2 Korinit 1:12 - Tataroha Diana

¹² Maeni eesiku, manataku e taha mola aana nou saie uri melu kaꞌa eeroa ike nga iini aana nga maholo, taꞌe melu ko lulu i sulie mola oodo-oodonga nge a God e saetoꞌo aana. Walu ola melu ko euꞌesuiꞌi e uure mola aana hahuꞌana manata-diananga a God, na melu kaꞌa asuie ike nga mei ola i sulie saenanaunge ni iinoni. Tolahameelu e diana oto urine tarau peꞌie ahutana mo iinoni, na oto liutaa maholo melu oꞌoꞌo peꞌiꞌomu.

2 Korinit 1:12 ပူးပေါင်းရင်းမြစ်များ

Palonga 23:1

A Pol e toꞌomaaie pulitaa ni lei-lei oto ko teꞌuri, “Maeni eesiku ni Israel, manataku e tahanie taane mola iiꞌonga ineu i naꞌona God lae mai hule siꞌiri.”

Palonga 24:16

Na no ko deu aahonga tarau hunie manataku ke rereꞌa i naꞌona God na i naꞌona mo iinoni.

Uusu-uusu A Pol Hurula'aa Hunie Mo Rom 9:1

Taꞌe ngaeta mei ola ko da uri no ko tohungei saehuu loꞌu liutaa, aana mwala ineu mo Jiu kire iiꞌo oto loosie maenga huu. Ineu iinoni a Kraes na a Liꞌoa Maaꞌi ko ere haꞌa-oaie uri manataku e taha mola. Oto no ko ere toꞌohuu ni ie, na nou kaꞌa eero ike aana no ko unue uri salunge ineu ngeena kaꞌa mou-mou ike mwaanieu. Na hule aana saeku uri haꞌaloileku ke lae oolisire hunie kire ke lae mai meuri huu oolisieu, haꞌalaa ke diana. Maꞌalana ne ke oopa mwaanie a Kraes oolisire, nge e diana mola aaku aana no ko tohungei aamasire, aana ikire oto mo tohungei iinoni ineu, na mwala oto aana uluhe ineu.

1 Korinit 1:17

A Kraes e kaꞌa uusungeꞌinieu ike mola huni loo-loto maaꞌi aana mwala, taꞌe huni laeliwala aana Tataroha Diana. Na e kaꞌa ike huni laeliwala mola aana mo wala diana mala mo iini e saenanau huni haꞌa-olaa mwala, taꞌe mola i sulie a Kraes, mwaanie maenga a Jisas i lengine poꞌu-poꞌu e totowai mola.

1 Korinit 12:8

Aana e taꞌa-taꞌa Liꞌoa Maaꞌi ngeena mola ni ko niie nanamanga hunie ngaeta mwala huni unu tahangaꞌinie mo wala ni saenanaunge, na ko niie noꞌone hunie ngaeta mwala tolaha ni sai-olanga.

1 Korinit 15:10

Taꞌe aana niinge ni hahuꞌana manata-diananga a God e lae hunieu mone, no ko oꞌoꞌo urine ue ie. Na manata-diananga a God hunieu e kaꞌa waetaꞌi ike taane mola mwaakule, aana nou lae peꞌi esu oto hiitoꞌo loꞌu liutaa aada mo hurulaꞌaa. Taꞌe nou kaꞌa asuie ike taane tohuku, aana niinge a God mone ko peꞌieu huni esuie leune urine.

1 Korinit 2:13

Oto melu kaꞌa ere ike aana mo wala i sulie saenanaunge iinoni, taꞌe melu ko ere mola i sulie mo wala nge Liꞌoa Maaꞌi e haꞌa-uusuliꞌemeelu eeni, maholo melu ko ere luhesie walaimolinge i sulie a God hunie mo iini nge kire toꞌo aana Liꞌoa Maaꞌi.

