2 Timoti 3:2 - Tataroha Diana

² Mwala kei loꞌo-loꞌongaꞌinire oto mola maraada. Kire kei neꞌi-neꞌisae paine oto hiitoꞌo aana toꞌoha, na kire kei lae-lahera maraada, na kire kei too-toohaꞌinire oto hiitoꞌo. Kire kei talei ere-ere aaela mola, na kire saꞌa totola i sulie ike mo nikada na mo aamada. Kire saꞌa paa-paalahea ike nga iini haahie nga mei ola nge niilana e lae oto hunie, na kire saꞌa loꞌo-loꞌongaꞌinie ike loꞌu a God.

2 Timoti 3:2 ပူးပေါင်းရင်းမြစ်များ

Matiu 15:6

urine ke suꞌuri haꞌamaꞌu loꞌu aana aamana na nikana peꞌie niilana mei olana hunire. Aena aana omu ko lae oto i sulie tolahamiu urine, nge omu ko mwakataꞌinie mola walana God eena.

Tataroha Diana I Sulie A Jisas Kraes Nge A Luk E Uusue 12:15

Na a Jisas ko heꞌi lae loꞌu peꞌi erenga uurini hunie ahutada, “Omu ke lio talamiu na omu ke kinetaꞌiniꞌomu mwaanie taꞌena nga saehanalinge. Aana tohungana maurihaꞌana iinoni e kaꞌa lae ike i sulie nga taa nge iinoni e toꞌo aana, maꞌalana iinoni ngeena ke toꞌo-toꞌo loꞌu uri taa.”

Tataroha Diana I Sulie A Jisas Kraes Nge A Luk E Uusue 16:14

Na maholo mo Parise kire rongoa walu ola ienini, oto kire ko si haꞌamwasi mola aana a Jisas, i sulie ikire ngeena mwala e neꞌisae paine aana toꞌoha oto liutaa.

Tataroha Diana I Sulie A Jisas Kraes Nge A Luk E Uusue 6:35

!Taꞌe haꞌike! Omu ke manata diana hunie mo maelonga iꞌomu na omu ke dau diana hunire. Omu ke nii-nii na omu ke suꞌuri loꞌongaꞌinie loꞌu suꞌuleni eelihoꞌi huniꞌomu. Mala uri omu kei teꞌurine nge waaitemiu ke si peine loꞌu liutaa, na omu ke si neꞌi kalena God, iini e paine liutaa. Aana ingeie noꞌone hule aana e diana hunie mo iini e oorahaꞌaala na mo iini kaꞌa sai paalahea.

Palonga 5:36

Omu saie oto aana mo helisi e mango, a Tiudas e unue uri ingeie ngaeta naꞌohai mwane, oto lae-lae hai tangalai mwane ko lae loꞌu mei peꞌie. Taꞌe mae ni Rom kire horoꞌie, oto mo mwane ingeie kire tatanga hailiu mola na hari-huninge ingeie e kaꞌa oa ike.

Uusu-uusu A Pol Hurula'aa Hunie Mo Rom 11:18

Aana urine, mwaanie omu mwa-mwaka aana mo sasarai ola a God e taꞌaasiꞌi ngeena. Mwaanie omu ere toohaꞌiniꞌomu, aena aana iꞌomu, omu saꞌa roroꞌa niie ike mauringe hunie imi-imine ai diana ngeena, taꞌe imi-imi ola ngeena nge e sai niie mauringe namiu.

2 Korinit 5:15

Na a Kraes e mae toꞌohuu huni peꞌie ahutana mo iinoni, uri hunie ahutaka mo iini kie toꞌo aana maurihe haalu kie ke suꞌuri lae loꞌu i sulie mo loꞌongaꞌinge ikie maraaka, taꞌe hunie kie ke lulu i sulie mola a Kraes, iini e mae kaꞌu na e taꞌelaꞌi eelihoꞌi loꞌu i tehulaꞌaka.

Pilipae 2:21

Mo iini hunge, kire ko talei loꞌo-loꞌongaꞌinire mola maraada, na kire saꞌa loꞌohie ike mo ola i sulie tolahana a Jisas Kraes.

Kolosi 3:5

Aena urine, omu ke horo aasie oto ahutana mo neꞌisaenga aaela mwaanie maurihaꞌamiu mala masinge, na dau-olanga taꞌe wau peꞌie nga iini, na hari-huninge ni sape, na saehanalilana mo ola aaela. Na omu ke suꞌuri saehanalie toꞌolana ngaeta mwala, aena aana palolana mo god eero-eero ni ngeena.

