2 Pita 3:7 - Tataroha Diana

⁷ Oto aana taꞌa-taꞌa mei wala a God noꞌone mola, nge salo na aano huu kire iiꞌo siꞌiri, na nanamanga aana walana mola nge ko hele aadarue loosie Dinge Ni Leinge. Aana maholona dunge kei lae mai huni weru suuheꞌinie walumalau na ahutana mo iinoni nge kire kaꞌa manataꞌinie ike a God.

2 Pita 3:7 ပူးပေါင်းရင်းမြစ်များ

Matiu 10:15

No ko unue oto huniꞌomu, aana dinge ni leinge, haꞌaloilana mwala aana huilume ngeena kei aaela loꞌu hiitoꞌo liutaa aana haꞌaloinge nge kei lae hunie mwala tataꞌala aana e ro huilume i Sodom na i Komora.”

Matiu 11:22

No ko unue oto huniꞌomu uri aana dinge ni leinge a God kei aamasie mo iinoni tataꞌala i Taea na i Saedon loꞌu liutaa aamiu.

Matiu 11:24

No ko unue oto huniꞌomu uri aana dinge ni leinge haꞌamotaahilemiu kei lae loꞌu liutaa aana i Sodom.”

Matiu 12:36

“No ko unue oto huniꞌomu uri aana dinge ni leinge taꞌena nga mei wala oto mola mo iinoni ko talei unu-unue, iidumileni kei lae.

Matiu 24:35

I Lengi na i aano kei suu, taꞌe walaku e saꞌa suu ike oto ooꞌoo.”

Matiu 25:41

“Oto ne ke si unue loꞌu hunie mo iini i meu-meuliku uuri, ‘Omu ke tahi mwaanieu, mo iini nge omu iiꞌo oto loosie haꞌamotaahinge a God. Omu ke tahi i laona dunge nge ko weru tarau mola, na e saꞌa mwaꞌa loꞌu. Dunge ngeena dau aakaulana e lae oto hunie a Satan na mo liꞌoa aaela ingeie.

Tataroha Diana I Sulie A Jisas Kraes Nge A Mak E Uusue 6:11

Mala uri nga hanue omu ko lai aarapuu aana na mwala kaꞌa soi koniꞌomu, wa kire ke sare rongo huniꞌomu, nge omu ke lae mwaanie hanuena, na omu ke tataaꞌinie mo wasa-wasa mwaanie aeꞌaemiu, domana uri nga haꞌapasunge hunire uri a God kei haꞌaloire.”

Tataroha Diana I Sulie A Jisas Kraes Nge A Jon E Uusue 12:48

Nga mei ola huni leie mo iinoni e iiꞌo taane. Mo iini kire kaꞌa sare hiiwalaimoli eeku, na kire kaꞌa sare rongo hunie walaku, nge mo wala nge no ko unu-unuꞌi ngeena, kire ke si lei mae aana mwala urine aana dinge ooreta.

Uusu-uusu A Pol Hurula'aa Hunie Mo Rom 2:5

Taꞌe saemiu e hau mola hule aana omu kaꞌa sare oonisae loꞌu mwaanie mo takalonga iꞌomu. Oto aena leune omu ko si da mola haꞌaloilemiu ke paine oto loꞌu aana hai dinge nge a God kei haataꞌinie saewasunge ingeie haahie tataꞌalanga mo iinoni. Na maholo nge a God kei leie taꞌena nga iinoni, nge ahutana mwala ke si leesie oodotaꞌinge ingeie.

1 Korinit 3:13

Taꞌe aana hai dinge ooreta, dunge kei haataꞌinie mo taungei esunge hai aaopaꞌi nge mwala e asuiꞌi, ohe kire diana taane wa haꞌike.

Pilipae 1:28

Omu ke suꞌuri meꞌuteꞌinie mo maelonga iꞌomu, taꞌe omu ke uure aꞌailaꞌa, hunie ke haataꞌinie aada uri a God ni kei haꞌa-uuriꞌomu, na kei haꞌaloire.

2 Tesalonaeka 2:3

Omu ke suꞌuri toliꞌaasie nga iini ke eeroꞌomu urine, aena aana dinge ooreta e saꞌa talei reu ike mola maraana. !Haꞌike! Taꞌe ngaeta mo ola kei holaꞌi reu. Mwala oto hunge kei haro ooho honosie a God, na loꞌu nga mwane e tataꞌala oto liutaa kei holaꞌi lae noꞌone mai huni heli peꞌie a God. Taꞌe a God kei tohungei haꞌaloie oto hiitoꞌo.