1 Korinit 4:4

Manataku e taha mola aana nou kaꞌa saie ike nga mei takalonga ineu, taꞌe e kaꞌa loꞌongaꞌinie ike uri ineu mwane oodotaꞌi. Aalaha ikie mola ni kei leieu.

1 Korinit 5:8

Oto aena urinena, kie ke mani ilenimwaꞌe, taꞌe kie ke suꞌuri ilenimwaꞌe peꞌi tola i sulilana mo tolaha lalahuꞌe aana saewasunge na inu wei ni pweunge na dau roroꞌanga. !Haꞌike! Mo oorahaꞌaa urine kire urihana iis nge e sai sikihie mola walu ola. Taꞌe ikie, kie taꞌaasie oto walu ola urine, na kie ko ilenimwaꞌe mola peꞌi saemanola na peꞌie walaimolinge.

2 Korinit 1:17

Saꞌa mola omu ko loꞌo-loꞌongaꞌinie uri no ko eero wa no ko ere-ere mwaakule mola, aena aana nou kaꞌa lae ike i sulie oalaꞌinge ineu ngeena. !Taꞌe haꞌike! Ineu, nou kaꞌa asuie ike mo oalaꞌinge mala mo iinoni ni welumalau ko euꞌesuiꞌi. Ineu nou kaꞌa sai unue ike, “Iau, ne kei teꞌurine” maholo no ko loꞌongaꞌinie, “Haꞌike, nou saꞌa teꞌurine ike.”

2 Korinit 11:3

Taꞌe no ko maarara, mwaanie nga mo iini e waelie manata-diananga iꞌomu hunie a Kraes na mei sae manola huni lulu i sulie. Na no ko maarara mwaanie e si urihana mola maholo mwaa e eeroa a Iv aana mo eeronga ingeie oto i naꞌo.

2 Korinit 2:17

Mo iini oto hunge ko lupweꞌi tarohaꞌinie walana God, taꞌe kire kaꞌa asu toꞌohuu ike, aena aana saeda mola hunie kire ke tari toꞌoha aana. Taꞌe iꞌemeelu, melu aaopa oto mwaanire aana melu ko tarohaꞌinie walana God aani sae manola peꞌie nanamanga a Kraes. Na melu saie uri a God nge e uusungeꞌiniꞌemeelu mala mo koni-konihe ingeie, na ko toꞌo-toꞌomaaie taane nga taa melu ko euꞌesuie.

2 Korinit 4:2

Melu ko tarohaꞌinie a Kraes mola aana mo tolahai ola diana, na melu toliꞌaasie oto taꞌena nga tolahai ola aaela huni tarohaꞌinie. Melu kaꞌa tarohaꞌinie ike a Kraes aana mo tolahai ola e kaꞌa malisi, wa aana mo tolahai ola mumuni, wa aana mo tolahai ola nge ko esuie masanga. Melu kaꞌa haꞌa-olaa ike nga mo iini aani eeronga, na melu kaꞌa sai huꞌisie ike walana God. !Haꞌike oto ooꞌoo! Taꞌe melu ko lae peꞌi unu tahangaꞌinie mola walaimolinge haliꞌite i maana God, hunie ahutana mwala kire ke lio saie uri melu ko ere toꞌohuu.

2 Korinit 8:8

Maholo no ko ere urine, nou kaꞌa neꞌie ike nga haꞌatolanga huniꞌomu. Taꞌe no ko ere urine mola aana nou leesie uri ngaeta mo soihaadaꞌinge kire ko tohungei mwaꞌe-mwaꞌe huni peꞌi-peꞌi, na mala uri omu ke peꞌi-peꞌi noꞌone urine, nge e haataꞌinie uri manata-diananga iꞌomu nga ola toꞌohuu taane.

Kalesia 6:4

Taꞌe nga iini ke lei-leie mola tolahana maraana. Mala uri tolahana ko diana aana asunge na iiꞌonga ingeie, nge ke sae-saemango mola haahie maraana, na e saꞌa loꞌongaꞌi oto hiitoꞌo ike aana haꞌasadangaꞌinilana tolahana ngaeta iinoni.

