2 Korinit 6:8 - Tataroha Diana

⁸ Melu ko esu nana God maꞌalana mwala ko haꞌamaꞌu aameelu wa kire ko haꞌamasaꞌemeelu mola, maꞌalana kire ko laheꞌemeelu wa kire ko haꞌamwasi mola aameelu. Ngaeta mwala kire ko haaraꞌi haꞌa-uusuli eero-eero mola aameelu, taꞌe maꞌalana ke urine loꞌu, iꞌemeelu, melu ko lae peꞌi haꞌa-uusuli taane aana walaimolinge.

2 Korinit 6:8 ပူးပေါင်းရင်းမြစ်များ

Matiu 10:25

E malisine uri tolahana pwaarongoisuli ke urihana oto haꞌa-uusuli ingeie, na koni-konihe ke urihana oto aalaha ingeie. Ineu oto pwaune nume ikolu, na oto mala mwala ko haaraꞌinieu aana naꞌohana mo liꞌoa aaela, iꞌomu, mwala aana nume kire ke si haaraꞌi aaelasiꞌomu loꞌu liutaa.

Matiu 22:16

Oto kire ere tararuru peꞌie pulitaa a Herod Inemauri, na kire ko uusungeꞌinie taꞌau mo pwaarongoisuli ikire i saana a Jisas peꞌie ngaeta mo mwane aana poꞌo ni mwane a Herod. Oto mo mwaena kire ko unue hunie a Jisas uuri, “Haꞌa-uusuli, melu saie uri walaimolinge ni oto o ko unu-unuena, aana o ko haꞌa-uusuli i sulie hari-huninge a God hunie mo iinoni. Oto o kaꞌa aapwasu ike aana nga taa mwala ko loꞌo-loꞌongaꞌinie, aena aana o kaꞌa lio ike hunie maana mo iinoni.

Matiu 27:63

Oto kire ko teꞌuri hunie, “Mwane Ouꞌou, melu ko si aamasitoꞌo aana nga taa mwane eero-eero ngeena e unue na e mauri ue aana e teꞌuri, ‘I purine oolu hei dinge ne kei taꞌelaꞌi loꞌu.’

Tataroha Diana I Sulie A Jisas Kraes Nge A Mak E Uusue 12:14

Kire lae mai saana a Jisas, oto kire ko teꞌuri, “Haꞌa-uusuli melu saie uri walaimolinge ni oto o ko unu-unuena. Oto o kaꞌa aapwasu ike aana nga taa mwala aaopa ko loꞌo-loꞌongaꞌinie aena aana o kaꞌa lio ike hunie maana mo iinoni, taꞌe o ko haꞌa-uusuli mola i sulie hari-huninge a God hunie mo iinoni. Oto o ke unue oodoiꞌemeelu. ?Uri e adona taane huni niie takis hunie aalahanga ni Rom wa haꞌike?”

Tataroha Diana I Sulie A Jisas Kraes Nge A Jon E Uusue 7:12

Mwala oto hunge ikire taꞌau i leune, na mo iini hunge aada ko talei kele sasawaru taane hailiu hunire i sulie a Jisas uuri, “Ingeie mwane diana ni ngeena.” Ngaeta mwala kire ko ere oolisire uuri, “Haꞌike, aana ko eeroa mola mwala.”

Palonga 10:22

Oto ngaeta iini aadaelu ko teꞌuri hunie, “A Konilias nge e uusungeꞌiniꞌemeelu mei ie, ingeie poro paine haahie mae. Na ingeie mwane e oodotaꞌi, na ko palo-paloa noꞌone a God, na ahutana mwala ni Jiu kire tohungei haꞌamaꞌu aana. Na ngaeta ensel a God e unue hunie ke unue huniꞌo uri o ke lae kaꞌu weu i nume ingeie hunie ke rongoa nga taa o kei unue hunie.”

Palonga 16:39

Oto kire lae mai saana a Pol na Saelas, kire ko si unue saehuunge ikire hunirerue, na kire ko haꞌa-iisitaangaꞌinirerue oto mwaanie nume ni hoꞌo, na kire ko eitanairerue uri kirerue ke lae mwa-mwanoto mola mwaanie huilume.

Palonga 22:12

Oto nga mwane satana a Ananaeas e lae mai seeku. Ingeie ko tohungei lulu i sulie mo Haꞌatolanga a Moses, na ahutana mo Jiu nge kire iiꞌo wau i Damaskas kire tohungei haꞌamaꞌu aana.

Palonga 24:5

“Melu lio saie a mwane ie, ingeie nga mwane oto huni esuie aaelanga tarau, na ko esuie haꞌa-erenga i matolana mo Jiu aana taꞌena nga leu aana walumalau. Na ingeie ngaeta naꞌohai mwane aana pulitaa a Jisas ni Nasaret.

Palonga 28:22

Na melu ko tohungei sare rongoa loꞌongaꞌinge iꞌoe sulie mwala aana taꞌena nga leu kire ko tohungei ere aaelasie hiiwalaimolinge aaopa ngeena.”

Palonga 4:21

Mo mwane paine aana pulitaa ni lei-lei kire ko haꞌamauꞌorarue loꞌu liutaa, taꞌe lae-lae kire ko si heꞌi toliꞌaasirerue loꞌu hunie kirerue ke lae. Aana e aasa hunie kire kei leirerue aana kire lio saie uri mwala ko lae peꞌi lahea God oto haahie mei ola nge e raune.

Palonga 5:13

na ahutana mwala kire ko meꞌu ni uure peꞌire, taꞌe kire ko lae-lahera mola.