1 Timoti 6:9

Mo iini nge kire ko heri hunie kire ke toꞌo-toꞌo, kire ko da mola malaahonga hunire maraada ni ngeena. Kire kei pola oto peꞌie pwanu, aani loꞌongaꞌinge mweꞌu-mweꞌule mola nge kire sai waelire mola maraada.

Hibru 12:29

Aana God ikie ngeena e urihana dunge nge e sai weru suuheꞌinie taꞌena nga ola.

2 Pita 2:9

Oto urine kie sai leesie uri mo iini kire ko esu nana a God maꞌalana ko aasa uri taa, taꞌe a God e sai haꞌa-uurire mola mwaanie mo siꞌohaꞌanga ikire. Na a God e sai hele aakau aana haꞌaloinge hunie mo iini tataꞌala loosie Dinge Ni Leinge.

2 Pita 3:10

Taꞌe hai dinge Aalaha ikie kei ooli loꞌu mei, hai dinge ngeena kei lae mai mola mala iinoni peli-peli aana kie saꞌa manataꞌinie ike maholo kei lae mai wa kie ke loꞌongaꞌinie. Na aana hai dingena, painehaꞌana kou-kouhaꞌa oto paine kei reu uure mai taꞌau i Lengi na salo kei eiꞌaa oto. Na dunge oto paine kei ngaa oto ahutana walu ola taꞌau i salo hule aana kire kei meni aaela mango oto. Na walumalau ngeena oto peꞌie walu ola aana, kire kei meni eiꞌaa oto.

2 Pita 3:12

Na maholo omu ko lae peꞌi maaꞌoohie hai dinge paine a God ngeena, omu ke asu waaꞌiniꞌini hunie hai dingena ke hule lau-leu. Aana hai dinge ngeena, dunge kei ngaa salo lai hule aana kei aano talihu oto, na walu ola aana haꞌaholanga dunge kei madorohiꞌi hule aana kire kei aahe mango.

1 Jon 4:17

Na mala uri manata-diananga ingeie ke tohungei eehu diana oto i lalo aaka urine, na iiꞌolaka mai welumalau ke urihana tolahana a Kraes, nge kie saꞌa maꞌuteꞌinie ike uuranga i naꞌona God aana hai dinge ni leinge.

Jiud 1:7

Omu ke aama-aamasitoꞌo noꞌone aana e ro huilume i Sodom na i Komora na mo huilume loꞌu kali-kelirerue. Mala uri mo ensel ngeena kire lae aaopa mwaanie neꞌisaenga a God hunire, nge mwala aana mo henuena kire lae aaopa noꞌone aana kire toliꞌaasire oto mola hunie aeni-olanga, na hule aana aeni-olanga tataꞌala peꞌie mo mwane mala ikire. Oto kire sapesalu aana haꞌaloilada e lae aana dunge mala nga tolimaa hunie ahutaka kie ke mani lee-leesie.

Haataꞌinge 17:11

Na ola loo-looꞌa nge e mauri keꞌu waite taꞌe e aiꞌaa oto ie, ingeie nge walune nga inemauri, taꞌe ingeie nga ola mola aana e hiu inemauri holaꞌinaꞌo, na kei lae mola i sulie tala takoie haꞌamangolana.

Haataꞌinge 17:8

“Oto o ke saie uri ola loo-looꞌa ngeena, ingeie iini e mauri keꞌu waite, taꞌe ie e aiꞌaa oto. Kei maau taane poi mwaanie kalinge ni haꞌamotaahinge ngeena, taꞌe kei lae mola i sulie tala takoie haꞌamangolana. Mwala aana walumalau kei tohungei pangataꞌinie aana maholo kire kei leesie uri e mauri loꞌu, aena aana e mauri keꞌu waite, na e aiꞌaa oto ie, na kei heꞌi meuri loꞌu. Mwala nge kei pangataꞌinie mo iini mola nge uusulana satada e kaꞌa lae ike i laona uusu-uusu ni meurihe uure oto wau aana aehotalana walumalau.”

Haataꞌinge 20:11

Oto nou leesie a God e iiꞌo i lengine naunekume rereꞌa oto paine. Na e lio mala uri walumalau na salo kire tahi mwaanie, na nga leu huni lio oodoiꞌi haꞌike loꞌu.

Haataꞌinge 21:1

Oto nou heꞌi leesie loꞌu walumalau haalu, taꞌe nga aasi haꞌike loꞌu i laona, na salo e haalu noꞌone. Aana walumalau lalahuꞌe peꞌie salo na aasi i laona, kire mani eiꞌaa mango oto.