2 Korinit 6:5 - Tataroha Diana

⁵ Mwala kire rapusiꞌemeelu oto, na kire neꞌiꞌemeelu oto i laona nume ni hoꞌo, na kire maaola-ola peꞌi waeliꞌemeelu oto. Taꞌe maꞌalana e urine melu ko haꞌaweoꞌemeelu oto mola aani tarohaꞌinilana a Jisas taraureꞌi, hule aana nga maꞌahunge wa ngaunge na haꞌike loꞌu.

2 Korinit 6:5 ပူးပေါင်းရင်းမြစ်များ

Matiu 14:10

Oto e lae i nume ni hoꞌo huni lama mousie pwaune a Jon.

Matiu 14:3

A Herod e ere urine aena aana a Jon Loto Maaꞌi e mae oto. Na laladonga i sulie maelana a Jon e lae uuri. Holaꞌinaꞌo, keni satana a Herodias ingeie huꞌe a Pilip mwane aasine a Herod. Taꞌe lae-lae a Herod ko heꞌi toolea loꞌu a huꞌena mwaanie a Pilip aasine. Oto a Jon Loto Maaꞌi e unu-unue hunie a Herod uuri, “Aana Haꞌatolanga a Mosis, e kaꞌa adona ike uri hunie o ke toꞌo aana loꞌu a Herodias aena aana ingeie huꞌe a Pilip aasimu.” Oto a Herod e si unue kire ke tapolie a Jon Loto Maaꞌi na kire ke pwasue aani iieli heu na kire ke neꞌie i nume ni hoꞌo.

Matiu 9:15

A Jisas e aalamire uuri, “?Mo malahune a poro haalu kire kei saehuu uri taa na kire ko ngeu-ngeu ue aana ngauhe ni haꞌarurunge na a poro haalu e iiꞌo ue peꞌire? Taꞌe kei hule aana hai dinge nge kire kei toolea poro haalu mwaanire, nge kire ke si oolongau taane.”

Palonga 13:3

Oto i purine oolongaunge na aarengaꞌinge kire si haꞌamaaꞌire aana nimada, na kire uusungeꞌinirerue oto huni esu nana.

Palonga 14:19

Oto lae-lae i purine nga maholo e kele tewa, ngaeta mo mwane ni Jiu uure mwaanie huilume i Aekoniam na huilume i Antiok aana poꞌo ni henue i Pisidia kire hule mai, na kire ko haꞌa-olaa mwala ni Listra ngeena uri kire ke uure honosie e ro hurulaꞌaa. Na kire ko uuꞌie a Pol aani heu, na kire ko weꞌi ookea oto mwaanie huilume aana kire loꞌongaꞌinie uri e mae oto.

Palonga 14:23

Na i laona ahutana mo soihaadaꞌinge kirerue lio hilisie mo naꞌohai mwane huni naꞌoda. Na kirerue iiꞌo mola peꞌie oolongaunge na aarengaꞌinge talada, na kirerue toliꞌaasire mola hunie a Aalaha, iini nge kire hiiwalaimoli oto aana.

Palonga 17:5

Taꞌe mo rato ni Jiu kire ko tohungei heotaꞌinire, oto kire lai rurue mo iini hunge aana kira holo-holo amaa, kire ko si aehotaa maaola-olanga. Oto kire huru weu i nume ngaeta mwane satana a Jeson aana kire ko lio hunie a Pol na Saelas huni toolerarue i naꞌona mo rato ni mwane.

Palonga 20:31

Oto omu ke tohungei lio talamiu. Omu ke aamasitoꞌo aana mo haꞌapasulinge nge nou nii-niie huniꞌomu tarau, na nou sapesalu i suliꞌomu hunie e oolu helisi.

Palonga 23:10

Haꞌa-erenga ngeena e lae-lae na ko peine oto. Oto poro paine haahie sinolai ramo ni Rom ngeena ko maarara mwaanie kire horoꞌie a Pol, oto e uusungeꞌinie mo ramo ingeie hunie kire ke lai toolea a Pol mwaanie pulitaa ni lei-lei, na kire ke tola aalihoꞌi aana hunie leu nge mae ko oꞌoꞌo aana.

