Haataꞌinge 3:8 - Tataroha Diana

⁸ “Nou saie taane nga taa omu esuie na nou saie taane mola uri maꞌalana iꞌomu nga mo mwane paine haꞌike, taꞌe omu hele i sulie mo haꞌa-uusulinge ineu, na omu kaꞌa taateingeꞌinieu. Aena urine nou tahanie oto maa talamiu nge nga iini e saꞌa honoa ike loꞌu.

Haataꞌinge 3:8 ပူးပေါင်းရင်းမြစ်များ

Tataroha Diana I Sulie A Jisas Kraes Nge A Luk E Uusue 12:9

Taꞌe nga iini nge kei taateingeꞌinieu i naꞌona mo iinoni, nge ineu a Kale Ni Iinoni, ne kei taateingeꞌinie noꞌone i naꞌona mo ensel a God uri iinoni ngeena nga iinoni ineu haꞌike.

Tataroha Diana I Sulie A Jisas Kraes Nge A Jon E Uusue 15:20

Omu ke aamasitoꞌo aana mei wala nou unue kaꞌu huniꞌomu uri nga koni-konihe e kaꞌa paine ike loꞌu liutaa aana aalaha ingeie. Oto mala uri mwala aana walumalau ngeena ko teungeꞌinieu, nge kire kei teungeꞌiniꞌomu noꞌone. Mala uri kire ke tola i sulie mo haꞌatolanga ineu, haꞌalaa kire kei tola i sulie noꞌone mo haꞌatolanga iꞌomu.

Tataroha Diana I Sulie A Jisas Kraes Nge A Jon E Uusue 17:6

Oto a Jisas e si heꞌi aarengaꞌi loꞌu uuri, “Mamaꞌa, nou haataꞌinie oto walu ola i suliꞌo hunie mo iini o maire nakue mwaanie walumalau ie. Ikire mo iinoni iꞌoe, na o maire oto nakue. Oto kire tola oto i sulie walamu,

Palonga 14:27

Oto maholo kirerue hule loꞌu i Antiok kire si lokoa ahutana mo iini aana soihaadaꞌinge. Na kire ladoa ahutana walu ola nge a God e asuiꞌi hunirerue, aana e tahanie ngaeta maa aana hiiwalaimolinge hunie mo Aapoloa Aaopa ke sili noꞌone mai i sulie.

1 Korinit 16:9

Aana kele maholo kohi huni deu i sulie nga mo ola diana hunge i leu ni oto ienini, maꞌalana uri nga mo iini hunge ko si uure honosieu taane.

2 Korinit 2:12

Maholo nou hule wau aana huilume i Troas huni laeliwala aana Tataroha Diana i sulie a Kraes, nou deu oodoie uri a Aalaha e tahanie oto maa talana asunge ngeena hunie ke lae diana i leune.

Pilipae 4:13

Ko lae urine aena aana nanamanga nge a Kraes e niie hunieu, nge ko haꞌa-aꞌailaꞌaau huni lio oodoie taꞌena nga ola kei reu eeku.

Kolosi 4:3

Omu saie taane uri ineu i laona nume ni hoꞌo siꞌiri aena aana nou lae peꞌi houleꞌinie Tataroha Diana i sulie a Kraes. Taꞌe maꞌalana ineu i nume ni hoꞌo urine, omu ke aare-aarengaꞌi noꞌone talameelu mo oaku uri hunie a God ke niie nga mo maholo diana nameelu huni houleꞌinie a Kraes i saana ngaeta mwala.

1 Timoti 5:8

Mala nga mwane e kaꞌa lio i sulie mo tekihana, liutaa oto mo iini aana uluhe ni iinoni ingeie, nge ko taateingeꞌinie hiiwalaimolinge ingeie ni ngeena, na leune e aaela loꞌu liutaa aana nga taa mo puꞌo kire ko esuie aana kire kaꞌa kele hiiwalaimoli ike aana a God.

2 Timoti 4:7

Na mauringe ineu e urihana noꞌone halinge. Na nou huru diana aana halinge ngeena, aana maꞌalana nga taa e raꞌusieu, taꞌe nou esu diana mola nana a Aalaha. Oto maholo ie nou hule oto aana haꞌamangolana halinge ngeena, aana nou haꞌamangoa oto asunge e niie mai hunieu. Nou hele maꞌutaꞌa aana hiiwalaimolinge toꞌohuu, na nou lae-lae peꞌi haꞌa-uusulilana mwala aana.

