Haataꞌinge 22:5 - Tataroha Diana

⁵ Nga rodohono haꞌike loꞌu taꞌau, na kire saꞌa hari hunie loꞌu nga raa-raa aani dunge wa sato hunie ke raangire, aena aana a God Aalaha oto kei niie raa-raa nada. Na kire kei aalaha mala mo inemauri oto huu.

Haataꞌinge 22:5 ပူးပေါင်းရင်းမြစ်များ

Matiu 19:28

Oto a Jisas ko si unue hunire uuri, “No ko unue oto huniꞌomu uri aana walumalau haalu, maholo ineu a Kale Ni Iinoni ne kei iiꞌo i lengine naunekume ni menikuluꞌanga ineu, iꞌomu mo iini nge omu ko lulu i sulieu, omu kei iiꞌo noꞌone i lengine aawalai neunekume mwana rue huni leie aawalai komu mwana rue mo Israel.

Matiu 25:34

“Oto ineu, a Inemauri, ne ke si unue hunie mo iini oodotaꞌi nge ikire i pwalo-pwaloku uuri, ‘Omu ke lae mai mo iini nge a Mamaꞌa e niie haꞌadianaꞌanga ingeie oto huniꞌomu. Omu ke hele huu oto namiu aana aalahanga nge a Mamaꞌa e dau aakau aana loosiꞌomu, uure oto aana haꞌaholalana walumalau.

Matiu 25:46

Oto a Jisas ko si ere ooreta uuri, “Mwala ngeena haꞌamotaahilada kei lae taraꞌasi oto. Taꞌe mo iini e oodotaꞌi kire kei lae oto i laona maurihe huu.”

Uusu-uusu A Pol Hurula'aa Hunie Mo Rom 5:17

E toꞌohuu taane uri oorahaꞌaanga taꞌa-taꞌa iinoni a Adam, e da uri maenga ko peine haahie ahutana mwala. Taꞌe mei ola nge taꞌa-taꞌa iinoni ngeena a Jisas Kraes e asuie, e paine loꞌu liutaa. Aana maholo a Jisas e mousie nanamanga aana maenga e kaꞌa haꞌa-oodohie mola takalonga i naꞌo ngeena, taꞌe ko da kie ko helesie loꞌu mo haꞌadianaꞌanga paine loꞌu liutaa. I tehulaꞌana a Jisas mone, a God e sapeie loꞌu oodotaꞌinge ingeie hunikie, na e unue kie kei meuri oto huu peꞌie, na kie kei aalaha peꞌie aana nanamanga paine ingeie.

2 Timoti 2:12

Mala uri kie ko iiꞌo susuleꞌi mola aana hiiwalaimolinge maꞌalana kie ko sapesalu, nge kie sai aalaha noꞌone mola peꞌie. Taꞌe mala uri kie ko taateingeꞌinie uri kie kaꞌa saie ike a Kraes, nge ingeie kei taateingeꞌinikie noꞌone uri e kaꞌa saikie.

Haataꞌinge 11:15

Oto hiune nga ensel e uuhie aahuri ingeie, na mo wala paine uure taꞌau i Lengi ko teꞌuri, “A God ikie na iini e lio hilisie hunie ke neꞌie a Haꞌa-uuri, ikire oto kire toꞌo aana nanamanga haahie ahutana walu ola aana walumalau na huni aalaha haahie oto huu.”

Haataꞌinge 20:4

Na nou leesie noꞌone ngaeta mo neunekume, na mo iini kire iiꞌo i lengini kire toꞌo aana nanamanga hunie leinge. Nou leesie noꞌone mangona mo iini nge horoꞌilada e lae oto i naꞌo, aena aana kire tarohaꞌinie a Jisas na walana a God. Kire kaꞌa haꞌapainaꞌaa ike ola loo-looꞌa ngeena wa nunune, na kire kaꞌa toꞌo aana ike haꞌa-ara ingeie i naꞌona darada wa i nimada. Oto kire mauri eelihoꞌi, na kire ko aalaha peꞌie a Kraes hunie sinolai helisi ngeena.

Haataꞌinge 20:6

Deidehie mo iini nge kire taꞌelaꞌi aana eetana nga taꞌelaꞌinge ngeena aana ikire oto kire maaꞌi. Kire saꞌa sapesalu ike i laona dunge ko weru oto huu, nge ruana nga maenga ni ngeena. Taꞌe kire kei neꞌi pris a God na a Kraes, na kire kei aalaha peꞌie a Kraes sulie sinolai helisi.

Haataꞌinge 21:11

Na hanuena e raa aana manikuluhaꞌana a God, na ko wana-wana oto mala nga hau iiro-iiro ola holitana e paine, na mala hau jaspa e mano-manolaꞌa taꞌingelu.

Haataꞌinge 3:21

“Hunie mo iini nge kire kei aꞌailaꞌa taraꞌasi honosie aaelanga, nge ne kei niie nada iiꞌo-iiꞌoha huni iiꞌo peꞌieu i lengine naunekume ineu, mala kaꞌu nou aꞌailaꞌa taraꞌasi na nou iiꞌo oto peꞌinie a Mamaꞌa i lengine naunekume ingeie.