1 Pita 1:5 - Tataroha Diana

⁵ Omu hiiwalaimoli oto aana God, na ingeie ni ko lio i suli diana aamiu oto aana nanamanga ingeie. Ke lio i suliꞌomu lai hule aana dinge ooreta, maholo nge a God kei haataꞌinie hunie walumalau uri ingeie ni ko haꞌa-uuriꞌomu.

1 Pita 1:5 ပူးပေါင်းရင်းမြစ်များ

Tataroha Diana I Sulie A Jisas Kraes Nge A Jon E Uusue 12:48

Nga mei ola huni leie mo iinoni e iiꞌo taane. Mo iini kire kaꞌa sare hiiwalaimoli eeku, na kire kaꞌa sare rongo hunie walaku, nge mo wala nge no ko unu-unuꞌi ngeena, kire ke si lei mae aana mwala urine aana dinge ooreta.

Tataroha Diana I Sulie A Jisas Kraes Nge A Jon E Uusue 17:15

Nou kaꞌa sukaa ike uri o ke taꞌaasire mwaanie walumalau, taꞌe hunie o ke kinetaꞌinire mwaanie iini tataꞌala, a Pwelu Eero-eero.

Tataroha Diana I Sulie A Jisas Kraes Nge A Jon E Uusue 4:14

Taꞌe iini nge ko inu aana mei wei nge ne kei niie ana, e saꞌa maarou loꞌu. Mei wei nou niie ana ngeena kei neꞌi huulaa mauri i lalo aana, na kei niie maurihe huu hunie.”

Tataroha Diana I Sulie A Jisas Kraes Nge A Jon E Uusue 5:24

“No ko unue oto toꞌohuu huniꞌomu uri iini ko rongoa walaku na ko hiiwalaimoli aana iini e uusungeꞌinieu mei, iinoni ngeena e hele aana oto maurihe huu eena, na leilana e saꞌa roroꞌa ni lae ike loꞌu. Iini urine e pwani liu oto mwaanie maenga na e sili oto i laona maurihe.

Uusu-uusu A Pol Hurula'aa Hunie Mo Rom 11:20

Leune e toꞌohuu taane, taꞌe a God e hali aasiꞌi aena aana kire kaꞌa hiiwalaimoli ike. Na iꞌomu oto, omu iiꞌo aana ai diana ngeena mola i sulie omu hiiwalaimoli. Oto mwaanie omu too-toohaꞌiniꞌomu haahie leune, taꞌe omu ke lio talamiu mola.

Uusu-uusu A Pol Hurula'aa Hunie Mo Rom 8:18

Nou sai diana aana uri walu ola nge kie ko sapesalu eeni aana maholo ienini, walu ola mwaakule mola ni ngeena, aana kie ko loꞌongaꞌinie tohungei mei menikuluꞌanga nge a God e loohaꞌinie naka.

1 Korinit 1:21

Oto aana a God e asuie mone i sulie saenanaunge ingeie, mwala aana walumalau ie kire dau aasaie uri kire kei haꞌa-uurire maraada i sulie saenanaunge ikire. Na e lae mola urine aana saena a God mola huni haꞌa-uurie iinoni aana ola kire unue nga mei saenanaunge haꞌike aana, nge hiiwalaimolinge aana laeliwalanga i sulie a Kraes.

2 Korinit 1:24

Iau, e toꞌohuu oto aana melu ko sare asu loko-loko mola peꞌiꞌomu hunie omu ke ilenimwaꞌe, na melu kaꞌa sare paine ike haahiꞌomu huni deu rarahiꞌomu hunie omu ke hiiwalaimoli, aana melu saie uri omu uure maꞌutaꞌa oto aana hiiwalaimolinge aana God.

Kalesia 2:20

Na ineu haꞌike ni nou meuri ienini, taꞌe a Kraes ni e iiꞌo na e mauri i lalo aaku. Mauringe ineu aana walumalau ienini, ola nou toꞌo aana mola i sulie nou hiiwalaimoli aana Kalena God, iini e manata diana hunieu, na e toliꞌaasie maraana hunie ke mae honotaku.

Epesas 2:8

Aena aana maholo kie hiiwalaimoli aana a Jisas, a God mone e haꞌa-uurikie, na e asuie mola urine aena aana a God ko ilenimwaꞌe huni deu diana aaka maꞌalana kie kaꞌa malisine nga mei ola diana mwaanie.

Epesas 3:17

na hunie a Kraes ke iiꞌo susu i laona manatamiu aani hiiwalaimolinge aana. No ko eitanai talamiu uri manata-diananga a Kraes huniꞌomu ke neꞌi imi-imine mauringe iꞌomu hunie omu ke uure maꞌutaꞌa.

Pilipae 1:6

Na nou norutoꞌo uri a God nge e aehotaa mei esunge diana i laona maurihaꞌamiu, kei lae peꞌi esu taraꞌasi oto urine i lalo aamiu, lai hule aana hai dinge a Jisas Kraes kei ooli loꞌu mei.

