1 Pita 3:16 - Tataroha Diana

¹⁶ Taꞌe omu ke aalamire aani sae maneko peꞌi haꞌamaꞌunge aada. Omu ke iiꞌo oodotaꞌi taraureꞌi hunie manatamiu ke taha mola. Urine mo iinoni nge kire ko ere-ere aaelasiꞌomu kire kei masa i sulie nga taa kire ko unu-unue ngeena, aena aana ahutana mwala kei leesie mo ola diana omu ko esuiꞌi aana omu ko lulu i sulie a Kraes.

1 Pita 3:16 ပူးပေါင်းရင်းမြစ်များ

Matiu 5:11

“Oto iꞌomu na mwala kei teungeꞌiniꞌomu noꞌone urine, na kire kei ere aaelasiꞌomu, na kire kei pwelu wala eero-eero noꞌone i lengimiu urine, aena aana omu ko lulu i sulieu, taꞌe maꞌalana e urine omu ke ile-ilenimwaꞌe mola.

Palonga 24:16

Na no ko deu aahonga tarau hunie manataku ke rereꞌa i naꞌona God na i naꞌona mo iinoni.

Palonga 28:22

Na melu ko tohungei sare rongoa loꞌongaꞌinge iꞌoe sulie mwala aana taꞌena nga leu kire ko tohungei ere aaelasie hiiwalaimolinge aaopa ngeena.”

Uusu-uusu A Pol Hurula'aa Hunie Mo Rom 9:1

Taꞌe ngaeta mei ola ko da uri no ko tohungei saehuu loꞌu liutaa, aana mwala ineu mo Jiu kire iiꞌo oto loosie maenga huu. Ineu iinoni a Kraes na a Liꞌoa Maaꞌi ko ere haꞌa-oaie uri manataku e taha mola. Oto no ko ere toꞌohuu ni ie, na nou kaꞌa eero ike aana no ko unue uri salunge ineu ngeena kaꞌa mou-mou ike mwaanieu. Na hule aana saeku uri haꞌaloileku ke lae oolisire hunie kire ke lae mai meuri huu oolisieu, haꞌalaa ke diana. Maꞌalana ne ke oopa mwaanie a Kraes oolisire, nge e diana mola aaku aana no ko tohungei aamasire, aana ikire oto mo tohungei iinoni ineu, na mwala oto aana uluhe ineu.

2 Korinit 1:12

Maeni eesiku, manataku e taha mola aana nou saie uri melu kaꞌa eeroa ike nga iini aana nga maholo, taꞌe melu ko lulu i sulie mola oodo-oodonga nge a God e saetoꞌo aana. Walu ola melu ko euꞌesuiꞌi e uure mola aana hahuꞌana manata-diananga a God, na melu kaꞌa asuie ike nga mei ola i sulie saenanaunge ni iinoni. Tolahameelu e diana oto urine tarau peꞌie ahutana mo iinoni, na oto liutaa maholo melu oꞌoꞌo peꞌiꞌomu.

2 Korinit 4:2

Melu ko tarohaꞌinie a Kraes mola aana mo tolahai ola diana, na melu toliꞌaasie oto taꞌena nga tolahai ola aaela huni tarohaꞌinie. Melu kaꞌa tarohaꞌinie ike a Kraes aana mo tolahai ola e kaꞌa malisi, wa aana mo tolahai ola mumuni, wa aana mo tolahai ola nge ko esuie masanga. Melu kaꞌa haꞌa-olaa ike nga mo iini aani eeronga, na melu kaꞌa sai huꞌisie ike walana God. !Haꞌike oto ooꞌoo! Taꞌe melu ko lae peꞌi unu tahangaꞌinie mola walaimolinge haliꞌite i maana God, hunie ahutana mwala kire ke lio saie uri melu ko ere toꞌohuu.

1 Timoti 1:19

O ke hele susuleꞌi mola aana hiiwalaimolinge iꞌoe aana a Kraes, na o ke asuie mola tarau nga taa nge o manataꞌinie uri e oodotaꞌi. Ngaeta mwala kire ko talei deu huꞌisie mola nga taa nge manatada e unue hunire uri e oodotaꞌi, oto kire urihana mola haka e aape aana mwalo, na urine nge kire si tohungei waelie oto hiiwalaimolinge ikire.