2 Tesalonaeka 2:4

Mwane tataꞌala ngeena kei ere aaelasie ahutana mo god na taꞌena nga ola nge mwala ko palo-paloa. Na kei haꞌapainaꞌaa maraana uri hunie ke paine loꞌu liutaa aana taꞌena nga ola, na hule aana kei lae iiꞌo i laona Nume Maaꞌi Peine a God na ni unue uri ingeie oto a God.

1 Timoti 1:20

A Haemeneas na a Aleksanda ikirerue e ro iini aana mwala urine nge hiiwalaimolinge ikire e aaela taꞌingelu mala haka e aape. Oto nou toliꞌaasirerue oto hunie a Pwelu Eero-eero, uri hunie kirerue ke lio saie nga taa kei reu aana mo iini kire ko sare ere mwakataꞌinie a God.

1 Timoti 1:9

Na kie saie taane noꞌone uri mo Haꞌatolanga ngeena kire kaꞌa iiꞌo ike huni haꞌa-oodohie mwala diana, taꞌe huni haꞌa-oodohie mo iini nge kire ko deu aaelasie mo Haꞌatolanga na kire ko deu roroꞌanga mola tarau. Haꞌatolanga oto ola huni haꞌa-oodohie mo iini nge kire sereꞌinie a God na kire iiꞌo mola peꞌie oorahaꞌaanga na kire ko ere mwakataꞌinie mola a God na taꞌena nga ola maaꞌi. Na Haꞌatolanga ola noꞌone huni haꞌa-oodohie mo iini ko horoꞌie mo aamada na mo nikada na taꞌena nga iinoni loꞌu.

1 Timoti 3:3

Iinonine ke suꞌuri inu-inu wei ni pweunge oto hiitoꞌo hunie ke mahiri. Na mwane ngeena ke suꞌuri neꞌi iinoni hai-heiseuni, taꞌe ke maneko, na ke saetoꞌo aana hanuelamanga i matolana mwala, na ke suꞌuri sae-saehanalie toꞌoha.

1 Timoti 6:10

Na saehanalilana toꞌoha oto aahuꞌine taꞌena nga aaelanga. Na ngaeta mo iinoni kire toliꞌaasie oto hiiwalaimolinge ikire aena aana kire ko saehanalie mola uri toꞌo-toꞌolada ke paine loꞌu liutaa. Taꞌe aana kire ko teꞌurine, nge kire ko si esuie mola mo saehuunge ikire ko peine loꞌu liutaa.

1 Timoti 6:4

Iinoni nge ko haꞌa-uusuli aaopa urine e honu mola aana toohaꞌinge na e kaꞌa saie ike nga mei ola. Neꞌisaenga ingeie e rodohono mola, na ingeie e iiꞌo oto mola peꞌie haꞌa-erenga haahie taꞌena nga ola. Oto leune ko si da mola mwala ko esuie walu ola aaela mala saehanalilana toꞌo-toꞌolana ngaeta iini, na haiseuninge, na ere-aaelasilana ngaeta iini, na heotaꞌinge.

2 Timoti 3:4

Maꞌalana mo malahude, taꞌe kire kei pwelora mola, na kire saꞌa holaꞌi loꞌongaꞌi keꞌu i sulie taꞌena nga ola kire ko sare asuie, na kire kei too-toohaꞌinire oto e pulo. Kire kei saetoꞌo aana mola mo ola nge ko da kire ke hii diana, taꞌe kire kaꞌa saetoꞌo aana ike a God.

Jemes 2:8

Taꞌe mala omu ko hele i sulie haꞌatolanga a Inemauri ikie aana mo Uusu-uusu Maaꞌi, nge e unue uuri, O ke manata diana hunie mo iinoni mala o ko manata diana huniꞌo mola maraamu, Levitikas 19:18 nge urine haꞌalaa omu ko deu oodo.

Jemes 4:16

Taꞌe ie omu ko haꞌapainaꞌaꞌomu mola maraamiu, na omu ko si ere toohaꞌiniꞌomu mola. Na mo toohaꞌinge urine e tohungei aaela.

