane ahutana walu ola oto mola aana maaka maraaka. Aana maholona nge kie ke si saenanau diana aana a God oto mala a God e saenanau aaka.

2 Korinit 6:17

Aena urinena a Aalaha e unue noꞌone uuri, Omu ke toliꞌaasie mo puꞌo, na omu ke iiꞌo aaopa oto mwaanire. Omu ke suꞌuri hele i sulie loꞌu nga mei ola e madaꞌa, aana omu kei iiꞌo oodotaꞌi urine nge ne kei ilenimwaꞌe peꞌiꞌomu. Aesaea 52:11

2 Korinit 7:1

Maeni iinoni maaꞌi, ahutana mo heiholotaꞌinge ngeena a God e niiꞌi oto hunikie. Aena urine kie ke kinetaꞌinikie maraaka mwaanie walutana nga ola madaꞌa nge e sai haꞌamadaꞌaa maurihaꞌaka, na mwaanie kie asuie taꞌena nga ola aaela wa kie neꞌisae aaela hunie nga iini. Na aena aana kie haꞌamaꞌu aana God, kie ke lulu i sulie oto tolahana e maaꞌi.

Kalesia 3:21

?Oto uri mo Haꞌatolanga e uure honosie mo heiholotaꞌinge a God? !Haꞌike! Aana mala uri a God ke niie mai nga haꞌatolanga nge e sai niie maurihe huu, nge taꞌena nga iini ko tola i sulie haꞌatolanga ngeena kei neꞌi iinoni oodotaꞌi oto peꞌie a God eena.

Epesas 5:5

Iꞌomu, omu saie oto maraamiu uri mwala nge kire ko talei deu taꞌewau mola peꞌie taꞌena nga iinoni, na kire ko lae peꞌi esuie mola taꞌena nga ola aaela urine, kire kaꞌa toꞌo aana ike nga leu talada i laona mauringe nge a Kraes na a God kirerue ko aalaha haahie. Na e urine noꞌone hunie mo iini nge kire ko talei sae-saehanalie mola toꞌo-toꞌolana ngaeta mwala, aana mo iini urine kire ko paloa mola mo god eero-eero ni ngeena.

Pilipae 3:12

Nou kaꞌa unue ike uri nou hule oto aana leu no ko huru hunie, wa nou tohungei diana oto mala a God e saetoꞌo aana. Taꞌe no ko huru-huru ue wau, hunie ne ke hele aana waaite ineu. No ko huru-huru ue urine aena aana mei neꞌisaenga nge a Jisas Kraes e holaꞌi hele aaku hunie ni otona.

1 Tesalonaeka 3:13

Melu ko eitanai uri saemiu ke susu aani loꞌongaꞌinge diana, na omu ke iiꞌo maaꞌi, na mwaanie nga iini e pwelu wala i lengimiu, hunie maholo Aalaha ikie a Jisas kei ooli mei peꞌie mo iinoni maaꞌi ingeie, na omu ke suꞌuri masa ni uure i naꞌona God Aamaka.

1 Tesalonaeka 4:7

Aana a God e kaꞌa haaraikie ike hunie iiꞌonga madaꞌa urine, taꞌe e saetoꞌo aana uri iiꞌolaka ke maaꞌi oto taꞌingelu.

1 Tesalonaeka 5:15

Omu ke lio talamiu mwaanie nga iini e heꞌi suꞌue loꞌu tataꞌalanga hunie nga iini. !Haꞌike! Taꞌe omu ke diana mola huniꞌomu heiliu taraureꞌi na noꞌone hunie ahutana mwala.

1 Timoti 6:11

Taꞌe iꞌoe, Timoti, o ke lio talamu oto mwaanie ahutana mo ola mala ngeena, aena aana iꞌoe oto mwane a God. Na o ke huru oto mola i sulie tolaha diana. O ke iiꞌo oodotaꞌi, na o ke iiꞌo maaꞌi, na o ke hiiwalaimoli, na o ke manata diana hunie mwala, na o ke asu taraꞌasi, na o ke maneko.

2 Timoti 2:22

Oto o ke lio talamu mwaanie mo saehanalinge nge ko too-toolea mo saanau, taꞌe o ke dau diana mola tarau. Na o ke ariꞌapasie mola lulu i sulilana oodotaꞌinge, na hiiwalaimolinge iꞌoe ke susu, na o ke manata diana hunie ahutana mwala, na o ke iiꞌo ni henuelama mola peꞌie taꞌena nga iinoni. Na o ke hikusie mo iini ko palo-paloa a God toꞌohuu aani sae manola.

Hibru 12:10

Mo aamaka mai welumalau ngeena, kire ko haꞌa-haꞌaloikie i sulie saeda hunie kele maholo mola oꞌoruꞌe. Taꞌe a God ko haꞌaloikie aani peꞌilaka oto toꞌohuu, hunie kie ke iiꞌo maaꞌi oto mala ingeie.

Hibru 9:28

Na urine noꞌone, a Kraes e toliꞌaasie maurihaꞌana mola hautaꞌai hunie ke mae mala nga uunu-olanga aana ko helesie haꞌaletehinge haahie mo oorahaꞌaa mo iinoni hunge. Na a Kraes kei heꞌi ruana lae loꞌu mei, taꞌe aana maholo nge ko lae mai ngeena, e saꞌa lae ike mai huni mae honotana mo oorahaꞌaa ikie loꞌu. !Haꞌike! Taꞌe kei lae mai huni toolea mai maurihe huu nana mwala kire ko maaꞌoohie.

1 Pita 3:11

Ke toliꞌaasie oto mo tolahai ola aaela ingeie, na ke lulu i sulie oto mola mo tolahai ola diana, na ke ariꞌapasie uri ke iiꞌo ni henuelama peꞌie ahutana mwala.

1 Pita 3:13

?Oto mala uri omu kei lae peꞌi esuie mo ola diana, a tei kei waeliꞌomu?

2 Pita 3:11

Oto aena aana ahutana walu ola kei meni aaela mango oto urine, omu ke lio-lio diana aana mau-meuringe iꞌomu. Omu ke iiꞌo maaꞌi na omu ke lae peꞌi iiꞌo oodotaꞌi mola i sulie saena God.

2 Pita 3:18

Taꞌe omu ke pai-peine taraꞌasi mola i lalo aana manata-diananga na sai-olanga hunie Aalaha ikie na a Haꞌa-uuritaka, a Jisas Kraes. Nge manikuluꞌanga ingeie e saꞌa mango oto ooꞌoo. Ke urine oto.

3 Jon 1:11

Oto o ke suꞌuri heimaanie mo tolahai iinoni aaela urine, malahuku, taꞌe o ke lae mola i sulie tolahai iinoni diana. Aana iini nge ko lae i sulie tolahai iinoni diana, nge ingeie iinoni a God otona. Taꞌe iini nge ko lae i sulie tolahai iinoni aaela, nge e kaꞌa manataꞌinie ike a God.