1 Timoti 1:5

Aena aana nga taa no ko sare haꞌa-uusulire aana ngeena, nge mola hunie kire ke mana-manata diana hunire hailiu aani sae manola, na aani manatanga rereꞌa, na aani hiiwalaimolinge toꞌohuu.

2 Timoti 1:3

No ko aarengaꞌi talamu susue rodo na aatowaa, na no ko tohungei sae-saemango haahiꞌo suli maholo no ko aarea God ineu nge no ko esu nana peꞌie mei manatanga rereꞌa oto noꞌone mala mo weuweku kire auꞌesuie.

Taetas 2:8

Haꞌa-uusulinge iꞌoe ke tohungei oodo na ke diana mwaanie nga iini e ere aaelasie. O kei haꞌa-uusuli urine, nge mo maelonga ikie kire kei masa aena aana kire kei deu aasaie nga mei ola hunie kire ke ere aaelasikie aana.

Hibru 13:18

Omu ke aarea God talameelu, aena aana melu saetoꞌo aana mola uri melu ke auꞌesuie mola taꞌena nga mei ola e oodo. Melu sai diana aana uri melu kaꞌa dau huꞌisie ike nga mei ola aaela, na melu saetoꞌo aana uri manatameelu ke taha mola urine taraꞌasi.

Hibru 9:14

!Taꞌe apune a Kraes e nanama loꞌu liutaa! Aana nanamanga a Liꞌoa Maaꞌi nge e iiꞌo huu oto tarau, a Kraes e niie maurihaꞌana maraana hunie a God mala nga uunu-olanga e oodotaꞌi. Na apune ko hoda rereꞌa aana manataka, hunie kie ke toliꞌaasie mo tolahai ola aaela nge kie sai maesiꞌi, na hunie kie ke asu nana God Mau-meuriꞌe.

1 Pita 2:12

Oto omu ke lio-lio talamiu i matolana mo iinoni ni welumalau aana kire ko sare haꞌa-haꞌapeliꞌomu haahie mo ola hunge. Taꞌe omu ke iiꞌo oodotaꞌi mola tarau hunie kire ke leesie tolahamiu e oodotaꞌi. Omu ke teteꞌurine hunie maholo aasanga kei hite aada, ikire noꞌone kire ke si hiiwalaimoli, na kire ke soi haꞌamanikuluꞌaa a God haahiꞌomu.

1 Pita 2:15

Aana a God e saetoꞌo aana omu ke asuie mo ola e diana na e oodotaꞌi, aana urine omu sai uure honosie mo erenga hero-heroꞌa mwala ko talei unuꞌi mola aena aana kire kaꞌa saie nga mei ola diana.

1 Pita 2:19

Mala uri kire ko haꞌaloiꞌomu mola mwaakule na omu kaꞌa dau aaelasie nga mei ola, taꞌe omu ko iiꞌo rako mola aena aana omu ko loꞌongaꞌinie a God, nge a God kei haꞌadianaꞌaꞌomu taane haahie.

1 Pita 3:21

Na haꞌa-uurilada ngeena, nga tolimaa aana haꞌa-uurilaka nge ko lae mai hunikie aana loto-maaꞌinge. Loto-maaꞌinge nge ko haꞌa-uurikie ngeena e kaꞌa neꞌie ike mei ola mola aana wai ko hoda aasie mo mada mwaanie sapeka, taꞌe kie ko loto maaꞌi oto toꞌohuu maholo kie haiholotaꞌinie hunie a God aani sae manola uri kie kei lulu i sulie oto aani norutoꞌonga aana. Na loto-maaꞌinge urine e toꞌo aana nanamanga huni haꞌa-uurikie aena aana a Jisas Kraes e taꞌelaꞌi eelihoꞌi mwaanie maenga.

1 Pita 4:4

Taꞌe maholo ienini mo malahumiu oto i naꞌo kire ko tohungei pangataꞌiniꞌomu aana omu kaꞌa sare lae loꞌu peꞌire huni deu i sulie mo tolahai ola aaela ngeena. Oto kire ko ere tataaꞌiniꞌomu oto.