Epesas 6:14

Oto omu ke uure aakau. Omu ke hoꞌosie oto walaimolinge mala rorotoꞌoni iꞌomu, na omu ke toꞌoni oto haahiꞌomu aana oodo-oodonga mala toꞌoni ni oohotaa nge ko kinetaꞌinie sae.

Pilipae 1:10

No ko eitanaie a God urine hunie omu ke lio hilisie tohungei tala diana. Urine nge omu ke si iiꞌo rereꞌa na oodotaꞌi hule aana hai dinge nge a Kraes kei ooli loꞌu mei.

1 Tesalonaeka 2:10

Maholo melu oꞌoꞌo peꞌiꞌomu mo iini omu hiiwalaimoli, tolahameelu e diana, na e oodo, na e maaꞌi takoiꞌomu. Oto omu meni saie mola leune e toꞌohuu, na a God na e saie noꞌone urine.

1 Timoti 1:5

Aena aana nga taa no ko sare haꞌa-uusulire aana ngeena, nge mola hunie kire ke mana-manata diana hunire hailiu aani sae manola, na aani manatanga rereꞌa, na aani hiiwalaimolinge toꞌohuu.

Taetas 2:7

Na iꞌoe, Taetas, o ke haataꞌinie noꞌone mei meu-meuringe diana aani esuilana mo ola diana hunie kire ke haimaaniꞌo. Mwaanie o eero-eero aana maholo o ko haꞌa-uusuli, taꞌe o ke haꞌa-uusuli peꞌie saenanaunge hunie mwala ke haꞌamaꞌu noꞌone aamu.

Hibru 13:18

Omu ke aarea God talameelu, aena aana melu saetoꞌo aana mola uri melu ke auꞌesuie mola taꞌena nga mei ola e oodo. Melu sai diana aana uri melu kaꞌa dau huꞌisie ike nga mei ola aaela, na melu saetoꞌo aana uri manatameelu ke taha mola urine taraꞌasi.

Jemes 4:6

Taꞌe niinge aana hahuꞌana manata-diananga a God e paine liutaa aana aaelanga iinoni. Sulie e sai tola konie mo iini ko oonisae, oto mala mo Uusu-uusu Maaꞌi nge e unue uuri, A God e taꞌelaꞌi honosie mo iini kire ko toohaꞌinire, taꞌe e hahuꞌei manata diana hunie mo iini ko haꞌamwai-mweiꞌara. Provebs 3:34

1 Pita 3:16

Taꞌe omu ke aalamire aani sae maneko peꞌi haꞌamaꞌunge aada. Omu ke iiꞌo oodotaꞌi taraureꞌi hunie manatamiu ke taha mola. Urine mo iinoni nge kire ko ere-ere aaelasiꞌomu kire kei masa i sulie nga taa kire ko unu-unue ngeena, aena aana ahutana mwala kei leesie mo ola diana omu ko esuiꞌi aana omu ko lulu i sulie a Kraes.

1 Pita 3:21

Na haꞌa-uurilada ngeena, nga tolimaa aana haꞌa-uurilaka nge ko lae mai hunikie aana loto-maaꞌinge. Loto-maaꞌinge nge ko haꞌa-uurikie ngeena e kaꞌa neꞌie ike mei ola mola aana wai ko hoda aasie mo mada mwaanie sapeka, taꞌe kie ko loto maaꞌi oto toꞌohuu maholo kie haiholotaꞌinie hunie a God aani sae manola uri kie kei lulu i sulie oto aani norutoꞌonga aana. Na loto-maaꞌinge urine e toꞌo aana nanamanga huni haꞌa-uurikie aena aana a Jisas Kraes e taꞌelaꞌi eelihoꞌi mwaanie maenga.