Palonga 6:3

Oto mo mwane, kei lae oto i diana liutaa hunie omu ke lio hilisie nga hiu mwane aamiu nge omu saie uri kire saenanau liutaa na kire honu aana Liꞌoa Maaꞌi hunie melu ke niie mei esunge ngeena hunire.

Uusu-uusu A Pol Hurula'aa Hunie Mo Rom 3:8

Mala uri erenga ikire ke toꞌohuu, haꞌalaa e diana huni unue loꞌu uuri, “Kie ke talei deu taꞌewau mola hunie mo ola diana ke rau.” Ngaeta mwala kire ko ere aaelasieu taane na kire ko unue uri ineu ni no ko unue mo ola urine. !Taꞌe haꞌike! Eeronga mola ni ngeena, na e oodo taane mola hunie a God ke si haꞌaloire.

2 Korinit 1:18

Maholo no ko unue, “Iau,” no ko neꞌisae oto toꞌohuu huni esuie urine, na nou saꞌa talei unue mola “Haꞌike” mai puri. Mala a God ko ere-ere toꞌohuu oto tarau, ineu noꞌone no ko ere toꞌohuu,

2 Korinit 11:21

Oto no ko masa huni unue uri e toꞌohuu taane uri nou kaꞌa sada ike peꞌire. Nou kaꞌa sada ike peꞌire aana leune, aena aana nou kaꞌa sai neꞌisae mouteꞌi ike huni da nga mei ola urine aamiu. Taꞌe mala mo iini nge kire ko neꞌisae mouteꞌi huni ere toohaꞌinire, nge ineu na nou neꞌisae mouteꞌi huni ere toohaꞌi noꞌone urine, maꞌalana erenga ngeena ke rongo mala erenga mo iini e pweu.

2 Korinit 12:16

Omu saie taane mola uri nou kaꞌa haꞌahiꞌeiꞌomu ike, wa ne ke toolea nga mei ola mwaaniꞌomu. Taꞌe maꞌalana e urine, nga mo iini eemiu ko unue ue uri nou pweloꞌomu mola aani eeronga hunie uri ne ke toolea mo toꞌoha iꞌomu.

2 Korinit 4:2

Melu ko tarohaꞌinie a Kraes mola aana mo tolahai ola diana, na melu toliꞌaasie oto taꞌena nga tolahai ola aaela huni tarohaꞌinie. Melu kaꞌa tarohaꞌinie ike a Kraes aana mo tolahai ola e kaꞌa malisi, wa aana mo tolahai ola mumuni, wa aana mo tolahai ola nge ko esuie masanga. Melu kaꞌa haꞌa-olaa ike nga mo iini aani eeronga, na melu kaꞌa sai huꞌisie ike walana God. !Haꞌike oto ooꞌoo! Taꞌe melu ko lae peꞌi unu tahangaꞌinie mola walaimolinge haliꞌite i maana God, hunie ahutana mwala kire ke lio saie uri melu ko ere toꞌohuu.

1 Tesalonaeka 2:3

Oto omu sai kohie mola uri melu kaꞌa haꞌa-olaꞌomu ike aani loꞌongaꞌinge takalo, wa aani eeronga, wa aani pwelonga.

1 Timoti 3:7

Taꞌena nga naꞌohai mwane haahie soihaadaꞌinge ke haro neꞌie iinoni diana, hule aana mwala poꞌoi sinaha mwaanie soihaadaꞌinge ikire noꞌone kire ke ere diana i sulie. Ke urine oto mwaanie mwala kire siho aana, na mwaanie e pola mola peꞌie pwanu a Pwelu Eero-eero.

1 Timoti 4:10

Aana kolu esu aꞌailaꞌa mola aana kolu tohungei hiiwalaimoli oto aana God Mau-meuriꞌe, nge e sai haꞌa-uurie taꞌena nga iinoni, na kei haꞌa-uurikie mo iini kie hiiwalaimoli aana.

Hibru 13:13

Huilume ngeena ko haꞌamalaa mo Haꞌatolanga a Moses, na e malisine kie ke iisitaa mwaanie tolaha ni lulu i sulilana mo Haꞌatolanga a Mosis nge kie iiꞌo kaꞌu aana i naꞌo, na kie ke lae i saana uunu-olanga ikie, a Jisas Kraes. Na mwaanie kie maꞌuteꞌinie mwala kire ko haꞌamwasi aaka mala mwala kire haꞌamwasi keꞌu aana a Jisas.

1 Pita 4:14

Oto mala uri mwala ko haꞌasapesaluꞌaꞌomu i tehulaꞌana omu ko lulu i sulie a Kraes, omu ke ile-ilenimwaꞌe mola haahie. Omu ke ilenimwaꞌe mola aena aana mei tolahai sapesalunge i tehulaꞌana a Kraes nge ko haataꞌinie uri Liꞌoa Maaꞌi a God e iiꞌo oto aamiu toꞌohuu na kei haro niie manikuluꞌanga huniꞌomu.

3 Jon 1:12

Oto o ke peꞌie a Demitrias maholo kei hule wau i seemiu, aana ahutana mwala ko meni unue uri ingeie mwane diana, na walu ola ko esuiꞌi e oodotaꞌi na ko haataꞌinie uri e toꞌohuu oto. Ineu na nou unue noꞌone urine, na iꞌoe, o saie mola no ko ere toꞌohuu.

Haataꞌinge 3:9

Omu saie taane mo iini aana pulitaa a Pwelu Eero-eero nge kire ko unue uri ikire oto mo iini a God e saetoꞌo aada. !Taꞌe haꞌike! Kire ko eero mola. !Omu ke rongo kaꞌu! Ne kei haro dau rarahire hunie kire ke lae mai pouruuru i naꞌomiu. Nge kire ke si saie uri iꞌomu oto nou saetoꞌo aamiu liutaa.