2 Pita 1:8 - Tataroha Diana

⁸ Mala uri mo tolahai ola diana urine ke pai-peine i lalo aana mau-meuringe iꞌomu, nge omu ke si lae diana eena. Na omu sai eehu eeni hue-huei ola diana i lalo aana mau-meuringe iꞌomu aana omu manataꞌinie oto a Jisas Kraes Aalaha ikie.

2 Pita 1:8 ပူးပေါင်းရင်းမြစ်များ

Matiu 13:22

Nga mo iini loꞌu manatada e urihana mei mwakano e honu aana walo kau-keu ngeena, kire rongoa noꞌone walana God, taꞌe kire neꞌisae painesie mola mau-meuringe aana walumalau. Kire tolahiꞌe, na kire saetoꞌo aana mola toꞌo-toꞌonga, na kire ko saehanalie taꞌena nga ola. Oto mo wala diana ngeena kire kaꞌa pwito kohi, na kire kaꞌa hungu ike loꞌu.

Matiu 20:3

“Aana siwana nga maholoi sato aana aapa i hoꞌowa, e tapaliu na ko leesie ngaeta mwala kire uure mola mwaakule aana leu ni uusiꞌe.

Matiu 20:6

“Oto maholo ko karaꞌinie limana nga maholoi sato i seulehi, e lai liu loꞌu i saana leu ni uusiꞌe na ko leesie ngaeta mwala kire uure mola mwaakule. Oto ko dolosi loꞌu aada uuri, ‘?E ue omu ko talei uure-uure oto mola mwaakule hunie hai dinge laku urine?’

Matiu 25:26

“Oto aalaha ingeie e aalamie ko teꞌuri, ‘Iꞌoe oto mwane auꞌesu aaela na o tohungei lalawaꞌa. O unue uri nou sai soꞌokonie mo ola nou kaꞌa hasiꞌi.

Tataroha Diana I Sulie A Jisas Kraes Nge A Jon E Uusue 15:2

Ingeie oto ko taꞌaasie taꞌena nga sasarai ola aaku nge e kaꞌa hungu ike aani hue-huei ola. Na aana ko lio i suli diana aana hohola ingeie, nge mo sasarai ola kire ko hungu eeni hue-huei ola diana, ingeie ko si olo aasie taꞌena nga aaelanga mwaaniꞌi hunie kire ke rereꞌa na ke hungu oto loꞌu hiitoꞌo.

Tataroha Diana I Sulie A Jisas Kraes Nge A Jon E Uusue 17:3

Na loꞌongaꞌinge aana maurihe huu ngeena, uri hunie mwala ke sai diana aamu, taꞌa-taꞌa God oto toꞌohuu, na uri kire ke saieu noꞌone, a Jisas Kraes, iini o uusungeꞌinie mai.

Tataroha Diana I Sulie A Jisas Kraes Nge A Jon E Uusue 5:42

aana nou sai diana aana mola tolahamiu aana uri nga kele mei manata-diananga hunie a God haꞌike loꞌu i manatamiu.

Uusu-uusu A Pol Hurula'aa Hunie Mo Rom 12:11

Omu ke suꞌuri lalawa, taꞌe omu ke asu aꞌailaꞌa mola i suli maholo, na omu ke toliꞌaasie ahutana maurihaꞌamiu ke aꞌailaꞌa aani esunge nana Aalaha.

1 Korinit 15:58

Aena urinena, maeni eesiku maaꞌi, omu ke uure maꞌutaꞌa mola na omu ke suꞌuri esu oolo-oolo. Omu ke asu susuleꞌi mola nana Aalaha ikie. Aana omu saie oto uri nga taꞌa-taꞌa mei ola omu ko euꞌesuie nana Aalaha, e saꞌa mango ike mola mwaakule.