Palonga 23:35

ko si teꞌuri, “Mo mwane nge kire ko sare horoꞌiꞌo kire kei hule mai leu, nge ne ke si pwaarongo honosie mo ere-erenga iꞌomu.” Oto e si unue hunie mo ramo ingeie kire ke kakalie i laona nume paine ingeie nge a Herod e asuie holaꞌinaꞌo.

Palonga 24:27

Oto lae-lae, purine e ro halisi e mango, a Posias Festas ko oolisie a Filiks aana ko neꞌi Aalaha Paine oto haahie poꞌo ni henue ngeena. Na aena aana a Filiks ko sare dau hunie mo Jiu ke ilenimwaꞌe mola haahie, oto e unue mola uri a Pol ke iiꞌo ue i laona nume ni hoꞌo.

Palonga 26:10

Na nga taa nge nou esuie taꞌau i Jerusalem ni ngeena. Nou toolea nanamanga mwaanie mo naꞌohai pris huni neꞌie hungelana mo iini maaꞌi i laona nume ni hoꞌo. Na maholo leilada e lae hunie maenga, ineu noꞌone nou unue uri e malisine kire ke mae.

Palonga 26:29

Oto a Pol ko teꞌuri, “Maꞌalana kele maholoi sato e oꞌoruꞌe wa ke tewa loꞌu, taꞌe no ko aare-aarea God hunie mwala nge omu ko pwaarongo hunieu siꞌiri omu ke mani sada peꞌieu. Taꞌe hoꞌosilemiu aani iieli heu haꞌalaa nge nou sereꞌinie ke rau eemiu.”

Palonga 28:30

Na a Pol e iiꞌo hunie e ro halisi heꞌileku aana nume nge ko holi-holi haahie ngeena. E tolakonie taꞌena nga iini ko sare lae mai leesie,

Palonga 5:18

Oto kire lai tapolire, na kire si lai neꞌire i laona nume ni hoꞌo.

1 Korinit 15:10

Taꞌe aana niinge ni hahuꞌana manata-diananga a God e lae hunieu mone, no ko oꞌoꞌo urine ue ie. Na manata-diananga a God hunieu e kaꞌa waetaꞌi ike taane mola mwaakule, aana nou lae peꞌi esu oto hiitoꞌo loꞌu liutaa aada mo hurulaꞌaa. Taꞌe nou kaꞌa asuie ike taane tohuku, aana niinge a God mone ko peꞌieu huni esuie leune urine.

1 Korinit 4:11

Iꞌemeelu, mwala e lio mwai-mweisiꞌemeelu, taꞌe iꞌomu nge mwala e leesiꞌomu mala mo aalaha. Oto lae mai hule siꞌiri, melu ko tohungei maesie oto hiolonga, na melu ko maesie oto inunge, na melu kaꞌa hoꞌo-hoꞌosie oto nga mei sala diana. Mwala ko seuniꞌemeelu, na melu kaꞌa toꞌo aana ike nga leu ni iiꞌo aana.

1 Korinit 7:5

Maholo iini o haꞌaruru peꞌie ko sare maꞌahu peꞌiꞌo, o ke suꞌuri sereꞌi loꞌu. More sai maꞌahu oopa-oopa taane aana nga mo maholo, taꞌe more ko meni mwaꞌe-mwaꞌe huni oopa urine haꞌalaa. Na more ke oopa urine mola hunie more ke iiꞌo aani aarengaꞌinge hunie nga kele maholo. Oto more ke si heꞌi maꞌa-maꞌahu tararuru loꞌu, mwaanie a Satan e malaahongamoreꞌi aana e aasa hunie more ke kinetaꞌinie sapemoreꞌi hunie nga maholo tewa.

2 Korinit 11:27

Nou iiꞌo mola aani weonga, na nou oodoie mo aasanga oto hunge aena aana asunge nana Kraes. Mo maholo oto hunge asunge ngeena ko haapilingaꞌa haahieu hule aana nga maholo ni maꞌahunge na haꞌike loꞌu. Mo maholo hunge nou hiolo na nou maarou, na ngaeta mo dinge nga kele mei ngeulaa ne ke hikana na haꞌike loꞌu. Mo maholo hunge no ko maꞌahu mola mala iiola, na aana mo maholo hunge no ko maesie mola mamaꞌudi aana wawai e paine, na nou kaꞌa toꞌo aana ike nga mei ola ni eeluhieu aana.