Pilipae 4:7

Oto hanuelamanga a God nge nga iini e saꞌa neꞌisae talihana, ke si kakalie saemiu na mo loꞌongaꞌinge iꞌomu i lalo aana Kraes Jisas.

2 Timoti 3:15

O sai diana aana kaꞌu oto mo Uusu-uusu Maaꞌi na hule aana o neꞌi mwela ue. Na mo haꞌa-uusulinge aana kire sai peꞌikie aani loꞌongaꞌinge diana na aani hiiwalaimolinge aana a Jisas Kraes hunie uri a God ke haꞌa-uurikie.

Taetas 2:13

Na kie ko maaꞌoohi susutoꞌo mola hunie hai dinge nge mei ola e diana oto liutaa na e tohungei menikuluꞌe kei reu, hai dinge nge kie hiiwalaimoli uri hahuꞌana God ikie a Jisas Kraes kei haro ooli loꞌu mei aana. Ingeie oto a Haꞌa-uuritaka

Hibru 6:12

Mwaanie omu lalawa ni esu, taꞌe saeku uri omu ke uusulie mo iini kire hiiwalaimoli aana a God oto wau i naꞌo, aana kire iiꞌo peꞌi maaꞌoohinge susutoꞌo oto mola, nge kire si helesie nga taa nge a God e haiholotaꞌi huni niie hunire.

Hibru 9:28

Na urine noꞌone, a Kraes e toliꞌaasie maurihaꞌana mola hautaꞌai hunie ke mae mala nga uunu-olanga aana ko helesie haꞌaletehinge haahie mo oorahaꞌaa mo iinoni hunge. Na a Kraes kei heꞌi ruana lae loꞌu mei, taꞌe aana maholo nge ko lae mai ngeena, e saꞌa lae ike mai huni mae honotana mo oorahaꞌaa ikie loꞌu. !Haꞌike! Taꞌe kei lae mai huni toolea mai maurihe huu nana mwala kire ko maaꞌoohie.

1 Pita 1:13

Oto i tehulaꞌana walu ola ngeena, nge omu ke dau aakau eemiu maraamiu huni esuie mo ola diana, na omu ke kinetaꞌinie tolahamiu mwaanie aaelanga. Na omu ke tohungei norutoꞌo mola aana God, na maaꞌoohi-susutoꞌonga iꞌomu ke maꞌutaꞌa i lengine niinge diana nge a God kei niie huniꞌomu aana maholo a Jisas Kraes kei ooli loꞌu mei.

1 Pita 4:13

E diana uri hunie omu ke ile-ilenimwaꞌe mola, aana omu ko sapesalu oto noꞌone mala a Kraes e sapesalu keꞌu. Aena leune omu kei ilenimwaꞌe noꞌone aana maholo a Kraes kei lae mai peꞌie manikuluhaꞌana God.

1 Pita 5:1

Oto no ko sare unue ngaeta mei wala ni haꞌananaunge huniꞌomu mo naꞌohai mwane aana soihaadaꞌinge. Ineu ngaeta naꞌohai mwane aana soihaadaꞌinge noꞌone mala iꞌomu, na hule aana nou sai ere haꞌawalaimoliꞌaa uri Tataroha Diana i sulie a Kraes e toꞌohuu aana ineu maraaku nou leesie kaꞌu sapesalunge a Kraes. Na nou saie uri ineu noꞌone ne kei toꞌo aana manikuluꞌanga a God aana maholo a Kraes kei ooli loꞌu mei.

2 Pita 1:3

A God e niie taꞌe-taꞌena nga ola e ado hunikie hunie kie ke malisine iiꞌonga oodotaꞌi oto mala e saetoꞌo aana. Nanamanga a God e da ahutana walu ola ngeena hunikie aana e soikie mai i saana hunie kie ke tohungei sai diana aana, na hunie kie ke toꞌo aana noꞌone manikuluhaꞌana na mauringe diana ingeie.

1 Jon 3:2

Iau maeni malahuku, kie neꞌi mwela oto a God, na kie kaꞌa saie ue uri a God kei oolisikie loꞌu uri taa taꞌau i Lengi. Taꞌe kie saie taane oto uri maholo a Kraes kei ooli loꞌu mei, kie kei hei-oolisi mala ingeie, aana kie kei leesie tohungana manikuluhaꞌana.

Jiud 1:1

Saediananga mwaanieu a Jiud, koni-konihe a Jisas Kraes, na aasine a Jemes. No ko uusu-uusu ie huniꞌomu mo iini nge a God e soiꞌomu mei i saana. A God Mamaꞌa e tohungei manata diana huniꞌomu na omu iiꞌo oto i lalo aana hai kinetaꞌinge a Jisas Kraes.

Jiud 1:24

Oto kie ke haꞌamanikuluꞌaa iini e nanama na e sai kakalikie mwaanie kie domu i laona oorahaꞌaa. E sai kinetaꞌinikie mwaanie kie dau aaelasie nga mei ola, na kei toolekie aani ilenimwaꞌenga oto paine i laona manikuluhaꞌana.