2 Korinit 13:5

Omu ke lio-lio diana talamiu na omu ke leiꞌomu maraamiu. Omu ke leie tolahamiu maraamiu huni leesie uri ohe omu ko lulu i sulie tala aana hiiwalaimolinge toꞌohuu taane wa haꞌike. Mala uri omu kaꞌa sai leesie ike tolahana a Jisas Kraes i lalo aamiu, nge omu kaꞌa sai diana aana ike a Kraes kaꞌune.

2 Korinit 8:2

Oohongilada e lae kaꞌu aana mo aasanga oto paine e hite aada, na kire maitale oto hiitoꞌo. Taꞌe maꞌalana e urine, ilenimwaꞌenga ikire e paine oto liutaa hule aana kire ko sare nii huni peꞌie ngaeta mwala.

2 Korinit 8:7

Iꞌomu, omu ko hele diana aana oto ahutana tolahai ola diana. Hiiwalaimolinge iꞌomu e susu oto, na omu tohungei saenanau i sulie tolahana a Jisas, na omu sai haꞌa-uusuli aana mo ola urine. Oto tarau omu mwaꞌe-mwaꞌe huni peꞌi-peꞌie mo iinoni, na manata-diananga iꞌomu huniꞌemeelu e paine. Oto melu saetoꞌo aana uri omu ke aꞌailaꞌa noꞌone aana tolaha ni niinge peꞌie manata-diananga.

2 Korinit 9:14

Oto kire kei aarengaꞌi talamiu peꞌi manata-diananga huniꞌomu, aena aana omu haataꞌinie hahuꞌana manata-diananga a God hunire.

Pilipae 1:9

Na no ko eitanaie a God talamiu hunie manata-diananga iꞌomu ke paine loꞌu liutaa, na omu ke honu eeni saenanaunge hunie lio sai-olanga diana.

Pilipae 2:5

Tolahamiu na ahutana loꞌongaꞌinge iꞌomu ke mani sada oto mala loꞌongaꞌinge na tolahana a Kraes.

Pilipae 3:8

Na e kaꞌa ike taꞌe mola mo ola ie. Ineu nou loꞌongaꞌinie uri ahutana oto taꞌe-taꞌena nga ola nou esuiꞌi oto i naꞌo, toliꞌaasileni kei lae mango, hunie ne ke hele aana mo tohungei ola diana aana tolahana Aalaha ineu a Jisas Kraes. Oto aena aana no ko lulu i sulie oto a Kraes, no ko toliꞌaasie oto ahutana walu ola mango i eelitehu,

Kolosi 1:10

Melu ko eiꞌeitanai urine hunie omu ke iiꞌo oto aana tolahai ola e malisine mo iinoni maaꞌi a Aalaha, na hunie asunge iꞌomu ke toꞌohie saena a God. Urine nge omu ke si haꞌahungeꞌaa loꞌu taꞌena nga asunge diana, na omu ke sai diana aana a God.

Kolosi 2:7

Omu ke iiꞌo susu oto i lalo aana Kraes mala nga ai imi-imine e susu i aano. Na hiiwalaimolinge iꞌomu ke susu na ke aatosara loꞌu aana mo ola nge haꞌa-uusulilemiu e lae aani, na omu ke paa-paalahea God taraureꞌi suli maholo.

Kolosi 3:16

Omu ke iiꞌo diana hunie haꞌa-uusulinge a Kraes ke haataꞌi aana taꞌena nga ola omu ko esuie. Oto maholo omu ko haꞌa-uusuliꞌomu heiliu wa omu ko haꞌasaie nga iini, taꞌe saenanaunge ingeie ke si haataꞌi i leune. Na omu ke paalahea God aana ahutana saemiu aani kanalilana mo kananga aana Uusu-uusu Maaꞌi, na mo kananga maaꞌi lalahuꞌe, na mo kananga haalu nge Liꞌoa Maaꞌi ko niiꞌi mei hunikie.

1 Tesalonaeka 3:12

Saemeelu uri a Aalaha ke da manata-diananga iꞌomu ngeena ke aꞌailaꞌa huniꞌomu heiliu na hunie taꞌena nga iinoni loꞌu, mala manata-diananga iꞌemeelu huniꞌomu e paine loꞌu liutaa.