Epesas 3:1

Aena mei olana, nge ineu a Pol nou iiꞌo oto i nume ni hoꞌo ie, aena aana ineu iinoni a Jisas Kraes na nou esu talamiu mo iini nge iꞌomu nga mo Jiu haꞌike.

Pilipae 1:13

Aana ahutana mo ramo nge kire ko kakakali i leu aana nume paine a inemauri, na ahutana mwala kire iiꞌo i leu, kire mani saie uri nou iiꞌo i nume ni hoꞌo aena aana ineu koni-konihe a Kraes.

1 Tesalonaeka 2:9

Maeni eesiku maaꞌi, nou saie uri omu ko aama-aamasitoꞌo taane aana weonga iꞌemeelu aana melu esu susue rodo na aatowaa mwaanie melu haꞌahiꞌeie nga iini eemiu maholo melu lae-laeliwala aana Tataroha Diana a God namiu.

1 Timoti 4:10

Aana kolu esu aꞌailaꞌa mola aana kolu tohungei hiiwalaimoli oto aana God Mau-meuriꞌe, nge e sai haꞌa-uurie taꞌena nga iinoni, na kei haꞌa-uurikie mo iini kie hiiwalaimoli aana.

2 Timoti 1:8

Oto aena ngeena o ke suꞌuri masa ni houleꞌinie a Jisas Kraes oodoie mwala. Na o ke suꞌuri masa honosieu i sulie uri nou iiꞌo i nume ni hoꞌo haahie asunge nana. Taꞌe o ke hele maꞌutaꞌa mola aana nanamanga a God, na o ke mwaꞌe-mwaꞌe mola ni sapesalu aana o ko tarohaꞌinie Tataroha Diana a Jisas mala ineu.

2 Timoti 2:9

Na i tehulaꞌana Tataroha Diana ngeena mola nge hoꞌosileku e lae aani iieliheu ie. Taꞌe haꞌa-uusulinge a God nga walo hoꞌo-hoꞌo haꞌike aana.

2 Timoti 4:5

Taꞌe iꞌoe oto o ke loꞌo-loꞌongaꞌi diana tarau, na o ke uure aꞌailaꞌa mola maꞌalana uri o ko lae oodoie loꞌu aasanga. O ke lae taraꞌasi mola peꞌie tarohaꞌinilana Tataroha Diana, na o ke asuie toꞌohuu mei esunge a God e niie huniꞌo ngeena.

Hibru 11:36

Ngaeta mo iini aada, mo maelonga ikire ko lae peꞌi haꞌamwasi mola aada na peꞌi repusilada. Na ngaeta mo iini aada, mo maelonga ikire kire pwasure aani iieliheu na kire aasire i laona mo nume ni hoꞌo.

Hibru 13:17

Omu ke totola i sulie mo naꞌohai mwane aana soihaadaꞌinge iꞌomu peꞌi mwaꞌe-mwaꞌenga i sulie walada, aana ikire ni kire ko lio i sulie maurihaꞌamiu. Na a God ke iꞌie asunge ikire. Oto omu ke tola i sulire hunie kire ke asu ni ilenimwaꞌenga aana mei esunge ngeena, na mwaanie kire asu mola peꞌie saehuunge. Aana mala uri asunge ngeena kei hiꞌe hiitoꞌo hunire aana omu kaꞌa peꞌire, nge e saꞌa peꞌiꞌomu oto ooꞌoo.

Hibru 13:23

Na saeku uri omu ke saie uri aasikaelu a Timoti kire haꞌa-iisitaangaꞌinie oto mwaanie nume ni hoꞌo. Na mala uri ko hule aaku lau-leu, nge mere kei meni lae oto wau huni leesiꞌomu.

Haataꞌinge 2:10

Mwaanie omu meꞌu-meꞌuteꞌinie nga mei ola aana walu ola nge karaꞌinie oto kire kei reu eemiu ngeena. !Omu ke rongo kaꞌu! A Pwelu Eero-eero kei malaahongamiu na kei aasie ngaeta mo iini eemiu i laona nume ni hoꞌo, na taungeꞌinilemiu kei lae mola i sulie aawalai hei dinge haahuu. Omu ke hele susuleꞌi mola aaku lai hule aana maenga, oto ne kei niie huniꞌomu rorodara ni meurihe.