Jiud 1:4

No ko ere urine, aena aana ngaeta mwala aaela kire ko sili mumuni mola mai i matolamiu. Mwala ngeena kire sereꞌi deu i sulie walana a God, oto kire oolisie mei wala i sulie manata-diananga ingeie hunikie. Kire ko unue uri aena aana a God e tohungei manata diana hunikie, nge e saꞌa haꞌaloikie ike na kie sai deu taꞌewau mola mala saeka. Oto urine kire ko heitohea taꞌa-taꞌa Poro Paine na Aalaha ikie, a Jisas Kraes. Mo propet kire uusu-uusu i sulie mwala ngeena oto mai waite, na kire unue uri leilada kei lae.

Haataꞌinge 2:13

“Nou saie taane uri omu iiꞌo aana leu nge naunekume a Pwelu Eero-eero e iiꞌo aana, taꞌe maꞌalana e urine omu hele paipesi toꞌohuu aana sataku. I Pegamam nge leu kire horo maesie a Antipas aana, iini e tohungei sai houleꞌinieu. Taꞌe maꞌalana aana maholo aaela urine, na omu kaꞌa toliꞌaasie ike hiiwalaimolinge iꞌomu eeku i matolana mwala aana hanue a Pwelu Eero-eero ngeena.

Haataꞌinge 2:2

“Nou saie taane nga taa omu esuie, na uri omu esu hiitoꞌo nakue, na uri omu hele susuleꞌi aani hiiwalaimolinge aaku. Nou saie noꞌone uri omu leledie mo iini nge ko lae i sulie mo tolahai ola aaela, na uri omu oohongie oto mo iini nge kire ko unue uri ikire mo hurulaꞌaa ineu taꞌe haꞌike mola, na uri omu deu oodoie uri kire ko eero mola.

Haataꞌinge 22:7

Oto nou heꞌi rongoa loꞌu walana a Jisas ko teꞌuri, “Omu ke rongo kaꞌu. E saꞌa tewa na ne kei ooli loꞌu mei. Mo iini nge kire ko tola i sulie walana God e unu lalai eeni i laona uusu-uusu ie, kire ke ilenimwaꞌe mola.”

Haataꞌinge 3:1

Oto a mwaena e heꞌi unue loꞌu hunieu uuri, “O ke uusue oto hunie naꞌohai mwane aana soihaadaꞌinge wau i Sadis uuri. “Ineu nge nou hele aana e hiu Liꞌoa a God na e hiu ho heeꞌu, no ko unue huniꞌomu uuri. “Nou saie taane uri mwala ko unue soihaadaꞌinge iꞌomu e mauri diana. Taꞌe ineu, nou saie mola tolahamiu, uri omu mae oto ni ngeena.

Haataꞌinge 3:10

Oto aena aana omu hele susuleꞌi i sulie haꞌatolanga ineu, nge ineu noꞌone ne kei kinetaꞌiniꞌomu mwaanie maholo ni siꞌohaꞌanga nge ko lae mai huni oohongie ahutana mwala i laona walumalau.

Haataꞌinge 3:15

“Nou saiꞌomu taane na nga taa omu esuie, na nou saie taane uri saemiu e kaꞌa madoro ike aana manata-diananga hunieu, na e kaꞌa wawai ike aana ngiduupunge hunieu. Mala uri saemiu ke madoro hiitoꞌo wa omu ke wawai hiitoꞌo, na e kohi mola aaku.

Haataꞌinge 3:7

Oto a mwaena e heꞌi unue loꞌu hunieu uuri, “O ke uusue oto hunie naꞌohai mwane aana soihaadaꞌinge wau i Piladelpia uuri. “Ineu iini e maaꞌi na e toꞌohuu, nge nou hele aana kii a Deved Inemauri. Mala no ko tahanie taꞌena nga maa hunie nga iini, na nga iini e saꞌa honoa ike loꞌu. Wa mala uri no ko honoa maa hunie nga mo iini, na nga iini e saꞌa tahanie ike loꞌu hunire. Ineu oto ie no ko unue huniꞌomu.