Jemes 4:6

Taꞌe niinge aana hahuꞌana manata-diananga a God e paine liutaa aana aaelanga iinoni. Sulie e sai tola konie mo iini ko oonisae, oto mala mo Uusu-uusu Maaꞌi nge e unue uuri, A God e taꞌelaꞌi honosie mo iini kire ko toohaꞌinire, taꞌe e hahuꞌei manata diana hunie mo iini ko haꞌamwai-mweiꞌara. Provebs 3:34

1 Pita 5:5

Oto loꞌu huniꞌomu mo saanau, omu ke totola i sulie mo rato. Na oto ahutemiu, omu ke mani haꞌamwai-mweiꞌaꞌomu na omu ke peꞌi-peꞌiꞌomu heiliu. Aana mo Uusu-uusu Maaꞌi e unue uri, A God e kaꞌa saetoꞌo aana ike iini ko too-toohaꞌinie maraana, taꞌe ko haa-haataꞌinie manata-diananga ingeie hunie mo iini ko haꞌamwai-mweiꞌara. Provebs 3:34

2 Pita 2:10

Na a God kei lei aaelasie oto liutaa mo iini kire iiꞌo ni deu aaela oto mola i sulie saeda maraada na kire ko mwakataꞌinie mola nanamanga a God. Mo haꞌa-uusuli eero-eero ngeena ko tohungei toohaꞌinire mola maraada, hule aana kire kaꞌa sai haꞌamaꞌu ike aana mo ensel taꞌau i Lengi, taꞌe kire ko talei ere aaelasire oto mola.

2 Pita 2:12

Taꞌe mo haꞌa-uusuli eero-eero ngeena, kire urihana mola mo ola loo-looꞌa ni meꞌesu nge kire kaꞌa sai loꞌongaꞌinie ike nga mei ola, na e adona mola horo-aasileni ke lae. Kire sai ere aaelasie mola mo ola nge kire kaꞌa sai diana aani ike, taꞌe lae-lae mo ola aaela kire ko esuiꞌi ngeena kei eeliꞌu na kei heꞌi waelire loꞌu.

2 Pita 2:18

Kire sai haꞌa-olaa mwala mola hunie aaelanga peꞌie mo wala mwaakule ni toohaꞌinge, aana kire ko unu-unue uri e diana mola huni deu i sulie mo heri-huninge aana sape. Na urine kire ko weꞌi eelihoꞌi mola aana mwala nge kire ko si aehota huni lae i sulie tala oodo mwaanie mo tolahai ola aaela ngeena.

2 Pita 2:3

Na aena aana mo haꞌa-uusuli eero-eero ngeena kire ko heri hunie mone mola toꞌoha, oto kire kei da taꞌena nga haꞌa-uusulinge eero-eero mola huni weꞌinie mola mo toꞌoha iꞌomu. Taꞌe a God e kaꞌa sai maꞌahu ike, oto e leesie mola mo tolahai ola aaela ikire, na kei haro haꞌaloire taane. E pwani leie oto mo tolahai ola urine, na leilada e iiꞌo aakau oto loosire uure mai waite.

Jiud 1:16

Mwala ngeena kire sai upwe mola tarau, na kire ko haro iꞌie mola ahutana ola, na kire ko lae oto mola i sulie mo loꞌongaꞌinge aaela ikire maraada. Kire ko ere toohaꞌinire mola, na maholo kire ko lahea nga iini, kire ko eeroa mola hunie hari-huninge ikire maraada ke oa.

Haataꞌinge 13:1

Oto nou heꞌi leesie loꞌu ola loo-looꞌa nge e horo maesie e ro propet ngeena e maau poi mwaanie aasi. E toꞌo aana aawalai rarangoi ola na e hiu pwaꞌui ola aana. Mo rarangoi ola aana ngeena kire mani toꞌo rorodara mango. Na mo pwaꞌui ola aana kire mani toꞌo aana mo satai ola huni ere mwakataꞌinie a God.

Haataꞌinge 16:11

na kire ko ere aaelasie oto a God taꞌau i Lengi aena kire ko hii aaela aana mo osa na aana sapesalunge ikire, taꞌe kire kaꞌa sare oolisie mola manatada mwaanie aaelanga kire ko esuie.

Haataꞌinge 16:21

Na mo uudu-uuduhe aani nemo e pou mala hau taꞌi salo, kire ko teke oto mai aano haahie mwala. Na mo heu nge kire ko teke ngeena kire tohungei peine na kire hiꞌe oto hiitoꞌo, hule aana lime aawalai kilo aana nga hue. Oto maholo urine mwala ko isi aaelasie mola a God aana walu ola ko reu ngeena, aena aana kire tohungei aaela oto hiitoꞌo.

Haataꞌinge 16:9

Oto sapeda e waru aana madorohaꞌana sato e madoro oto hiitoꞌo. Oto kire ko si ere waelie satana God, iini nge e nanama haahie mo huꞌi-huꞌite aaela ngeena. Taꞌe kire sereꞌi oolisie manatada na tolahada huni eeliꞌu takoie a God na huni soi haꞌamanikuluꞌaa.