1 Tesalonaeka 4:1

Oto leu ooreta, maeni eesiku maaꞌi, melu haꞌananauꞌomu oto aana tala omu kei lulu i sulie hunie uri a God ke saemango haahiꞌomu, na omu ko lulu i sulie taane oto tala ngeena. Taꞌe aana satana Aalaha ikie a Jisas, melu ko eitanaiꞌomu loꞌu uri hunie omu ke tohungei lulu i suli diana aana loꞌu liutaa.

2 Tesalonaeka 1:3

Maeni eesiku maaꞌi, melu ko paalahea God mola tarau haahiꞌomu. Na e diana hunie melu ke asuie urine, aana hiiwalaimolinge iꞌomu ko peine aꞌailaꞌa mola i suli maholo, na manata-diananga nge omu toꞌo aana huniꞌomu heiliu ko lae peꞌi peine noꞌone loꞌu tarau.

1 Timoti 5:13

Na loꞌu kire kei lalawasie mola asunge na kire kei talei waetaꞌinie mola maholo ikire aani walo liunge mola i sulie mo nume. Na e kaꞌa taꞌe ike mola waetaꞌinilana maholo ikire, taꞌe peꞌi sihoai-olanga na kire kei oho dauhe mola aana mo esunge diana ngaeta mwala loꞌu aani unulana mola mo ola kire kaꞌa malisi.

Taetas 3:14

O ke haꞌaninaa mwala aana soihaadaꞌinge hunie kire ke mwaꞌe-mwaꞌe ni esuie mo ola diana huni peꞌi-peꞌie ngaeta mwala, na mwaanie kire lalawa huni esuie mo ola diana.

Pilimon 1:6

Na no ko aarea God uri o ke asu hiitoꞌo aana haꞌarongolana mwala i sulie a Jisas hunie ikire noꞌone kire ke hiiwalaimoli aana. Na aana o kei esu urine, nge o ke si saenanau oto hiitoꞌo loꞌu i sulie ahutana mo haꞌadianaꞌanga nge a God ko nii-niiꞌi mei hunikie aena kie lado oto peꞌie a Kraes.

Hibru 6:12

Mwaanie omu lalawa ni esu, taꞌe saeku uri omu ke uusulie mo iini kire hiiwalaimoli aana a God oto wau i naꞌo, aana kire iiꞌo peꞌi maaꞌoohinge susutoꞌo oto mola, nge kire si helesie nga taa nge a God e haiholotaꞌi huni niie hunire.

2 Pita 1:2

No ko eitanaie a God uri hahuꞌana manata-diananga na hanuelamanga ingeie ke iiꞌo peꞌiꞌomu maholo omu ko pei-peine i lalo aana sai-olanga a God na Aalaha ikie a Jisas.

2 Pita 1:3

A God e niie taꞌe-taꞌena nga ola e ado hunikie hunie kie ke malisine iiꞌonga oodotaꞌi oto mala e saetoꞌo aana. Nanamanga a God e da ahutana walu ola ngeena hunikie aana e soikie mai i saana hunie kie ke tohungei sai diana aana, na hunie kie ke toꞌo aana noꞌone manikuluhaꞌana na mauringe diana ingeie.

2 Pita 2:20

Mala uri mwala ke sai diana aana a Jisas Kraes Aalaha ikie, haꞌalaa kire sai iiꞌo luhetaꞌi mola mwaanie mo tolahai ola aaela aana walumalau ie. Taꞌe mala uri kire kei ooli loꞌu takoie mo tolahai ola aaela ngeena, nge mauringe ikire ke si aaela oto mwaanie holaꞌinaꞌo eena.

2 Pita 3:18

Taꞌe omu ke pai-peine taraꞌasi mola i lalo aana manata-diananga na sai-olanga hunie Aalaha ikie na a Haꞌa-uuritaka, a Jisas Kraes. Nge manikuluꞌanga ingeie e saꞌa mango oto ooꞌoo. Ke urine oto.